Putum kilhtamaku nalatamayaw komo Dios tlan nakinkaʼakxilhan
Putum kilhtamaku nalatamayaw komo Dios tlan nakinkaʼakxilhan
«Kintikukan Dios [Jehová], snun lan sikulanatlawaya ti kgaxmata mintachiwin; y mintalakgalhaman talama y makgtakgalhmaj.» (SAL. 5:12)
1, 2. ¿Tuku skini Elías puskat tiku xninita xchixku, chu tuku wani pi natlawa Dios?
PUSKAT xalak Sarepta tiku xninita xchixku chu xkgawasa tsinksmakgolh, chu nachuna Elías. Akxni puskat tsuku wili lhkuyat xlakata natlawa liwat, palakachuwina skini kaxtalanchu chu chuchut. Puskat kgalhi chuchut xlakata namaxki, pero ni kgalhi lhuwa liwat kaj «ni lhuwa harina kgalhi kxalanka xalu chu ni lhuwa aceite kgalhi xaʼaktsu xalu». Wa xlakata lakpuwan pi nila katimawilh Elías, chu chuna wanilh (1 Rey. 17:8-12).
2 Pero palakachuwina skinipara chu wani: «Tuku tajuma, pulana kakilitlawani maktum xastilili kaxtalanchu, chu nakilitaniya unu kkilhtin, chu alistalh natlawaya tuku wix chu minkgawasa nawayatit. Xlakata wa uma tuku wanit Jehová Dios xalak Israel: “Xalanka xalu nema kgalhi harina ni katisputli, chu xaʼaktsu xalu nema kgalhi aceite na ni katisputli”» (1 Rey. 17:13, 14).
3. ¿Tuku lu xlakaskinka nalaksakaw la uku?
3 Uma puskat ni kaj xʼama laksaka komo natawa Elías tuku xkgalhi, wi atanu tuku tlakg xlakaskinka xkilhchanima. ¿Tlakg xlakaskinka xʼama akxilha tuku xmaklakaskin chu xkgawasa o tlakg xlakaskinka xʼama akxilha tlan natalalin Dios? ¿Xʼama lipawan pi Jehová tlan xkalakgmaxtulh? Akinin nachuna titaxtumaw. ¿Tlakg kgalhiputunaw tuku xtapalh nixawa tlan nakinkaʼakxilhan Jehová? Anan lhuwa tuku xlakata nalipawanaw Jehová chu naskujnaniyaw. Chu Jehová kinkawaninitan tuku natlawayaw xlakata tlan nakinkaʼakxilhan.
Jehová lakgchan nakakninaniyaw
4. ¿Tuku xlakata Jehová lakgchan nakakninaniyaw?
4 Jehová tlan nakinkaskiniyan nakakninaniyaw chuna la lakaskin. Kʼakgapun, makgapitsi xlakskujnin chuna limasiyakgolh akxni wankgolh: «KinTlatikan [Jehová], chu nkiDioskan, luwa mininiyan namakglhtinana nkakni, chu [lilanka], chu litliwakga; sampi wix nti ntimalakatsuku xlipaks nkatuwa ntu anan, na wix mintalakaskin lilamakgo, chu litatlawakgolh» (Apo. 4:11). Jehová tlawalh putum tuku anan chu lakgchan nakakninaniyaw.
5. ¿Tuku xlakata tlakg naskujniputunaw Dios akxni akxilhaw la kinkapaxkiyan?
5 Wi atanu tuku xlakata naskujnaniyaw Jehová: xlakata niti atanu tlakg kinkapaxkinitan. Pulana, Biblia masiya pi «tlawalh chixku xtachuna la Dios; xachixku chu xapuskat katlawalh» (Gén. 1:27). Na kinkamaxkin talakaskin kiʼakstukan nalaksakaw tuku natlawayaw, uma wamputun pi tlan lakapastakaw chu laksakaw tuku tlawaputunaw. Chu xlakata kinkamaxkin latamat wa kinTlatkan (Luc. 3:38). Xlakata kintlatikan tlan likatsi, kinkamaxkiyan tuku maklakaskinaw xlakata xatapaxuwan nalatamayaw. Dios «maxkikgoy kxkgakganat chichini [...] chu na wa makamin sen», nema tlawa pi kKatiyatni tlan lhuwa tuku namakgalakan, chu lu stlan natasiya (Mat. 5:45, Hua Xasasti Talaccaxlan, 1999).
