Máax ku lúubul utsil tiʼ Dioseʼ táan u páaʼtik kuxtal minaʼan u xuul

«Techeʼ Yuumtsil ka kiʼtʼantik máax u yoksmaj u yóol tiʼ teech; baʼpachtaʼan tumen a wutsil.» (SAL. 5:12)

1, 2. ¿Baʼax tu kʼáataj Elías tiʼ le koʼolel kimen u yíicham kajaʼan kaʼach Sareptaoʼ, yéetel baʼax tu yaʼalaj kun úuchul?

JUNTÚUL koʼolel kimen u yíicham kajaʼan kaʼach Sarepta yéetel u hijoeʼ jach wiʼijoʼob, tsʼoʼoleʼ bey xan Elías. Ka taal le koʼolel óotsil u tʼab u kʼaakʼ utiaʼal u beetik baʼal u jaantoʼobeʼ, le profetaoʼ tu kʼáataj waaj yéetel jaʼ utiaʼal u yukʼe. Le koʼoleloʼ yaan jaʼ tiʼ u tsʼáa u yukʼe, baʼaleʼ chéen «junláapʼ harina tiʼ junpʼéel káat, yéetel junpʼíit aceite tiʼ junpʼéel x-tʼojob» pʼaatal kaʼach tiʼ. Le oʼolal tu yaʼalaj tiʼ Elías minaʼan baʼal u tsʼaa tiʼ (1 Rey. 17:8-12).

² Baʼaleʼ le profetaoʼ seguernaj u yaʼaliktiʼ: «Yéetel le harina yaantechoʼ, beet tiʼ teen junpʼéel chan piimpim waaj ka a taas tiʼ teen, ku tsʼoʼokoleʼ ka beetik uláakʼoʼob utiaʼal ka a jaant teech yéetel a paal. Tumen Yuumtsil u [Dios] u kajnáaliloʼob Israeleʼ tsʼoʼok u yaʼalik, maʼ bíin xuʼupuk le harina yaan teʼ káatoʼ, mix le aceite yaan teʼ x-tʼojo[boʼ]» (1 Rey. 17:13, 14).

3. ¿Baʼax jach unaj k-chʼaʼtuklik k-beetik?

³ Le koʼolelaʼ maʼ chéen unaj u chʼaʼtuklik bix kun meyajtiʼ le junpʼíit baʼax pʼaataltiʼoʼ. ¿Yaan wa u beetik baʼal u jaant letiʼ yéetel u hijo, wa yaan u tsʼáaik u jaant le profeta utiaʼal u lúubul utsil tiʼ Dios yéetel maʼ u xuʼulul u biskuba tu yéetel? ¿Yaan wa u kʼubik u yóol tiʼ le áantaj ku tsʼáaik Jéeobaoʼ? Toʼoneʼ láayliʼ unaj k-chʼaʼtuklik junpʼéel baʼal beyoʼ. ¿K-tsʼáaik wa táanil k-kaxtik ayikʼaliloʼob, wa k-ilik k-lúubul utsil tiʼ Jéeoba? Toʼoneʼ jach yaan baʼax oʼolal k-kʼubik k-óol tiʼ Dios utiaʼal ka k-meyajte. Yéetel ku yaʼaliktoʼon baʼaxoʼob unaj k-beetik utiaʼal k-lúubul utsil tiʼ letiʼ.

Jéeobaeʼ ku náajmatik ka k-adorarte

4. ¿Baʼaxten ku náajmatik Jéeoba ka k-adorarte?

⁴ Jéeobaeʼ yaan u derechoil tiʼ utiaʼal u  yaʼaliktoʼon ka k-adorart jeʼex u kʼáateʼ. Le angeloʼob meyajtik teʼ kaʼanoʼ, tu kʼayoʼob: «Yuumtsil yéetel k-Jajal Dios, techeʼ [ka] náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel beetaʼaboʼob» (Apo. 4:11). Letiʼ Beetmil tuláakal baʼal, le oʼolal ku náajmatik ka k-adorarte.

