Maan e tu e klun e yo sa ng’ɔ ti kpa’n

“A klo sa ng’ɔ ti kpa’n.”—JUE. 45:8.

1. ?Ngue yɛ ɔ́ úka e naan y’a sin “atin kpa’n nun” ɔn?

 ZOOVA sin i nuan Ndɛ’n ɔ nin i wawɛ’n be lika yɛ ɔ fɛ i sufuɛ mun sin “atin kpa’n nun” ɔn. (Jue. 23:3) Sanngɛ fɔ m’ɔ o e nun’n ti’n, e kwla kpaci atin sɔ’n. Ɔ maan, sɛ e waan é yó sa ng’ɔ ti kpa’n, ɔ fata kɛ e mian e ɲin kpa. ?Ngue yɛ ɔ kwla uka e ɔ? Kɛ Zezi sa’n, ɔ fata kɛ e klo sa ng’ɔ ti kpa’n i yolɛ.—An kanngan Jue Mun 45:7 nun.

2. ?Ngue yɛle “atin kpa’n”?

² ?Ngue yɛle “atin kpa’n”? Atin sɔ’n yɛle mɛn dilɛ wafa kun m’ɔ taka Zoova i mmla mɔ be ti kpa’n be su’n. Ebre nin Glɛki aniɛn’n nun’n, kɛ be se kɛ sran kun aeliɛ’n ti “kpa’n,” nn sran sɔ’n be kwlá sacimɛn i wun kaan sa. Zoova i sielɛ’n taka “sa nuan su yolɛ’n nin ndɛ nanwlɛ dilɛ’n be su.” I sɔ’n ti’n, kɛ Zoova kle i sufuɛ’m be atin ng’ɔ ti kpa’n, ɔ ti be cenjele like.—Jue. 97:2.

3. ?Wafa sɛ yɛ e kwla suan Ɲanmiɛn i sa nuan su sɛsɛ yolɛ’n i su like kpa ɔ?

³ Sɛ e kunndɛ kɛ Ɲanmiɛn klun jɔ e wun’n, saan kɛ é mían e ɲin é nánti i mmla mɔ be ti kpa’n be su. (Mml. 32:4) I sɔ yolɛ nun’n, ɔ nin i fata kɛ e dun mmua suan Ɲanmiɛn Zoova i su like Biblu’n nun. Kɛ é súan i su like é kɔ́’n, nn e nin i e afiɛn’n ɔ́ mántan titi kɔ́, yɛ é kló i sa nuan su sɛsɛ yolɛ’n é trá laa’n. (Zak 4:8) Asa kusu’n, ɔ nin i fata kɛ ajalɛ cinnjin kwlaa nga é fá’n, ɔ taka Ɲanmiɛn Ndɛ’n su.

Maan e yo Ɲanmiɛn i klun sa

4. ?Ngue yɛle Ɲanmiɛn i klun sa yolɛ’n?

⁴ An kanngan Matie 6:33 nun. Nán Ɲanmiɛn i klun sa yolɛ’n i ngba yɛle Ɲanmiɛn Sielɛ’n i jasin fɛ’n i bolɛ’n. Sɛ e kunndɛ kɛ e Ɲanmiɛn sulɛ’n ɔ jɔ Zoova i klun’n, ɔ nin i fata wie kɛ cɛn kwlaa e nanti i mmla’m be su. ?I sɔ yolɛ nun’n, ngue yɛ ɔ fata kɛ sran kwlaa ng’ɔ́ kúnndɛ yó Zoova i klun sa’n, ɔ yo ɔ? Ɔ fata kɛ ɔ ‘fa nzuɛn uflɛ b’ɔ fa Nyanmiɛn liɛ’n b’ɔ maan ɔ́ yó kpa’n, ɔ́ yó i klun sa nanwlɛ bɔ ɔ di’n ti.’—Efɛ. 4:24.

