Eqqortumik iliorneq uummatikkut iluunngarlutit nuannariuk

“Eqqortumik iliorneq nuannaraat.” — TUSSIAAT 45:8.

1. ‘Aqqutitigut naapertuilluartutigoornissamut’ suna iluaqutigisinnaavarput?

OQAATSINI anersaanilu illernartoq atorlugit Jehovap innuttani “aqqutitigut naapertuilluartutigut” siulersortarpai. (Tussiaat 23:3, NV) Naammalluinnanngitsuugattali aqqutit taakku nigortooqqajaasarpavut, aqqutikkulli eqqortukkut ingerlaleqqikkumalluni ilungersorluni iliuuseqarnissaq pisariaqarpoq. Taamaaliornissamut suna iluaqutigisinnaavarput? Jiisusip pisimaneratut eqqortumik iliorneq nuannarisariaqarparput. — Atuaruk Tussiaat 45:8.

2. ‘Aqqutitigut naapertuilluartutigoorneq’ qanoq paasisariaqarpa?

² ‘Aqqutitigut naapertuilluartutigoorneq’ qanoq paasisariaqarami? Aqqutitigut taakkunatigoorneq Jehovap naapertuilluarnermut najoqqutassiaa malillugu inuunertut paasisariaqarpoq. Oqaatsit hebræerisuut grækerisuullu “naapertuilluarneq”-mik isumaqartut — Biibilimi kalaallisuumi ilaatigut “iluarneq”-mik nutserneqartartut —  “eqqortumik iliorneq”-mut attuumassuteqarluinnarput. Naapertuilluartuuneq, imaluunniit ‘eqqortumik iliorneq’, najoqqutassianik naapertuilluartunik malinneqqissaarnertut paasisariaqarpoq. Jehovap ‘issiavissaarsua naapertuilluarnermut tunngaviummat’, taassuminnga pallorfiginnittut Jehova aqqutit suut naapertuilluartuunerannik — imaluunniit suut ileqqussatigut assuarnaatsuunerannik — aalajangiisuutikkumasarpaat taakkulu malikkumasarlugit. — Tussiaat 89:14.

3. Qanoq ililluta Guutip naapertuilluassusia pillugu paasisaqarnerusinnaavugut?

³ Aatsaat Guutip ‘aqqutigisaanik eqqortunik’, imaluunniit najoqqutassiaanik naapertuilluartunik, uummatikkut iluunngarluta maleruaagutta, taanna tamakkiisumik nuannaartissinnaavarput. (5 Mosesi 32:4, NV) Siullermik Jehova Guuti pillugu paasineqarsinnaasut tamaasa taassuma oqaasiani, Biibilimi, paasiniartariaqarpavut. Taanna pillugu paasisaqarnerujartortilluta ullullu tamaasa taassumunnga attaveqarluarnerujartortilluta taassuma naapertuilluassusianik nuannarinninnerujartuinnassaagut. (Jaaku 4:8) Aamma inuunitsinni pingaarutilinnik aalajangigaqassagaangatta Guutip oqaasiani isumassarsiarititaasumi siunnersuutigineqartunik malinnittariaqarpugut.

Guutip naapertuilluassusia ujaruk

4. Guutip naapertuilluassusianik ujaasineq qanoq paasisariaqarpa?

⁴ Atuaruk Matthæusi 6:33. Guutip iluarneranik, imaluunniit naapertuilluassusianik, ujaasineq Guutip naalagaaffia pillugu nutaarsiassamik nuannersumik oqaluussissutiginninnerinnaanngilaq. Illernartumik kiffartornerput Jehovamit akuerineqarsinnaassappat iliuuserisavut tamarmik taassuma najoqqutassiaanut qutsissunut naapertuuttariaqarput. Jehovap naapertuilluassusianik ujaasisut tamarmik susariaqarpat? ‘Inuttut pissuseq nutaaq Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq atisariaqarpaat.’ — Efesosimiut 4:24, NV.

