Kontan ladrwatir avek tou ou leker

“Ou’n kontan ladrwatir.”​—PS. 45:7.

1. Kwa ki pou ed nou reste lo sa “bann santye ladrwatir”?

ZEOVA pe diriz son pep lo “bann santye ladrwatir” atraver son Parol ek lespri sen. (Ps. 23:3) Me vi ki nou enparfe, nou annan sa tandans pour nou sorti lo sa semen. Pour nou retourn lo sa semen i demann en kantite zefor. Kwa ki pou ed nou reisi? Nou bezwen kontan fer sa ki drwat parey Zezi.​—Lir Psonm 45:7. *

2. Kwa sa sa “bann santye ladrwatir”?

² Kwa sa sa “bann santye ladrwatir”? Normalman, en santye i en pti semen. Sa “bann santye” i ganny trase dapre standar ladrwatir Zeova. Dan langaz Ebre ek Grek, “ladrwatir” i refer avek sa ki “drwat” dapre bann standar moral e i enplik reste atase avek sa bann standar. Vi ki Zeova i “sa landrwa kot ladrwatir i ete,” son bann adorater i tourn ver li pour konnen ki santye ki drwat moralman ki zot devret swiv.​—Zer. 50:7.

3. Ki mannyer nou kapab aprann plis lo ladrwatir Bondye?

³ Pour nou kapab ganny laprouvasyon Zeova, nou bezwen fer en kantite zefor avek tou nou leker pour viv an armoni avek son standar drwat. (Det. 32:4) Nou konmans fer sa par aprann tou sa ki nou kapab lo Zeova atraver son Parol Labib. Pli nou aprann konn li e vin pli pros avek li tou le zour, pli nou pou kontan son ladrwatir. (Zak 4:8) Nou osi bezwen aksepte gidans ki sorti dan Parol enspire Bondye kan nou bezwen fer bann desizyon enportan dan lavi.

Rod ladrwatir Bondye

4. Ki nou bezwen fer pour rod ladrwatir Bondye?

⁴ Lir Matye 6:33. * Rod ladrwatir Bondye i enplik plis ki zis pres sa bon nouvel lo Rwayonm. Nou bezwen viv nou lavi tou le zour an armoni avek standar Zeova pour li aksepte nou servis sakre. Kwa ki bann ki pe rod ladrwatir Zeova i bezwen fer? Zot bezwen “sanze e vin en dimoun konpletman nouvo, kree dan resanblans Bondye e ki dimoun i war ki zot viv dan en fason zis [oubyen “drwat,” NW] e sen dapre laverite.”​—Efe. 4:24.

5. Kwa ki pou ed nou pour pa reste dekouraze?

⁵ Anmezir ki nou fer zefor pour viv dapre bann standar drwat Bondye, nou kapab dekouraze parfwa akoz nou bann defo. Kwa ki pou kapab ed nou pour pa reste dekouraze e aprann kontan e pratik ladrwatir? (Prov. 24:10) Nou bezwen apros Zeova regilyerman dan lapriyer “avek en leker senser, avek en lasirans konplet dan lafwa.” (Ebr. 10:19-22) Ki swa nou en Kretyen swazir oubyen nou annan lespwar pour viv lo later, nou demontre lafwa dan sakrifis Zezi Kri e dan son servis konman Gran Pret. (Rom. 5:8; Ebr. 4:14-16) Menm dan premye nimero sa magazin, i ti annan en legzanp ki ti eksplik valer ki disan Zezi i annan. (1 Zan 1:6, 7) Sa lartik ti dir: “Kan nou get en lobze byen rouz dan laklerte atraver en keksoz rouz ki transparan, sa lobze pou aparet blan. Alor, menm  si nou bann pese i byen rouz, i konmsi zot vin blan ler nou get zot parey Bondye i vwar zot atraver disan Kris.” (Zilyet 1879, paz 6) Pa sa i en zoli provizyon ki Zeova in donn nou atraver sakrifis son Garson byenneme!​—Iza. 1:18.

