Bilong Kisim Laip Oltaim, God i Mas Orait Long Yumi
Bilong Kisim Laip Oltaim, God i Mas Orait Long Yumi
“Bikpela, yu save mekim gut long ol man i bihainim tru tok bilong yu. Yu stap olsem hap plang bilong pait na yu haitim ol. Yu lukautim ol gut tumas na ol i stap gut tru.”—SNG. 5:12.
1, 2. Elaija i askim wido meri long Sarefat long mekim wanem? Em i mekim wanem tok promis long em?
WIDO meri na pikinini man bilong em i hangre, na profet bilong God tu i hangre. Taim dispela wido long Sarefat i redi long wokim paia bilong kukim kaikai, profet Elaija i askim em long givim wara na hap bret long em. Meri i amamas long givim wara long em long dring, tasol em i gat “liklik plaua tasol i stap long wanpela sospen graun na liklik hap wel bilong oliv i stap long narapela sospen.” Em i tokim profet olsem em i no gat kaikai inap long givim long em.—1 Kin. 17:8-12.
2 Tasol Elaija i tokim em, “Pastaim yu mas kisim liklik hap bilong dispela plaua na wel bilong yu na kukim bret na bringim i kam long mi. Na bihain yu ken kukim bret bilong yu tupela pikinini bilong yu. Long wanem, God, Bikpela bilong Israel, i tok olsem, plaua long sospen bilong yu i no inap long pinis na wel long sospen bilong yu i no inap long sot, i go inap long taim Bikpela i salim ren i kam daun gen long graun.”—1 Kin. 17:13, 14.
3. Yumi mas tingim wanem bikpela askim?
3 Tasol i no olsem dispela wido i mas tingim samting em bai mekim long laspela liklik kaikai i stap na em tasol, nogat. Em i mas tingim, em bai trastim Jehova long helpim em na pikinini man bilong em, o em bai tingim kaikai i bikpela samting moa long pasin bilong stap pren bilong God na long God i orait long em? Yumi tu i mas tingim wankain askim. Bai yumi tingim pasin bilong Jehova long orait long yumi i bikpela samting moa long pasin bilong kisim ol samting bilong skin? I gat planti as long trastim God na mekim wok bilong em. Na i gat sampela samting em yumi ken mekim na bai God i ken orait long yumi.
‘I Stret Tru Long Ol Man i Lotu Long Yu’
4. I gat wanem as na i stret tru long yumi lotuim Jehova?
4 I stret Jehova i gat tingting olsem ol man i mas lotuim em long pasin i stret. Wanpela lain wokboi bilong em long heven i wanbel long dispela na ol i tok: “Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting. Na long laik bilong yu yet yu bin wokim ol na ol i stap.” (Rev. 4:11) Jehova i bin wokim olgeta samting, olsem na i stret tru long yumi lotuim em.
5. Wanem as na pasin laikim bilong God i mas kirapim yumi long mekim wok bilong em?
5 Narapela as na yumi mas mekim wok bilong Jehova, em pasin bilong em long laikim tru yumi. Baibel i tok: “God i wokim ol manmeri na ol i kamap olsem God yet. God i mekim ol i kamap man na meri.” (Stt. 1:27) Man i stap fri long wokim tingting na long makim olsem em bai mekim wok bilong God o nogat. Jehova i givim laip long yumi, olsem na em i Papa bilong olgeta manmeri. (Luk 3:38) Em i wanpela gutpela papa, olsem na em i bin givim ol pikinini bilong em olgeta samting ol i mas i gat bilong mekim ol i amamas. “Em i save mekim san bilong en i kam antap” na “mekim ren i kam daun,” na bai graun i kamapim planti kaikai na ples i luk nais tumas.—Mat. 5:45.
6, 7. (a) Adam i givim wanem hevi long ol tumbuna pikinini bilong em? (b) Ofa bilong Krais bai mekim wanem bilong helpim ol man husat i laik bai God i orait long ol?
