E noaa te ora mure ore maoti te farii maitai a te Atua
E noaa te ora mure ore maoti te farii maitai a te Atua
“Na oe hoi, e Iehova, e haamaitai i te parau-tia ra, e ua haaatihia oia e to aroha [aore ra farii maitai] mai te paruru.”—SAL. 5:12.
1, 2. Eaha ta Elia i ani i te vahine ivi no Zarephate, ma te haapapu atu i te aha?
TE POHE poia ra te hoê vahine ivi no Zarephate e ta ˈna tamaiti, oia atoa Elia peropheta a te Atua. A haere ai teie vahine e tunu i te maa, ua ani Elia i te pape e te pane. Ua ineine oia i te horoa ˈtu i te pape, tera râ ‘e maa faraoa [ota] noa hoê rima e î to roto i ta ˈna hue, e e maa hinu to roto i te farii.’ Ua manaˈo oia e eita e navai na ˈna, na ta ˈna tamaiti e na te peropheta, e tera iho â ta ˈna i parau atu.—Arii 1, 17:8-12.
2 Ua onoono Elia ma te parau: “E mata na râ i te hamani i te hoê vahi iti na ˈu, a hopoi mai ai ia ˈu nei, a hamani ai i ta oe e ta to tamaiti. Te na ô maira hoi te Atua o Iseraela [o] Iehova, E ore te hue faraoa e iti, e ore hoi e pau te farii hinu.”—Arii 1, 17:13, 14.
3. Eaha te faaotiraa faufaa ta tatou e rave?
3 E faaotiraa faufaa roa ta teie vahine ivi e rave hau atu i te maitiraa e horoa ˈtu i te maa e toe ra. E tiaturi anei oia ia Iehova no te faaherehere ia ˈna e ta ˈna tamaiti? Aore ra mea faufaa aˈe no ˈna ta ˈna maa i te farii maitai a te Atua e to ˈNa auhoaraa? Hoê â faaotiraa ta tatou. E tapi anei tatou i te farii maitai a Iehova hau atu i te imiraa ia navai te faufaa? E tano ia tiaturi e ia tavini tatou ia Iehova. Te vai atoa ra te mau ravea e imi ai e e fanaˈo ai tatou i te farii maitai a te Atua.
‘E au ia haamorihia oe’
4. No te aha mea tano ai ia haamori ia Iehova?
4 E tiaraa to Iehova ia titau i te taata ia haamori ia ˈna ma te au. Ua haapapu amui ta ˈna mau melahi i te reira: “E au te hanahana ia oe, e te Fatu [te Atua ra o Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” (Apo. 4:11) Mea tano iho â ia haamori tatou ia Iehova na ˈna hoi i hamani i te mau mea atoa.
5. No te aha te here o te Atua e turai ai ia tatou ia tavini ia ˈna?
5 No to Iehova here rahi ia tatou e tavini atoa ˈi tatou ia ˈna. Te na ô ra te Bibilia: “Hamani ihora hoi te Atua i te taata ma to ˈna ihora huru, . . . i hamani oia ia raua, o te tane e te vahine.” (Gen. 1:27) E ravea ta te taata e feruri e e rave i te faaotiraa. E fanaˈoraa e e hopoia atoa no ǒ mai i te Atua. Ma te horoa mai i te ora, ua riro Iehova ei Metua no te huitaata. (Luka 3:38) Mai te hoê papa maitai, ua rave oia i te mau mea atoa ia oaoa ta ˈna mau tamaroa e tamahine. ‘Te faahiti nei oia i to ˈna mahana’ e “te haamairi mai nei oia i te ûa,” ia tupu rahi te maa i nia i te fenua nehenehe mau.—Mat. 5:45.
6, 7. (a) Eaha ta Adamu i faatae i nia i to ˈna huaai atoa? (b) Eaha ta te feia fariihia e te Atua e fanaˈo maoti te tusia o te Mesia?
6 Ua faaora atoa Iehova ia tatou i te mau faahopearaa ino o te hara. I to Adamu hararaa, ua riro oia mai te hoê taata pere moni tei faaere i to ˈna utuafare. Ma te orure hau ia Iehova, ua faaere Adamu i to ˈna huaai i te oaoa mure ore. No to ˈna miimii i riro ai te huitaata ei tîtî no te huru tia ore. No reira te taata atoa e roohia ˈi i te maˈi, te oto, e te pohe. E titauhia te moni no te faatiamâ i te hoê tîtî e ua horoa Iehova i te hoo no te faaora ia tatou i tera mau faahopearaa ino. (A taio i te Roma 5:21.) Ia au i te hinaaro o to ˈna Metua, ua horoa Iesu Mesia i “to ˈna ora ei hoo no te taata e rave rahi.” (Mat. 20:28) Ua fatata te feia ta te Atua e farii i te fanaˈo i te mau haamaitairaa taatoa o taua hoo ra.
