Kukkomaninwa A Leza Cipa Kuti Tukabe Abuumi Butamani

“Nduwe olongezya balulami, O Jehova. Ulabatabilila aluse lwako mbuli intobo.”—INT. 5:12.

1, 2. Ino Eliya wakamulomba nzi mukamufwu waku Zarefati alimwi ncinzi ncakamusyomezya?

MUSINSIMI wa Leza, mukaintu amwanaakwe bakalifwide nzala. Mukamufwu waku Zarefati naakali kukunka mulilo, musinsimi Eliya wakamulomba meenda ansima. Wakamupa meenda pele cakulya ncaakajisi cakali buyo “tusu tuce mumutiba, atufuta twakujisya mukankuli.” Wakamwaambila oobo akaambo kakuti wakali kuyeeya kuti cakulya tiicakali cinji cakuti baabane amusinsimi.—1 Bam. 17:8-12, BT.

² Eliya wakazumanana kwaamba kuti: “Pele taanguna kundijikila mebo kasima kasyoonto, ukandiletele okuno. Lino kusule uyoolijikila, webo amwaanako. Nkaambo mbuboobu mbwaamba Jehova Leza wa-Israyeli. ‘Cinkuli cabusu tacikooyomana, ayalo insazi yamafuta taikooyooyuminina.’”—1 Bam. 17:13, 14.

3. Ino makani nzi ayandika kapati ngotweelede kubikkila maano?

³ Mukamufwu wakeelede kukabikkila maano kaambo aaka kutali buyo kuyeeya mbobakali kukonzya kwaabana cakulya eeci cisyoonto. Sena naakasyoma kuti Jehova ulamugwasya amwaanakwe naa kusyoma zyintu nzyaakajisi muciindi cakukkomaninwa a Leza? Andiswe ngomubuzyo ngotweelede kulibuzya ooyu. Sena tuyakubikkila maano kukukkomaninwa a Jehova naakukulijanina lubono? Tweelede kumusyoma Leza alimwi akumubelekela. Kuli zyintu nzyotukonzya kucita kutegwa atukkomanine.

‘Uleelela Kukombwa’

4. Ino nkaambo nzi ncotuyandika kumukomba Jehova?

⁴ Jehova uyanda kuti bantu bamubelekele munzila njayanda. Babelesi bakwe bali  kujulu caantoomwe bakaamba kuti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zyintu zyoonse, alimwi akaambo kakuyanda kwako zyakabako alimwi zyakalengwa.” (Ciy. 4:11) Akaambo kakuti Nguwakalenga zyintu zyoonse Jehova uyandika kukombwa.

5. Ino nkaambo nzi ncotweelede kumubelekela Leza?

⁵ Kaambo kambi ncotweelede kumubelekela Jehova nkakuti ulatuyanda kapati. Bbaibbele lyaamba kuti: “Leza wakalenga muntu mucinkozya cakwe. Wakamulenga mucinkozya ca-Leza. Wakabalenga baalumi abanakazi.” (Matl. 1:27) Muntu ulakonzya kulisalila kubelekela Leza naa pe. Akaambo kakuti nguwakatupa buumi, Jehova wakaba taateesu. (Lk. 3:38) Mbubwenya mbuli usyi mubotu ulabacitila zyoonse zibotu bana bakwe basankwa abasimbi kutegwa kabakomana mubuumi. “Ulapasuzya izuba lyakwe” alimwi “ulawisizya boonse imvula yakwe,” kutegwa Nyika yoonse izule icakulya alimwi kaiboneka kabotu.—Mt. 5:45.

6, 7. (a) Ino Adamu wakabaletela mapenzi nzi bana bakwe boonse? (b) Ino kulyaaba kwa Kristo kuya kubagwasya buti aabo bayanda kukkomaninwa a Leza?

⁶ Alimwi Jehova watufwutula kumapenzi aaboola akaambo kacibi. Akaambo kakubisya, Adamu wakaba mbuli usyi uubbida mukwasyi wakwe amane azyalo nzyaabba bamubbida. Akaambo kakuzangila Jehova, Adamu wakabbida bana bakwe cintu cimwi cakali kuyandika kapati—ooku nkukkomana kutamani. Akaambo kabulyato wapa kuti bantu babe bazike kucibi. Boonse bantu balaciswa, balatyompwa bamana balafwa. Kutegwa muzike aangululwe kuyandika kubbadela alimwi Jehova watubbadelela kale kutegwa tutafwi. (Amubale Baloma 5:21.) Akaambo kakucita kuyanda kwa Bausyi, Jesu Kristo wakaaba “buumi bwakwe ikuba cinunuzyo cabanji.” (Mt. 20:28) Ino-ino aabo bacita kuyanda kwa Leza bayakukkomana azyintu ziboola akaambo kacinunuzyo.