5. ¿Baʼaxten unaj u péekskoʼon k-meyajt Dios le yaabilaj ku yeʼesiktoʼonoʼ?

⁵ Uláakʼ baʼax oʼolal unaj k-meyajtik Jéeobaeʼ tumen jach u yaabiltmoʼon. Le Bibliaoʼ ku yaʼalikeʼ «tu beetaj jeʼel bix letiʼeʼ; xiib yéetel koʼolel» (Gén. 1:27). Tsʼoʼoleʼ tu tsʼáajtoʼon u jatsʼuts páajtalil k-chʼaʼtuklik baʼax ken k-beete. Tumen letiʼ tsʼaamil k-kuxtaleʼ letiʼ k-Taata (Luc. 3:38). Yéetel jeʼex juntúul maʼalob taatatsileʼ, letiʼeʼ ku tsʼáaik tuláakal baʼaxoʼob kʼaʼabéet utiaʼal u kiʼimaktal k-óol. Ku «beetik u jóokʼol kʼiin» yéetel «ku túuxtik cháak» utiaʼal u yantal baʼax jaantbil yéetel utiaʼal u jatsʼutstal le Luʼumaʼ (Mat. 5:45).

6, 7. 1) ¿Bix úuchik u taasik muʼyajil Adán tiʼ u paalal? 2) ¿Baʼax utsiloʼob ken u kʼam le máaxoʼob ku yilik u lúubloʼob utsil tiʼ Dios yoʼolal le u kuxtal Cristo tu kʼubaj t-oʼolaloʼ?

⁶ Tsʼoʼoleʼ Jéeobaeʼ tsʼoʼok u salvartikoʼon tiʼ le kʼebanoʼ. Ka kʼebanchaj Adaneʼ, tu beetaj jeʼex juntúul máak ku bulik tuláakal le taakʼin unaj u tsʼáaik ichil u yotochoʼ. ¿Baʼaxten? Tumen ka kʼebanchajeʼ tu luʼsaj tiʼ u paalal u derechoil u kuxtaloʼob ich kiʼimak óolal utiaʼal minaʼan u xuul. Letiʼeʼ tuukulnaj chéen tu yoʼolal, ka tu konaj u paalal tiʼ le kʼebanoʼ. Le oʼolal tuláakloʼon k-kʼojaʼantal, k-muʼyaj yéetel tu tsʼookeʼ k-kíimil. ¿Máasaʼ jach kʼaʼabéet k-luʼsaʼal yáanal le kʼebanoʼ? Baʼaleʼ jeʼex k-ojleʼ, utiaʼal u chaʼabal juntúul palitsileʼ, kʼaʼabéet u boʼotaʼal le bukaʼaj ku kʼáataʼaloʼ, lelaʼ tsʼoʼok u beetaʼal tumen Jéeoba (xokaʼak Romailoʼob 5:21). Tu beetaj le ka tu túuxtaj Jesús, u Hijo, «utiaʼal u tsʼáa u kuxtal bey junpʼéel boʼol utiaʼal u jáalkʼabtaʼal yaʼabkach máakoʼobeʼ» (Mat. 20:28). Maʼ kun xáantaleʼ le máaxoʼob kun lúubloʼob utsil tiʼ Dioseʼ yaan u kʼamkoʼob le utsiloʼob ku taasik u kuxtal Jesús tu kʼubaj t-oʼolaloʼ.

⁷ U jaajileʼ le Máax beetmiloʼonoʼ, tsʼoʼok u tsʼáaiktoʼon tuláakal baʼaxoʼob kʼaʼabéet utiaʼal ka yanak u biilal k-kuxtal yéetel utiaʼal ka yanaktoʼon kiʼimak óolal. Wa k-lúubul utsil tiʼ letiʼeʼ yaan u béeytal k-ilik bix ken u xuʼulsil le baʼaxoʼob beetik k-muʼyajoʼ. Teʼ kʼiin jeʼeloʼ Jéeobaeʼ yaan u yeʼesik tiʼ cada juntúul tiʼ toʼoneʼ, «letiʼeʼ ku boʼotik le máaxoʼob kaxtikoʼ» (Heb. 11:6).