5. ?Ngue yɛ ɔ kwla uka e naan y’a jran e sa sin bubulɛ’n i ɲrun kekle ɔ?

⁵ Kɛ é mían e ɲin é yó Ɲanmiɛn i klun sa’n, ɔ ju blɛ wie’n, fɔnlɛ mɔ e fɔn’n ti’n, e sa sin kwla bubu e. ?Ɔ maan sɛ e sa sin bubu e sɔ’n, ngue yɛ ɔ kwla uka e naan y’a jran kekle naan y’a klo sa kpa’n i yolɛ ɔ? (Nya. 24:10) Ɔ fata kɛ e srɛ Zoova titi. “Kɛ é yó sɔ’n, nán maan akunndan tɛ tran e klun, maan e lafi i su kpa.” (Ebr. 10:19-22) Be nga bé kɔ́ ɲanmiɛn su lɔ o, annzɛ be nga bé trán asiɛ’n su wa o, e ngba e lafi e ti kpɔlɛ tɛ’n mɔ Zezi Klist yili’n su. Yɛ e fa e wla’n e gua Zezi i Ɲanmiɛn ɲrun jranfuɛ’m be su kpɛn’n junman’n m’ɔ di’n su. (Rɔm. 5:8; Ebr. 4:14-16) Akoto Zan klɛli i kɛ: “Jésus i mmoja’n maan e wun sa tɛ kwlaa wíe.” (1 Zan 1:6, 7) I sɔ’n ti yɛ Biblu’n se kɛ, sɛ e sa tɛ bɔ e yo’n “be ti kɛ like ɔkwlɛ youun wie sa bɔbɔ’n, bé fɛ́n fitafita kɛ jese fɔkɔ sa.” Nanwlɛ, e ti kpɔlɛ tɛ’n mɔ Zoova maan i Wa’n yili’n, ɔ yo ɲɛnmɛn dan!—Eza. 1:18.

?E wlali e alɛ ninnge mun?

6. ?Ngue ti yɛ ɔ ti cinnjin kɛ e wla e alɛ ninnge mun ɔn?

⁶ Blɛ kwlaa nun’n, ɔ nin i fata kɛ e ‘yo sa ng’ɔ ti i nuan su’n, maan ɔ yo kɛ like kokloko bɔ é fá káta e wue’n su’n sa.’ Afin Ɲanmiɛn ninnge’m be nun’n, ɔ ti e alɛ ninnge’m be nun cinnjin kun. (Efɛ. 6:11, 14) Kannzɛ e fali  e wun mannin Zoova ɔ nin a cɛman, annzɛ i osu w’a cɛ o, ɔ ti cinnjin kɛ e wla e alɛ ninnge mun cɛn kwlaa. ?Ngue ti ɔ? Afin be kannin Satan nin i mmusu’m be bo guali be asiɛ’n su wa. (Ngl. 12:7-12) Satan w’a fa ya kpa, afin ɔ si kɛ i cɛn’n w’a sɔnman kun. I sɔ’n ti’n, ɔ wlɛ i wun ase kle Ɲanmiɛn i nvle’n nunfuɛ’m be yalɛ kpa. ?E wun like nga ti yɛ ɔ ti cinnjin kɛ e yo ‘sa ng’ɔ ti i nuan su’n, maan ɔ yo kɛ like kokloko bɔ é fá káta e wue’n su’n sa’n’?

7. ?Sɛ e wun i wlɛ kɛ ɔ nin i fata kɛ ‘e yo sa ng’ɔ ti i nuan su’n, m’ɔ ti kɛ like kokloko mɔ é fá káta e wue’n su’n sa’n,’ wafa sɛ yɛ é nánti ɔ?