⁷ Mulengi wesu Jehova wacita zyintu zinji kutegwa katukkomana mubuumi. Akaambo kakuti ulatukkomanina tuya kubona mbwaya kuzibambulula zyintu zibapenzya bantu. Jehova uyakututondezya toonse mbwali “sikupa bulumbu kuli baabo bamuyandaula cabusungu.”—Heb. 11:6.

“Bantu Bako Balabungana Camoyo Woonse”

8. Ino ncaakacita Isaya cituyiisya nzi kujatikizya kubelekela Leza?

⁸ Kutegwa tukkomaninwe a Leza tweelede kuzyibelesya kabotu nguzu zyakulisalila. Cili boobo nkambo Jehova tasungilizyi muntu kuti amubelekele. Mumazuba a Isaya , Wakabuzya kuti: “Ino nguni ngunti tume? Nguni uukonzya kutwiinkila?” Jehova wakamulemeka musinsimi kwiinda mukumupa coolwe cakulisalila. Isaya wakakkomana kuvwiila kuti: “Mpendi! Unditume mebo.”—Is. 6:8.

9, 10. (a) Ino mbuti mbotukonzya kumubelekela Leza amakanze mabotu? (b) Ino nkaambo nzi cileelela kubelekela Jehova amoyo wesu woonse?

⁹ Bantu balaangulukide kumubelekela Leza naa pe. Jehova uyanda kuti tumubelekela cakuliyandila. (Amubale Joshua 24:15.) Boonse aabo batayandi kumukomba Leza tabamukkomanisyi; abaabo bayanda buyo kukkomanisya bantu tabayandi. (Kol. 3:22) Kuti katutamubelekeli kabotu Leza kwiinda mukuzumizya zyintu zyanyika kuti zitunyonganye mubukombi bwesu, ciya kutupa kuti Leza atukake. (Kul. 22:29) Jehova ulizyi kuti, ikuti twamubelekela camoyo woonse cilakonzya kutugwasya. Musa wakaambila bana Israyeli kuti basale buumi kwiinda ‘mukuyandisya Jehova Leza wabo, baswiilile ijwi lyakwe, akukakatila kuli nguwe.’—Dt. 30:19, 20.

¹⁰ Mwami Davida wamu Israyeli yansiku wakamwiimbila boobu Jehova: “Bantu bako  balabungana camoyo woonse azilundu zisalala mubuzuba bwalumamba lwako. Balombe bako bali mbuli malosi aalume luboneka cifumofumo.” (Int. 110:3) Bantu banji aano mazuba babikkila kapati maano kulubono azyakulikondelezya. Pele kuli baabo bamuyanda Jehova ikumubelekela ncintu cakusaanguna mubuumi bwabo. Busungu mbubajisi nobakambauka makani mabotu kutondezya ncobabikkila kapati maano mubuumi bwabo. Basyoma kuti lyoonse Jehova unakubapa nzyobayandika.—Mt. 6:33, 34.

Kulyaaba Nkwakkomanina Leza

11. Ino mbulumbu nzi bana Israyeli mbobakali kulangila kutambula akaambo kakwaaba zipaizyo kuli Jehova?

¹¹ Mumulawo wacizuminano bantu bakeelede kwaaba cipaizyo citambulika kutegwa Leza abakkomanine. Ibbuku lya Levitiko 19:5 yaamba kuti: “Na mwatuulila Jehova cituuzyo cakutontozya, amucituule kuti citambulike.” Mubbuku ndilyoonya eeli tubala kuti: “Namwapaizizya Jehova cipaizyo cakulumba, amupaizye kabotu kuti mutambulike.” (Lev. 22:29) Ciindi bana Israyeli nibakali kwaaba banyama ibayandika kuli Jehova acipaililo, ibusi ibwakali kuya kujulu bwakali mbuli “bweema bubotu” kuli Leza wakasimpe. (Lev. 1:9, 13) Wakakkomana kubona bantu bakwe ncobakamucitila. (Matl. 8:21) Mumulawo ooyo tujana njiisyo zikonzya kubeleka mazuba aano. Aabo baleta zipaizyo zitambulika kuli Jehova ulabakkomanina. Ino zipaizyo nzi nzyakkomanina? Atubone nzyintu zyobilo zicitika mubuumi bwesu: mbotulilemeka ambotwaambaula.

