Kutambwila Wuselewa waNzambi Kwalombolaña Kuwumi Wahaya Nyaka

“Eyi wakamukoolekesha muntu waloña; eyi Yehova, wakamunyeñumwisha kwi-ndo nawuselewa weyi neyi chakumunyeñumwisha nankebu hohu.”—MAS. 5:12.

1, 2. Yumanyi Elija yamulombeliyi ntuluwa wakuZarefwati, nawa wamukanini nindidi?

 MAMA yawantu nimwanindi weyala afwili nzala, kaprofwetu waNzambi niyena wafwili nzala. Mumbanda wantuluwa wakuZarefwati chelili nanonojoli dehi tusonsu nindi yabutuli kesi, kaprofwetu Elija hakumulomba menji nidinkendi. Wakeñeleña kumwinka meji akunwa, ilaña wadiña hohu ‘natuwuña twakukwata muchikasa muchitayi nitumanji twanti muchipunda,’ twakudya yena nimwanindi. Dichi mumbanda watoñojokeli nindi hateleleli kumwinka kaprofwetu yakudyaku, nawa wamulejeli nindi yakudya yakumwinka kwosi.—1 Anya. 17:8-12.

² Elija watwalekeluhu nindi: “Sambilaku ntahi kuntuñila kadinkendi kami, wunleteli kunu, nkumininaku hiwakatuña keyi namwaneyi. Muloña Yehova, Nzambi yaIsarela, nahoshi dehi nindi, Muchitayi chawuña himwakamanaku, nimuchipunda chamanji himwakanoñaku, ndo nikwifuku damba kanokeshayi Yehova nvula hamaseki.”—1 Anya. 17:13, 14.

3. Chumanyi chalema chitwatela kufuukulahu?

³ Iwu mumbanda ntuluwa wateleleli kufuukulahu chachiwahi kubadika kutoñojoka hohu nindi wateleleli kuhana tuyakudya twantesha twasheliyi natu. Komana wateleleli kumukuhwelela Yehova nindi wakumuhandisha yena nimwanindi weyala, ntahindi wateleleli kutwamijaku yuma yakumujimba yakeñeleñayi kubadika kutambwila wuselewa nikukwata wubwambu naNzambi? Anetu nawa twatela kudihula lwihu lwolumu. Twatela kusha maana hakutambwila wuselewa waYehova ntahindi hakukeña maheta? Twatela kumukuhwelela Nzambi nikumukalakela. Nawa kudi njila jitwatela kulondela hakukeñakeña nikutambwila wuselewa windi.

 ‘Yeyi Itwatela Kudifukulaku’

4. Muloñadi chitwatela kudifukwila kudi Yehova?

⁴ Yehova wukweti wuswa wakwiluka nindi antu atela kumukalakela munjila yayiwahi. Izanvu dawambuñindi amwiwulu etejeleli hamu nawu: ‘Eyi Yehova, eyi Nzambi yetu, wunateli kutambula kulema nimpuhu niñovu, muloña yeyi waleñeli yuma yejima, nawa muloña wankeñelu yeyi dichi chiyekalilaku, dichayileñeleluwu.’ (Chim. 4:11) Twatela kudifukula kudi Yehova, muloña diyi Nleñi.

5. Muloñadi kumukeña Nzambi chikwatela kutusañumuna kulonda tumukalakeleña?

⁵ Cheñi twatela kumukalakela Yehova muloña wasweja kutukeña. Bayibolu yahosha nawu, “Nzambi yoleña muntu neyi chekalayi yomweni, chochekalayi Nzambi dichi chamuleñeliyi; wayileñeli niiyala nimumbanda.” (Kutach. 1:27) Antu akweti wuswa wakufuukulahu aweni neyi anakukeña kumukalakela Nzambi hela nehi. Yehova chatwinkeliyi wumi, wekalili Tata yetu. (Luka 3:38) Neyi chochelaña nvwali wamuwahi, waloñesha yuma yejima yakeñaña anyanindi awamayala niawambanda kulonda adiluñisheña muchihandilu. “Watuntwishaña itañwa dindi” nawa “wanokeshaña nvula,” kulonda Iseki disoñeña yakudya yayivulu mumpata yalubanji.—Mat. 5:45.