⁷ Kɛ nga like kokloko mɔ be fa kata be wue’n su’n, ɔ sasa be awlɛn ba lika’n sa’n, i wafa kunngba’n yɛ sa kpa yolɛ’n ɔ sasa e klun akunndan’n niɔn. Fɔ’n m’ɔ o e nun’n ti’n, e klun akunndan’n ti tɛ tra like kwlaa, be yo i sa fi ɔ ɔ yoman ye. (Zer. 17:9) Kɛ mɔ e klun akunndan’n i ɲin wo’n sa tɛ’n i sin’n ti’n, ɔ ti cinnjin kɛ e tinngɛ i. (Bob. 8:21) Sɛ e wun i wlɛ kɛ ɔ nin i fata kɛ e ‘yo sa ng’ɔ ti i nuan su’n,’ e su faman sa tɛ’n atin’n su kaan sa. Ɔ ti kɛ e su yiman ‘like kokloko mɔ é fá káta e wue’n su’n’ bɔɔ kaan sa. Ɔ maan e su faman e wun e wlɛmɛn i be ɲin su yiyilɛ nga Ɲanmiɛn kpɔ be’n be nun. Annzɛ e su buman sa tɛ yolɛ’n i akunndan. Asa ekun’n, e su saciman e blɛ e nianman televiziɔn sa trilili. Sanngɛ é mían e ɲin é yó sa ng’ɔ jɔ Zoova i klun titi’n. Kannzɛ bɔbɔ ɔ ju blɛ wie’n, e ja kpla’n naan e bu klɔ sran akunndan’n, Zoova fanngan nun maan e kwla jaso ekun.—An kanngan Nyanndra Mun 24:16 nun.

8. ?Ngue ti yɛ ɔ fata kɛ ‘Krist su bɔ e lafi’n’ ɔ yo kɛ ‘e nyrɛn sa’ ɔ?

⁸ E alɛ ninnge’m be nun kun ekun yɛle ‘Krist su bɔ e lafi’n b’ɔ ti kɛ e nyrɛn sa’n.’ Ɔ maan ‘Klunwifuɛ’n i ta’n b’ɔ sɔ i nuan to’n, i kwlaa wie su.’ (Efɛ. 6:16) Zoova su mɔ e lafi’n ɔ nin klolɛ mɔ e klo i kpa’n, ɔ uka e naan y’a yo sa kpa’n naan y’a ka anannganman nguan atin’n su. Kɛ é kló Zoova é trá laa’n, nn é kló i sa nuan su sɛsɛ yolɛ’n kpa é trá laa’n wie. ?Sanngɛ, wafa sɛ yɛ e klun akunndan’n uka e naan y’a mian e ɲin y’a klo sa kpa’n i yolɛ’n niɔn?

Nán e yo sa nga é kóko i sin’n

9. ?Sɛ e yoman sa nga é kókó i sin’n, i su mmlusuɛ benin yɛ é ɲɛ́n i ɔ?

⁹ Kɛ bé yó e batɛmu’n e srɛ Ɲanmiɛn kɛ “nán maan e klun titi ye kun.” (1 Piɛ. 3:21) Kɛ mɔ e lafi e ti kpɔlɛ tɛ nga Zezi yili’n su’n ti’n, Ɲanmiɛn yaci e wun sa’n cɛ e, ɔ maan ɔ bu e sran kpa. Sanngɛ, sɛ e waan ɔ bu e sran kpa titi’n, nán maan e yo sa nga é kókó i sin’n. Sɛ blɛ wie nun’n, e klun akunndan’n se e kɛ nán e yo like wie’n, maan i sɔ’n yo e fɛ. Afin i sɔ’n kle kɛ e klun akunndan’n timan ketewa. (1 Tim. 4:2) Sanngɛ, be nga be klo sa nuan su sɛsɛ yolɛ’n, be klun akunndan’n kwla uka be wafa uflɛ ekun.

