Tongei minne mi Pwüng Ren Unusen Letipom

“Ka efich pwüng.”​—KÖLF. 45:7.

1. Met epwe älisikich le aleni ekkewe “al mi pwüng”?

JIOWA a kan emmweni nöün kewe aramas woon ekkewe “al mi pwüng,” ren an Kapas me an we manaman. (Kölf. 23:3) Iwe nge, pokiten sise unusöch, sia kan päe seni ena al. A lamot ach üppos le angang weires pwe sipwe liwiniti ach föfföri minne mi pwüng. Met epwe älisikich pwe sipwe sopwöch? Usun chök Jises, a lamot sipwe tongei minne mi pwüng.​—Älleani Kölfel 45:7.

2. Met weween ekkewe “al mi pwüng”?

² Met weween ekkewe “al mi pwüng”? Ekkewe “al” ra pwüngülo me ren ekiekin Jiowa usun minne mi pwüng me mwääl. Ewe kapas “pwüng” lon fosun Ipru me Krik a weneiti met mi “wenechar,” usun a wewe ngeni än emön fiti ekkewe kapasen emmwen ren minne mi pwüng me mwääl. Pokiten Jiowa ‘mi pung me wenewen,’ chon fel ngeni ra pwapwa le kütta seni an epwe wisen apwüngalo ewe al mi wenechar repwe aleni.​—Kölf. 92:15, Kapasen God.

3. Ifa usun sipwe alapalo ach silei usun minne mi pwüng me ren Kot?

³ Kot epwe chök pwapwaitikich ika sia achocho ren unusen letipach le etipeeü manauach ngeni än allük mi pwüng. (Tut. 32:4) Sia poputä ren ach käeöfichi usun Jiowa seni an we Kapas, ewe Paipel. Ewin ach käeö usun i me akkarap ngeni iteiten rän, pwal ina ewin lapoloon ach tongei an we pwüng. (Jem. 4:8) Mi pwal lamot sipwe etiwa än ewe Paipel emmwen lupwen sipwe föri kefil mi lamot lon manauach.

Kütta än Kot Ekiek Usun Minne mi Pwüng

4. Met weween än emön kükkütta än Kot ekiek usun minne mi pwüng?

⁴ Älleani Mattu 6:33. Kükkütta än Kot ekiek usun minne mi pwüng ese chök wewe ngeni ach akkafalafala ewe kapas allim usun ewe Mwu. A lamot pwe föfförüch iteiten rän epwe tipeeü ngeni än Kot kewe allük mi tekia pwe epwe etiwa ach angang ngeni i. Iir mi kükkütta än Kot pwüng repwe föri met? Mi lamot repwe “angei ewe manau mi fö mi för lon lapalapen Kot o pwäla lon eu manau mi enletin pwüng me pin.”​—Ef. 4:24.

5. Met epwe älisikich le pworacho ngeni lichippüng?

⁵ Lon ach achocho le etipeeü manauach ren än Kot kewe allük mi pwüng, eli fän ekkoch sipwe lichippüng ren ach kewe tipis. Met epwe tongeni älisikich le pworacho ngeni lichippüng mi chounikichetiw, iwe tongei me föri minne mi pwüng? (SalF. 24:10) Mi lamot sipwe ikkiotek ngeni Jiowa “ren wenecharen letipach, pwal fän lükülük mi nüküchar.” (Ipru 10:19-22) Ese lifilifil ika kich Chon Kraist mi kepit are chon eäni äpilükülükün manau woon fönüfan, sipwe anganga ach lükü än Jises asorun möön kepich me wisan we Sou Asor mi Lap. (Rom 5:8; Ipru 4:14-16) Ewe äkkäeüin The Watchtower minen July 1879, pekin taropwe 6 a äweweei manamanen chchaan Jises we. (1 Jon 1:6, 7) Iei alon ena puk: “Enlet, atun ka nöünöü eü kinas mi anüpar le nengeni och pisek mi parochon fän ewe saram,  iwe ewe pisek epwe usun itä a anüppwech. Pwal ina chök usun, inaamwo ika ach tipis a usun parochon, nge lupwen Kot a nennengenikich me ren chchaan Kraist, iwe usun itä sia fen anüppwech.” A ifa me amwararen kaworen ewe möön kepich Jiowa a awora fän itach me ren nöün we mi ächengicheng!​—Ais. 1:18.

