Laprouvasyon Bondye i anmenn ver lavi eternel

“Ou menm O Zeova, ou pou beni sa enn ki drwat. Parey en gran boukliye, avek laprouvasyon ou pou antour zot.”​—PS. 5:12.

1, 2. Ki Eliya ti demann sa vev Tsarfat pour fer e ki lasirans i ti donn li?

SA MADANM ek son garson, ensi ki profet Bondye ti vreman lafen. Letan ki sa vev Tsarfat ti pe met pare pour alim dife pour kwi manze, profet Eliya ti demann li en pe delo ek dipen. Sa madanm ti pare pour donn li en keksoz pour bwar, me pour manze i ti annan zis “en ptigin lafarin dan en gran potis ek en ptigin delwil dan en pti potis.” I ti santi ki i ti napa ase manze pour partaz avek sa profet e sanmenm ki i ti dir li.​—1 Rwa. 17:8-12.

² Eliya ti ensiste an dizan: “Avek sa ki ou annan, fer en pti gato ron pour mwan avan, e ou devret anmenn pour mwan, e apre ou kapab fer en keksoz pour ou ek ou garson. Akoz la sa ki Zeova Bondye Izrael in dir, ‘Lafarin dan sa gran potis pa pou fini, e i pou toultan annan delwil dan sa pti potis.’”​—1 Rwa. 17:13, 14.

3. Ki desizyon enportan nou annan pour fer?

³ Sa vev ti annan en gro desizyon pour pran apard ki zis deside si i ti pare pour partaz sa dernyen ptigin manze ki i ti annan. Eski i ti annan konfyans ki Zeova ti pou sov li ek son garson, oubyen i ti pou plifere met keksoz materyel premye olye ganny laprouvasyon ek lanmitye Bondye? Nou tou nou annan menm desizyon pour fer. Eski nou pou pli enterese pour ganny laprouvasyon Zeova olye rod sekirite lo plan materyel? Nou annan tou rezon pour annan konfyans dan Bondye e servi li. Nou bezwen fer serten keksoz si nou anvi rod e ganny son laprouvasyon.

‘Ou merite resevwar ladorasyon’

4. Akoz Zeova i merit nou ladorasyon?

⁴ Zeova i annan sa drwa pour ekspekte ki bann imen i servi li dan en fason akseptab. En group son bann serviter dan lesyel ti dakor avek sa laverite, kan zot ti dir zot tou ansanm: “Nou Senyer, [Zeova] nou Bondye, ou merite resevwar laglwar, loner ek pisans, parski ou’n  kree tou keksoz, e se par ou lavolonte ki zot egziste e ki zot in ganny kree.” (Rev. 4:11) Lefet ki i Kreater, Zeova i merite ganny nou ladorasyon.

5. Akoz lanmour Bondye i devret motiv nou pour servi li?

⁵ En lot rezon nou annan pour servi Zeova i akoz napa personn ki kontan nou parey li. Labib i dir ki “Bondye ti kree zonm dan son resanblans, dan resanblans Bondye i ti kree li. I ti kree zonm ek fanm.” (Zen. 1:27) Bondye in donn zonm sa liberte pour swazir, reflesir e pran bann desizyon. Zeova i Papa limanite akoz li ki’n donn nou lavi. (Lik 3:38) Parey en bon papa imen, i’n fer tou pour donn son bann garson ek fiy sa ki zot bezwen pour kapab apresye lavi. “I fer leve son soley” e “fer tonbe lapli,” pour ki nou plannet i prodwir nouritir fizik annabondans dan en zoli lanvironnman.​—Mat. 5:45.

6, 7. (a) Ki ditor Adan in koz tou son desandans? (b) Ki sakrifis Kris in fer pour tou sa bann ki anvi ganny laprouvasyon Bondye?

⁶ Zeova in osi sov nou avek move konsekans pese. Ler Adan ti fer pese, i ti vin zis parey en dimoun ki zwe larzan e ki vol larzan son fanmir pour kapab al zwe. Lefet ki i ti rebel kont Zeova, Adan ti priv son zanfan sa loportinite pour viv ere eternelman. Son legoizm in fer limanite vin lesklavaz lenperfeksyon, en met vreman kriyel. Alor, tou imen i tonm malad, santi latristes e fini par mor. Pour ki en lesklav i ganny libere, fodre en peyman i ganny fer, e Zeova in fer sa peyman pour ki nou kapab ganny libere avek sa bann move konsekans. (Lir Romen 5:21.) Pour azir an armoni avek lavolonte son Papa, Zezi Kri ti donn “son lavi konman pri pour liberasyon bokou dimoun.” (Mat. 20:28) Byento, bann ki annan laprouvasyon Bondye pou ganny tou benediksyon ki sa ranson ki’n ganny peye in fer posib.