7 E haapaeraa rahi ta Iehova to tatou Atua Poiete i rave ia fanaˈo tatou i te hoê oraraa oaoa e auraa to te reira. Maoti ta ˈna farii maitai e ite ai tatou e nafea oia e faaore ai i te mauiui o te huitaata. E faaite Iehova ia tatou taitahi e nafea oia e “faautua [maitai ai] i te feia i imi papu ia ˈna.”—Heb. 11:6.
E pûpû te nunaa o Iehova ia ratou ma te aau tae
8. Eaha ta te tupuraa o Isaia e haapii maira no nia i te taviniraa i te Atua?
8 Ia faaohipa maitai tatou i to tatou tiamâraa e maiti e farii mai ai te Atua. Aita Iehova e faahepo ra i te taata ia tavini ia ˈna. I te tau o Isaia a imi ai te Atua i te hoê taata no te tahi ohipa, ua ui Oia: “O vai ta ˈu e tono; o vai te haere no tatou?” Ua faatura Iehova i te peropheta ma te vaiiho ia ˈna ia faaoti. Ua oaoa roa Isaia i te pahonoraa ˈtu: “Inaha, teie au; o vau ta oe e tono.”—Isa. 6:8, 9.
9, 10. (a) E nafea tatou e tavini ai i te Atua? (b) No te aha mea tano ai ia tavini tatou ia Iehova ma te aau e puai atoa?
9 E tiamâraa to te taata e tavini i te Atua aore ra eita. Te hinaaro ra Iehova ia tavini tatou ia ˈna ma te aau tae. (A taio i te Iosua 24:15.) Eita te Atua e mauruuru i te taata e taahoa i te haamori ia ˈna. Eita atoa oia e farii i te feia o te haamori ia ˈna ia itehia mai ratou e te taata. (Kol. 3:22) Ia faataupupu tatou i roto i ta tatou taviniraa moˈa, ma te vaiiho i te mau ohipa a teie nei ao ia haafifi i ta tatou haamoriraa, eita ïa te Atua e farii mai. (Exo. 22:29) Ua ite Iehova e mea maitai ia tavini tatou ia ˈna ma te aau e puai atoa. Ua faaitoito Mose i te mau Iseraela ia maiti i te ora ma te ‘hinaaro i to ratou Atua ra ia Iehova, ma te faaroo i to ˈna reo, e ma te ati atu ia ˈna.’—Deut. 30:19, 20.
10 Ua himene Davida arii o Iseraela i tahito ia Iehova: “E tia rahi roa to to oe ra mau taata, i te mahana e faaitehia ˈi to oe ra mana ma te tura moˈa ra; to oe ra huaai, mai te hau ïa no te opu ra o te poipoi.” (Sal. 110:3) E tapi e rave rahi taata i teie mahana i te oraraa fanaˈo e te faaanaanataeraa. Area te feia e here ra ia Iehova, o ta ratou ïa taviniraa moˈa na mua. Na to ratou itoito rahi i te pororaa i te evanelia e haapapu ra eaha ta ratou mau fa matamua. Te tiaturi roa nei ratou e na Iehova e haamâha i to ratou mau hinaaro mau i te mau mahana atoa.—Mat. 6:33, 34.
Tusia ta te Atua e farii
11. Ma te pûpû i te tusia ia Iehova e fanaˈo ai Iseraela i te aha?
11 Ia au i te faufaa o te Ture, ua pûpû te nunaa o te Atua i te mau tusia e au ia fariihia ratou e Iehova. Te na ô ra te Levitiko 19:5: “Ia hopoi outou i te tusia no te maitai ia Iehova ra, ei hopoiraa itehia mai ta outou.” Te taio atoa nei tatou: “Ia hopoi outou i te tusia haamaitai ia Iehova ra, e hopoi i te tusia e fariihia mai.” (Lev. 22:29) I to Iseraela pûpûraa i te mau tusia animara e au i nia i te fata a Iehova, mai te “hauˈa noˈanoˈa” te au auahi o te reira no te Atua mau. (Lev. 1:9, 13) Ua mauruuru e ua farii oia i tera mau faaiteraa i te here o to ˈna nunaa. (Gen. 8:21) E haapiiraa ïa ta tatou e huti mai i teie mahana. E farii Iehova i te feia e pûpû i te mau tusia e au. Teihea ïa mau tusia? E hiˈopoa anaˈe e piti tuhaa o te oraraa: to tatou haerea e ta tatou huru paraparau.
