E Aogā Taumafaiga!

E TĀUA tele le tapuaʻiga ma le suʻesuʻega a aiga, ina ia tausia aʻe ai tamaiti “i aʻoaʻiga ma apoapoaʻiga a Ieova.” (Efe. 6:4) Afai o oe o se matua, ia e iloa e fiugofie tamaiti laiti. E faapefea ona e faauaʻi mai i latou? Seʻi vaai i mea na faia e nisi mātua.

Ua faapea mai Siaosi mai Kalefonia i Amerika: “A o laiti la ma fanau, sa ma taumafai ma laʻu avā e fesuisuiaʻi mataupu e faia ai le suʻesuʻega, ina ia fiafia ai i latou.” I nisi taimi, e fai ai o matou ofu e pei o tagata i tala o le Tusi Paia, ma faatino se tala mai i Laʻu Tusi o Tala o le Tusi Paia. E matou te faia foʻi mea e pei o pelu, tootoo, ato, ma isi mea faapena. E matou te faia foʻi taaloga faale-Tusi Paia, ‘e mate mai po o ai aʻu’ ma le taaloga e tusia ai fesili i pepa malō, o isi e faigofie a o isi e faigatā. E matou te fauina foʻi se faatusa o le vaa o Noa, pe e tusia se faasologa o mea na tutupu o loo i le Tusi Paia. I nisi taimi, e matou te tusia ai ata o tagata po o ni tala o loo i le Tusi Paia. I le taimi nei, o loo matou tusiaina ata o le ofutau faaleagaga lea o loo taʻua i le Efeso 6:11-17, e tofu i matou ma le vaega o le ofutau e faamatala, ma lona uiga. Ua aogā nei mea iā i matou e fiafia ai pea i la matou suʻesuʻega faaleaiga.”

Ua taʻua e Tepora, o se tinā mai i Michigan, i Amerika: “Sa faigatā iā i maʻua ma laʻu tane ona faauaʻi mai le loto o la ma tama teine i le tolu o ona tausaga. I se tasi aso, a o faitau le tala iā Isaako ma Repeka mai i Laʻu Tusi o Tala o le Tusi Paia, na ou faaaogā ni pepe meataalo se lua e fai ai le talanoaga. Na vave ona uaʻi mai o ia i upu o loo fai atu! I masina na sosoo ai, na faaaogā ai nei pepe meataalo e avea ma tagata eseese o tala o le Tusi Paia. Pe a uma ona ma faitau se tala, ona suʻe solo lea e la ma tama ni meataalo po o nisi mea e mafai ona faatino ai se tala. E pei o loo saʻili se oloa tāua! Na faaaogā se atigi pusa ma se lipine mūmū e fai ma fale o Raava. Sa faaaogā se gata meataalo e lima futu le umi (1.5 m), e taʻaiʻai i le ʻau o se salu e fai ma gata apamemea lea e taʻua i le Numera 21:4-9. E teu uma na mea i se ato telē. E ese lo ma fiafia i le vāai atu o saofaʻi la ma tama e suʻe mea o i totonu o lana ato telē. E fiafia foʻi i le vāai atu o faatino e ia tala i lana lava auala!”

E lē faigofie le tausia aʻe o fanau, ma e lē lava suʻesuʻega o loo fai i vaiaso taʻitasi e tāmau ai i o latou loto le faanaunauga e auauna iā Ieova. Ae o le Tapuaʻiga a le Aiga ma le suʻesuʻeina o le Tusi Paia, o se faavae mo isi aʻoaʻoga faale-Tusi Paia. E mautinoa la, e aogā taumafaiga e fai le Tapuaʻiga a le Aiga!