“Winjo Oloyo Timo Misango”

RUOTH mokwongo mar Israel ne en Saulo. Kata obedo ni Nyasaye madier ema ne oyiere, gikone Saulo ne oweyo winjo dwond Nyasaye.

Gin ketho mage ma Saulo notimo? Be ne onyalo weyo maok odonjo e kethogo? Ere kaka nono ranyisi mare nyalo konyowa?

Jehova Yango Jalo Moseyiero Obed Ruoth

Kane Saulo pok obedo ruoth, janabi Samuel ne tiyo kaka jal mawuoyo e lo Nyasaye e Israel. Koro Samuel ne oti, kendo yawuote ne ok oluoro Nyasaye. Gie kindeno bende, jowasigu ne dwaro monjo ogandano. Kane jodong Israel okwayo Samuel mondo oketnegi ruoth ma ne nyalo ng’adonegi bura kendo tayogi e lweny, Jehova nochiko janabino mondo owir Saulo obed jatelo, kendo nowacho niya: “Enores joga e luet Jo-Filistia.”​—1 Sam. 8:4-7, 20; 9:16.

Saulo ne en “wuoi motegno ma jaber.” Kata kamano, chia ma ne en-go kende ok ema ne omiyo oyiere. Bende ne en ng’ama obolore. Kuom ranyisi, Saulo nopenjo Samuel niya: “An ok an Ja-Benjamin koso, ma libamba matin moloyo duto mag Israel? kendo dhoodwa ok en dhoot matin moloyo koso, kuom dhoudi duto mar libamba Benjamin? koro ere gi momiyo iwuoyo koda kama?” Saulo ne okawore kaka ng’ama tin kaachiel gi joodgi, kata obedo ni Kish Wuon mare ne en “ng’a maratego ma jachir [“jamwandu,” NW ].”​—1 Sam. 9:1, 2, 21.

Non ane bende dwoko ma Saulo nochiwo kane Samuel oyango wach jalo ma Jehova oseyiero mondo obed ruodh Israel. Mokwongo, Samuel noolo mo kuom Saulo ka gin kar kendgi, mowachone niya: ‘Tim kaka wang’i oneno; nikech Nyasaye ni kodi.’ Bang’ mano janabino nochoko ji mondo onyisgi wach jal ma Jehova oseyiero. Kata kamano, sama ne oluong nyinge, Saulo ne onge kanyo. Saulo nodhi pondo nikech ne ojaluoro. Jehova noelo ne ji kama ne entiere, mi ne oket Saulo obed ruoth.​—1 Sam. 10:7, 20-24.

E Lweny

Mapiyo, Saulo nochako timo gik manyiso ni ne owinjore gadier bedo e kom-ruoth. Kane Jo-Amon dwaro monjo taon moro mar Jo-Israel, ‘much Nyasaye nobiro kuom  Saulo gi teko.’ Nochoko oganda lweny, mochanogi kendo tayogi e loyo lwenyno. Kata kamano, Saulo nonyiso ni Nyasaye ema ne omiyogi loch kowacho niya: “Tinende Jehova osetimo warruok ni Israel.”​—1 Sam. 11:1-13.

Saulo ne nigi kido mabeyo koda gweth mar Nyasaye. Bende ne oyie ni teko mar Jehova ema ne nikode. Kata kamano, mondo weche osiki kadhi maber ne Jo-Israel koda ruodhgi, nitie gima ne dwarore ahinya ni gitim. Samuel nowacho ne Jo-Israel niya: “Ka nuluor Jehova, mutiyone, kendo uwinjo dwonde, mak utimo tama kuom chik mar Jehova, kendo un kod ruodhno man kuomu ubedo jo maluwo Jehova Nyasachu, mano ber.” Winjo dwond Nyasaye ne dhi miyo Jo-Israel obed gadier kuom wach mane? Samuel dwoko kama: “Jehova ok anojwang’ joge nikech nyinge maduong’: niwira Jehova noneno ni ber mondo otimu ogandane owuon.”​—1 Sam. 12:14, 22.

Winjo dwond Nyasaye e gimaduong’ ma ne dwarore mondo omi Nyasaye oyie kodgi, kendo mano e gima podi dwarore sani. Sama jotich Jehova luwo chikene, ogwedhogi. To nade ka ok giwinj dwond Jehova?

“Itimo Tim Mofuwo”

Bang’e, gima Saulo notimo ne Jo-Filisti nowang’o igi ahinya. Oganda lweny “machal gi kuoyo me dho nam kuom thothgi” nobiro monjo Saulo. “To ka jo Israel noneno ni gidhier, (nikech ji nechandore), eka ji nopondo e buche, kendo e sugini, kendo e lwendini, e bugini kendo e sokini.” (1 Sam. 13:5, 6) Ang’o ma Saulo ne dhi timo?

Noyudo Samuel osewacho ne Saulo mondo girom Gilgal, kama janabino ne dhi chiwoe misengini. Saulo norito, to kata kamano Samuel nodeko, kendo jolweny mag Saulo koro nochako ke. Omiyo Saulo nong’ado mar chiwo misenginigo en owuon. Mapiyo bang’ timo kamano, Samuel nochopo. Bang’ winjo gima Saulo nosetimo, Samuel nowachone niya: “Itimo tim mofuwo: pok imako chik mar Jehova Nyasachi kaka nochikoi: noyudo Jehova dosir pinyruodhi mondo obedi kuom Israel nyaka chieng’. To koro pinyruodhi ok nosiki: Jehova osedwarone ng’ato ma chunye mor godo, kendo Jehova oseketo jalo mondo obed jatend joge, nikech ne ok irito gino ma ne Jehova ochikoie.”​—1 Sam. 10:8; 13:8, 13, 14.