5. Nikallunganerup ajugaaffiginissaanut suna iluaqutigisinnaavarput?

⁵ Guutip najoqqutassiaanik naapertuilluartunik malinninniartilluta kukkusarnerput pissutigalugu ilaannikkut nikallungalertarsinnaavugut. Taamatut nikallunganerup uagutsinnut nukillaarsaataasup ajugaaffiginissaanut, eqqortumik iliornermik nuannarinninnissamut eqqortumillu iliortarnissamut suna iluaqutigisinnaavarput? (Ussatit 24:10) Jehovamut qinunikkut palliguttuartariaqarpugut “uummatitsigut ilumoorluta, uppernermi aalajaalluta”. (Hebræerit  10:19-22) Tanitaagaluarutta nunarsuarmiluunniit inuunissamik neriugisaqaraluarutta Jiisusip Kristusip utertitsissutitut pilliutaa palasiunitsitullu kiffartornera upperaarput. (Romamiut 5:8; Hebræerit 4:14-16) Jiisusip aavata kuisap qanoq sunniuteqarnera Zion’s Watch Tower-imi (Napasuliaq Alapernaarsuiffik) saqqummertut siullersaanni erseqqissarneqarpoq. (1 Johannesi 1:6, 7) Allaaserisami ima allassimasoqarpoq: “Qaamasumi suna arlaat aappallorissoq igalaaminikkut aappaluttukkut isigigaanni aappallorissoq taanna qaqortoorpasittarpoq. Ajortitsinnut tunngatillugu aamma taamaappoq; taakkua Guutimit Jiisusip aavatigut isigineqarfiannut pigutta, taakku aappallorissutut ikkaluarlutik Guutimit qaqortutut isigineqassapput.” (Juuli 1879, qupp. 6) Jehovap ernermi asangaakkami pilliutaa atorlugu utertitaassutissatsinnik akiliisimanera ilumut nuanningaarami! — Esaja 1:18.

Anersaakkut sakkutuussutitit misissukkit

6. Sooq anersaakkut sakkutuussutitsinnik misissuisarnissarput pingaaruteqarluinnarpa?

⁶ “Iluarneq saattuaasatut” atortuartariaqarparput, anersaakkut sakkutuussutinut Guutimeersunut ilaammat pingaarutilik. (Efesosimiut 6:11, 14) Jehovamut tunniulluinnarlaajugaluarutta ukiorpassuilluunniit kiffartorsimagaluarutta anersaakkut sakkutuussutitsinnik ullut tamaasa misissuisarnissarput pingaaruteqarluinnarpoq. Sooq? Diaavulu anersaapiluilu nunarsuup eqqaanut igitaanikuummata. (Saqqummersitat 12:7-12) Saatani kamattorsuuvoq nalunnginnamiuk piffissakilluni. Taamaattumik Guutip innuttaanik saassussinini sakkortunerulersippaa. ‘Iluarnermik saattuaasaqarnerup’ qanoq pingaaruteqartiginera paasivarput?

7. ‘Iluarnermik saattuaasaqartariaqarnerput’ paasisimagutsigu sussaagut, aamma sunaveersaartassaagut?

⁷ Saattuaasaq uummammut illersuutaasarpoq. Naammalluinnanngitsuunerput pissutigalugu uummaterput assersuutaasoq tatigisassaanngeqqajaasarpoq. (Jeremia 17:9) Uummatitta eqqunngitsuliorteqqajaasarmatigut tamatuma ilinniartillugulu perorsartarnissaa pingaaruteqarpoq. (1 Mosesi 8:21; Tussiaat 139:23, 24) ‘Iluarnermik saattuaasaqartariaqarnerput’ paasigutsigu taanna peerallattarnavianngilarput Guutip uumigisaanik aliikkutaqarniarluta; aamma eqqarsaataannakkut takorloortarnavianngilarput eqqunngitsuliorluta. Piffissarujussuaq atorlugu fjernsynertarnavianngilagut. Jehovalli iluarisaanik iliorniartuassaagut. Uinimmut tunngasunik eqqarsaatipiloqallatsiarnikkut naakkiutissagaluarutta Jehovap ikiuineratigut nikueqqissaagut. — Atuaruk Ussatit 24:16.