12. No teihea mau peu e au ore ai te Atua i te ‘pûpûraa i to tatou tino ei tusia’?
12 Ua papai te aposetolo Paulo i to Roma: “Ia pûpû atu outou i to outou mau tino ei tusia ora, e te moˈa, e te au hoi i te Atua ra, o te haamori au ïa ia outou.” (Roma 12:1) Ia farii mai te Atua, e titauhia ia moˈa noa te tino o te hoê taata. Ia haaviivii oia ia ˈna i te avaava, te huero bétel, te raau taero, e te inu-hua-raa i te ava, e faufaa ore ïa ta ˈna tusia. (Kor. 2, 7:1) Mea au ore na Iehova te tusia a te taata taiata no te mea ‘te hamani ino ra te taata faaturi i to ˈna iho tino.’ (Kor. 1, 6:18) Ia mauruuru te Atua, ia ‘moˈa ïa te hoê taata i to ˈna haerea atoa.’—Pet. 1, 1:14-16.
13. No te aha e tano ai ia arue ia Iehova?
13 Ua taaihia te tahi atu tusia ta Iehova e au i ta tatou huru paraparau. E parau maitai anaˈe ta te feia e here ra ia Iehova no nia ia ˈna i te vahi taata e i roto atoa i to ratou utuafare. (A taio i te Salamo 34:1-3.) Mea rahi roa te parau haamaitai, aore ra arue, ia Iehova i roto i te Salamo 148-150 ta outou e taio. “E au [hoi] te haamaitai i te feia parau-tia.” (Sal. 33:1) Ua haapapu Iesu Mesia, to tatou Hiˈoraa, i te faufaaraa ia arue i te Atua ma te poro i te evanelia.—Luka 4:18, 43, 44.
14, 15. Ua aˈo Hosea i te mau Iseraela ia pûpû i teihea mau tusia, e ua nafea Iehova?
14 Te haapapu ra ta tatou pororaa itoito rahi i to tatou here ia Iehova e to tatou hinaaro ia fariihia mai e ana. Ei hiˈoraa, ua aˈo te peropheta Hosea i te mau Iseraela tei haamori i te mau atua ê e tei ere i te farii maitai a te Atua. (Hos. 13:1-3) Ua parau Hosea ia ratou ia taparu: “E faaore mai [oe Iehova] i te mau hara atoa, a farii mai ai ia matou ma te aroha; a horoa ˈtu ai matou i te tusia o to matou vaha.”—Hos. 14:1, 2.
15 “Te tusia o to [t]atou vaha,” o te mau parau arueraa haavare ore ïa e te feruri-maitai-hia i te Atua mau. Ua nafea Iehova i te feia e pûpû ra i tera mau tusia arueraa? Ua na ô oia: “E aroha noa ˈtu [vau] ia ratou.” (Hos. 14:4) Ua faaore Iehova i ta ratou mau hara, ua farii e ua faahoa ˈtu ia ratou.
16, 17. Mai te aha te huru o Iehova ia poro te hoê taata i te evanelia ei arueraa no to ˈna faaroo ia ˈNa?
16 E tuhaa faufaa o te haamoriraa mau te arueraa ia Iehova i te vahi taata. Mea faufaa roa no te papai salamo te faahanahanaraa i te Atua mau i taparu ai oia ia ˈna: “Ite mai na oe, e Iehova, i ta ˈu nei mau euhe,” aore ra tusia o te vaha. (Sal. 119:108) E i teie mahana? Ua tohu Isaia e e “himene” te hoê nahoa taata i to tatou tau ‘i te haamaitairaa ia Iehova. E tae [ta ratou mau ô] i nia i ta te Atua fata ma te itehia mai.’ (Isa. 60:6, 7) E mirioni taata e pûpû ra i ‘te tusia haamaitai i te Atua, oia hoi ta te vaha, i te haamaitairaa i to ˈna iˈoa.’—Heb. 13:15.
17 E oe ïa? Te pûpû ra anei oe i te tusia e au i te Atua? Mai te peu e aita, e rave anei oe i te mau tauiraa hinaarohia no te arue ia Iehova i te vahi taata? Ia turai to faaroo ia oe ia poro i te evanelia, “mea au rahi to [ta oe pûpûraa] ia Iehova, i to te puaatoro oni apî.” (A taio i te Salamo 69:30, 31.) Ia papu ia oe e e tae te “hauˈa noˈanoˈa” o ta oe tusia arueraa ia Iehova o te farii ia oe. (Ezk. 20:41) E hope roa ïa oe i te oaoa i tera taime.