«A kaajaleʼ ku kʼubikuba tiʼ tech»

8. Ken k-xok le baʼax úuch tiʼ Isaíasoʼ, ¿baʼax k-kanik tiʼ bix u kʼáat Dios ka k-meyajte?

⁸ Jéeobaeʼ maʼatech u obligartik mix máak ka u meyajte. Ku chaʼik u chʼaʼtuklik máak baʼax ken u beete. Yéetel ku lúubul utsil tiʼ le máax ku chʼaʼtuklik u meyajtikoʼ. Tu kʼiiniloʼob Isaíaseʼ tu kʼáataj: «¿Máax bíin in túuxte? ¿Máax bíin u beetuba k-bisaj tʼaan?». Lelaʼ ku yeʼesikeʼ tu tsʼáaj u páajtalil tiʼ le profeta u chʼaʼtuklik baʼax ken u beetoʼ. Le oʼolal Isaíaseʼ jach kiʼimakchaj u yóol úuchik u núukik: «Jeʼelenaʼ, [túuxteniʼ]» (Isa. 6:8).

9, 10. 1) ¿Bix unaj k-meyajtik Jéeoba? 2) ¿Baʼaxten jach maʼalob ka k-tsʼáa táanil k-meyajtik Dios?

⁹ Cada juntúul tiʼ toʼoneʼ jeʼel u páajtal u chʼaʼtuklik u meyajtik Dioseʼ bey xan u chʼaʼtuklik maʼ u beetik. Jéeobaeʼ u kʼáat toʼon ka k-chʼaʼtukult k-meyajtik (xokaʼak Josué 24:15). Letiʼeʼ maʼ ken u kʼam le meyaj k-tsʼáaik tiʼ wa maʼ tu jaajil k-óol k-beetkiʼ bey xan wa chéen utiaʼal k-kiʼimakkúuntik u yóol u maasil (Col. 3:22). Wa maʼ «yéetel tuláakal [k-]puksiʼikʼal» k-meyajtik Dioseʼ maʼ ken u kʼam le meyaj k-beetkoʼ (Sal. 119:2). Letiʼeʼ u yojel wa k-tsʼáaik k-óol meyajteʼ u yutsileʼ k-tiaʼal. Le oʼolal Moiseseʼ tu yaʼalaj tiʼ le israelitaʼob ka u yéeyoʼob le kuxtaloʼ. ¿Bix ken u beetiloʼob kaʼachi? Unaj u beetkoʼob le baʼax tu yaʼalaj Moisesaʼ: «Yaabilteʼex Yuumtsil [...], uʼuyajtʼanteʼex» (Deu. 30:19, 20.)

¹⁰ Rey David úuchjeakileʼ tu kʼayaj tiʼ  Jéeoba: «A kaajaleʼ ku kʼubikuba tiʼ tech tu kʼiinil le tsʼáanchaʼatajoʼ; tu yóokʼol le kiliʼich puʼukoʼoboʼ, jeʼel bix le pʼuul jaʼ ku síijil tiʼ le jaʼatskab kʼiinoʼ u táankelmileʼ, ku túumbental sáamsamal» (Sal. 110:3). Bejlaʼeʼ yaʼab máakeʼ chéen ku bin tu paach taakʼin yéetel náaysaj óolaloʼob. Baʼaleʼ le máaxoʼob yaabiltik Jéeobaoʼ u yojloʼob unaj u tsʼáaikoʼob táanil u meyajtikoʼob. Le bix u tsʼáaik u yóoloʼob teʼ kʼaʼaytajoʼ ku yeʼesik baʼax ku tsʼáaikoʼob táanil ichil u kuxtaloʼob. Letiʼobeʼ jach u yojloʼob yaan u tsʼaʼabal tumen Jéeoba le baʼaxoʼob kʼaʼabéettiʼob sáamsamaloʼ (Mat. 6:33, 34).

Siibaloʼob ku kʼaʼamal tumen Dios

11. ¿Baʼax utsiloʼob tu kʼamaj le israelitaʼob le ka tu tsʼáajoʼob siibaloʼob tiʼ Jéeobaoʼ?