6, 7. (a) Kukalanyi kwaleteliyi Adama hadi anyanindi ejima? (b) Mulambu waKristu wakakuula ñahi antu akeñaña wuselewa waNzambi?

⁶ Yehova watukuula cheñi kuyuma yatama yafumaña kunshidi. Adama chavulumwiniyi, wekalili neyi muntu wahemaña yisela yalwisu, weyilaña chisaka chindi mali kulonda yahemeña yisela yalwisu. Adama chadikañiliyi naYehova, weyilili anyanindi kuchiñeja kwakushakama haya nyaka mumuzañalu. Lwisu lwindi lwaleñeleli muchidi wamuntu kwikala muwuduñu wanshidi. Dichi antu ejima akataña, aneñaña, nkumininaku afwaña. Hakukuula nduñu chiña amufwetela mali, nawa Yehova watufwetela dehi kulonda yatukuuli kuyuma yatama yafumaña kunshidi. (Tañenu Aroma 5:21.) Yesu Kristu waheni “wumi windi wakukuula nachu antu amavulu,” kwesekeja nakufuukula kwaTata yindi. (Mat. 20:28) Katataka antu akweti wuselewa waNzambi akahetelumu chikupu mwifutu damuloña dafweteluwu.

⁷ Yehova, Nleñi yetu, watukoñela chuma chabadika chikupu hakutwinka wumi wawuwahi, wamuzañalu. Neyi twikala nawuselewa windi, twakamona chakamanishayi yuma yejima yatama yinakuyandisha muchidi wamuntu. Yehova wakatumwekeshela wonsu wetu chakekalayi ‘mukwakusomona antu amukeñakeñaña.’—Heb. 11:6.

‘Antu Eyi Akadilambula’

8. Chumanyi chitwadizilaña kudi Isaya chatela kutukwasha hakumukalakela Nzambi?

⁸ Hakwila nawu twikali nawuselewa waNzambi twatela kuzatisha chachiwahi wuswa wetu wakudifuukwila. Muloña Yehova hakanjikijaña muntu nindi yamukalakeleñaku. Mumafuku aIsaya, Nzambi wenhwili nindi: “Nukutemeshanyi? Wukutuyila hinyi?” Yehova wamulemesheli kaprofwetu kuhitila mukumwiteja nindi yafuukuluhu yomweni. Toñojokenu Isaya chazañaleliyi hakwakula nindi: “Yamonu, ntemeshami.”—Isa. 6:8.

9, 10. (a) Twatela kumukalakela Nzambi nayililu yamuchidinyi? (b) Muloñadi chitwatela kumukalakela Yehova nawumi wetu wejima?

⁹ Antu atela kufuukulahu kumukalakela Nzambi hela nehi. Yehova wakeñaña nindi tumukalakeli namuchima wumu. (Tañenu Yoshuwa 24:15.) Antu adikañaña kudifukula kudi Nzambi hiyanateli kumuzañaleshaku; nawa antu afwilaña kuzañalesha akwawu antu hayitalaña mesuku. (Kol. 3:22) Neyi tukalakalaña mudimu wajila ‘mukulaba’ kuhitila mukutwamijaku yuma yamukaayi kukañesha kudifukula kwetu, hitukwikala nawuselewa waNzambuku. (Kwid. 22:29) Yehova weluka nindi neyi tumukalakela nawumi wetu wejima tukuhetelamu. Mosi walejeli aIsarela kutonda wumi ‘kuhitila mukukeña Yehova Nzambi yawu, kwovwahila izu dindi, nikumulamata.’—Kuhit. 30:19, 20.

¹⁰ Mwanta Davidi wamuIsarela wakushankulu wembeli kudi Yehova nindi: “Antu eyi hiyakudilambula himulambu wakutwala chanyichima  yawu awenawu mwifuku deyi dañovu; mulubanji lwakujila chakufuma mwivumu dabudidi, eyi wukweti wuumi wakuwukwenzi weyi.” (Mas. 110:3) Antu amavulu makonu atwamijañaku maheta nikuhema muchihandilu chawu. Ilaña antu amukeña Yehova, atwamijañaku mudimu wajila kubadika yuma yejima. Kushimwina nsañu yayiwahi neyena kwamwekeshaña nawu atwamijañaku mudimu wajila. Amukuhwelela chikupu Yehova nawu nateli kuyinka yuma yakeñañawu.—Mat. 6:33, 34.