6, 7. 1) ¿La kamatitaxtinilh Adán tuku nitlan xkamanan? 2) ¿La nalitamakgtayakgo xtamakamastan Cristo tiku Dios tlan kaʼakxilha?
6 Nachuna, Jehová kinkalakgmaxtunitan ktalakgalhin. Akxni Adán chu Eva ni kgalhakgaxmatkgolh Dios kitaxtulh la tiku kgamanan xlakata natlaja tumin kamakglhti xtumin xfamilia chu likgamanan. ¿Tuku xlakata? Xlakata akxni nialh kgalhakgaxmatkgolh Dios, kamakglhtilh tuku xkalakgchan xkamanan: xatapaxuwan xlatamakgolh putum kilhtamaku. Xlakata Adán xakstu paxkika, makamastalh latamanin: ktalakgalhin chu lu nitlan kitaxtulh. Wa xlakata tatatlayaw, patinanaw, lipuwanaw, o lakgaputsayaw chu niyaw. ¡Lu lakaskinaw nakinkalakgmaxtukanan ktalakgalhin! Pero akxni wi tiku lakgmaxtukan talakaskin naxokgokan chu Jehová xokgolha tuku xtalakaskin (kalikgalhtawakga Romanos 5:21). Chuna tlawalh akxni makamilh xKgawasa, Jesús, xlakata «nalimastay xlatamat, nalilakgmaxtukgoy xlilhuwa ntachixkuwitat» (Mat. 20:28). Nialh makgas putum tiku tlan kaʼakxilha Dios tlan nalitamakgtayakgo talakgmaxtut.
7 Xlikana, kiMalakatsukinakan lhuwa tuku tlawanit xlakata xatapaxuwan nalatamayaw. Komo Dios tlan nakinkaʼakxilhan, naʼakxilhaw la namasputu putum tuku lipatinamaw. Jehová nakinkalimasiyaniyan kinchatunukan pi «nti mputsakgoy lakgalhamankgoy» (Heb. 11:6).
«Minkachikin xatapaxuwan natamakamastaniyan»
8. Akxni akxilhaw tuku titaxtulh Isaías, ¿tuku kinkamasiyaniyan xlakata la naskujnaniyaw Dios?
8 Jehová ni kinkaskiniyan xafuerza naskujnaniyaw. Masta talakaskin pi kinchatunukan nalaksakaw komo naskujniyaw. Chu tlan akxilha tiku laksaka naskujni. Akxni xlama Isaías, Dios kgalhskininalh: «¿Tiku nakmalakgacha, chu tiku naʼan kimpalakatakan?». Chuna la akxilhaw, Dios maxkilh talakaskin Isaías nalaksaka tuku natlawa. Akxni Isaías wanilh Dios: «¡Unu kwi! Akit kakimalakgacha», lu tlan limakgkatsilh (Isa. 6:8).
9, 10. 1) ¿La naskujnaniyaw Jehová? 2) ¿Tuku xlakata tlakg tlan xliputum kinakujkan naskujnaniyaw Dios?
9 Kinchatunukan tlan nalaksakaw nakakninaniyaw Dios o ni nakakninaniyaw. Jehová lakaskin pi xatapaxuwan nakakninaniyaw (kalikgalhtawakga Josué 24:15). Nikxni katimakgamakglhtinalh kintaskujutkan komo xatasitsi natlawayaw o kaj xlakata nakamakgapaxuwayaw amakgapitsin (Col. 3:22). Na ni katimakgamakglhtinalh komo «ni liwana tlawaputunaw», uma wamputun akxni tuku xalak kakilhtamaku tlawa pi nialh liwana namakgantaxtiyaw la skujnaniyaw Dios (Éxo. 22:29). Dios akxilha akxni xliputum kinakujkan skujnaniyaw chu akxni chuna tlawayaw lu tlan kinkakitaxtuniyan. Wa xlakata Moisés kawanilh israelitas pi xlaksakkgolh latamat. ¿La tlan xlaksakkgolh latamat? “Xpaxkikgolh Jehová, xkgalhakgaxmatkgolh chu ni xmakgxtakgkgolh.” (Deu. 30:19, 20.)