6 Na tu, Jehova i bin kisim bek yumi long ol samting nogut em sin i as bilong en. Taim Adam i mekim sin, em i kamap olsem man bilong pilai laki husat i save stilim mani long famili bilong em na tromoi long pilai laki. Taim Adam i bikhet long Jehova, i olsem em i stilim wanpela gutpela samting long ol pikinini bilong em—em gutpela laip bilong i stap oltaim oltaim. Pasin bilong tingim em yet i mekim na ol manmeri i kamap wokboi bilong sin. Olsem na olgeta manmeri i save sik, bel hevi, na bihain ol i dai. Man i mas givim pe na bai wokboi i ken kamap fri, na olsem tasol Jehova i bin givim pe bilong kisim bek yumi long ol dispela samting nogut. (Ritim Rom 5:21.) Jisas Krais i bihainim laik bilong Papa bilong em, na em i “givim laip bilong em olsem pe bilong baim bek planti manmeri.” (Mat. 20:28) Klostu nau dispela pe bai helpim tru olgeta manmeri em God i orait long ol.
7 Man Bilong Wokim yumi, Jehova, i bin mekim planti samting bilong helpim yumi long stap amamas na laip bilong yumi i gat as bilong en. Sapos Jehova i orait long yumi, bai yumi inap lukim ol wok em bai mekim bilong stretim olgeta hevi i bin painim ol manmeri. Na Jehova bai wok yet long helpim yumi wan wan long save olsem em i Man bilong “givim gutpela pe long ol man i wok strong long painim em.”—Hib. 11:6.
Ol Manmeri Bilong Yu Bai Amamas Long Helpim Yu
8. Samting i kamap long Aisaia i givim wanem skul long yumi long pasin bilong mekim wok bilong God?
8 Sapos yumi laik bai God i orait long yumi, yumi mas mekim wok i stret long dispela pasin bilong i stap fri long makim samting yumi laik mekim. Dispela i olsem, long wanem, Jehova i no save subim man long mekim wok bilong em. Long taim bilong Aisaia, God i askim: “Bai yumi salim husat? Husat bai i bringim tok bilong mi i go?” Jehova i soim rispek long profet Aisaia na larim em i wokim disisen long samting em i laik mekim. Tingim amamas bilong Aisaia long tok olsem: “Yu salim mi.”—Ais. 6:8.
9, 10. (a) Yumi mas i gat wanem tingting long mekim wok bilong God? (b) Bilong wanem i stret yumi givim bel olgeta long mekim wok bilong Jehova?
9 Ol manmeri i stap fri long makim olsem ol i laik mekim wok bilong God o nogat. Jehova i laik bai yumi amamas long mekim wok bilong em. (Ritim Josua 24:15.) God i no inap amamas long man i bel hevi long lotuim em, na tu, em i no inap orait long lotu man i mekim bilong amamasim man tasol. (Kol. 3:22) Sapos yumi givim hap bel tasol long lotuim God, long wanem, yumi larim ol samting bilong graun i pasim rot bilong yumi, God bai i no orait long yumi. (Kis. 22:29) Jehova i save olsem pasin bilong givim bel olgeta long mekim wok bilong em i gutpela samting bilong helpim yumi. Moses i tokim ol Israel long bihainim rot bilong i stap gut, na bilong mekim olsem ol i mas ‘laikim tru God, Bikpela bilong ol, na harim tok bilong en na bel tru long em oltaim.’—Lo 30:19, 20.
10 King Devit bilong Israel bilong bipo i singsing long Jehova olsem: “Taim yu laik pait long ol birua ol manmeri bilong yu bai [“amamas long,” NW ] i go wantaim yu na helpim yu, na bai yupela i go antap long maunten bilong God. Olgeta nait, wara i save kamap long gras, na gras i kisim nupela strong. Na bai yu tu yu kisim strong long olgeta de.” (Sng. 110:3) Nambawan samting long planti manmeri long nau em long kisim bikpela mani na painim amamas. Tasol long ol manmeri i laikim tumas Jehova, ol wok lotu bilong ol i stap nambawan long ol narapela samting. Pasin bilong ol long givim bel tru long autim gutnius i kamapim klia samting i nambawan bikpela samting long ol. Ol i bilip olsem Jehova inap tru long helpim ol long kisim ol samting ol i mas i gat long olgeta wan wan de.—Mat. 6:33, 34.
