Neyi Mushaku Maana Mukuhetelamu Nankashi

KUDIFUKULA KWACHISAKA kwalema nankashi neyi munakukeña anyanenu akuli “nakuyibabesha nikuyikonkomwena mudi Mwanta.” (Efwes. 6:4) Neyi mudi anvwali, muneluki nenu anyana ashimbulaña wanyi nakuzeya. Munateli kuyikwasha ñahi kulonda ashiku maana kuyuma yimunakudiza? Talenu chelawu anvwali amakwawu.

George, wakuCalifornia, U.S.A., wahosheli nindi, “Henohu anyanetu achidi atwansi, ami niñodami twazatileña nañovu hakwila nawu kudiza Bayibolu nachisaka kwikaleña kwakuzañalesha. Mpinji yikwawu twavwalileña neyi chavwalileñawu antu ashimunawu muBayibolu nikuhema chisela chinesekani nansañu yitukutaña muMukanda Wami waMpanji Jamu Bayibolu. Twatuñileña yitwamu, mpoku jatubali, nkuunyi, yimpaya, niyuma yikwawu. Twahemeneña cheñi yisela yamuBayibolu yakwila nawu ‘yaminyi’ nawa twehwileña malwihu apela niakala. Kwadiña yuma yitwelileña hamu, yidi neyi kutuña watu waNowa hela kutanjika yuma yashimunawu muBayibolu kwesekeja nampinji muyamwekeneneña. Mpinji yikwawu twaleñeleña antu nikushimuna nsañu yamuBayibolu. Chayinu mpinji, tunakutoñojoka kuleña chitwa chakuspiritu chashimunawu haAefwesesa 6:11-17, nawa wejima wetu twatela kulumbulula mwatalisha yikunku yikwawu yanichi chitwa. Kuzatisha iyi njila kunatuleñeli tudiluñisheña kudifukula kwachisaka.”

Mama yawantu wejina daDebi wakumusumba waMichigan, U.S.A., wahosheli nindi: “Ami ninfumwami chatukalilileña kuwana njila yakukwashilamu mwanetu wamumbanda kusha maana kuyuma yitwadizileña hadiñayi nayaaka yisatu. Ifuku dimu twatañileña nsañu yaIsaka naRebeka kufuma muMukanda Wami waMpanji Jamu Bayibolu, nanoneli tudoli tuyedi nakutachika kutuzatisha muniyi nsañu, nakumwekesha chahanjekeleñawu awa antu ayedi. Watachikili kutiyilila hama. Mutukweji twalondeleluhu, itu tudoli tuyedi twatuzatishileña kwimenaku antu amboka-mboka ashimunawu muBayibolu. Chitwataña nsañu, mwanetu wayileña nakukeña tudoli mwitala hela chuma chidi chejima chakuzatisha munsañu yitunakutaña. Twazañaleli nankashi neyi muntu wunawani iheta dalema wuseya! Kachikasha mwekalaña nkwabilu kwakukasila kachibeli kachinana dikekalili neyi itala daRahaba kwadiña mwonji wuchinana. Kakapela kakuhemesha kadiñi namamita 1.5 kakasililuwu kumutondu wakakombu dikemeneneñaku kapela wawuneñu washimunawu hamukanda waKuchinda 21:4-9. Yuma yeniyi yitwazatishileña twayihembeleleña mufuba weneni. Chatuzañalesheleña, muloña mwanetu washakamineña mukapeka kakunookela nakusandujola ‘mufuba mwahembeleleñayi yuma yakuzatisha hakudiza mpanji yamuBayibolu.’ Twazañaleleña nankashi hakumona chadiña nakuhemayi yisela yampanji yamuBayibolu nkawindi.”

Kukulisha anyana kwakala, nawa chakeñekaña kuyidizisha chikupu hakwila nawu ekali nampwila yakumuzatila Yehova. Ilaña kudifukula kwachisaka kukuyikwasha mwikaleña nampinji yakuyidizisha yuma yikwawu yakuspiritu. Chakadi nikujina, neyi mushaku maana mukuhetelamu nankashi!