10 Makgasa mapakgsina David kilhtlinilh Jehová: «Minkachikin xatapaxuwan natamakamastaniyan xlakata mi soldados nawankgo. Niku lu xasanto, niku tsuku xkgakganat, tawilakgon lakgkgawasan xtachuna monkganat» (Sal. 110:3, NM). La uku lhuwa kaj lakaskinkgo tumin chu putsakgo tuku nalipaxuwakgo. Pero tiku paxkikgo Jehová katsikgo pi tlakg xlakaskinka natlawakgo xtalakaskin. Chu akxni lhuwa lichuwinankgo Dios, limasiyakgo pi wa tuku tlakg xlakaskinka akxilhkgo. Lipawankgo pi Jehová nakamaxki tuku maklakaskinkgo chali chali (Mat. 6:33, 34).
Tamakamastan nema Dios lakgati
11. ¿Tukuya tasikulunalin xmakgamakglhtinamputunkgo israelitas akxni wi tuku xmakamastanikgo Jehová?
11 Limapakgsin nema kamaxkika israelitas xwan pi xlakata Dios tlan xkaʼakxilhli xtalakaskin xmakamastanikgolh tuku lakgati. Anta kʼLevítico 19:5 wan pi xtalakaskin israelitas xlinkgolh akgtum «tamakamastan xlakata tlan xtalalinkgolh Jehová» chu uma xtlawa pi «tlan xkaʼakxilhli». Chu watiya uma libro wan pi xlimakamastatkan «tamakamastan xla tapaxtikatsinit» chu chuna «tlan xkaʼakxilhli» Dios (Lev. 22:29). Makgatunu akxni israelitas xmakamastanikgo Jehová tantum xatlan animal, jin nema xʼan kʼakgapun la “tuku xamuksun chu skaya xlimakgkatsi” (Lev. 1:9, 13). Tlan nawanaw pi tuku xlimasiyanikgo xlakskujni pi xpaxkikgo, Dios tlan xlimakgkatsi chu xlipaxuwa (Gén. 8:21, nota). Uma tuku xlichuwinan Limapakgsin kinkamasiyaniyan tuku tlan natlawayaw la uku: Dios tlan nakinkaʼakxilhan komo namakamaxkiyaw tuku lakgati. Pero ¿tuku tlan namakamaxkiyaw? Kalichuwinaw pulaktiy: tuku tlawayaw chu kintachuwinkan.
12. Tiku ni makgasitsiputunkgo Dios, ¿tuku ni xlitlawatkan xlakata tlan “namakamastakgo xtiyatliwakan, xtachuna likaxtlawan xastakna”?
12 Apóstol Pablo katsokgnanilh kstalaninanin Cristo xalak Roma: «Namakamastayatit mintiyatliwakan, xtachuna likaxtlawan xastakna, chu na xasantujlani, wa ntlan tlaway Dios, xampi chuna xlilat nalimaxkiyatit nkakni» (Rom. 12:1). Chuna la akxilhaw komo lakaskinaw pi tlan nakinkaʼakxilhan Dios, talakaskin kuenta natlawayaw kimaknikan xlakata Jehová namakgamakglhtinan. Ni katimakglhtinalh komo nalimaxkajwaniyaw lhuwa kuchu, naxkuliyaw axkut, xtuwan coca, nueces xla areca o atanu drogas (2 Cor. 7:1). Na ni xlakgatilh komo nitlan xliw kilatamatkan, xlakata «tiku tlawa talakgxtumit nema ni xlitatlawat, lakglakgalhi xmakni» (1 Cor. 6:18, NM). Xlikana putum tiku makgapaxuwaputunkgo Dios talakaskin “santuj nawankgo kxlatamatkan” (1 Ped. 1:14-16).
13. ¿Tuku xlakata talakaskin namalankiyaw Jehová?
13 Atanu tamakamastan nema lakgati Jehová, wa kintachuwinkan. Chuna xla, tiku paxkikgo Dios putum kilhtamaku tlan lichuwinankgo (kalikgalhtawakga Salmo 34:1-3). Akxni likgalhtawakgayaw Salmos 148 asta 150 akxilhaw la Jehová makglhuwa kinkawaniyan namalankiyaw. Xlikana: «Dios kalakgatini ixtatlinkan» akxni tiku kilhtlinikgo «laktankswa» (Sal. 33:1). Pulaktum tuku lu tlan limalankiyaw kinTlatikan wa nalichuwinanaw xalakwan xalaksasti tamakatsin, taskujut nema lu xlakaskinka akxilhli Jesús, tiku kinkawilinin liʼakxilhtit (Luc. 4:18, 43, 44).
14, 15. ¿Tukuya tamakamastan kawanilh Oseas xmakamastakgolh israelitas chu la xmakgamakglhtinan Jehová?