Ol Ofa God i Orait Long En
11. Pasin bilong mekim ol ofa long Jehova i helpim ol Israel olsem wanem?
11 Aninit long kontrak bilong Lo, ol manmeri bilong God i save mekim ol ofa em God i orait long en bambai em i ken amamas long ol. Wok Pris 19:5 i tok: “Taim yupela i mekim ofa bilong kamap wanbel wantaim mi, yupela i mas bihainim lo mi bin givim yupela, bilong mekim dispela ofa. Sapos yupela i mekim olsem, bai mi laikim ofa bilong yupela.” Narapela hap bilong dispela buk bilong Baibel i tok: “Sapos yupela i mekim wanpela ofa bilong tenkyu long mi Bikpela, orait yupela i mas bihainim lo bilong ofa, na bai mi laikim ofa bilong yupela.” (Wkp. 22:29) Taim ol Israel i ofaim ol animal long alta bilong Jehova, em ol ofa Jehova i orait long en, smel bilong en i go antap na God i “belgut long en.” (Wkp. 1:9, 13) Ol dispela samting lain bilong em i mekim bilong soim olsem ol i laikim em, dispela i mekim isi bel bilong em. (Stt. 8:21) Long ol dispela tok bilong Lo, i gat wanpela stiatok i stret long nau. Olsem: Ol man husat i mekim ol ofa Jehova i laikim, em i save orait long ol. Em i laikim wanem kain ofa? Tingim tupela samting long laip bilong yumi: pasin bilong yumi na toktok bilong yumi.
12. Wanem ol kain pasin inap mekim na ‘bodi man i givim olsem sakrifais’ i samting nogut tru long ai bilong God?
12 Long pas aposel Pol i raitim long ol Rom, em i tok: “Givim bodi bilong yupela olsem sakrifais i stap laip, na i stap holi, na God i orait long en. Dispela em wanpela wok bilong God yupela i mekim wantaim gutpela tingting.” (Rom 12:1) Bilong God i ken orait long man, bodi bilong man i mas i stap kain bodi em God i laikim. Sapos man i mekim bodi i doti long smok, kaikai buai, kisim drak, dring planti tumas, dispela bodi i no gutpela ofa long ai bilong God. (2 Kor. 7:1) Na tu, man i “save mekim pasin pamuk, em i mekim sin long bodi bilong em yet,” olsem na olgeta kain pasin pamuk i save mekim na ofa bilong man i kamap samting nogut tru long ai bilong Jehova. (1 Kor. 6:18) Bilong amamasim God, man i mas ‘kamap holi long olgeta wokabaut bilong em.’—1 Pita 1:14-16.
13. Bilong wanem em i gutpela pasin long litimapim nem bilong Jehova?
13 Pasin bilong toktok, em narapela ofa God inap amamas long en. Ol man i laikim tumas Jehova ol i save givim biknem long em taim ol i stap long ai bilong ol man o ol i stap long haus bilong ol yet. (Ritim Song 34:1-3.) Ritim Song 148 i go 150, na tingim olsem wanem dispela 3-pela song i kirapim yumi long litimapim nem bilong Jehova. Tru tumas, pasin bilong ‘litimapim nem bilong God em i gutpela pasin ol stretpela manmeri i save mekim.’ (Sng. 33:1) Na Man i stap gutpela piksa bilong yumi, Jisas Krais, i kamapim klia olsem i bikpela samting long litimapim nem bilong God long rot bilong autim gutnius.—Luk 4:18, 43, 44.
14, 15. Hosea i kirapim ol Israel long givim wanem kain ofa? Jehova i mekim wanem long ol man i mekim dispela kain ofa?