10, 11. (a) ?Ngue ti yɛ ɔ fata kɛ, kɛ e klun akunndan kan ndɛ kle e’n e tie ɔ? An fa sa kun yiyi nun. (b) ?Sɛ e klo sa kpa yolɛ’n, wafa sɛ yɛ i sɔ’n yó maan é dí aklunjuɛ dan ɔn?

¹⁰ Kɛ e yo sa ng’ɔ timan kpa’n, e klun akunndan’n bu e fɔ. Gbanflɛn kun yacili “atin kpa’n” i su nantilɛ. Ɔ wa fali bian nin bla nna nga be fa fite nzra nun’n i nianlɛ’n fa cicili i  ti. Kpɛkun ɔ wa boli drɔgi nɔnlɛ bo wie. I sɔ m’ɔ yo’n ti’n, kɛ ɔ́ kɔ́ aɲia’m be bo’n m’ɔ́ bó jasin fɛ’n i akunndan’n bu i fɔ. Ɔ yo i kɛ i nuan nun ndɛ’n ti nɲɔnnɲɔn sa. I sɔ’n ti’n, ɔ yacili Ɲanmiɛn ninnge sɔ’m be yolɛ. Ɔ seli kɛ: “Sanngɛ, m’an wunmɛn i wlɛ kɛ min aeliɛ’n ti’n min akunndan’n kwla bu min fɔ.” Ɔ kan ukali su kɛ: “N yoli sinnzin ninnge sɔ mun afuɛ kɔe lele nnan.” I sin’n, ɔ wa kunndɛli kɛ ɔ́ nánti nanwlɛ atin’n su ekun. Kannzɛ bɔbɔ ɔ buli i kɛ Zoova su tiemɛn i srɛlɛ’n, sanngɛ ɔ srɛli i kɛ ɔ yaci i wun sa’n cɛ i. Kɛ ɔ yoli sɔ’n, w’a diman miniti blu bɔbɔ yɛ i nin’n bɛli i osu nianlɛ ɔ. Ɔ wlɛli i fanngan kɛ ɔ wɔ aɲia’m be bo ekun. Ɔ ɔli aɲia’n bo, yɛ ɔ seli asɔnun kpɛnngbɛn kun kɛ ɔ nin i be suan Biblu’n nun like. Kɛ ɔ juli i ɲrun’n, be wa yoli i batɛmu. I delɛ mɔ Zoova deli i’n ti’n, ɔ te si i ye.

¹¹ ?Amun wunman kɛ, kɛ e yoman sa tɛ’n, e wun yo e fɛ’n? Kɛ é kló sa kpa i yolɛ’n, mɔ é wlá e wun ase é yó i titi’n, nn é dí aklunjuɛ dan. Afin e yo e Si m’ɔ o ɲanmiɛn su lɔ’n, i klun sa. Amun nian! Ɔ ka kaan sa’n, klɔ sran’m be klun akunndan’n su buman be fɔ kun. Blɛ sɔ nun’n, be aeliɛ’n fá Ɲanmiɛn liɛ’n sa kwlaa nun. I sɔ’n ti’n, maan sa kpa yolɛ’n i klolɛ’n, ɔ tra ndin e awlɛn’n nun lɔ, naan i sɔ’n yo maan Zoova i klun jɔ.—Nya. 23:15, 16.

12, 13. ?Wafa sɛ yɛ e kwla yo naan e klun akunndan’n w’a yo kpa ɔ?

