NATUDIA idia tubu daekau lalonai, “Iehova ena matahakani bona sisiba amo idia umui hadibaia” totona, Ruma Bese Ena Tomadiho umui karaia be namo. (Efe. 6:⁠4) Bema oi be tama o sina ta, oi diba natu maragidia be idia hesiku haraga. Dahaka oi karaia diba idia hesiku haraga lasi totona? Mani tama sina haida ese idia karaia gaudia ita herevalaia.

California, U.S.A., ai ia noho tama ta ladana George ia gwau: “Emai natudia idia maragi neganai, dala idauidau ai emai famili stadi ai karaia dainai, idia be stadi negana idia moalelaia. Nega haida Lauegu Baibel Sivarai Bukana ai ia noho sivarai ta ai duahia bona ena drama ai karaia. Drama kohudia hegeregere tuari kaia, itotohi, bosea bona kohu ma haida ai karaia. Danu, Baibel gadara haida ai karaia, hegeregere ta be henanadai ia henia bona ma haida ese idia tahua ia be daika ia herevalaia. Pepa dekenai Baibel henanadai haida ai torea bona ai ta ta be unai henanadai edia haere ai tahua. Ma danu, ai gaukara hebou Baibel ese ia herevalaia gauna ta ai karaia totona, hegeregere Noa ena lagatoi, o Baibel negadiai idia vara gaudia edia deit o time line ai karaia. Nega haida Baibel sivaraina ta o Baibel negadiai ia noho tauna ta ena laulau ai torea. Hari, ai karaia noho gauna ta be Efeso 6:​11-17 ese ia herevalaia tuari dabua ena laulau bona ena kahana ta ta edia anina ai torea. Unai dala idauidau ai gaukaralaia dainai emai ruma bese tomadiho negana ai moalelaia.”

Michigan, U.S.A., ai ia noho sina ta ladana Debi ia gwau: “Emai natuna kekeni ena mauri lagani be 3 neganai, ia ura lasi Baibel sivaraidia ia kamonai. Dina ta Lauegu Baibel Sivarai Bukana amo Isako bona Rebeka edia sivarai lau duahia lalonai, doli rua lau gaukaralaia Isako bona Rebeka idia herevahereva dalana lau hahedinaraia totona. Lau itaia ia kamonai namonamo! Hua haida lalonai, unai doli rua lau gaukaralaia Baibel sivaraidia ese idia gwauraia taudia edia hereva lau hahedinaraia totona. Baibel sivaraina ta ai duahia murinai, emai natuna be gadara gaudia idauidau o kohu ma haida ia tahua ai duahia sivaraina ena drama do ai karaia totona. Hegeregere, tamaka ena boksi ta bona varo kakakakana ta ai gaukaralaia Rahaba ena ruma ia laulaulaia totona. Bona mita 1.5 gaigai koikoina ta be mopu auna ta dekenai ai gegea Numera 21:​4-9 ese ia herevalaia gaigaina ia laulaulaia totona. Unai gau ibounai be baege badana ta lalonai ai udaia. Ai moale badina emai natuna kekeni be unai baege lalonai idia noho gaudia ia gaukaralaia sibona ena Baibel sivarai drama ia karaia totona!”

Oibe, natuna hadibaia karana be mai ena hekwarahi, to namona be nega bona dala idauidau ai oi hadibadia, unai amo Iehova idia hesiai henia diba. Ruma bese ena tomadiho be nega namona dala idauidau ai emu natudia oi hadibaia totona. Ita diba unai ese anina namona ia havaraia diba!