14 Taim yumi givim bel long autim tok, dispela i kamapim klia olsem yumi laikim Jehova na yumi laik bai em i orait long yumi. Tingim tok em profet Hosea i bin mekim long kirapim ol Israel husat i lotuim ol giaman god na God i no orait moa long ol. (Hos. 13:1-3) Hosea i tokim ol long beten long Jehova olsem: “Plis, lusim tingting long ol rong; na kisim samting i gutpela, na bai mipela i givim maus bilong mipela, olsem ol yangpela bulmakau, long yu.”—Hos. 14:1, 2, NW.
15 Bulmakau i gat bikpela pe moa winim ol arapela animal em ol Israel inap givim olsem ofa long Jehova. Olsem na dispela tok ‘givim maus bilong mipela olsem ol yangpela bulmakau,’ i makim ol gutpela tok man i mekim bilong litimapim nem bilong God, em ol tok man i pilim tru long bel na i bin tingting gut long en paslain long em i mekim. Jehova i tok wanem long ol man i mekim kain ofa olsem? Em i tok: “Bai mi laikim ol long bel bilong mi olgeta.” (Hos. 14:4) Ol manmeri i mekim ol kain ofa olsem bilong litimapim nem bilong em, Jehova i lusim ol rong bilong ol, orait long ol, na i stap pren bilong ol.
16, 17. Taim pasin bilong bilip long God i kirapim man long autim gutnius, Jehova i ting olsem wanem long dispela ofa bilong litimapim nem bilong em?
16 Pasin bilong litimapim nem bilong Jehova long ai bilong ol man em i bikpela hap wok bilong lotu i tru. Pasin bilong givim biknem long trupela God i bikpela samting tru long man bilong raitim song, olsem na em i beten olsem: “Bikpela, mi prea na givim tenkyu long yu. Yu ken kisim tenkyu [“ofa mi mekim long maus,” NW ] bilong mi.” (Sng. 119:108) Olsem wanem long nau? Aisaia i tok profet na stori long wanpela bikpela lain long taim bilong yumi, olsem: “Ol manmeri bai i litimapim biknem bilong mi, Bikpela. . . . Na bai mi amamas long lukim ol manmeri bilong mi i bringim” ol presen bilong ol “na ofaim antap long alta bilong mi.” (Ais. 60:6, 7) Bilong truim dispela tok profet, planti milion manmeri i ‘givim biknem long God olsem sakrifais, ol i yusim maus bilong ol long tokaut long nem bilong en.’—Hib. 13:15.
17 Olsem wanem long yu? Yu save mekim ol ofa em God i orait long en? Sapos nogat, bai yu senisim sampela samting long laip bilong yu na kirap long litimapim nem bilong Jehova long ai bilong ol man? Taim bilip i kirapim yu long autim gutnius, Jehova bai “laikim tumas ofa” bilong yu, winim “ol ofa bilong bulmakau.” (Ritim Song 69:30, 31.) Yu ken bilip olsem “gutpela smel” bilong ofa yu mekim long litimapim nem bilong Jehova bai i go antap long em na em bai orait long yu. (Ese. 20:41) Amamas yu bai kisim long dispela samting i winim tru olgeta narapela amamas.
‘Bikpela i Mekim Gut Long Ol Man i Bihainim Tok’
18, 19. (a) Long nau planti manmeri i gat wanem tingting long mekim wok bilong God? (b) Sapos God i no orait long man, wanem samting bai kamap?
18 Long nau, planti manmeri i gat wankain tingting olsem bilong sampela man long taim bilong Malakai: “Yumi lotu long God na God i no helpim yumi. Watpo yumi bihainim tok bilong en?” (Mal. 3:14) Pasin bilong laikim tumas mani kago i mekim na ol i ting ol samting God i tingting pinis long mekim em i no inap kamap, na ol lo bilong em i no stret long yumi bihainim long nau. Long tingting bilong ol, ol man i autim gutnius ol i westim taim bilong ol na sikirapim bel bilong ol man.