12. Nzyintu nzi zikonzya kupa kuti ‘mibili yesu ibe cipaizyo’ cikonzya kumunyemya Leza?

¹² Mwaapostolo Paulo mulugwalo lwakwe ndwaakali kulembela bana Roma wakati: “Mutuule mibili yanu kiili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.” (Lom. 12:1) Kutegwa muntu atambulwe a Leza, uyandika kulilemeka. Ikuti naa muntu ooyu wasofwaazya mubili wakwe akaambo katombwe, inseke zyalubanje, misamu iikola naa ikwiindilizya kunywa bukoko, cipaizyo cakwe cilaba cabuyo. (2 Ko. 7:1) Mbwaanga “ooyo uucita bwaamu ubisizya mubili wakwe mwini,” ikutalilemeka munzila iili yoonse kulamucima Jehova. (1 Ko. 6:18) Kutegwa amukkomanisye Leza, muntu uyandika ‘kusalala mubukkale bwakwe boonse.’—1 Pe. 1:14-16.

13. Ino nkaambo nzi ncociyandika kuti katumutembaula Jehova?

¹³ Acimwi cipaizyo ncakkomanina Jehova ncambotwaambaula. Aabo bamuyanda Jehova lyoonse balaamba zibotu kujatikizya nguwe nobali akati kabantu alimwi anobali balikke. (Amubale Intembauzyo 34:1-3.) Amubale Intembauzyo 148-150, akubona  intembauzyo eezyi zyotatwe mbozitukulwaizya kutembaula Jehova. Masimpe “kutembaula nkubotu kubaluzi.” (Int. 33:1) Jesu Kristo Ngotutobela, wakakankaizya mbokuyandika kutembaula Leza kwiinda mukukambauka makani mabotu.—Lk. 4:18, 43, 44.

14, 15. Ino ncipaizyo nzi Hosiya ncaakabalomba bana Israyeli alimwi ino Jehova wakacita nzi?

¹⁴ Kwiinda mukukambauka cabusungu, tutondezya kuti tulamuyanda Jehova alimwi tuyanda kukkomaninwa anguwe. Mucikozyanyo, amubone musinsimi Hosiya mbwaakakulwaizya bana Israyeli ibakaleka kukomba Leza akutobela bukombi bwakubeja. (Hos. 13:1-3) Hosiya wakabaambila kuti bakombelezye kuti: “Kotulekelela [Jehova] milandu yesu yoonse, kotutambula caluzyalo, elyo tuyookuletela micelo yamilomo yesu.”—Hos. 14:1, 2.

¹⁵ “Micelo ya milimo yesu” yaamba majwi aabelesegwa aciindi ceelede kutembaula Leza wakasimpe. Ino ncinzi Jehova ncaakacita kuli baabo bakalyaaba? Wakaamba kuti: “Njoobayandisya.” (Hos. 14:4) Kuli baabo bamutembaula boobu, Jehova ulabalekelela, ulabazumina alimwi balaba beenzinyina.

16, 17. Kuti naa kusyoma Leza kwapa kuti muntu atalike kukambauka makani mabotu, ino mbuti Jehova mbwalimvwa kukutembaula ooku?

¹⁶ Kuzwa kaindi ikutembaula Jehova caantangalala ncintu cali kuyandika kapati mubukombi bwakasimpe. Ikutembaula Leza wakasimpe cakali kumugwasya kapati sintembauzyo cakuti wakaamba kuti kuli Leza: “Utambule inkambilizyo zyamulomo wangu, O Jehova.” (Int. 119:108) Ino mbuti mazuba aano? Kaamba nkamu mpati yabantu bapona mazuba aano, Isaya wakasinsima kuti: “Makani mabotu aa-Jehova ayootembaulwa. . . . Bayootuulwa acipaililo cangu akutambulika.” (Is. 60:6, 7) Ikuzuzikizya kaambo aaka bantu banji bapa Leza “cipaizyo cantembauzyo, nkokuti, micelo yamilomo yesu iyaambilizya zyina lyakwe antangalala.”—Heb. 13:15.

¹⁷ Ino mbuti nywebo? Sena mulamupa Leza cipaizyo ncakkomanina? Ikuti naa tamuciti oobo, sena mulakonzya kucinca akutalika kumutembaula Jehova caantangalala? Ikuti naa lusyomo lwamupa kuti mutalike kukambauka makani mabotu, cipaizyo cenu “cilabotezya Jehova kwiinda musune.” (Amubale Intembauzyo 69:30, 31.) Mweelede kuba masimpe kuti “bweema bwatununkilizyo” twacipaizyo canu ulatutambula Jehova alimwi akuti uyakumukkomanina. (Ezk. 20:41) Inzya, muyookkomana kapati.

‘Jehova Uyakubalongezya Boonse Baluleme’

18, 19. (a) Ino kubelekela Leza bakububona buti bantu banji aano mazuba? (b) Ino kuleka kumubelekela Leza cisololela kunzi?

