Jehová ñandeguerohorýramo jaikovéta opa ára g̃uarã

‘Nde ningo Ñandejára, rehovasáta pe hekopotĩvape, ha reñuãmbáta chupe reguerohory rupi.’ (SAL. 5:12, ÑÑB)

1, 2. Mbaʼépa ojerure Elías pe viúda Sareptayguápe, ha mbaʼépa opromete chupe?

PETEĨ viúda Sareptaygua imboriahumíva ha imemby iñembyahyieterei. Ha oñepyrũta javete ojatapy oñekosina hag̃ua oñemboja oúvo proféta Elías. Haʼe ningo iñembyahýi avei ha ojerure chupe y ha pán. Upémarõ pe viúda pyaʼe porã ogueru pe y, péro heʼi ndaikatumoʼãiha omeʼẽ chupe hoʼuvaʼerã. Mbaʼére piko? Haʼe ningo michĩmíntema oguereko ‘trígo kuʼi ha ijaséite katu opapotaitéma avei’ (1 Rey. 17:8-12, ÑÑB).

² Upéicharamo jepe proféta Elías heʼi jey chupe: ‘Ejapo raẽ peteĩ pán chéve g̃uarã ha eru chéve, ha upéi rejapóta ndéve ha ne membýpe g̃uarã. Jehová Israel Jára niko heʼi ndopamoʼãiha nde trígo kuʼi ni pe aséite’ (1 Rey. 17:13, 14).

3. Mbaʼe iñimportántevapa jadesidivaʼerã?

³ Tuichaiterei mbaʼe ningo pe viúda odesidivaʼerã. Ndahaʼeihína odesidítanteva omeʼẽtapa michĩmi pán Elíaspe. Haʼe ohechavaʼerã oñehaʼãtapa oĩ porã Ñandejárandi ha oñemoag̃ui hese, térãpa ojepyʼapýtante hemikotevẽre? Ojeroviátapa Jehová ikatutaha omeʼẽmbaite chupe oikotevẽva guive? Koʼág̃a rupi ñande avei jadesidivaʼerã peteĩ mbaʼe iñimportánteva: Ñañehaʼãtapa Jehová ñandeguerohory hag̃ua térãpa jaikótante umi mbaʼerepy rapykuéri? Añetehápe oĩ hetaiterei mbaʼe ñanemokyreʼỹva jajerovia ha jaservi hag̃ua Ñandejárape. Ha Jehová omombeʼu porã ñandéve mbaʼe mbaʼépa jajapovaʼerã ñandeguerohory hag̃ua.

 ‘Jehovápe añoite oñemombaʼeguasuvaʼerã’

4. Mbaʼérepa Jehovápe añoite ñamombaʼeguasuvaʼerã?

⁴ Jehová hína opa mbaʼe Apohare ha upévare ikatu heʼi ñandéve mbaʼéichapa jaservivaʼerã chupe. Umi hembiguái oĩva yvágape ohechauka ojejapovaʼerãha upéva heʼívo: ‘Ore Jára Jehová, ndéve añoite opavave nemombaʼeguasu ha nembotuichavaʼerã, nde haʼégui opa mbaʼe Apohare, ha nde reipotáguinte oĩ ha ojejapo opa mbaʼe’ (Rev. 4:11).

5. Mbaʼérepa avei ñamombaʼeguasuvaʼerã Jehovápe?

⁵ Mbaʼérepa avei ñamombaʼeguasuvaʼerã Jehovápe? Pe mborayhu haʼe ohechaukáva ñandéve ndaijojahái ha jahechakuaa upéva heta mbaʼépe. Ñepyrũrã la Biblia heʼi ‘Ñandejára ojapo hague kuimbaʼépe ijoguaháramo’ (Gén. 1:27). Avei oheja ñandete jadesidi mbaʼépa jajapóta. Ñandeapo rupi, haʼe hína ñande Ru, ha ojapoháicha peteĩ túva oporohayhúva, Ñandejára omeʼẽmbaite ñandéve ñaikotevẽva javyʼa hag̃ua. ‘Haʼe ningo oheja kuarahy ojope [...]; ha omongy’, upéicha rupi ikatu jahecha umi ñu hovyũ asýva ha heñói opaichagua hiʼupy (Mat. 5:45, NM; Luc. 3:38).