¹² ?Ngue yɛ e kwla yo naan e klun akunndan’n w’a yo kpa ɔ? Kɛ é súan Ɲanmiɛn Ndɛ’n, ɔ nin Biblu’n i akua’m be nun like’n, maan ndɛ cinnjin nga tran e klun. Ndɛ sɔ’n yɛle kɛ: “Sran ng’ɔ ti sran kpa’n, ɔ bu sa sin naan w’a tɛ ndɛ su.” (Nya. 15:28) Junman kunndɛlɛ nun’n, ndɛ sɔ’n kwla uka e kpa. Yɛle kɛ, sɛ junman kun o lɛ m’ɔ ti weiin kɛ ɔ nin Zoova i mmla’m be kɔman likawlɛ’n, e nun sunman lika é nánti ajalɛ nga sran kpa nanwlɛfuɛ’n kle e’n su ndɛndɛ kpa. Sanngɛ, sɛ ɔ timan weiin kɛ junman sɔ’n i dilɛ’n ɔ fɔn Ɲanmiɛn i mmla’n annzɛ ɔ fɔnmɛn i’n, ɔ nin i fata kɛ e kunndɛ Biblu’n nun mmla nga be kwla uka e naan y’a fa ajalɛ kpa’n. Yɛ e fa e wlɛ i srɛlɛ’n nun. * Biblu’n nun mmla nga é bú be akunndan’n, i wie yɛle ng’ɔ kle kɛ ɔ fataman kɛ e yo like ng’ɔ́ sánngan e wiengu akunndan’n. (1 Kor. 10:31-33) Blɛ sɔ’n nun’n, Biblu’n nun mmla nga be kwla uka e naan e nin Ɲanmiɛn y’a nanti klanman titi’n, be su akunndan bulɛ’n yɛ ɔ́ yó e cinnjin kpa liɛ su ɔ. Sɛ e kunndɛ kɛ Zoova klun jɔ e wun’n, é úsa e wun kɛ: ‘?Sɛ n di junman sɔ’n, ɔ́ yó kɛ n su klɔklɔ Zoova sa?’—Jue. 78:40, 41.

¹³ Sɛ e su siesie e wun naan y’a wɔ aɲia’m be bo’n, maan ɔ yo Sasafuɛ Tranwlɛ’n i nun ninnge suanlɛ’n, annzɛ Asɔnun’n i Biblu’n nun like suanlɛ’n nin o, nán maan e wla fi su kɛ ɔ ti cinnjin kɛ e bu ndɛ’m be su akunndan. ?Kɛ é síesíe e wun’n, e jaja kosan kun i su tɛlɛ’n i bo ndɛndɛ kpɛkun e su kɔ ndɛ kpɔlɛ uflɛ su? Sɛ e siesie e wun kɛ ngalɛ sa’n, e su kwlá kloman Ɲanmiɛn i klun sa yolɛ’n kpa. Annzɛ kusu’n, ɔ su kwlá yoman naan e klun akunndan’n w’a yo kpa. Sɛ e kunndɛ kɛ é kló Ɲanmiɛn  klun sa yolɛ’n, ɔ fata kɛ e suan Ɲanmiɛn Ndɛ’n nun like kpa yɛ e bu i su akunndan. Saan kɛ é mían e ɲin kpa naan y’a klo Ɲanmiɛn i klun sa yolɛ’n!

Maan e konvi sɔ Ɲanmiɛn i klun sa yolɛ’n

14. ?Wafa sɛ yɛ Ɲanmiɛn Zoova ɔ nin Zezi Klist be kunndɛ kɛ e di junman nga be fa mannin e’n niɔn?

¹⁴ Ɲanmiɛn Zoova nin Zezi Klist be kunndɛ kɛ e di junman nga be fa mannin e’n aklunjuɛ su. ?Ngue yɛ ɔ́ úka e naan y’a di aklunjuɛ ɔ? Ɲanmiɛn i klun sa yolɛ’n i klolɛ’n niɔn. Kɛ Zezi íjɔ oka’n su lɔ’n, ɔ seli kɛ: “Be nga be konvi sɔ Nyanmiɛn klun sa yolɛ’n kɛ awe nin nzue we kun sran sa’n, be liɛ su ti ye, afin be klun wá jɔ́!” (Mat. 5:6) ?Ngue ti yɛ ndɛ sɔ’n ti cinnjin man be nga be kunndɛ kɛ bé kló Ɲanmiɛn i klun sa yolɛ’n niɔn?