14 Akxni lu lichuwinanaw Dios limasiyayaw pi paxkiyaw chu lakaskinaw tlan nakinkaʼakxilhan. Kalakpuwaw tastakyaw nema Oseas kamaxkilh israelitas tiku nialh tlan xkaʼakxilha Jehová xlakata xmakgtanukgonit ni xaxlikana takanajla (Ose. 13:1-3). Palakachuwina kawanilh kaskinikgolh Jehová: «Kakinkatapati kintalakgalhinkan, chu kamakgamakglhtinanti tuku tlan, chu xlikana nakmakamastayaw tamakamastan nema nataxtu kkinkilhnikan» (Ose. 14:1, 2).
15 ¿Tuku wamputun «tamakamastan nema nataxtu kkinkilhnikan»? Kilhchanima akxni liwana lakapastakaw chu xlikana tuku waniyaw Jehová xlakata nalimalankiyaw. ¿La xkakgalhti Jehová tiku xmastakgo uma tamakamastan? Xla kgalhtinalh: «Nakkapaxki xlakata akit chuna klaksaknit» (Ose. 14:4). Chuna la akxilhaw, xlakata Dios chuna xlakaskin, xkatapati, tlan xkamakgamakglhtinan chu tlan xkatalalin tiku xmalankikgo.
16, 17. ¿La makgamakglhtinan Jehová xtamakamastan tiku lichuwinankgo xlakata paxkikgo?
16 Xaxlikana xlakskujnin Dios kalilakgapaskan xlakata lichuwinankgo Dios xlakatin amakgapitsin. Salmista lu xlakaskinka akxilhli namalanki Jehová wa xlakata tlawalh uma oración: «Kintikukan Dios, [...] kalakgati kintatlin, nima lilakgachixkuwiyan kinkilhni» (Sal. 119:108). ¿Tuku tlan wanaw la uku? Isaías xlichuwinama lhuwa tiku xkakninanikgolh Dios la uku akxni wa: «Nalichuwinankgo la malankikgo Jehová» chu «[xla] nakawani kawilikgolh [xtamakamastan] xʼakgspun niku mastakan tamakamastan» (Isa. 60:6, 7). La uku lhuwa millones kstalaninanin Cristo makgantaxtimaw uma tuku wa Isaías «kaj xtachuna nkilikaxtlawankan, wa cha nkintachuwinkan ntu limaxkiyaw nkakni xtukuwini Dios» (Heb. 13:15).
17 ¿Chu wix tuku tlawapat? ¿Makamastapat tuku nalimakgapaxuwaya Dios? Komo ni chuna, ¿natlawaya tuku natalakaskin chu namalankiya akxni nalichuwinana xalakwan xalaksasti? Uma tamakamastan nalimasiya pi kanajlaniya chu “Dios tlakg nalakgati nixawa akxni makgniya tantum toro” (kalikgalhtawakga Salmo 69:30, 31). Liwana kakatsi pi tamakamastan nalakgchan xpumapakgsin Jehová, «xamuksun chu skaya namakgkatsi» chu tlan naʼakxilhan (Eze. 20:41). ¡Lu lipaxuw namakgkatsiya!
«Sikulanatlawaya ti kgaxmata mintachiwin»
18, 19. 1) ¿Tuku lakpuwankgo lhuwa latamanin xlakata la xlilakaskinka naskujniyaw Dios? 2) ¿Tuku kitaxtu akxni Dios nialh tlan kinkaʼakxilhan?
18 La uku, lhuwa nitlan lakpuwankgo la israelitas tiku xlamakgo xkilhtamaku Malaquías: «¿Tlan kitaxtu naskujniya Dios? ¿Tuku makglhtinanitaw kaj xlakata kgalhakgaxmataw[?]» (Mal. 3:14, Nueva Traducción Viviente). Xlakata lhuwa tuku kgalhiputunkgo, lakpuwankgo pi tuku wan Jehová nikxni nakgantaxtu chu xlimapakgsin nialh makgtayanan la uku. Lakpuwankgo pi tiku ankgo lichuwinankgo Dios kaj makgatsankgamakgolh kilhtamaku chu kaj kamakgasitsikgo tiku kalakgapaxialhnankgo.