Nyilambu Yetejañayi Nzambi

11. Chahanineñawu aIsarela nyilambu kudi Yehova akuhweleleña kutambwila chumanyi?

¹¹ MuNshimbi yachitiyañenu, antu jaNzambi ahanineña nyilambu yayiwahi hakwila nawu ekali nawuselewa windi. Mukanda waAlevi 19:5, wahosha nawu: “Neyi mwakamuketwila Yehova chimuna chanyilambu yakuwunda, mwakamulambula kulonda akayiitiji.” Mumukanda wowumu, twatañaña netu: “Neyi mwakamuketwila Yehova chimuna chakumusakilila nachu, Mwakamuketulaña kulonda enu akayiitiji.” (Lev. 22:29) Hampinji yalambwileñawu aIsarela nyilambu yawanyama amawahi hakameña kaYehova, wishi wafumineñaku wadiña “wevumba dadiwahi” wayileña kudi Nzambi walala. (Lev. 1:9, 13) Kukeña kwamwekesheluwu antu kudi Nzambi yawu kwamutiyishili kuwaha nankashi nikumuzañalesha. (Kutach. 8:21) Iyi nyilambu yahanineñawu muNshimbi, mwekala lushimbi lwazatikaña nimakonu. Antu ahanaña nyilambu yayiwahi kudi Yehova atambwilaña wuselewa windi. Nyilambu yamuchidinyi yatambwilañayi? Shinshikenu hayuma yiyedi yamwekanaña muchihandilu chetu: yililu ninhoshelu yetu.

12. Yumanyi yinateli kuleñela ‘mulambu wanyijimba yetu’ awukaani kudi Nzambi?

¹² Mumukanda wayisonekeleliyi Aroma, kapostolu Pawulu wasonekeli nindi: “Lambulenu nyijimba yenu yili mulambu wawumi, wajila, wakutiyisha nachu Nzambi kuwaha; diwu mudimu wenu waya mumaana.” (Rom. 12:1) Hakwila nawu tutambwili wuselewa waNzambi muntu himuntu watela kuhemba mujimba windi kulonda yamutiyisheña nachu Nzambi kuwaha. Neyi yatamisha mujimba windi namakanya, kubokota nteteli yabetel, yitumbu yashetana yakaanishawu, hela kusheta walwa, mulambu windi hiyakuwutambulaku. (2 Kor. 7:1) Hela chochu, chineli muntu “welaña wuvumbi waditamishaña mujimba windi yomweni,” yililu yindi yatama yaleñelaña mulambu windi awukaani kudi Yehova. (1 Kor. 6:18) Hakwila nawu tumuzañalesheña Nzambi, muntu chiña ‘yekala wajila mwelañayi mwejima.’—1 Pet. 1:14-16.

13. Muloñadi chitwatela kumushimekela Yehova?

¹³ Mulambu wukwawu wamuzañaleshaña Yehova hinhoshelu yetu. Antu amukeña Yehova ahoshaña yuma yayiwahi hadi yena kumesu awantu nimumatalawu. (Tañenu Masamu 34:1-3.) Tañenu Masamu 148-150, kulonda mwiluki awa masamu asatu chiyavula  kutukolesha nawu tumushimekeña Yehova. Eñañi, “kushimeka kunayiwahili antu oloka.” (Mas. 33:1) Yesu Kristu, Chakutalilahu chetu, wakonkomweneni hakulema kwakumushimeka Nzambi kuhitila mukushimwina nsañu yayiwahi.—Luka 4:18, 43, 44.

14, 15. Hoseya wayikonkomweneni aIsarela kulambula nyilambu yamuchidinyi, nawa Yehova wahosheli nindidi?