15, 16. ?Be nga be konvi sɔ Ɲanmiɛn klun sa yolɛ’n kɛ awe nin nzue we kun sran sa’n, ngue yɛ maan be klun wá jɔ́ ɔ?

¹⁵ Klunwifuɛ’n yɛ ɔ sie mɛn nga e o nun yɛ’n niɔn. (1 Zan 5:19) Kan kwlaa nga e wo’n, sɛ e kanngan zronali’m be nun’n, é wún kɛ mɛn’n wunmuan’n nun’n, sran’m be klun w’a yo wi kpa, naan be yo nzaje sa tra laa’n. Be wiengu klunwi yolɛ kɛ ngalɛ sa’n ɔ bo be nga be yo Ɲanmiɛn klun sa’n be wla. (Aku. 8:9) E mɔ e klo Zoova’n, e si kɛ i kunngba cɛ yɛ ɔ kwla uka sran mun naan b’a yo sa kpa ɔ. Ɔ ka kaan Ɲanmiɛn wá núnnún klunwifuɛ mun. Ɔ maan yalɛ nga sa tɛ yofuɛ sɔ’m be kle be’n, ɔ́ wíe. (2 Piɛ. 2:7, 8) Nanwlɛ, bé wá dí aklunjuɛ dan!

¹⁶ E mɔ e ti Zoova i sufuɛ’n, mɔ e ti Zezi Klist i sɔnnzɔnfuɛ’n, e si kɛ be kwlaa nga be konvi sɔ Ɲanmiɛn i klun sa yolɛ’n “be klun wá jɔ́.” Yɛle kɛ Ɲanmiɛn waan ɔ́ mán e nyanmiɛn su lɔ nin asiɛ uflɛ, lɔ yɛ “be nga be yo sa kpa’n bé trán-an.” (2 Piɛ. 3:13) Ɔ maan, nán maan e sa sin bubu e, yɛ nán maan klunwi aeliɛ’n ɔ nin nzaje sa nga e wun be Satan i mɛn nga nun’n be bo e nuan. (Aku. 5:7) Zoova, mɔ like fi nunmɛn i sin’n, ɔ wun i sɔ sa liɛ mun. Ɔ cɛ kaan sa’n, ɔ́ wá dé be nga be klo sa kpa i yolɛ’n.

Sa kpa yolɛ’n i su mmlusuɛ’n

17. ?Kɛ be klo sa kpa’n, mmlusuɛ nga be kwla ɲɛn i’n, i wie yɛle benin?

¹⁷ Jue Mun 146:8 fa e ɲin sie i sa kpa yolɛ’n i su mmlusuɛ’n i su kpa. Jue tofuɛ’n seli kɛ: “Anannganman [...] klo be b’ɔ bu be sran kpa’n.” Amun bu i akunndan nian! Sa kpa yolɛ mɔ e klo i’n ti’n, Ɲanmiɛn m’ɔ sie like kwlaa’n klo e! Kɛ mɔ Zoova klo e’n ti’n, e lafi su kɛ, sɛ e dun mmua fa e wun mɛn i naan ɔ sie e’n, ɔ́ nían e lika. (An kanngan Jue Mun 37:25 ɔ nin Nyanndra Mun 10:3 be nun.) Cɛn wie lele’n, be kwlaa nga bé trán asiɛ’n su bé yó sran mɔ be klo sa kpa yolɛ ɔ. (Nya. 13:22) Ɲanmiɛn i sufuɛ’m be sunman lika be wla o su kɛ bé trán asiɛ’n su wa titi mɛn klanman nun, naan bé dí aklunjuɛ m’ɔ leman kpɛbo’n. Be kwla ɲɛn i sɔ afin be yoli sa kpa. Sanngɛ ka naan b’a ɲɛn i sɔ’n, kɛ é sé yɛ bɔbɔ’n, be nga be klo Ɲanmiɛn klun sa yolɛ’n, be klun jɔ be wun fɔuun. Ɔ maan be awlobo nun ti fɔuun. Yɛ i sɔ’n yo maan be nin be niaan’m be tran klanman asɔnun’n nun.—Fil. 4:6, 7.