⁷ Zeova, nou Kreater in fer plis ki nenport ki pour nou annan en lavi ere ki annan en bi. Si nou annan son laprouvasyon, nou pou kapab vwar ki mannyer i azir pour repar domaz ki laras imen pe eksperyanse. Zeova pou kontinyelman montre sakenn parmi nou ki mannyer i pou “rekonpans tou bann ki rod li.”​—Ebr. 11:6.

“Ou pep pou ofer zot lekor volonterman”

8. Ki leksperyans Izai i ansenny nou konsernan servi Bondye?

⁸ Pour annan laprouvasyon Bondye, nou bezwen byen servi nou liberte pour swazir. Zeova pa fors personn pour servi li. Dan letan Izai, I ti demande: “Lekel ki mon pou anvoye, e lekel ki pou ale pour nou?” Zeova ti demontre respe anver sa profet par les li fer son prop desizyon. Mazin satisfaksyon Izai kan i ti reponn: “La mon la! Anvoy mwan.”​—Iza. 6:8.

9, 10. (a) Avek ki latitid nou devret servi Bondye? (b) Akoz i byen pour nou servi Zeova avek tou nou leker?

⁹ Bann imen i lib pour servi Bondye ouswa pa servi li. Zeova i anvi ki nou servi li volonterman. (Lir Zozye 24:15. *) Nenport dimoun ki ador Bondye kontreker pa kapab fer li plezir, e i pa ni menm aksepte devosyon sa bann ki servi li zis pour fer plezir lezot imen. (Kol. 3:22) Si nou “ezite” pour ofer Bondye en servis sakre akoz nou pe les bann keksoz dan sa lemonn enterfer avek nou ladorasyon, nou pa pou ganny son laprouvasyon. (Egz. 22:29) Zeova i konnen ki i byen pour nou servi li avek tou nou leker. Moiz ti sipliy bann Izraelit pour swazir lavi “par kontan Zeova zot Bondye, par ekout son lavwa e par reste atase avek li.”​—Det. 30:19, 20.

¹⁰ Lerwa David dan letan lontan Izrael ti dir Zeova an santan: “Ou pep pou ofer zot lekor volonterman zour ou lafors militer. Avek labote  zot sentete, ou annan ou latroup zenn zan, parey laroze dan granmaten.” (Ps. 110:3) Sekirite finansyel ek detant i sa keksoz pli enportan pour bokou dimoun dan nou letan. Me, pour sa bann ki kontan Zeova, zot servis sakre i pli enportan ki tou lezot keksoz. Atraver sa devouman ki zot demontre ler zot pe pres sa bon nouvel, ou konpran kwa ki zot priyorite dan lavi. Zot annan konfyans total dan abilite ki Zeova i annan pour donn zot zot bann bezwen sak zour.​—Mat. 6:33, 34.

Bann sakrifis ki Bondye i aprouve

11. Ki byenfe bann Izraelit ti anvi gannyen ler zot ti ofer Zeova sakrifis?

¹¹ Dapre lalyans Lalwa, pep Bondye ti ofer li bann sakrifis akseptab pour ganny son laprouvasyon. Levitik 19:5 i dir: “Si zot devret fer en sakrifis konminyon pour Zeova, zot devret fer sa sakrifis pour ganny laprouvasyon Zeova.” Dan sa menm liv Labib nou lir: “E si zot devret fer en sakrifis remersiman pour Zeova, zot devret fer sa sakrifis pour ganny laprouvasyon Zeova.” (Lev. 22:29) Kan bann Izraelit ti ofer bann sakrifis zannimo ki ti akseptab lo lotel Zeova, sa lafimen ki i ti large ti anvoy “en loder agreab” pour sa vre Bondye. (Lev. 1:9, 13) I ti santi li soulaze e rekonforte par lafason ki son pep ti demontre lanmour anver li. (Zen. 8:21) Atraver sa bann laspe dan Lalwa, nou vwar en prensip ki aplik pour nou osi ozordi. Sa bann ki pe ofer Zeova bann sakrifis akseptab i ganny son laprouvasyon. Ki kalite sakrifis ki i aksepte? Annou egzamin de domenn dan lavi: Nou kondwit ek nou parol.