¹⁴ Neyi tukushimwinaña neyena, tukumwekesha netu twamukeña Yehova nawa twakeñaña kutambwila wuselewa windi. Chakutalilahu, talenu kaprofwetu Hoseya chayikonkomweneniyi aIsarela adiñijili mukudifukula kwakutwamba nawa ajimbesheli wuselewa waNzambi. (Hos. 13:1-3) Hoseya wayilejeli nindi alembi nawu: ‘Tufumishili Yehova kuluwa kwejima, wututambuli chachiwahi; ninetu tukukulambula nyilambu yañombi yayizamba yakunyivumbu yetu.’—Hos. 14:1, 2.

¹⁵ Chizamba chañombi chadiña nawuseya nankashi nawa dimulambu wahanineña aIsarela kudi Yehova. Dichi, ‘nyilambu yanyana kañombi yayizamba yakunyivumbu yetu’ yatalisha kumazu amawahi alala, itwahoshaña hakumushimeka Nzambi walala. Indi Yehova wahosheli nindidi hadi antu alambwileña nyilambu yamuchidiwu? Wahosheli nindi: “Nakayikeña namuchima wejima.” (Hos. 14:4) Antu alambwileña nyilambu yamuchidiwu yakumushimeka, Yehova wayanakeneneña, nakuyinka wuselewa, nikukwata nawu wubwambu.

16, 17. Neyi muntu wamukuhwelela Nzambi yatachika kushimwina nsañu yayiwahi, Yehova watambwilaña ñahi kushimeka kwindi?

¹⁶ Kumushimeka Yehova hatooka hinjila yazatishañawu mukudifukula kwalala. Ñimbi yamasamu washili muchima hakumulemesha Nzambi walala nawa wamulembeleli Nzambi nindi: “Eyi Yehova, atambuli mwani, nyilambu yamukanwa kami yakudilambwila namuchima wamami aweni.” (Mas. 119:108) Indi makonu? Hakutena izaza deneni dawantu amuyinu mpinji, Isaya waprofweteli nindi: “Akatiyakesha nsañu yakushimeka Yehova. . . . [nyilambu yawu] yakaya hakameña [kaNzambi] chakuyiitija.” (Isa. 60:6, 7) Hakushikijewa kwawuprofwetu, yihita yawantu anakumulambula Nzambi “mulambu wakumuhameka mafuku ejima mudi Yesu, yowu nyikabu yakunyivumbu yakwiteja ijina dindi.”—Heb. 13:15.

¹⁷ Indenu? Komana mwamulambulaña Nzambi nyilambu yayiwahi? Neyi himwamulambulañaku, komana mukuzatilahu kulonda mutachiki kumushimeka Yehova kudi antu? Neyi chikuhwelelu chenu chiyisañumuna kutachika kushimwina nsañu yayiwahi, nyilambu yenu ‘yikumutiyishaña Yehova kuwaha kubadika ñombi wachizamba.’ (Tañenu Masamu 69:30, 31.) Ilukenu nenu “ivumba dadiwahi” damulambu wenu wakumushimeka dikushika kudi Yehova nawa wukuyinka wuselewa windi. (Ezek. 20:41) Dichi mukwikala namuzañalu wabadika nankashi.

‘Yehova Wakiswilaña Muntu Waloña’

18, 19. (a) Antu amavulu makonu atiyaña ñahi kumuchima hakumukalakela Nzambi? (b) Chumanyi chafumaña mukujimbesha wuselewa waNzambi?

¹⁸ Makonu, antu amavulu atoñojokaña neyi chatoñojokeleñawu antu adiñuku mumafuku aMalaki nawu: “Kumukalakela Nzambi hichuma chamukunkulwayi. Nenu, Chitunahembi nshimbi jindi, . . . tunadiilumu ika?” (Mal. 3:14) Hamuloña wakufwila maheta, atoñojokaña nawu kufuukula kwaNzambi hikwamba kashikijewaku nawa nshimbi jindi hijazatikañaku. Wena amonaña nawu mudimu wakushimwina  nsañu yayiwahi wamanishaña mpinji nawa wahilishaña antu.