Verifye ou lekipman batay

6. Akoz i enportan pour nou verifye nou lekipman batay?

⁶ A tou moman, nou bezwen pran “ladrwatir konman en proteksyon lo [nou] pwatrin,” akoz dan en sans spirityel, i en parti enportan sa lekipman batay ki Bondye i donn nou. (Efe. 6:11, 14) Menm si nou’n fek dedye nou lavi avek Zeova oubyen nou’n dan sa servis sakre pour plizyer lannen, i vreman enportan pour nou verifye nou lekipman batay tou le zour. Pour ki rezon? Akoz Dyab ek son bann demon in ganny zete lo later. (Rev. 12:7-12) Satan i ankoler e i konnen ki i reste li zis en pti gin letan. Alor, i pe entansifye son latak lo pep Bondye. Eski nou realiz lenportans pour pran “ladrwatir konman en proteksyon” pour nou pwatrin?

7. Ki mannyer nou pou azir si nou realize ki nou bezwen pran “ladrwatir konman en proteksyon” pour nou pwatrin?

⁷ Sa proteksyon lo nou pwatrin i protez nou leker fizik. Akoz nou enparfe, nou leker senbolik i tant pour vin tret e tre move. (Zer. 17:9) Vi ki i annan sa tandans pour fer sa ki mal, i enportan pour nou antrenn e disiplin nou leker. (Zen. 8:21) Si nou realize ki nou bezwen pran “ladrwatir konman en proteksyon” pour nou pwatrin, nou pa pou tir li pour en pti moman par swazir bann divertisman ki Bondye i deteste. Nou pa pou mazin nou pe fer bann move aksyon e nou pa pou ni gaspiy en kantite letan pour get televizyon. O kontrer, nou pou lalit pour fer sa ki fer plezir Zeova. Menm si i arive ki nou tonbe akoz nou’n fer en keksoz mal ki nou ti pe mazin lo la, nou kapab leve e debout ankor avek led Zeova.​—Lir Proverb 24:16. *

8. Akoz nou bezwen pran “lafwa konman en proteksyon ki en boukliye i donnen”?

⁸ Lafwa i osi form parti sa lekipman batay. I “konman en proteksyon ki en boukliye i donnen.” I ed nou pour “tenny dife tou bann dart alimen ki Dyab i anvoye.” (Efe. 6:16) Lafwa ek lanmour pour Zeova pou ed nou fer sa ki drwat e pour reste lo sa semen ki anmenn ver lavi eternel. Pli nou aprann kontan Zeova, pli nou pou apresye son ladrwatir. Me an sa ki konsern nou konsyans, konman i pou ed nou dan nou zefor pour kontan ladrwatir?

Gard en bon konsyans

9. Ki byenfe nou gannyen letan nou gard en bon konsyans?

⁹ Zour nou batenm, nou ti demann Zeova pour donn nou “en konsyans kler.” (1 Pyer 3:21) Akoz nou demontre lafwa dan sa ranson, disan Zezi i kouver nou pese e alor nou kapab  reste pir devan Bondye. Par kont, pour nou kapab gard en bon relasyon avek Bondye, nou bezwen gard en bon konsyans. Si parfwa nou konsyans i akiz nou oubyen i averti nou, nou devret kontan akoz i ankor pe mars byen. Sa i endike ki nou konsyans i ankor sansib anver bann standar drwat Zeova. (1 Tim. 4:2) Me pour bann ki anvi kontan ladrwatir, nou konsyans i kapab zwe en lot rol.

10, 11. (a) Rakont en leksperyans ki montre akoz nou bezwen ekout nou konsyans ki’n ganny antrennen par Labib. (b) Akoz nou kapab ganny bokou plezir kan nou kontan ladrwatir?

¹⁰ Kan nou fer bann keksoz mal, nou konsyans i swa akiz nou ouswa fatig nou. I ti annan en zenn ki ti sorti lo sa “bann santye ladrwatir.” I ti vin adikt avek pornografi e i ti konmans fim mariwana. Vi ki i ti santi li koupab kan i ti al renyon e santi li konman en ipokrit ler i ti partisip dan predikasyon, i ti aret partisip dan sa bann aktivite Kretyen. I ti dir: “Me, sa ki mon pa ti realize se ki mon konsyans ti pou akiz mwan akoz sa ki mon ti pe fer.” I ti azoute: “Mon ti fer mon lenbesil pandan kat-r-an.” Apre i ti konmans reflesir lo retourn dan laverite. I ti panse ki Zeova pa ti pou ekout son lapriyer, me kantmenm sa i ti priye pour demann pardon. Pa plis ki dis minit plitar, son manman ti vizit li e ankouraz li pour rekonmans al renyon. I ti al kot Lasal Rwayonm e demann en ansyen pour etidye avek li. Avek letan i ti batize e i vreman rekonesan ki Zeova in sov son lavi.