12. Ki pratik ki pou fer nou lekor en sakrifis ki pa akseptab devan Bondye?

¹² Dan son let pour bann Romen, zapot Pol ti ekrir: “Ofer zot lekor konman en sakrifis vivan, sen e agreab devan Bondye, ki ava en kilt ki fer li bokou plezir.” (Rom. 12:1) En dimoun ki anvi ganny laprouvasyon Bondye i devret kit son lekor prop devan li. Son lofrann ti pou napa valer si i ti sali son lekor avek bann pratik parey fim sigaret, sik taba, servi drog ouswa abiz lalkol. (2 Kor. 7:1) Deplis, vi ki “en dimoun ki livre li dan limoralite [seksyel] i fer pese kont son prop lekor,” nenport kalite kondwit imoral i annan, pou fer son sakrifis napa valer devan lizye Zeova. (1 Kor. 6:18) Pour arive fer plezir Bondye, en dimoun i devret ‘vin sen dan tou son kondwit.’​—1 Pyer 1:14-16.

13. Akoz i apropriye pour nou loue Zeova?

¹³ Nou parol i en lot sakrifis ki Zeova i kontan. Sa bann ki kontan Zeova i touzour koz byen lo li, ki swa an piblik oubyen an prive dan zot lakour. (Lir Psonm 34:1-3. *) Lir Psonm 148-150, e vwar konbyen fwa sa trwa psonm i ankouraz nou pour loue Zeova. Vreman alor, “louanz sorti kot bann ki drwat i  apropriye.” (Ps. 33:1) Zezi Kri, nou Legzanp, ti met lanfaz lo lenportans pour loue Bondye atraver predikasyon sa bon nouvel.​—Lik 4:18, 43, 44.

14, 15. Osea ti sipliy bann Izraelit pour ofer ki kalite sakrifis e ki reaksyon Zeova?

¹⁴ Ler nou pres avek devouman, sa i donn laprev ki nou kontan Zeova e nou anvi ganny son laprouvasyon. Par egzanp, egzamin lafason ki profet Osea ti sipliy bann Izraelit ki ti pe pratik fo ladorasyon e ti’n perdi laprouvasyon Bondye. (Ose. 13:1-3) Osea ti demann zot pour sipliye an dizan: “Ki ou [Zeova ou] pardonn fot; e aksepte sa ki bon, e an retour nou pou ofer bann zenn toro avek nou labous.”​—Ose. 14:1, 2.

¹⁵ Toro ti sa zannimo pli ser ki en Izraelit ti kapab ofer Zeova. Alor, “bann zenn toro avek nou labous” ti pe refer avek bann parol senser, ki ti’n ganny byen reflesir davans, pour loue sa vre Bondye. Ki mannyer Zeova ti azir anver sa bann ki ti fer bann sakrifis koumsa? I ti dir: “Mon pou kontan zot akoz mon anvi.” (Ose. 14:4) Bann dimoun ki pe ofer Zeova sa kalite sakrifis louanz ti ganny son pardon, son laprouvasyon ek son lanmitye.

16, 17. Kan lafwa dan Bondye i pous en dimoun pour pres sa bon nouvel, dan ki fason i loue Zeova?

¹⁶ Loue Zeova piblikman in touzour en laspe enportan dan vre ladorasyon. En psalmis ti kontan pour loue Bondye an piblik, ki i ti sipliy li an dizan: “Silvouple pran plezir dan sa lofrann volonter ki mon fer avek mon labous, O Zeova.” (Ps. 119:108) Ki pour dir dan nou letan? Ler Izai ti pe koz lo en gran lafoul dimoun dan nou letan, i ti profetize: “Zot pou anons louanz Zeova. . . .  [Zot kado] pou ganny laprouvasyon lo lotel [Bondye].” (Iza. 60:6, 7) Pour akonplir sa profesi, plizyer milyon dimoun pe ‘rann glwar Bondye, setadir, toultan loue son non par zot labous.’​—Ebr. 13:15.

¹⁷ Me ou, eski ou pe ofer Bondye bann sakrifis ki fer li plezir? Si i pa leka, eski ou pou fer bann sanzman neseser e konmans loue Zeova piblikman? Kan ou lafwa i pous ou pour pres sa bon nouvel, ou lofrann pou “fer Zeova plis plezir ki en toro.” (Lir Psonm 69:30, 31. *) Reste asire ki loder ou sakrifis louanz pou arive ziska kot Zeova, e ou pou ganny son laprouvasyon. (Ezek. 20:41) Napa pli gran lazwa ou pou resanti ankor ki sa enn.