6, 7. a) Mbaʼe ivaívapa ñanderupyty Adán káusare? b) Jesús sakrifísio rupive, mbaʼépa ohupytýta umi oñehaʼãva oĩ porã Jehovándi?

⁶ Pe pekádo káusare jahasa hetaiterei mbaʼe ivaíva, péro Jehová ojapóma oñekotevẽva ñanemosãso hag̃ua. Opuʼãrõ guare Jehováre, Adán oipeʼa ñandehegui peteĩ mbaʼe ijojahaʼỹva: ndaikatuvéima jaiko vyʼápe opa ára g̃uarã. Upéicha ojogua peteĩ túvape omombopa reíva ipláta huegohápe ha ombohasa asýva ifamíliape. Adán opensa ijehénte ha ikáusare enterove yvypóra japyta pekádo rembiguáiramo, jaiko asy, ñanderasypa, ñandeahoʼi vyʼaʼỹ ha amo ipahápe ñamano. Ñaikotevẽte ningo peteĩ ñanemosãsovaʼerã! Péro jaikuaaháicha peteĩ tembiguái isãso hag̃ua ojepagamantevaʼerã hese. Ha Jehová ojapo upéva omboúvo Itaʼýra Jesucristo ko yvy ape ári (elee Romanos 5:21). Haʼe ‘omeʼẽ hekove opaga ha oguenohẽ hag̃ua yvyporakuérape pekádo poguýgui’ (Mat. 20:28, NM). Ojejapo rupi ko mbaʼe, koʼẽrõitéma umi tapicha oĩ porãva Jehovándi ikatúta oiko opa ára g̃uarã peteĩ hardín neporãvape.

⁷ Añetehápe Jehová omeʼẽmbaite opa mbaʼe ñaikotevẽva jaiko porã ha javyʼa hag̃ua. Ñaime porãramo hendive, amo gotyove ikatúta jahecha mbaʼéichapa oipeʼapaite opa mbaʼe ombohasa asýva yvyporakuérape. Ñandete voi jahechakuaáta haʼe ‘omyengovia porãha umi chupe ohekávape’ (Heb. 11:6, BNP).

‘Vyʼápe oñekuaveʼẽta ndéve’

8. Mbaʼépa jahechakuaa Isaías ehémplore?

⁸ Jehová nañandejopýi jaservi hag̃ua chupe, síno oipota ñandete jadesidi mbaʼépa jajapóta. Upéva jahechakuaa Isaías ehémplore. Peteĩ jey Ñandejára oporandu: ‘Mávapepa amondóta? Mávatapa ñane rembijokuái?’ Jehová ohechauka omombaʼeha iprofétape ohejávo odesidi mbaʼépa ojapóta. Oiméne Isaías ovyʼaitéraʼe ombohováivo chupe: “Ápe aime. Chejokuái chéve” (Isa. 6:8).

9, 10. a) Mbaʼéichapa jaservivaʼerã Jehovápe? b) Mbaʼérepa ñamombaʼeguasuvaʼerã Jehovápe ñane ánga rugua guive?

⁹ Enterove ikatu jadesidi ñamombaʼeguasútapa Ñandejárape térãpa nahániri. Péro Jehová oipota jaservi chupe ñande pyʼaite guive (elee Josué 24:15). Ni mbaʼevéicharõ nañandeguerohorymoʼãi jaservíramo chupe tova pukúpe térã ñaĩ porãséguinte ñande rapichakuéra renondépe (Col. 3:22). Avei jahejáramo umi mbaʼe ko mundopegua hoʼupa ñane tiémpo ha ñameʼẽ chupe  tembyréntema ndaikatumoʼãi ñaime porã hendive (Éxo. 22:29). Jehová oikuaa katuete ñasẽ porãtaha ñamombaʼeguasúrõ chupe ñane ánga rugua guive. Upévare voi Moisés omokyreʼỹ umi isrraelítape odesidi porã hag̃ua heʼívo: “Pehayhúke [Ñandejárape], [...] peneñeʼẽrendúke chupe ha ani pejei chugui” (Deu. 30:19, 20.)