19 Namba wan taim tru dispela kain tingting i bin kamap em long gaden Iden. Satan i bin kirapim Iv long ting olsem dispela gutpela laip Jehova i givim long em i samting nating, na i no bikpela samting long God i mas orait long em. Long nau, Satan i wok long kirapim ol man long ting olsem pasin bilong mekim laik bilong God i no inap helpim ol. Tasol Iv na man bilong em i bin kisim save olsem, sapos God i no orait long man, orait man i no inap stap laip. Ol manmeri husat i bihainim pasin nogut bilong tupela, i no longtaim na ol tu bai kisim save long dispela samting.—Stt. 3:1-7, 17-19.
20, 21. (a) Wido bilong Sarefat i mekim wanem? Wanem samting i kamap? (b) Olsem wanem yumi inap bihainim pasin bilong wido meri bilong Sarefat? Bilong wanem yumi mas mekim olsem?
20 Tingim samting i bin kamap long Adam na Iv na skelim wantaim samting i bin kamap long wido meri bilong Sarefat. Taim meri i harim pinis gutpela tok bilong Elaija, em i kirap wokim bret na pastaim em i givim sampela long dispela profet. Orait nau Jehova i truim tok promis em i bin mekim long rot bilong Elaija. Baibel i tok: “Elaija na famili bilong dispela meri i gat kaikai inap long planti de. Plaua long sospen bilong en i no pinis na wel long sospen bilong en i no sot, olsem Bikpela i bin tok long maus bilong Elaija.”—1 Kin. 17:15, 16.
21 Dispela wido bilong Sarefat i mekim samting em planti milion manmeri long nau i no gat laik long mekim. Em i bilip tru long dispela God bilong kisim bek ol manmeri, na God i helpim em. Dispela stori na sampela stori moa bilong Baibel i kamapim klia olsem i stret tru yumi trastim Jehova. (Ritim Josua 21:43-45; 23:14.) Ol samting i painim ol Witnes Bilong Jehova long nau, dispela tu i kamapim klia olsem Jehova bai no lusim ol man em i orait long ol.—Sng. 34:6, 7, 17-19. a
22. Bilong wanem yumi mas hariap long mekim ol samting na bai God i ken orait long yumi?
22 De bilong kot bilong God “bai kamap long olgeta manmeri i stap long graun,” dispela de i kam klostu. (Luk 21:34, 35) No gat rot long abrusim. Long dispela de, mani kago bai i no bikpela samting. Bikpela samting em yumi laik harim Jas em God i bin makim i tok olsem: “Yupela husat i kisim blesing long Papa bilong mi, yupela kam. Kisim dispela Kingdom ol i redim bilong yupela kirap long taim ol manmeri i bon long graun.” (Mat. 25:34) Em nau, ‘Bikpela bai mekim gut long ol man i bihainim tru tok bilong em. Em bai stap olsem hap plang bilong pait na haitim ol. Em bai lukautim ol gut tumas na ol i stap gut tru.’ (Sng. 5:12) Olsem na yumi mas mekim ol samting na bai God i ken orait long yumi, a?
[Futnot]
a Lukim Wastaua, Mas 15, 2005, pes 13, paragraf 15; Ogas 1, 1997, pes 20-25.
Yu Inap Tingim?
• Bilong wanem i stret yumi givim bel tru long lotuim Jehova?
• Jehova i laikim wanem kain ofa long nau?
• Dispela tok ‘givim maus bilong mipela olsem ol yangpela bulmakau’ i makim wanem samting? I gat wanem as na yumi mas givim dispela ofa long Jehova?
• Bilong wanem yumi mas mekim ol samting na bai God i ken orait long yumi?
[Askim Bilong Stadi]
[Piksa long pes 13]
Profet bilong God i askim wanpela mama i sot long kaikai long mekim wanem disisen?
[Piksa long pes 15]
Taim yumi givim biknem long Jehova olsem ofa, dispela i helpim yumi olsem wanem?
[Piksa long pes 17]
Sapos yu trastim tru Jehova, bai em i no lusim yu