Nikech ne ok onyiso yie, Saulo nonyiso wich teko mi oketho chik Nyasaye ma ne dwaro ni orit Samuel ema mondo ochiw misango. Mano kaka gima Saulo notimo opogore ahinya gi kaka Gideon notimo, jal ma ne en jatend jolweny mag Israel e kinde motelo! Jehova nochiko Gideon mondo odwok piny kwan mar jolweny mage wuok 32,000 nyaka 300, mi Gideon notimo kamano. Nikech ang’o? En nikech ne en gi yie kuom Jehova. Kokalo kuom kony ma Nyasaye nomiye, noloyo wasigu 135,000. (Bura 7:1-7, 17-22; 8:10) Jehova dine okonyo Saulo bende. Kata kamano, nikech timne mar chayo chik, Jo-Filisti nopeyo Israel.​—1 Sam. 13:17, 18.

Sama wan e bwo chandruoge, ere kaka wang’ado paro? Kuom joma onge gi yie, chayo chike Nyasaye nyalo nenorenegi ka gima long’o. Sama ne Samuel onge, nyalo bedo ni Saulo noparo ni gima ne otimono ne long’o. Kata kamano, jogo madwaro ni mondo Nyasaye oyie kodgi, luwo chike koda puonj manie Ndiko motudore gi wach momakogino, nimar mano kende e gima long’o.

Jehova Tamore Saulo

E lweny ma ne gigoyo gi Jo-Amalek, Saulo notimo ketho machielo marach ahinya. Noyudo Nyasaye osekwedo Jo-Amalek nikech monj ma ne gimonjogo Jo-Israel bang’ wuok margi Misri. (Wuok 17:8; Rapar 25:17, 18) E wi mano, Jo-Amalek nochako oriwore  gi jomamoko e monjo oganda moyier mar Nyasaye e diere mag Jobura. (Bura 3:12, 13; 6:1-3, 33) Omiyo, Jehova nong’ado ne Jo-Amalek bura, mi nochiko Saulo mondo oneggi.​—1 Sam. 15:1-3.

Kar luwo kaka Jehova nochiko ni otiek Jo-Amalek oganda ma jokinyo, kendo ketho mwandugi, Saulo nomako ruodhgi kendo peyo jambgi ma ne beyo moloyo. Ang’o ma notimore kane Samuel odhi ir Saulo gi wachno? Saulo notemo keto kethono kuom jomoko kowacho niya: “Ji noweyo mago mabecho mag rombe gi dhok, ni mondo gitimgo misango ni Jehova.” Kata bed ni Saulo ne dwaro chiwo lego kaka misango kata ok kamano, gimaduong’ en ni ne ok owinjo dwond Jehova. Saulo koro ne ok nenre ka ‘ng’at matin’ e wang’e owuon. Omiyo, janabi mar Nyasaye nonyise maler ni oseketho chik Nyasaye. Kae to Samuel nowacho niya: “Jehova ohero chiwo kod misango moromo kod winjo dwond Jehova koso? Ne, winjo oloyo timo misango . . . Nikech isedagi wach mar Jehova, en bende osedagi ni kik ibed ruoth.”​—1 Sam. 15:15, 17, 22, 23.

Kane Jehova ogolo rohone maler kuom Saulo moweyo gwedhe, “muya marach” nochako chiko ruodh Israel mokwongono. Saulo koro nopong’ gi paro mag chich kod nyiego kuom Daudi​—jal ma bang’e Jehova ne dhi miyo kom-ruoth. Mokalo dichiel, Saulo notemo nego Daudi. Muma wacho ni bang’ neno ni ‘Jehova ne nikod Daudi, Saulo nobedo jasik Daudi mosiko.’ Saulo notemo himo Daudi, mi ochiko bende ni oneg jodolo 85 gi jomamoko. Omiyo, ok kawwa gi wuoro ni Jehova nodagi Saulo!​—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Kane Jo-Filisti ochako omonjo Israel kendo, Saulo koro ne odonjo e tim manono mar manyo kony kuom ajuoga. Odiechieng’ ma noluwo, nohinyore marach e lweny, mi ne odere. (1 Sam. 28:4-8; 31:3, 4) Ndiko wacho e wi ruodh Israel mokwongono, ma ne ok owinjo dwond Nyasaye, niya: “Saulo notho nikech kethne ma notimo ni Jehova, mana nikech wach Jehova ma ne ok orito; kendo nikech nodwaro wach kuom ng’ato ma jamirieri mondo openje, to ne ok openjo Jehova wach.”​—1 Weche 10:13, 14.

Ranyisi marach ma Saulo noketo nyiso ni winjo Jehova ber moloyo chiwone misango moro amora. Jaote Johana nondiko ni: “Hero Nyasaye en mako chikne, to chikne ok tek.” (1 Joh. 5:3) Mad kik wacha ngang’ wachni ma en adier chuth: Bedo gi winjruok mosiko gi Nyasaye dwaro ni wawinj dwonde kendo waluw chikene.

[Picha manie ite mar 21]

Kar chakruok, Saulo ne en jatelo mobolore

[Picha manie ite mar 23]

Ang’o momiyo Samuel nowacho ne Saulo ni “winjo oloyo timo misango”?