8. Sooq “uppernerup eqqortinnaveeqqutaa” pisariaqartipparput?

⁸ Anersaakkut sakkutuussutitsinnut aamma ilaavoq “uppernerup eqqortinnaveeqqutaa”. Taanna ‘Ajortup qarsuinik ikumasunik qamitsinissamut’ iluaqutigisarparput. (Efesosimiut 6:16) Upperneq uummatikkullu iluunngarluni Jehovamik asanninneq eqqortumik iliornissamut aqqumilu inuunermut naassaanngitsumut sammisumiiginnarnissamut iluaqutigisarpavut. Jehovamik asanninnissaq ilikkarnerujartortillugu taassuma naapertuilluassusianik pingaartitsinerujartuinnassaagut. Nalunngeqatiginnissuterpummi? Taanna eqqortumik iliornermik nuannarinninnissamut qanoq iluaqutigisarparput?

Ilerasuutissaqarnaveersaarit

9. Ilerasuutissaqarnaveersaarneq qanoq iluaqutigisinnaavarput?

⁹ Kuisikkatta Jehova ‘ilerasuuteqannginnissamik qinnuteqarfigaarput’. (1 Petrusi 3:21, NV) Utertitsissut upperigatsigu Jiisusip aavata ajortivut matoortarpai, taamaalillutalu Guutimut minguitsutut sassarsinnaavugut. Guutimut minguitsumik  attaveqartuassagutta ilerasuutissaqarnaveersaartariaqarpugut. Nalunngeqatiginnissutittali unnerluutigalutalu mianersoqquppatigut, taanna ajoquteqarsimassanngimmat qujamasuutigisinnaavarput. Taamatut ‘kapitilaartarnivut’ nalunngeqatiginnissutitta Jehovap aqqutigeqqusaanut naapertuilluartunut tunngatillugu malussarlersimannginneranut ersiutaaginnarput. (1 Timotheusi 4:2) Nalunngeqatiginnissulli eqqortumik iliornermik nuannarisalinnut iluaqutaasumik suli allatut sunniuteqartarpoq.

10, 11. (a) Misigisaq nalunngeqatiginnissutitsinnik Biibili tunngavigalugu ilinniartinneqarsimasumik tusarnaartariaqartarnitsinnik ersersitsisoq oqaluttuariuk. (b) Eqqortumik iliornermik nuannarinninnerput qanoq iluaqutigisinnaavarput?

¹⁰ Eqqunngitsulioraangatta qularnanngitsumik ilerasuttarpugut. Angut inuusuttoq ‘aqqutinit naapertuilluartunit’ qimaguppoq. Pornografiimik isiginnaanngitsoorsinnaajunnaarpoq marihuanamillu pujortartalerluni. Ataatsimiigiaraangami ilerasuttarpoq oqaluusseqataagaangamilu ilumoortuusaartutut misigisarluni, taamaattumillu kristumiutut sammisassat peqataaffigisarunnaarpai. Imali oqarpoq: “Isumaqanngikkaluarpunga nalunngeqatiginnissutima erloqisittuassagaanga.” Imalu nangippoq: “Ukiut sisamat missiliorlugit taamatut sianiilliorujoorpunga.” Taava sallusuissummut uternissani eqqarsaatigilerpaa. Jehovamit tusarnaarneqassasorinngikkaluarluni taanna isumakkeerfigeqqulluni qinnuigaa. Minutsit quliunngitsulluunniit qaangiuttut anaanaa pulaarluni iserpoq ataatsimiigiartaleqqeqqullugulu kajumissaarlugu. Naalagaaffilersaarfiliarpoq utoqqaanertarlu qinnuigalugu atuaqqissaaqatigisaleqqulluni. Naggataatigut kuisippoq, Jehovallu inuunerminik annaassinera qujamasuutigaa.