Etittina Om Pisekin Maun Me Ren Kot

6. Pwata a lamot sipwe etittina ach we pisekin maun me ren Kot?

⁶ A lamot sipwe ükküföüf ‘pwüng pwe iei ach chechen leupw,’ ina kinikinin ewe pisekin maun me ren Kot mi aüchea. (Ef. 6:11, 14) Ese lifilifil ika sia kerän papatais are sia fen angang ngeni Kot fite fite ier, nge mi lamot sipwe etittina ach pisekin maun iteiten rän. Pwata? Pokiten ewe Tefil me nöün kewe chonläng mi ngaw ra fen koturutiw woon ei fönüfan. (Pwar. 12:7-12) Setan a song me a silei pwe a chök mwochomwoch an fansoun. Ina minne, a fel alapalo le mammaunei nöün Kot kewe aramas. Sia kan alamota le ükküföüf ewe “chechen leupw” itan pwüng?

7. Epwe ifa föfförüch ika sia alamota ach we “chechen leupw” itan pwüng?

⁷ Ewe chechen leupw a tümünü wesewesen ewe föün ngasangas. Nge letipach, a otuputup me unusen ngaw pokiten sise unusöch. (Jer. 17:9) A lamot sipwe emiriti me apwüngü pun a kan päe ngeni minne mi mwääl. (Ken. 8:21) Ika sia alamota ach we “chechen leupw” itan pwüng, sisap mwo nge pwiliti senikich ren chök ach sipwe filatä ekkewe minen apwapwa Kot a oput, are akkanchangei ach sipwe föri och föfför mi ngaw. Sisap pwal asolapalo watteen fansoun le kakkatol TV. Nge, sipwe angang weires le föri minne Kot epwe pwapwa ren. Inaamwo ika sia ttur ren ach ekis mwo fitalo ach ekiek mi ngaw, sipwe pwätä sefäl ren än Jiowa älillis.​—Älleani Än Salomon Fos 24:16.

8. Pwata a lamot ewe “epetin maun” itan lükü?

⁸ Ewe “epetin maun” itan lükü, ina pwal kinikinin ach we pisekin maun me ren Kot. A atufichikich le “kunu ngeni ekewe föün esefich mi pulopulen ekkei seni ewe Eman mi Ngau.” (Ef. 6:16) Lükü me tong mi unus ngeni Jiowa repwe älisikich le föfföri minne mi pwüng me akkaleni ewe alen manau esemuch. Ewin ach käeö le tongei Jiowa, pwal ina ewin ach aücheani an we pwüng. Nge ifa usun mwelien letipach? Ifa usun a älisikich lon ach achocho le tongei minne mi pwüng?

Akkamwöchü Mwelien Letip mi Limöch

9. Ifa usun sipwe feiöch seni ach akkamwöchü eü mwelien letip mi limöch?

⁹ Lupwen sia papatais sia tingorei Jiowa ‘eu mwelien letip mi limöch.’ (1 Pit. 3:21) Pokiten sia anganga ach lükü ewe möön kepich, chchaan Jises we a pwölüelo ach tipis, ina popun sia pwapwaiti ach  üöch mwen mesen Kot. Iwe nge, ren ach sipwe amwöchü ach üöch, mi lamot sipwe akkamwöchü eü mwelien letip mi limöch. Ika fän ekkoch mwelien letipach a etipisikich are öüröürakich, sipwe kilisou pwe weween mi pwüng angangan. Än mwelien letipach möngüngü ngenikich a wewe ngeni pwe a chüen meefi me süföliti än Jiowa kewe allük mi pwüng. (1 Tim. 4:2) Nge mi pwal wor wisen ewe mwelien letip ngeni iir mi mochen tongei minne mi pwüng.

10, 11. (a) Apworausa eü pworaus mi pwäratä lamoten ach aüselinga mwelien letipach mi käit seni Paipel. (b) Pwata ach tongei minne mi pwüng a atoto watteen pwapwa?

¹⁰ Lupwen sia mwäällilo, mwelien letipach mi tongeni apwüngükich are eriäfföükich. Emön alüwöl a riki seni ewe “al mi pwüng.” A umwesilo le kakkatol sasingin kapasingaw me poputä le ükkün maruo. A mengiringir lupwen a fiti mwich me meefi pwe a chök elingepin le fiti afalafal, iwe a ükütiw. Iei alon: “Use silei pwe mwelien letipei epwe fen apwüngüei ren ai kewe föfför. Ükükün rüanü ier ua lükümachelo le föfföri minne mi mwääl.” Iwe mwirin, a ekieki le liwiniti ewe enlet. Inaamwo ika a meefi pwe Jiowa esap chüen aüselinga an iotek, nge a chök pwal iotek me omusomus ngeni. Mwirin chök orun engol minich, inan we a chuuri me pesei an epwe fitisefäli ekkewe mwich. A lo ngeni ewe Kingdom Hall me tingorei emön elter an epwe käeö ngeni. Lo, lo, lo a papatais me a kilisou ngeni Jiowa ren an seläni manauan.

