Paunaia te Tautaanga!

KA ANOANO maataia te Akamorianga a te Ngutuare e te apii Pipiria i te utuutu anga i te tamariki ma te ‘apii ia ratou i te ako a Iehova.’ (Ephe. 6:4) Inara me e metua koe, kua kite koe e ka iu vave ua te tamariki. Ka akapeea ra koe i te akamou mai anga i to ratou manako? Akamanako ana i ta tetai au metua i rave.

“Te rikiriki ake anga te tamariki,” i karanga ai a George, i California, Marike, “e tauta ana maua ko taku vaine kia mataora ua te apii Pipiria a te pamiri. Tetai au taime e akamanea ana matou pouroa ei aronga i roto i te Pipiria e oti kua akatutu mai i tetai papaanga, ia matou e tatau ra mei roto i te My Book of Bible Stories. E maani katoa ana matou i tetai au apinga—te koke, te tepeta, kete, e te au mea mei te reira te tu. E akatutu katoa ana matou i te au tarekareka Pipiria ‘kimi e koai au,’ e te rave i tetai kanga Pipiria tei tataia te au uianga ngata tukeke ki runga i te papa. E oti e au angaanga tetai, mei te maani anga i tetai akaraanga no te araka o Noa, me kore i te akanoo anga i te tuatau no te au tupuanga i roto i te Pipiria. Tetai au taime e toro ana matou i tetai au tutu e akatutu mai ana matou i te au tangata me kore i te au tua i roto i te Pipiria. Teia taime te parani nei matou i tetai angaanga toro tutu no runga i te rakei pae vaerua e akatakaia ra i roto ia Ephesia 6:11-17, e oti ka akamarama matou tataki tai e eaa te aiteanga o tetai tuanga. Riro teia au ravenga ei tauturu ia matou kia mataora i ta matou apii a te pamiri.”

Ko Debi, e mama no Michigan i Marike, karanga ai e: “E ngata ana ia maua ko taku tane i te akamou mai i te manako o ta maua tamaine i te taime e toru rai ona mataiti. Inara i tetai ra iaku e tatau maata ra i te tua o Isaaka raua ko Rebeka i roto i te My Book of Bible Stories, kua mou mai au e rua pepe rakau e kua taangaanga i te reira ei akatutu mai i tetai tua. Teianei e akarongo meitaki mai ana aia! Te au marama tei aru mai, kua riro mai taua nga pepe rakau ei akatutu mai i te au tangata tuketuke i roto i te Pipiria. Me oti ia maua i te tatau i tetai tua, ka kimi ta maua tamaine i te au apinga kangakanga i roto i te are, me kore i tetai atu au apinga ka rauka kia taangaangaia i te akatutu mai i te tua. Mei te kimi apinga oko maata rai! Riro mai te pia aao tamaka e te ripine muramura ei are no Rahaba ma te taura kutekute. Te ovi kangakanga e [1.5 mita] tei takaiia ki runga i te pu purumu, tau meitaki no te ovi veo i roto ia Numero 21:4-9. E vaoo ana matou i te au apinga ki roto i te kiri kie. Rekareka tikai maua, e noo ana ta maua tamaine ki roto i te pia noonoo i te eru aere na roto i tana ‘kiri tua Pipiria.’ Mataora tikai i te kite iaia e akatutu maira i te au tua na roto i te tu tana uaorai i manako!”

Kare te utuutu tamariki i te mea ngoie, kare e rava ua te apiianga i te au epetoma, e maata atu te ka anoanoia i te apii anga ia ratou kia tavini ia Iehova. Inara ka rauka i te akariro i te akamorianga a te ngutuare e te apii Pipiria ei tumuanga no tetai atu ikuikuanga pae vaerua. Kare ekoko e ka paunaia te tautaanga!