19 Uma talakapastakni xtachuna tuku tilalh kjardín xaʼEdén. ¿Tiku tlawalh pi Eva nialh xlipaxuwalh lu xatlan latamat nema xkamaxkinit Dios? ¿Tiku malakpuwanilh pi ni xtalakaskin naliskuja xlakata tlan xtalalilh Dios? Wa Satanás, tiku la uku tlawa pi latamanin nalakpuwankgo pi nitu tlajakgo akxni tlawakgo xtalakaskin Dios. Pero Eva chu xchixku katsikgolh pi akxni Dios nialh tlan kinkaʼakxilhan makgatsankgayaw latamat. Chu nialh makgas nachuna nakaʼakgspula tiku natlawakgo la Adán chu Eva (Gén. 3:1-7, 17-19).
20, 21. 1) ¿Tuku tlawalh puskat tiku xninita xchixku chu la sikulunatlawaka? 2) ¿Tuku xlakata nachuna kilitlawatkan, chu la natlawayaw?
20 Tiku limasiyalh pi tlakg skgalala nixawa xapulana kinatlatnikan wa puskat xalak Sarepta tiku xninita xchixku. ¿Tuku tlawalh akxni kgaxmatli tuku wanilh palakachuwina? Tsukulh tlawa kaxtalanchu chu pulana maxkilh Elías. Jehová makgantaxtilh tuku xwaninit palakachuwina Elías, chuna la wan Biblia «chuntiya kgalhilh tuku nawa, Elías, puskat chu xfamilia xkgalhikgo tuku nawakgo, makgas kgalhikgolh tuku nawakgo. Xalanka xalu nema xkgalhi harina ni sputli, chu aktsu xalu nema xkgalhi aceite ni sputli, chuna la Jehová xwaninit Elías» (1 Rey. 17:15, 16).
21 Puskat xalak Sarepta tiku xninita xchixku tlawalh tuku la uku ni tlawamakgolh lhuwa millones latamanin. Lipawa Dios tiku lakgmaxtunan chu Dios ni makgxtakgli. Uma chu atanu tuku lichuwinan Biblia kinkamasiyanikgoyan pi Jehová lakgchan nalipawanaw (kalikgalhtawakga Josué 21:43-45 chu 23:14). Chu la uku na akxilhmaw lhuwa tuku kinkamasiyaniyan xlakata Jehová nikxni kamakgxtakga tiku tlan kaʼakxilha (Sal. 34:6, 7, 17-19). *
22. ¿Tuku xlakata la uku lu xlakaskinka naputsayaw pi Dios tlan nakinkaʼakxilhan?
22 Kilhtamaku akxni nakaputsananikan «xlipaks wanti lamakgolh nawan [...] xlikatlanka nkatuxawat» lakatsu wi chu xlikana namin (Luc. 21:34, 35). Nitu nakinkamakgtayayan maski lhuwa tuku nakgalhiyaw chu tumin. Tuku tlakg xtapalh nawan wa nakgaxmataw akxni Juez tiku Dios lakgayawanit nakinkawaniyan: «Katantit wixin xtalaksaknin nkinTlat; kakgalhitit ntapakgsin wa ntu ntakaxtlawanit wixin mimpalakatakan» (Mat. 25:34). Akxni ama kilhtamaku naʼakxilhaw la nakgantaxtu umakgolh tachuwin: «[Jehová] snun lan sikulanatlawaya ti kgaxmata mintachiwin; y mintalakgalhaman talama y makgtakgalhmaj» (Sal. 5:12). La uku xlakaskinka naputsayaw pi Dios tlan nakinkaʼakxilhan.
[Notas nema wilakgo kpágina]
^ párr. 21 Kaʼakxilhti La Atalaya 15 xla marzo kata 2005, página 13, párrafo 15, chu 1 xla agosto kata 1997, páginas 20 asta 25.
¿Lakapastakaku?
• ¿Tuku xlakata Jehová lakgchan xliputum kinakujkan nakakninaniyaw?
• ¿Tukuya tamakamastan makgamakglhtinan Jehová la uku?
• ¿Tuku wamputun «namakamastayaw tamakamastan nema nataxtu kkinkilhnikan», chu tuku xlakata namakamastaniyaw Jehová?
• ¿Tuku xlakata kiliputsatkan tlan nakinkaʼakxilhan Dios?
[Takgalhskinin]
[Epígrafe xla página 17]
¿Tuku lu xlakaskinka xlilaksakat chatum tse tiku nitu xkgalhi?
[Epígrafe xla página 19]
¿Tuku tasikulunalin makglhtinanaw akxni lichuwinanaw Dios?
[Epígrafe xla página 21]
Komo lu lipawanaw Jehová nikxni kintikamakgxtakgni