¹¹ Sise fen meefi watteen pwapwa atun sia föri minne mi pwüng? Ewin ach käeö le tongei minne mi pwüng me unusen anganga, pwal ina ewin lapoloon ewe pwapwa sipwe meefi lon ach föfföri met Semach we lon läng a pwapwaiti. Anchangei mwo! Epwele war ewe rän lupwen meinisin aramas repwe chök meefi kinamween mwelien letiper, repwe unusen pwäralo napanapen Kot kewe. Ina minne, iei sipwe fotukalong le alolloolun letipach tongen minne mi pwüng me apwapwaai Jiowa.​—SalF. 23:15, 16.

12, 13. Ifa usun sipwe emiriti mwelien letipach?

¹² Ifa usun sipwe tongeni emiriti mwelien letipach? Lupwen sia käeö Paipel me nöüch kewe puk, a lamot sipwe chechchemeni pwe “ekewe chon pwüng ra akomwen ekieköchü mine repwe pälüeni ngeni kapas.” (SalF. 15:28) Nengeni ifa usun ei mettoch epwe älisikich lon pekin angangen moni. Lupwen a ffat pwe eü sokkun angang a ü ngeni än Paipel emmwen, lap ngenikich sia mwittir älleasochisi ekkewe emmwen seni ewe chon angang mi tuppwöl me alükülük. Iwe nge, ika ese lien ffat, mi lamot sipwe kütta ekkewe kapasen emmwen lon Paipel mi weneiti me iotek usur. Ekkoch kapasen emmwen a weneiti tümünün mwelien letipen ekkewe ekkoch pwe esap chepetek. (1 Kor. 10:31-33) Sipwe äkkäeüin ekieki ekkewe kapasen emmwen mi kküü ach riri ngeni Kot. Ika sia ekieki pwe Jiowa wesewesen emön,  iwe sipwe akkomw pwisin eisinikich, ‘Ai eäni ei angang epwe eletipechou Jiowa, me ämeteki letipan?’​—Kölf. 78:40, 41.

¹³ Lupwen sia ammolnatä fän iten ewe käeöön Leenien Mas are än ewe Mwichefel Käeöön Paipel, mi lamot sipwe ekieki lamoten ach ekilonei ewe lesen sia käeö. Iteitan sia kan chök mwittir erielo pölüwen ewe kapas eis me mwet ngeni ewe parakraf mwirin? Ekkena fansoun käeö ra tongeni alolloolaalo ach tongei minne mi pwüng are ämääraatä mwelien letipach mi mirit. Ika sia tongei minne mi pwüng, mi lamot sipwe käeöfichi me ekkekieki minne sia älleani lon Paipel. A lamot angang weires ren ach sipwe käeö le tongei minne mi pwüng ren unusen letipach!

Echik me Kaka fän iten minne mi Pwüng

14. Met Jiowa me Jises Kraist ra mochen sipwe meefi usun ach angang?

¹⁴ Jiowa me Jises Kraist ra mochen ach sipwe pwapwa lon ach angang. Met epwe alapalo ach pwapwa? Ina ach tongei minne mi pwüng! Lon ewe Afalafal woon ewe Chuuk, Jises a erä: “Ra feiöch chon mochen föri mine a pwüng me mwen mesen Kot, pun Kot epwe amenemenöchür.” (Mt. 5:6) Ifa lamoten ekkeei kapas ngeni iir kewe mi mochen tongei minne mi pwüng?

15, 16. Ifa usun chokkewe mi echik me kaka fän iten minne mi pwüng repwe mötülo?

¹⁵ Ei fönüfan a nom fän nemenien ewe mi ngaw. (1 Jon 5:19) Sia rorrongorong pworausen kirikiringaw me föfförün mwänesol mi kon ssenük mi fiffis ekis meinisin. Emön chon pwüng a fokkun weires lupwen a ekieki usun än aramas kirikiringaw ngeni aramas. (SalAf. 8:9) Kich chon tongei Jiowa, sia silei pwe i chök a tongeni amenemenöchü aramas mi echik me kaka fän iten minne mi pwüng. Ekiselo chök ekkewe mi ngaw repwele morolo, me chon tongei minne mi pwüng resap chüen küna riäfföü seni ekkewe chon atai allük me ar kewe föfföringaw. (2 Pit. 2:7, 8) A ifa me öchün ena ngaselo!