¹⁰ Rréi David opuraheivaʼekue: ‘Ne retã oñemoĩta nde poguýpe, ha ijao ojajaipáva reheve, vyʼápe oñekuaveʼẽta ndéve g̃uarã. Koʼẽtĩ ruguaite guive ojajáita hikuái ysapýicha’ (Sal. 110:3, ÑÑB). Ko tiémpope heta hénte oiko pláta ha vyʼarã rapykuérinte. Péro umi ohayhúva Jehovápe ndaupeichaiete. Haʼekuéra omotenonde Ñandejára Rréino ha ojerovia haʼe omeʼẽtaha chupekuéra hemikotevẽ. Ohechauka hikuái upéva opredikávo kyreʼỹme pe marandu porã (Mat. 6:33, 34).

Mbaʼeichagua sakrifísiopa Ñandejára oguerohory?

11. Mbaʼérepa umi isrraelíta oikuaveʼẽ sakrifísio Jehovápe?

¹¹ Yma Israélpe umi hénte oikuaveʼẽ sakrifísio opyta porã hag̃ua Ñandejára renondépe. Pór ehémplo Levítico 19:5 heʼi umi isrraelíta ojapo hague ‘sakrifísio pyʼaguapy rehegua ombovyʼa hag̃ua’ Jehovápe. Ambue téysto heʼi avei omeʼẽ hague hikuái ‘sakrifísio oagradese hag̃ua’ ha péicha ‘ombovyʼa Ñandejárape’ (Lev. 22:29, ÑÑB). Umi isrraelíta oikuaveʼẽ jave peteĩ mymba oĩ porãva, pe hatatĩngue haʼete “hyakuã asýva Ñandejárape” g̃uarã (Lev. 1:9, 13). Jehová ipyʼarory ha oñeñandu porãiterei ohechávo mbaʼéichapa hembiguaikuéra ohayhu chupe (Gén. 8:21, nóta). Koʼã mbaʼe ohechauka ñandéve peteĩ mbaʼe iñimportantetereíva: Ñaime porã hag̃ua Jehovándi, tekotevẽ ñameʼẽ chupe umi sakrifísio haʼe oguerohorýva. Koʼág̃a jahechami mbaʼéichapa jaʼéva ha jajapóva rupive ikatu ñameʼẽ sakrifísio Ñandejárape.

12. Ndajapytavaiséiramo Ñandejárandi, mbaʼépa ndovaléi jajapo?

¹² Apóstol Pablo ohaivaʼekue umi kristiáno Romayguápe ‘Peñemoĩ Ñandejára renondépe, sakrifísio oikovéva, imarangatúva ha iporãvaramo’ (Rom. 12:1). Jaipotáramo Jehová ñandeguerohory, ñañehaʼãmbaitevaʼerã ani hag̃ua ñamongyʼa ñande rete. Katuete haʼe ñanemboykéta jaikóramo jaʼu rasa vevída, japita, ñanakea, jajedroga ha umícha (2 Cor. 7:1). La Biblia heʼi avei ‘umi ojeitýva tekovaípe ijehe voi ojapoha ivaíva’, upévare ñanderekokyʼáramo japyta vaíta Ñandejárandi (1 Cor. 6:18). Entéro oĩ porãséva Jehová ndive ‘imarangatuvaʼerã opa mbaʼépe’ (1 Ped. 1:14-16, BNP).

13. Mbaʼérepa ñamombaʼeguasuvaʼerã Jehovápe ñane ñeʼẽ rupive?

 ¹³ Jehová ovyʼaiterei avei ñamombaʼeguasúramo chupe ñane ñeʼẽ rupive. Añetehápe umi ohayhúva Ñandejárape akóinte oñeʼẽ porã hese mamo oĩháme (elee Salmo 34:1-3). Jaleéramo Salmos 148-150 jahechakuaáta hetaiterei vése ñanemokyreʼỹha jaguerohory hag̃ua Ñandejárape. Salmo 33:1 heʼi avei: “Omombaʼeguasuvaʼerã voínte chupe opa imarangatúva”. Jesús ohechauka iñimportantetereiha upéva omyerakuãvo pe marandu porã (Luc. 4:18, 43, 44).