‘Zeova li menm pou beni sa enn ki drwat’

18, 19. (a) Ki pwennvi konsernan servi Bondye, bokou dimoun i annan konmela? (b) Ki pou arive si nou perdi laprouvasyon Bondye?

¹⁸ Dan nou letan, bokou dimoun i tonm lo menm konklizyon avek serten dan letan Malaki. Zot dir: “I pa vo lapenn servi Bondye, e ki byenfe i annan ki nou’n gard son lord?” (Mal. 3:14, An American Translation) Lefet ki zot les sa dezir pour ganny plis keksoz materyel kontrol zot, zot krwar ki i difisil pour plan Bondye reisi e ki son lalwa nepli aplikab. Pour zot, predikasyon i en gaspiyaz letan e i tant pour fer bann dimoun fristre.

 ¹⁹ Sa kalite latitid ti devlope depi dan zarden Edenn. Satan li menm ki ti persyad Ev pour rezet vre valer sa lavi merveye ki Zeova ti’n donn li e osi perdi Son laprouvasyon. Dan nou letan, Satan pe kontinyelman esey persyad bann dimoun pour krwar ki i pa vo lapenn fer lavolonte Bondye. Me, Ev ek son msye ti dekouver ki perdi laprouvasyon Bondye ti vedir perdi zot lavi. Sa bann ki konmela pe swiv zot move legzanp pou byento rekonnet sa menm realite.​—Zen. 3:1-7, 17-19.

20, 21. (a) Ki sa vev Tsarfat ti fer e ki i ti devenir? (b) Ki mannyer e akoz nou devret imit sa vev Tsarfat?

²⁰ Konpar diferans ant sa ki ti arive avek Adan ek Ev ek sa sityasyon ki nou ti mansyonnen o konmansman konsernan Eliya ek sa vev Tsarfat. Apre ki i ti’n tann parol ankourazan ki Eliya ti’n dir li, sa madanm ti konmans prepar sa dipen ron e i ti premyerman donn sa profet en morso dipen. Apre sa, Zeova ti akonplir son promes ki i ti’n fer atraver Eliya. Sa resi i dir: “Sa madanm ti kontinyen manze, li ansanm avek son fanmir ek Eliya, pour plizyer zour. Lafarin dan sa gran potis pa ti fini, e i ti toultan annan delwil dan sa pti potis, dapre parol ki Zeova ti’n dir atraver Eliya.”​—1 Rwa. 17:15, 16.

²¹ Sa vev Tsarfat ti fer en keksoz ki zis en pti ponnyen parmi sa bilyon dimoun ki egziste lo later i pare pour fer. I ti met tou son konfyans dan sa Bondye delivrans e I pa ti zanmen abandonn li. Sa resi ek lezot resi Labib i konfirmen ki nou devret annan konfyans dan Zeova. (Lir Zozye 21:43-45; 23:14. *) Leksperyans Temwen Zeova dan nou letan i donn plis laprev ankor ki i pa pou zanmen abandonn sa bann ki annan son laprouvasyon.​—Ps. 34:6, 7, 17-19. *

22. Akoz i enportan ki nou rod laprouvasyon Bondye san tarde?

²² Tre byento zour zizman Bondye pou ariv “lo tou zabitan later.” (Lik 21:34, 35) Personn pa pou kapab sov sa zour. Ni larises ouswa konfor materyel pa pou zanmen annan plis valer ki tann sa enn ki Bondye in apwent konman ziz dir: “Vini, zot ki mon Papa in beni! Vin erit Rwayonm ki’n ganny prepare pour zot.” (Mat. 25:34) Wi, ‘Zeova li menm pou beni sa enn ki drwat. Parey en gran boukliye, avek laprouvasyon i pou antour zot.’ (Ps. 5:12) Eski pa nou devret vreman rod laprouvasyon Bondye?

[Not anba lo paz]

Eski ou rapel?

• Akoz Zeova i merit ganny nou ladorasyon senser?

• Dan nou letan, ki kalite sakrifis Zeova i aksepte?

• Sa lekspresyon “zenn toro avek nou labous” i refer avek kwa, e akoz nou devret ofer sa kalite lofrann avek Zeova?

• Akoz nou devret rod laprouvasyon Bondye?

[Kestyon]

[Portre lo paz 19]

Ki desizyon profet Bondye ti plas devan en madanm pov e lafen?

[Portre lo paz 21]

Ki byenfe nou gannyen ler nou ofer sakrifis louanz avek Zeova?

[Portre lo paz 23]

Ou pa pou zanmen dezapwente si ou annan konfyans total dan Zeova