¹¹ Pa nou’n vwar ki nou kapab ganny bokou plezir kan nou fer sa ki byen? Anmezir ki nou aprann kontan ladrwatir e demontre li plis ankor dan nou lavi, nou pou trouv plis lazwa pour fer sa ki fer plezir nou Papa ki dan lesyel. Zis mazinen! Sa zour kot tou imen pou dan lazwa akoz zot pou annan en konsyans kler i pros pour arive. Zot pou reflekte personnalite Bondye dan en fason parfe. Alor, annou devlop lanmour pour ladrwatir o fon nou leker e fer Zeova rezouir.​—Prov. 23:15, 16.

12, 13. Ki mannyer nou kapab antrenn nou konsyans?

¹² Ki nou kapab fer pour antrenn nou konsyans? Kan nou etidye Labib ek bann piblikasyon baze lo Labib, i enportan pour rapel ki “leker sa enn ki drwat i medite pour reponn.” (Prov. 15:28) Annou vwar ki mannyer sa pou ed nou fer en bon desizyon konsernan lanplwa. Normalman, si en travay i klerman pa annakor avek sa ki Labib i dir, laplipar nou pou definitivman azir dapre gidans ki nou gannyen atraver lesklav fidel e pridan. Me kan nou pa asire si en travay i byen, nou bezwen pran an konsiderasyon bann prensip Labib e medit lo zot dan lapriyer. * Sa i enkli bann prensip ki pou ed nou pour pa ofans konsyans lezot. (1 Kor. 10:31-33) Me pli enportan, nou bezwen konsider bann prensip ki enplik nou relasyon avek Bondye. Si Zeova i en personnaz reel pour  nou, premyerman nou pou demann nou lekor: ‘Eski i pou fer leker Zeova fermal si mon fer sa?’​—Ps. 78:40, 41.

¹³ Kan nou prepar Letid Latour Veyer oubyen Letid Labib Kongregasyon, nou bezwen gard antet lenportans pour medit lo sa bann lenformasyon. Eski nou vwar nou pe toultan zis souliny larepons e al lo lot paragraf? I pa pou posib pour sa kalite letid ogmant nou lanmour pour ladrwatir oubyen fer nou devlop en konsyans sansib. Si nou anvi kontan ladrwatir, nou bezwen etidye seryezman e medit lo sa ki nou lir dan Parol Bondye. Napa en lot fason pli fasil pour nou aprann kontan ladrwatir avek tou nou leker.

Lafen e swaf ladrwatir

14. Ki mannyer Zeova ek Zezi Kri i anvi nou santi dan nou servis sakre?

¹⁴ Zeova ek Zezi Kri i anvi ki nou fer nou servis sakre dan lazwa. Kwa ki pou ed nou annan sa lazwa? Lanmour pour ladrwatir! Zezi ti dir dan son Sermon lo Montanny: “Byennere bann ki lafen e swaf lazistis [oubyen “ladrwatir,” NW], zot pou rasazye.” (Mat. 5:6) Ki sa i vedir pour bann ki annan sa dezir pour kontan ladrwatir?

15, 16. Dan ki fason bann ki lafen e swaf spirityelman pou rasazye?

¹⁵ Sa lemonn ki nou pe viv ladan i ganny kontrole par Dyab. (1 Zan 5:19) Si nou lir en zournal dan nenport ki pei, nou pou vwar dan bann rapor ki i annan bokou plis krim ek vyolans ki oparavan. I enkyetan pour en dimoun ki drwat mazin lo sa bann kriyote ki imen i fer. (Ekle. 8:9) Me pour nou ki kontan Zeova, nou konnen ki zis li ki kapab rasazye tou bann ki lafen e swaf spirityelman ki anvi aprann ladrwatir. Tre byento, bann move dimoun pou ganny retire e bann ki kontan ladrwatir pa pou eksperyans ankor sa bann problenm koze par bann dimoun ki kas lalwa. (2 Pyer 2:7, 8) Pa sa pou en gran soulazman!