14, 15. Mbaʼépa heʼi Oseas umi isrraelítape ojapo hag̃ua? Ha mbaʼéichapa ombohovái chupekuéra Jehová?

¹⁴ Kyreʼỹme japredikáramo jahechaukáta jahayhuha Jehovápe ha jaipotaha ñandeguerohory. Pór ehémplo, jahechami mbaʼépa oikovaʼekue Oseas tiémpope. Upérõ umi isrraelíta oñepyrũ omombaʼeguasu umi ñandejára guaʼúpe ha upévare Jehová omboyke chupekuéra (Ose. 13:1-3). Upémarõ Oseas heʼi umi héntepe: “Tapeho jevy Ñandejára rendápe ha peje chupe: ‘Eheja reíkena oréve ore rembiapo vaikue ha ehendu ore ñeʼẽ’” (Ose. 14:1, 2).

¹⁵ Mbaʼépa ojapo Jehová ohendúvo umi hénte ñemboʼe? Haʼe heʼi: “Ahayhúta chupekuéra” (Ose. 14:4). Upéva heʼise oñemoag̃uitaha hesekuéra, oheja reíta hembiapo vaikue ha oguerohorytaha chupekuéra.

16, 17. Mbaʼéichapa oñeñandu Jehová ohechávo umi opredikáva pe marandu porã?

¹⁶ Ymaite guive Ñandejára siervokuéra omombaʼeguasu chupe hapichakuéra renondépe. Pe salmístape g̃uarã iñimportantetereivaʼekue ko mbaʼe, upévare oñemboʼévo heʼi: “Ajerure ndéve che Ruete, toʼa porãite ndéve umi [sakrifísio] osẽva che jurúgui” (Sal. 119:108, ÑÑB). Mbaʼépa jaʼekuaa ñane tiémpore? Proféta Isaías heʼivaʼekue Jehová rembiguaikuérare: ‘Ombotuicháta Ñandejárape, vyʼapópe oikuaveʼẽta pe altárpe’ (Isa. 60:6, 7, ÑÑB). Koʼág̃a ñaiméma hetaiterei ‘ñamombaʼeguasúva Jehovápe ñamombeʼúvo héra’ ha péicha ñakumpli ko profesía (Heb. 13:15).

¹⁷ Ha nde, remombaʼeguasúpa Jehovápe ne ñeʼẽ rupive? Oiméramo nderejapói gueteri upéva, reñehaʼãtapa rejapo opa mbaʼe oñekotevẽva resẽma hag̃ua repredika? Upéicha rehechaukáta nde jerovia, ha umichagua sakrifísio ‘ombovyʼavéta Ñandejárape reikuaveʼẽ rangue chupe peteĩ tóro’ (elee Salmo 69:30, 31). Jehová katuete ndeguerohorýta ha umi mbaʼe reikuaveʼẽva haʼéta chupe g̃uarã ku “mbaʼe ryakuã porãicha” (Eze. 20:41). Ajépa revyʼaitéta upéicharõ!

‘Ñandejára ohovasáta pe hekopotĩvape’

18, 19. a) Mbaʼépa opensa heta hénte koʼág̃a rupi? b) Mbaʼépa oikóta ñanderehe ñamboykéramo Jehovápe?

¹⁸ Koʼág̃a rupi oĩ hetaiterei opensáva umi isrraelíta yma guare opensa haguéicha. Malaquías tiémpope oĩ umi heʼíva: “Jajapóramo Ñandejára heʼíva ndajahupytýi mbaʼeve. Mbaʼépa ñanohẽta jajapóramo haʼe oipotáva?” (Mal. 3:14) Umi oikóva mbaʼerepy rapykuéri ndojeroviái Jehová okumplitaha ipromesakuéra ha heʼi la Biblia ndaikatuveimaha  ñanepytyvõ koʼág̃a rupi. Haʼekuéra heʼi voi japerde reiha ñane tiémpo ñasẽvo japredika ha hiʼarive ñamongueraipamaha umi héntepe.