18. ?Lele nin kɛ Zoova i cɛn’n fá jú’n, ngue yɛ ɔ fata kɛ e yo ɔ?

¹⁸ E su minndɛ Zoova i cɛn dan’n. Lele naan cɛn sɔ’n w’a ju’n, ɔ fata kɛ e mian e ɲin e yo Ɲanmiɛn i klun sa. (Sof. 2:2, 3) I sɔ’n ti’n, Ɲanmiɛn Zoova i mmla mɔ be ti kpakpa ngunmin’n, maan e klo be kpa lelele. Yɛle kɛ sɛ é kwlá sé’n, nán maan e yi like ‘kokloko bɔ  e fa kata e wue su’n’ le. Ɔ kle kɛ maan e yo sa ng’ɔ ti i nuan su’n titi. Asa ekun’n, nán maan e yo sa nga mɔ maan é kókó i sin’n. Yɛle kɛ maan e mian e ɲin naan e akunndan yo kpa titi. Sɛ e yo sɔ’n, e klun’n tɔ́ e nun fɔuun, yɛ Ɲanmiɛn i klun jɔ́ wie.—Nya. 27:11.

19. ?Ngue yɛ ɔ fata kɛ e fua kɛ é yó ɔ? ?Ngue yɛ é wá wún i like suanlɛ ng’ɔ́ bá lɛ’n nun ɔn?

¹⁹ Zoova “nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.” (2 Nyo. 16:9) Kannzɛ bɔbɔ kɛ aliɛ cɛ́n m’ɔ́ sán’n nn nzaje sa’n ɔ nin klunwi yolɛ’n, ɔ́ úka su kɔ́’n, sanngɛ e nga e yo sa kpa’n, ndɛ sɔ’n gua e awlɛn su nzue! Sran kpanngban nga be nin Ɲanmiɛn be afiɛn ti nun’n yɛ’n, kɛ be wun kɛ e yo sa kpa’n, be wunmɛn i wlɛ, ɔ bo be nuan. Sanngɛ e liɛ’n e si kɛ Zoova i klun sa mɔ e yo’n, e ɲan su ye dan. (Eza. 48:17; 1 Piɛ. 4:4) I sɔ’n ti’n, maan e fua kpa kɛ e su yaciman sa kpa’n i klolɛ ɔ nin i yolɛ le. Sɛ e yo i sɔ’n, é dí aklunjuɛ. Sanngɛ kɛ ɔ yo naan y’a kwlɛ i sɔ yo’n, ɔ fata kɛ e kpɔ sa tɛ’n. I sɔ yɛ é wá wún i like suanlɛ ng’ɔ́ bá lɛ’n i nun ɔn.

[Ja ngua lɛ ndɛ’n]

?Amún tɛ́ su sɛ?

• ?Sɛ e waan é kló sa kpa yolɛ’n, ngue ti yɛ ɔ fata kɛ e wun i wlɛ kɛ e ti kpɔlɛ tɛ nga Zezi yili’n ti cinnjin kpa ɔ?

• ?Ngue ti yɛ ɔ ti cinnjin kɛ e wla ‘like kokloko bɔ be fa kata be wue’n su’n,’ naan e ‘yo sa ng’ɔ ti i nuan su’n’ niɔn?

• ?Wafa sɛ yɛ e kwla yo naan e klun akunndan’n w’a yo kpa ɔ?

[Kosan mun]

[Foto, bue 26]

Sɛ e klun akunndan’n ti kpa’n, ɔ́ úka e naan junman kunndɛlɛ nun’n, y’a fa ajalɛ kpa.