¹⁹ Yitoñojoka yamuchidiwu yatachikili mwitempa daEdeni. Satana diyi wamushinjilili Evu kulonda yadiwuli wumi wawuwahi wamwinkeluwu kudi Yehova nakudiwula wuselewa Windi. Makonu, Satana washinjilaña antu kulonda atoñojokeña nawu kumuzatila Nzambi kwosi chafumañamu. Hela chochu, Evu ninfumwindi elukili nawu kujimbesha wuselewa waNzambi kwayileñeleleli kujimbesha wumi wawu. Antu embujolaña yuma yatama yakoñeluwu katataka eluki nawu kujimbesha wuselewa waNzambi kukuleñela ajimbeshi wumi wawu.—Kutach. 3:1-7, 17-19.

20, 21. (a) Chumanyi cheliliyi ntuluwa wakuZarefwati, nawa yumanyi yafuminumu? (b) Munjilanyi mutwatelela kumwimbujola ntuluwa wakuZarefwati nawa muloñadi?

²⁰ Toñojokenu hayuma yatama yafumini muyuma yakoñeli Adama naEvu nayuma yafumini munsañu yitwashimuna hakusambila yaElija namumbanda ntuluwa wakuZarefwati. Chatiyiliyi mazu akumukolesha kudi Elija, mumbanda watachikili kutuña dinkendi nawa wasambilili kumwinka kaprofwetu kadinkendi katuñiliyi natuwuña twantesha. Nkumininaku Yehova wakoñeli mwamukaniniyi Elija. Iyi nsañu yashimunaña nawu: “Niyena mumbanda niElija niakwetala dindi adiili mafuku amavulu. Chitayi chawuña kumana nehi, chipunda chamanji kunoña nehi, mwomwizu daYehova dahosheliyi kukanwa kaElija.”—1 Anya. 17:15, 16.

²¹ Chuma chakoñeliyi mumbanda ntuluwa wakuZarefwati dichinakwilawu antu antesha adi hakachi kayihita yawantu amavulu makonu. Wamukuhweleleli chikupu Nzambi wawamwinu, nawa wamukwashili. Iyi nsañu yamuBayibolu kushilahu tuhu ninsañu yikwawu yamwekeshaña nawu twatela kumukuhwelela Yehova. (Tañenu Yoshuwa 21:43-45; 23:14.) Chihandilu chawaYinsahu jaYehova makonu chamwekeshaña cheñi nawu Yehova hamba kashiya antu atambwilaña wuselewa winduku.—Mas. 34:6, 7, 17-19. *

22. Muloñadi chitwatela kunyakashana kukeña wuselewa waNzambi?

²² Ifuku daNzambi dakusompesha ‘dakashikena antu ejima ashakama heseki dejima’ didi kwakwihi. (Luka 21:34, 35) Kwosi wakatwesha kutemukaku. Maheta hela yuma yakumujimba hiyinateli kwesekana nihantuku nakulema kwakutiya mutambi waNsompeshi atondawu kudi Nzambi wakwila nawu: “Inzenu enu anakoolekeshuwu kudi Tata yami, swanenu wanta wenu wayiloñesheleluwu kufumisha haaliluwu chikuku champata yamunu mwishina.” (Mat. 25:34) Eñañi, ‘Yehova yomweni wakakoolekesha muntu waloña; wakamunyeñumwisha kwi-ndo nawuselewa windi neyi chakumunyeñumwisha nankebu hohu.’ (Mas. 5:12) Komana kwila tukeñakeña wuselewa waNzambi nehi?

[Tumazu twaheshina]

Munakwanuka?

• Muloñadi chitwatela kudifukwila kudi Yehova namuchima wejima?

• Nyilambu yamuchidinyi yatambwilañayi Yehova makonu?

• Indi nhoshelu yakwila nawu ‘ñombi yayizamba yakunyivumbu yetu’ yatalisha mudihi, nawa muloñadi chitwatela kuyilambwila kudi Yehova?

• Muloñadi chitwatela kukeñela wuselewa waNzambi?

[Malwihu aKuzatisha haKudiza]

[Mwevulu wudi hefu 13]

Kaprofwetu waNzambi wamulejeli mama yawantu kazweñi wadiña nanzala kufuukulahu chumanyi?

[Mwevulu wudi hefu 15]

Nkiswinyi yitwatambwilaña neyi tuhana mulambu wakumushimeka Yehova?

[Mwevulu wudi hefu 17]

Neyi mumukuhwelela Yehova nankashi hitwakatiya nsonyuku