¹¹ Le Leyoʼ ku yaʼalik kaʼacheʼ, utiaʼal ka lúubuk utsil máak tiʼ Dioseʼ kʼaʼabéet u kʼubik siibaloʼob maʼalobtak tu táan. Levítico 19:5 ku yaʼalikeʼ le israelitaʼoboʼ unaj u kʼubkoʼob «kíimsbil baʼalcheʼob utiaʼal kaʼa bisajbail», lelaʼ unaj u beetkoʼob «utiaʼal ka kʼaʼamak[oʼob] tumen [Dios]». U libroil Levíticoeʼ ku yaʼalikeʼ unaj u «táanbes[koʼob] u tiʼibil óolal nib óolal [...] utiaʼal ka kʼaʼamak[oʼob]» tumen Dios (Lev. 22:29). Cada ken u kʼuboʼob juntúul baʼalcheʼ teʼ altaroʼ, u buutsʼileʼ ku bin tak yiknal Jéeoba «bey junpʼéel kiʼibok tiʼibil óola[leʼ]» (Lev. 1:9, 13). Lelaʼ junpʼéel bix u yeʼeskoʼob yaabilaj tiʼ, le oʼolal ku kiʼimaktal u yóol (Gén. 8:21). Le baʼaxoʼob ku yaʼalik le Leyaʼ ku yeʼesikeʼ utiaʼal ka lúubkoʼon utsil tiʼ Jéeobaeʼ kʼaʼabéet k-beetik siibaloʼob tiʼ jeʼex uts tu tʼaaneʼ. Baʼaleʼ ¿baʼax siibalil unaj k-tsʼáaiktiʼ? Koʼoneʼex ilik kaʼapʼéeliʼ: le baʼaxoʼob k-beetkoʼ yéetel le baʼaxoʼob k-aʼalikoʼ.

12. ¿Baʼaxoʼob maʼ unaj u beetik máak wa u kʼáat u kʼub u wíinklil «bey junpʼéel kuxaʼan siibal» tiʼ Dioseʼ?

¹² Apóstol Pabloeʼ tu yaʼalaj tiʼ le sukuʼunoʼob yanoʼob Romaoʼ: «Kʼub a wíinklileʼex bey junpʼéel kuxaʼan siibal, junpáaykuntaʼan yéetel kʼambeʼen tu táan Jajal Dios. Lelaʼ letiʼ u jaajil [adoración] unaj a tsʼáaikeʼexoʼ» (Rom. 12:1). Jeʼex túun k-ilkoʼ, wa k-kʼáat lúubul utsil tiʼ Jéeobaeʼ unaj k-kanáantik k-wíinklil jeʼex uts tu tʼaaneʼ. Letiʼeʼ maʼ tu kʼamkoʼon wa k-káaltal, wa k-tsʼuʼutsʼ chamal, wa k-drogartikba yéetel u leʼ coca, nueces de betel wa uláakʼ drogaʼob (2 Cor. 7:1). Yéetel maʼ tu kʼamkoʼon wa k-beetik baʼaloʼob kʼaastak, tumen «le máax ku núupkʼebaneʼ ku kʼebankúuntik u wíinklil» (1 Cor. 6:18). Tuláakal le xiiboʼob yéetel le koʼoleloʼob u kʼáatoʼob lúubul utsil tiʼ Diosoʼ unaj u kuxtaloʼob «ich kiliʼichil» (1 Ped. 1:14-16).

13. ¿Baʼaxten unaj k-kiʼikiʼtʼantik Jéeoba?