¹⁹ Hardín de Edénpe oĩmavaʼekue opensáva upéicha. Satanás ombotavýrõ guare Évape haʼete ku heʼíva chupe: Mbaʼépe piko ideprovécho ndéve reime porã Ñandejárandi? Haʼe ningo nomeʼẽi ndéve mbaʼeve ovalemíva! Ñane tiémpope avei Satanás ogueroviauka umi héntepe ndohupytymoʼãiha mbaʼeve iporãva ojapóramo Jehová rembipota. Péro jaikuaaháicha Adán ha Eva tuichaiterei ojavy omboykévo Ijapoharépe ha upeakuére omano. Ha koʼẽrõitéma avei oikóta upéicha enterove umi nomombaʼeguasúivare Ñandejárape (Gén. 3:1-7, 17-19).

20, 21. a) Mbaʼépa ojapo pe viúda Sareptaygua, ha mbaʼépa ohupyty upe haguére? b) Mbaʼérepa ñahaʼangavaʼerã chupe ha mbaʼéichapa jajapokuaa upéva?

²⁰ Pe viúda Sareptaygua katu ndojoguaiete ñande ru ha ñande sy ypykuépe. Mbaʼépa ojapo haʼe, Elías ojerurérõ guare chupe hoʼuvaʼerã? Pyaʼeterei oho ombojy pe pán ha ogueru pe profétape, jepe saʼieterei hembýta chupe. Ha Jehová okumpli oprometevaʼekue: ‘Haʼe, imemby ha Elías oguereko hembiʼurã heta árape g̃uarã. Ndopái pe trígo kuʼi ni pe aséite, heʼi haguéicha Ñandejára, Elías rupive’ (1 Rey. 17:15, 16).

²¹ Upe viúda ojapovaʼekue naentéroi ojapose. Haʼe ojerovia ipyʼaite guive Ñandejárare, ha Haʼe ndohejareíri chupe. La Bíbliape jatopa hetave ehémplo ohechaukáva ikatuha jajerovia Jehováre (elee Josué 21:43-45 ha 23:14). Koʼág̃ante voi heta testígo ohechakuaa mbaʼéichapa Jehová katuete oñangareko umi haʼe oguerohorývare (Sal. 34:6, 7, 17-19). *

22. Mbaʼérepa koʼág̃ama voi jakuʼevaʼerã Jehová ñandeguerohory hag̃ua?

²² Ñandejára ára guasu ‘ouvaʼerã opavave yvypóra ári’ ha upéva hiʼag̃uimbaitéma (Luc. 21:34, 35, NM). Pe ára og̃uahẽ vove mbaʼevépe ndaideprovechomoʼãi pláta ha mbaʼerepy. Upéva rangue, iporãvéta ñahendu pe Hués Ñandejára oiporavovaʼekuépe ág̃a heʼi vove: ‘Peju peẽ che Ru ohovasavaʼekue ha pereko pene mbaʼerã pe rréino ojepreparavaʼekue peẽme g̃uarã’ (Mat. 25:34, NM). Upérõ jahecháta mbaʼéichapa oñekumpli Salmo 5:12 heʼíva: ‘Nde ningo Ñandejára, rehovasáta pe hekopotĩvape, ha reñuãmbáta chupe reguerohory rupi’ (ÑÑB). Upévare koʼág̃ama voi jakuʼevaʼerã Jehová ñandeguerohory hag̃ua.

[Nóta]

Ñanemanduʼápa koʼã mbaʼére?

• Mbaʼérepa ñamombaʼeguasuvaʼerã Jehovápe ñane ánga rugua guive?

• Mbaʼeichagua sakrifísiopa ikatu ñameʼẽ Ñandejárape?

• Mbaʼérepa ñamombaʼeguasuvaʼerã Jehovápe ñane ñeʼẽ rupive?

• Mbaʼérepa jakuʼevaʼerã Jehová ñandeguerohory hag̃ua?

[Porandu ñahesaʼỹijóva]

[Nóta oĩva taʼanga ndive páhina 13]

Mbaʼépa ojerure Elías peteĩ kuñakarai imboriahúvape?

[Nóta oĩva taʼanga ndive páhina 15]

Mbaʼépa jahupytýta ñamombaʼeguasúramo Jehovápe ñane ñeʼẽ rupive?

[Nóta oĩva taʼanga ndive páhina 17]

Jajeroviáramo Jehováre nañambyasyichéne arakaʼeve