¹⁸ Mazuba aano, bantu banji bayeeya mbuli mbobakali kuyeeya bantu bamumazuba a Malaki bakali kwaamba kuti: “Kumanina Leza milimo tacigwasyi pe. Twajana impindu nzi mukubamba imbeta zyakwe?” (Malk. 3:14) Akaambo kakuyandisya lubono, batalika kuyeeya kuti makanze aa Leza taakonzyi kucitika alimwi akuti milawo wakwe taigwasyi. Bayeeya kuti kukambauka makani mabotu nkusowa buyo ciindi alimwi nkunyonganya buyo bantu.

 ¹⁹ Mizeezo iili boobu yakatalikila mumuunda wa Edeni. Ngu Saatani wakapa Eva kuti aleke kuzibikkila maano zyintu nzyaakamupede Jehova alimwi akupa kuti aleke kumukkomanina. Mazuba aano, Saatani ulabacenga bantu kuti kabasyoma kuti ikubelekela Leza tacigwasyi. Nokuba boobo, Eva amulumaakwe bakazyiba kuti ikuleka kumubelekela Leza caamba lufwu. Aabo batobela cikozyanyo cabo cibyaabi abalo bayakufwa ino-ino.—Matl. 3:1-7, 17-19.

20, 21. (a) Ino ncinzi mukamufwu waku Zarefati ncaakasala kucita, alimwi ncinzi cakamucitikila? (b) Nkaambo nzi alimwi munzila nzi mbotukonzya kumwiiya mukamufwu waku Zarefati?

²⁰ Atubone kwiindana kuliko akati kambubakafwa ba Adamu a Eva azyakacitika kuli Eliya amukamufwu waku Zarefati ngotwabala kumatalikilo. Naakamvwa majwi aakulwaizya ngaakamba Eliya, imukaintu wakajika nsima akumupa musinsimi kutaanguna nokuba kuti tanaakajisi cakulya cinji. Amane Jehova wakacizuzikizya cisyomezyo ncaakaamba kwiinda muli Eliya. Cibalo eeci caamba kuti: “Nkabela bakalya boonse, Eliya amwanakazi amwanaakwe musankwa, mazuba manji. Cinkuli cabusu tacikwe nicakamana, ayalo insazi yamafuta tiikwe niyakayuminina, mbubwenya mbuli ijwi lya-Jehova ndyaakaamba kumulomo wa-Eliya.”—1 Bam. 17:15, 16.

²¹ Mukamufwu waku Zarefati wakacita cintu cimwi ncobalyaabide kucita bantu basyoonto bapona mazuba aano. Wakali kumusyoma kapati Leza alimwi awalo taku naakamusiya. Eeci cibalo azibalo zimwi zyamu Bbaibbele zyitondezya kuti tuyandika kumusyoma Jehova. (Amubale Joshua 21:43-45; 23:14.) Buumi mbobapona Bakamboni ba Jehova bamazuba aano bupa bumboni buyungizidwe bwakuti takabalekelezyi aabo mbakkomanina.—Int. 34:6, 7, 17-19. *

22. Ino nkaambo nzi ncotweelede kuyandisya kukkomaninwa a Leza cakutamuka?

²² Buzuba bwalubeta lwa Leza “buyoobasikila boonse aabo bakkala anyika” ino-ino. (Lk. 21:34, 35) Tabakacciji pe. Kunyina buvwubi naa lubono lukonzya kukkomanisya kwiinda kumvwa mubetesi ngwaakasala Leza kati: “Amuboole, nywebo nomulelekedwe a Taata, amunjile mu Bwami mbomwakabambilwa.” (Mt. 25:34) Masimpe, ‘Jehova uyakubalongezya balulami, uyakubatabilila aluse lwakwe mbuli intobo.’ (Int. 5:12) Eelo kaka cilayandika kukkomaninwa a Leza!

[Bupanduluzi Buyungizyidwe]

Sena Muciyeeyede?

• Ino nkaambo nzi Jehova ncotweelede kumukomba amoyo woonse?

• Ino nkulyaaba kuli buti Jehova nkwakkomanina mazuba aano?

• Ino mabala aakuti “micelo yamilomo yesu” aamba nzi, alimwi nkaambo nzi ncotweelede kulyaaba kuli Jehova?

• Ino nkaambo nzi ncotweelede kuyandisya kukkomaninwa a Leza?

[Mibuzyo yaciiyo]

[Cifwanikiso icili apeeji 13]

Ino ncinzi musinsimi wa Leza ncaakamulomba mukaintu watakajisi cakulya cinji kuti acite?

[Cifwanikiso icili apeeji 15]

Ino mbubotu nzi mbotujana akaambo kupa zipaizyo zyakutembaula Jehova?

[Cifwanikiso icili apeeji 17]

Lusyomo lwini-lwini ndomujisi muli Jehova talukamutyompyi