¹³ Jéeobaeʼ ku kʼamik xan bey junpʼéel siibal le bix u tʼaan máakoʼ. Le máaxoʼob yaabiltmiloʼ, ku tʼaanoʼob maʼalob tiʼ letiʼ ichil u yotochoʼob bey xan táanxelil (xokaʼak Salmo 34:1-3). Ken k-xok le Salmo 148 tak 150, k-ilkeʼ yaʼab u téenel ku yaʼaliktoʼon ka k-kiʼikiʼtʼante.  Jéeobaeʼ «jatsʼuts [u yilik] le kiʼikiʼtʼaan ku jóokʼol tu chiʼ le utsil máakoʼoboʼ» (Sal. 33:1). Junpʼéel bix jeʼel u páajtal k-kiʼikiʼtʼantik k-Taata yaan teʼ kaʼanoʼ letiʼe k-jóokʼol k-kʼaʼayt le maʼalob péektsiloʼ, le meyaj jach tu tsʼáaj yóol Jesús u beetoʼ (Luc. 4:18, 43, 44).

14, 15. ¿Baʼax siibaliloʼob tu yaʼalaj Oseas unaj u tsʼaʼabal tiʼ Jéeoba, yéetel bix u kʼamik?

¹⁴ Ken k-tsʼáa k-óol teʼ kʼaʼaytajoʼ, k-eʼesik jach tu jaajil k-yaabiltmaj Dios yéetel k-kʼáat lúubul utsil tu táan. Tuukulnakoʼon tiʼ le baʼax tu yaʼalaj Oseas tiʼ le israelitaʼob xuʼul u kʼaʼamloʼob tumen Dios le ka joʼopʼ u adorartikoʼob yaanal diosoʼoboʼ (Ose. 13:1-3). Oseaseʼ tu yaʼalajtiʼob ka u kʼáat óoltoʼob tiʼ Jéeoba: «[Perdonart] tuláakal k-kʼasaʼanil[,] kʼam yéetel utsil óolal le kiʼikiʼtʼaanoʼob [k-]kʼubik tiʼ techaʼ» (Ose. 14:1, 2).

¹⁵ «Le kiʼikiʼtʼaanoʼob [k-]kʼubik tiʼ» Diosoʼ letiʼe baʼaxoʼob k-aʼalik ken k-tsʼáa nojbeʼenil tiʼoʼ. ¿Bix u yilik Jéeoba le kiʼikiʼtʼaanoʼob ku tsʼaʼabaltiʼ beyaʼ? Letiʼeʼ tu yaʼalaj: «[Nikaʼaj] in yaabiltoʼob kex maʼ tu náajmatkoʼob» (Ose. 14:4). Jeʼex túun k-ilkoʼ, Dioseʼ ku perdonartik le máaxoʼob tsʼáaik siibaloʼob tiʼ letiʼ tumen bey u kʼáat u beetoʼ.

16, 17. ¿Bix u yilik Jéeoba le siibaloʼob ku beetik le máaxoʼob ku káajal u jóokʼloʼob kʼaʼaytaj yoʼolal u fejoʼob tiʼ letiʼoʼ?

¹⁶ Le máaxoʼob meyajtik Diosoʼ kʼaj óolaʼanoʼob yoʼolal bix u tsʼáaikoʼob ojéeltbil u kʼaabaʼ tuláakal tuʼux. Utiaʼal le salmistaoʼ jach kʼaʼanaʼan u tsʼáaik nojbeʼenil tiʼ, le oʼolal tu yaʼalaj: «Yuumtsil kʼam u siibaloʼob in chiʼ» (Sal. 119:108). ¿Kux túun teʼ kʼiinoʼobaʼ? Isaíaseʼ tu yaʼalaj le baʼaxoʼob ken u beet le máaxoʼob meyajtik Diosoʼ: «Bíin xan u kʼayoʼob u nojbeʼeniloʼob Yuumtsil» yéetel tu yaʼaleʼ yaan u «kʼub[koʼob] tiʼ Yuumtsil [siibaloʼob] tu yóokʼol u [altar]» (Isa. 60:6, 7). Bejlaʼeʼ u millonesil máakoʼob meyajtik Dioseʼ táan u beetkoʼob le baʼax tu yaʼaloʼ, tumen táan «[k-]kiʼikiʼtʼantik u kaabaʼ yéetel k-chiʼ» (Heb. 13:15).