‘Na Iehova e haamaitai i te taata parau-tia’
18, 19. (a) Eaha te manaˈo o te taata e rave rahi no nia i te taviniraa i te Atua i teie mahana? (b) Eaha te hopea ia ere i te farii maitai a te Atua?
18 I teie mahana, hoê â manaˈo to te taata e rave rahi e to vetahi i te tau o Malaki: “E mea faufaa ore te haamori i te Atua: e eaha ta tatou faufaa i te haapaoraa i ta ˈna parau?” (Mal. 3:14) No to ratou hoi nounou taoˈa i manaˈo ai ratou e eita te opuaraa a te Atua e tupu e mea faufaa ore ïa ta ˈna mau ture. No ratou, e mâuˈa te taime ia poro i te evanelia e e riri mai te taata.
19 No ǒ roa mai teie huru i te ô i Edene. Ua faatiaturi Satani ia Eva e mea faufaa ore te oraraa faahiahia ta Iehova i horoa mai, ia vahavaha ïa oia i ta te Atua farii maitai. I teie mahana, te faatiaturi noa ra Satani i te taata e aita e faufaa ia rave i te hinaaro o te Atua. Ua taa râ ia Eva e ta ˈna tane e e pohe raua no te ereraa i te farii maitai a te Atua. Fatata te feia e pee ra i to raua hiˈoraa ino e ite ai i te hoê â hopea.—Gen. 3:1-7, 17-19.
20, 21. (a) Eaha ta te vahine ivi no Zarephate i rave, e eaha tei tupu mai? (b) E nafea e no te aha tatou e pee ai i te hiˈoraa o te vahine ivi no Zarephate?
20 A feruri na i te hopea ino o Adamu raua Eva e te hopea maitai o te tupuraa i faahitihia na no nia ia Elia e te vahine ivi no Zarephate. I to te vahine faarooraa i te mau parau mahanahana a Elia, ua tunu oia i te pane e ua horoa ˈtu i te tahi na te peropheta na mua. I muri iho, ua faatupu Iehova i ta ˈna i fafau na roto ia Elia. Te na ô ra te faatiaraa: “Ua amu ihora oia e o Elia, e to ˈna atoa utuafare, e rave rahi aˈera te mahana. Aore hoi taua hue faraoa [ota] ra i iti, aore hoi te farii hinu i pau, ta Iehova hoi i parau mai, i te vaha o Elia.”—Arii 1, 17:15, 16.
21 I teie tau, aita i rahi te taata tei ineine i te pee i te hiˈoraa o te vahine ivi no Zarephate. Ua tiaturi mau oia i te Atua faaora, tei tauturu ia ˈna. Te haapapu ra teie e te tahi atu mau faatiaraa Bibilia e mea tano iho â ia tiaturi ia Iehova. (A taio i te Iosua 21:43-45; 23:14.) Te haapapu atoa ra te oraraa o te mau Ite no Iehova i teie tau e eita roa ˈtu te Atua e faarue i te feia ta ˈna i farii.—Sal. 34:6, 7, 17-19. *
22. No te aha mea ru ai ia imi oioi i te farii maitai a te Atua?
22 Te piri maira te mahana e haava ˈi te Atua i “to te ao atoa nei.” (Luka 21:34, 35) Aita e hororaa. Eita tatou e ora i te taoˈa rahi aore ra te oraraa fanaˈo. Ia faaroo râ tatou i te Haava faatoroahia e te Atua ia parau: “A haere mai outou, e te feia i faaorahia e tau Metua, e parahi i te basileia i haapaohia no outou.” (Mat. 25:34) ‘Na Iehova e haamaitai i te parau-tia e e haaatihia oia e to ˈna aroha [aore ra farii maitai] mai te paruru.’ (Sal. 5:12) E imi anaˈe ïa i te farii maitai a te Atua.
[Nota i raro i te api]
^ A hiˈo i Te Pare Tiairaa o te 1 no Eperera 2005, api 10, paratarafa 15 e te 1 no Atete 1997, api 20-25.
Te haamanaˈo ra anei outou?
• No te aha e tano ai ia haamori ia Iehova ma to tatou aau e puai atoa?
• Eaha te mau tusia ta Iehova e farii i teie mahana?
• Eaha ‘te tusia o to tatou vaha,’ e no te aha e pûpû ai i te reira ia Iehova?
• No te aha e imi ai i te farii maitai a te Atua?
[Uiraa haapiiraa]
[Hohoˈa i te api 19]
Eaha ta te peropheta a te Atua i ani i tera mama veve?
[Hohoˈa i te api 21]
Eaha te haamaitairaa ia pûpû i te tusia arueraa ia Iehova?
[Hohoˈa i te api 23]
Eita roa oe e tatarahapa i te tiaturi-mau-raa ia Iehova