¹⁶ Kich nöün Jiowa chon angang me chon äppirü Kraist, sia mirititi pwe ‘Kot epwe amenemenöchü’ meinisin mi echik me kaka fän iten minne mi pwüng. Repwe fokkun mötülo ren än Kot we kokkot fän iten läng sefö me fönüfan sefö ikewe “pwüng epwe chöchöla ie.” (2 Pit. 3:13) Ina popun, sisap letipengaw are mäirü pwe eriäfföü me föfförün akkachofesä ra fen amoielo minne mi pwüng lon ei fönüfan mi pworoingaw. (SalAf. 5:8) Jiowa, ewe mi Lapalap seni meinisin, a silei met a fiffis me ekiselo chök epwe angasalo chon tongei pwüng.

Feiöchün Tongei Minne mi Pwüng

17. Ikkefa ekkoch feiöch epwe toto ren än emön tongei minne mi pwüng?

¹⁷ Kölfel 146:8 a menlapei ewe feiöch mi fokkun mürinnö epwe toto ren emön mi aleni ewe alen pwüng. Ewe sou mak köl a kölü: Jiowa a “echeni ekewe chon pwüng.” Anchangei! Ewe Sou Nemenemen unuselapen läng me fönüfan a tongekich pokiten sia tongei minne mi pwüng! Pokiten än Jiowa tong, sia lükü pwe epwe tümünükich ika sipwe akkakkomwa an we Mwu lon manauach. (Älleani Kölfel 37:25; Än Salomon Fos 10:3.) Ekiselo chon tongei minne mi pwüng repwe pwapwaiti unusen ei fönüfan. (SalF. 13:22) Ren lap ngeni nöün Kot  aramas, pokiten ra föri minne mi pwüng, repwe küna pwapwa wachemwuk me manau esemuch lon eü paratis mi lingöch woon fönüfan. Pwal mwo nge iei, ekkewe mi tongei än Kot pwüng ra feiöch ren kinamween letiper mi älisi tipeeüin ar famili me ar mwichefel.​—Fil. 4:6, 7.

18. Met sipwe sopwelo le föri atun sia wikkitiwiti warotoon ränin Jiowa we?

¹⁸ Mi lamot sipwe sopwelo le kütta än Jiowa pwüng atun sia wikkitiwiti warotoon ränin we mi lap. (Sef. 2:2, 3) Ina minne, sipwe enletin tongei föfförün Jiowa kewe mi wenechar. A kapachelong ach sipwe anüküöchü ewe “chechen leupw” itan pwüng pwe epwe tümünü letipach. A pwal lamot ach akkamwöchü eü mwelien letip mi limöch, ewe epwe atoto ngenikich chengel me apwapwaai letipen Kot.​—SalF. 27:11

19. Met sipwe üppos le föri, me met sipwe käeö lon ewe lesen mwirin ei?

¹⁹ Jiowa “a nenengeni unusen fanüfan, pwe epwe apöchöküla chokewe mi fang ngeni unusen letiper.” (2 Kron. 16:9) A mmen apöchökkülakich le föri minne mi pwüng inaamwo ika a lallapolo föfförün mwänesol, kirikiringaw me nükünüküngawen ei fönüfan! Enlet, föfförüch kewe mi pwüng repwe tongeni aosukosuka chon ei fönüfan mi imu seni Kot. Nge sia fokkun feiöch ren ach fitipacheiti än Jiowa we pwüng. (Ais. 48:17; 1 Pit. 4:4) Ina minne, ren letip mi unus, sipwe üppos le tongei me föfföri minne mi pwüng ren unusen letipach, ewe epwe atoto ngenikich pwapwa. Iwe nge, ach eäni eü letip mi unus a pwal wewe ngeni ach oputa minne mi ngaw. Ewe lesen mwirin ei epwe äweweei ena.

Ifa Usun Kopwe Pölüweni?

• Pwata ach aücheani ewe möön kepich a lamot lon ach tongei minne mi pwüng?

• Pwata a lamot sipwe ükküföüf ewe “chechen leupw” itan pwüng?

• Ifa usun sipwe emiriti mwelien letipach?

[Kapas Eis fán Iten ewe Lesen]

[Sasing lon pekin taropwe 26]

Eü mwelien letip mi mirit a älisikich le pwäkini osukosuk lon pekin angangen moni