¹⁷ ¿Kux túun teech? ¿Táan wa a kʼubik siibaloʼob ku beetik u kiʼimaktal u yóol Dios? Wa maʼatecheʼ, ¿yaan wa a beetik kʼeexoʼob ichil a kuxtal utiaʼal u káajal a jóokʼol kʼaʼaytaj? Le siibaloʼob beyoʼ ku yeʼesik ka tsʼáaik a fe tiʼ letiʼ, wa ka beetkeʼ «Yuumtsileʼ yaan u pʼáatal [maas] kiʼimak u yóol, tiʼ ka [a] kíims juntúul wakax utiaʼal [a] kʼub tiʼ» (xokaʼak Salmo 69:30, 31). Maʼ u tuʼubultecheʼ, u kiʼibokil le siibaloʼob ka beetkoʼ yaan u kʼuchul tak tu trono, bey túunoʼ yaan a lúubul utsil tiʼ (Eze. 20:41). Wa ka beetik beyoʼ jach yaan u kiʼimaktal a wóol.

«Yuumtsil ka kiʼtʼantik máax u yoksmaj u yóol tiʼ tech»

18, 19. 1) ¿Baʼax ku tuklik yaʼab máakoʼob yoʼolal u meyajtaʼal Dios? 2) ¿Baʼax ku taasik u xuʼulul u lúubul utsil máak tiʼ Dios?

¹⁸ Yaʼab máakoʼob bejlaʼeʼ ku tuukuloʼob jeʼex tu beetil jujuntúul israelitaʼob tu kʼiiniloʼob Malaquíasoʼ: «¿Baʼax utsil bíin k-kʼameʼex utiaʼal u boʼolil [k-beetik] baʼax ku yaʼalik[?]» (Mal. 3:14.). Tumen chéen chʼiikiloʼob tu paach ayikʼaliloʼobeʼ, ku tuklikoʼobeʼ le baʼaxoʼob u yaʼalmaj Jéeobaoʼ mix bikʼin u béeytal, yéetel u leyoʼobeʼ tsʼoʼok u pʼáatal maʼ maʼalobtakiʼ. Ku tuklikoʼobeʼ le máaxoʼob ku jóokʼloʼob kʼaʼaytajoʼ chéen táan u peʼertik u tiempoʼob yéetel chéen táan u máan u náaksoʼob u yóol u yuumiloʼob naj.

 ¹⁹ Le tuukul beyaʼ tiʼ káaj tu jardinil Edeneʼ. ¿Máax beet u tuklik Eva yaan baʼax maʼalob maʼ tsʼaʼantiʼob tumen Jéeobaiʼ? ¿Máax beet u tuklik chéen kunel ka u yil u beetik le baʼaxoʼob ku yaʼalik u Taata yaan teʼ kaʼanoʼ? Satanás, le máax beetik u tuklik máak chéen kunel u beetaʼal baʼax ku yaʼalik Diosoʼ. Baʼaleʼ Eva yéetel Adaneʼ tu yiloʼobeʼ u xuʼulul u lúubul utsil máak tiʼ Dioseʼ ku bisik máak tiʼ kíimil. Maʼ kun xáantaleʼ, bey kun úuchul xan tiʼ le máaxoʼob beetik jeʼex tu beetiloʼoboʼ (Gén. 3:1-7, 17-19).

20, 21. 1) ¿Baʼax tu beetaj le koʼolel kimen u yíicham kajaʼan kaʼach Sareptaoʼ, yéetel baʼax utsiloʼob tu kʼamaj? 2) ¿Baʼaxten unaj k-beetik jeʼex tu beetiloʼ, yéetel bix jeʼel u páajtal k-beetkeʼ?

²⁰ Le koʼolel kimen u yíicham kajaʼan kaʼach Sareptaoʼ maʼ tuukulnaj jeʼex Adán yéetel Evaeʼ. ¿Baʼax tu beetaj le ka tu yuʼubaj le baʼax tu yaʼalaj le profetaoʼ? Tu pakʼachtaj le waaj yéetel u yalab le juuchʼ pʼaataltiʼoʼ ka tu tsʼáaj yáax tiʼ le profetaoʼ. Jéeoba túuneʼ tu tsʼoʼokbesaj le baʼax u yaʼalmaj tiʼ Elíasoʼ, le Bibliaoʼ ku yaʼalik: «Letiʼ, u paal yéetel Elíaseʼ yanji baʼal u jaantoʼob yaʼabkach kʼiinoʼob. Maʼ xuʼup le harina tiʼ le káatoʼ, mix xuʼup le aceite yaan kaʼach tiʼ le x-tʼojob, jeʼel bix tu yaʼalaj Yuumtsil tu chiʼ Elíaseʼ» (1 Rey. 17:15, 16).