¹⁶ Konman bann serviter Zeova e bann ki pe swiv Zezi Kri, nou realize ki tou bann ki lafen e swaf ladrwatir “pou rasazye.” Zot satisfaksyon pou konplet anba sa laranzman ki Bondye in fer konsernan en nouvo lesyel ek en nouvo later kot “pou annan lazistis [oubyen “ladrwatir,” NW].” (2 Pyer 3:13) Alor, annou pa dekouraze oubyen sirprann si labi pouvwar oubyen vyolans in fer ladrwatir disparet dan sa lemonn Satan. (Ekle. 5:8) Zeova, sa enn Tre O i konnen sa ki pe arive e byento i pou sov bann ki kontan ladrwatir.

Kontan ladrwatir i anmenn byenfe

17. Nonm serten byenfe ki nou gannyen ler nou kontan ladrwatir.

¹⁷ Psonm 146:8 i met lanfaz lo en byenfe remarkab ki mars lo sa santye ladrwatir i anmennen. Sa psalmis ti sante: “Zeova i kontan sa bann ki drwat.” Zis mazinen! Souvren liniver i kontan nou akoz nou kontan ladrwatir! Akoz Zeova i kontan nou, nou annan konfyans ki i pou donn nou sa ki nou bezwen anmezir ki nou met lentere Rwayonm premye dan nou lavi. (Lir Psonm 37:25; Proverb 10:3. *) Avek letan, bann ki kontan ladrwatir pou erit later. (Prov. 13:22)  Pour laplipar serviter Bondye ki’n fer sa ki drwat, zot pou ganny rekonpanse avek en lazwa ekstraordiner e zot pou reste lo later pour touzour dan en zoli paradi. Menm la konmela, bann ki kontan ladrwatir Bondye pe ganny rekonpanse avek en lape lespri ki kontribye anver linite dan zot fanmir ek dan zot kongregasyon.​—Fili. 4:6, 7.

18. Ki nou bezwen kontinyen fer anmezir ki nou esper zour Zeova?

¹⁸ Anmezir ki nou esper larive gran zour Zeova, nou bezwen kontinyen rod ladrwatir. (Tsef. 2:2, 3) Annou alor demontre en lanmour senser pour standar drwat Zeova. Sa i enkli gard “ladrwatir konman en proteksyon lo [nou] pwatrin” san retir li ni menm pour en pti moman akoz i protez nou leker senbolik. Nou osi bezwen gard en bon konsyans, enn ki pou fer nou kontan e fer leker Bondye rezwir.​—Prov. 27:11.

19. Ki nou devret determinen pour fer e kwa ki pou ganny diskite dan sa lot lartik?

¹⁹ Lizye Zeova “pe ale vini partou lo later pour li montre son lafors an faver bann ki zot leker i tou pour li.” (2 Kron. 16:9) Pa sa bann parol i rekonfort nou anmezir ki nou fer sa ki byen menm si nou fer fas avek vyolans, kondisyon ki pa stab ek bann move keksoz dan sa lemonn ki ranpli avek problenm! I vre, sa kantite dimoun ki elwannyen avek Bondye i kapab vwar li drol ki nou pe viv dapre bann standar drwat. Me nou kapab ganny bokou byenfe kan nou viv an armoni avek bann standar Zeova. (Iza. 48:17; 1 Pyer 4:4) Alor, annou determinen pour kontinyen kontan e pratik sa ki drwat avek tou nou leker akoz sa pou anmenn lazwa. Par kont, pour nou annan en leker konplet nou bezwen ay sa ki mal osi. Sa lartik ki swiv pou montre ki sa i vedir.

[Not anba lo paz]

Ki ou pou reponn?

• Akoz i neseser pour bann ki kontan ladrwatir rekonnet valer sakrifis Zezi?

• Akoz i enportan pour pran “ladrwatir konman en proteksyon” pour nou pwatrin?

• Ki mannyer nou kapab antrenn nou konsyans?

[Kestyon]

[Portre lo paz 26]

En konsyans ki’n ganny antrennen pou ed nou fer en bon desizyon konsernan lanplwa