²¹ Bejlaʼeʼ maʼ yaʼab máakoʼob jeʼel u beetkoʼob jeʼex le koʼolel kimen u yíicham kajaʼan kaʼach Sareptaoʼ. Letiʼeʼ tu tsʼáaj u fe tiʼ Dios le oʼolal áantaʼabi. Le baʼaxoʼob ku yaʼalik le Biblia jeʼex le baʼax tu beetaj le koʼolelaʼ, ku yeʼesikeʼ Jéeobaeʼ ku náajmatik ka k-kʼub k-óol tiʼ letiʼ (xokaʼak Josué 21:43-45 yéetel 23:14). Bejlaʼa xaneʼ k-ilik yaʼab baʼaxoʼob eʼesik Jéeobaeʼ maʼatech u pʼatik le máaxoʼob ku lúubloʼob utsil tiʼoʼ (Sal. 34:6, 7, 17-19). *

22. ¿Baʼaxten jach kʼaʼabéet k-ilik k-lúubul utsil tu táan Dios teʼ kʼiinoʼobaʼ?

²² Le xuʼulsajil kun taal «tu yóokʼol tuláakal u kajnáaliloʼob yóokʼol kaab[oʼ]» jach tsʼoʼok u náatsʼal yéetel mix baʼal jeʼel u beetik u pʼáatal maʼ u taaleʼ (Luc. 21:34, 35). Le baʼaloʼob koʼojtak u tojol yéetel le ayikʼaliloʼoboʼ maʼ ken u salvartoʼob máak. Baʼax ken u jach kiʼimakkúuns k-óoleʼ letiʼe k-uʼuyik u yaʼaliktoʼon le Juez tsʼaʼan tumen Diosoʼ: «Koʼoteneʼex teʼex máaxeʼex kiʼikiʼtʼantaʼaneʼex tumen in Taata, kʼameʼex le [reino] nuʼuktaʼan a tiaʼaleʼex[oʼ]» (Mat. 25:34). Teʼ kʼiin jeʼeloʼ yaan k-ilik u béeytal le tʼaanoʼobaʼ: «Techeʼ Yuumtsil ka kiʼtʼantik máax u yoksmaj u yóol tiʼ tech; baʼpachtaʼan tumen a wutsil» (Sal. 5:12). Jeʼex túun k-ilkoʼ, bejlaʼeʼ u kʼiinil k-ilik k-lúubul utsil tu táan Dios.

[Tsolajiloʼob]

¿Kʼajaʼan wa toʼon?

• ¿Baʼaxten ku náajmatik Jéeoba ka k-adorart tu jaajil k-óol?

• ¿Baʼax siibaliloʼob ku kʼamik Jéeoba teʼ kʼiinoʼobaʼ?

• ¿Baʼax «le kiʼikiʼtʼaanoʼob [k-]kʼubik tiʼ» Jéeobaoʼ, yéetel baʼaxten unaj k-kʼubik tiʼ?

• ¿Baʼaxten unaj k-ilik k-lúubul utsil tu táan Dios?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

¿Baʼax tu yaʼalaj juntúul profeta talamchaj u beetik juntúul maamatsil jach óotsil?

[U tsolajil le oochel teʼ táan juʼun 15]

¿Baʼax utsiloʼob k-kʼamik ikil k-kiʼikiʼtʼantik Dios yéetel k-chiʼ?

[U tsolajil le oochel teʼ táan juʼun 17]

Wa k-kʼubik k-óol tiʼ Jéeobaeʼ, letiʼeʼ maʼ ken u pʼatoʼon