¹¹ Eqqortumik iliornerup nuannaarnangaarnera nammineq misiginikuuarput, ilaa? Eqqortumik iliornermik nuannarinninneq ilikkarnerujartortillugu aqqutinillu naapertuilluartunik malinninnerujartortilluta Ataatatta qilammiusup iluarisaanik iliorneq nuannarineruleraluttuinnartarparput. Eqqarsaatigeriaruk! Ulloq inuit tamarmik nalunngeqatiginnissutimik nipaa tusaraangamikku tamatigut nuannaartarfissaat nalliukkumaarpoq. Guutip pissusiinik naammalluinnartumik ersersitsisinnaanngussapput. Taamaattumik eqqortumik iliornermik nuannarinninneq uummatitsinni sorlanitsitsigu taamaalillutalu Jehovap uummataa nuannaartillugu. — Ussatit 23:15, 16.

12, 13. Nalunngeqatiginnissuterput qanoq ililluta malussarissarsinnaavarput?

¹² Nalunngeqatiginnissuterput ilinniartinniarlugu susinnaavugut? Biibilimik Biibililersaarutaatitsinnillu atuaqqissaaraangatta pingaaruteqarpoq eqqaamasassallugu naapertuilluartoq ‘oqalulersinnani qamuuna eqqarsaqqaartartoq’. (Ussatit 15:28) Assersuutigalugu suliffitsinnut tunngatillugu aalajangigassaqaleraangatta tamanna iluaqutaasassaaq. Suliffik aalajangersimasoq piumasaqaatinut Biibilimiittunut erseqqissumik tulluanngippat amerlanersatta inussiaq aalajaallunilu silatooq aqqutigalugu uagutsinnut siunnersuutigineqartut qularnanngitsumik malinniapallassavaat. Suliffimmulli tunngatillugu qanoq aalajangissanerluni nalornigaanni najoqqutassiat Biibilimiittut tamatumunnga tunngasut maluginiarneqartariaqarput najoqqutassiallu qinunikkut eqqarsaatigeqqissaarneqartariaqarlutik. * Assersuutigalugu imaassinnaavoq allat nalunngeqatiginnissutaannik  ajoqusiinnginnissamut tunngatillugu najoqqutassiaq eqqarsaatigineqartariaqartoq. (1 Korinthimiut 10:31-33) Ingammik najoqqutassiat Guutimut attaveqarnitsinnut tunngassutillit eqqumaffigisariaqarpavut. Jehova uagutsinnut piviusuuppat siullermik imminut ima aperisariaqarpugut: “Suliffik taanna suliffigilissagukku Jehovap tamanna ‘aliasuutigalugulu’ anniaatigissavaa?” — Tussiaat 78:40, 1990.

¹³ Napasuliaq Alapernaarsuiffik-mik atuaqqissaaqatigiinnissamut ilagiilluunniit Biibilimik atuaqqissaaqatigiinnissaannut piareersaraangatta eqqaamasariaqarparput atuakkatta eqqarsaatigeqqissaartarnissaat. Atuaqqissaarnermi apeqqutinut akissutinik titarsipallariarluta immikkoortumut tulliuttumut ingerlaqqinniapallattarpugut? Ilimananngilaq taamatut atuaqqissaarneq eqqortumik iliornermik nuannarinninnerulissutigissagipput imaluunniit nalunngeqatiginnissutitsinnut malussarissaataassasoq. Eqqortumik iliornermik nuannarinnilissagutta peqqissaarnerusumik atuaqqissaartariaqartassallutalu Guutip oqaasiani allanneqarsimasumi atuakkatsinnik eqqarsaatiginneqqissaartariaqartassaagut. Eqqortumik iliorneq uummatikkut iluunngarluta nuannarilissagutsigu iliuuseqartariaqarpugut.

Naapertuilluarnermut kaallunilu imerusunneq

14. Jehovap Guutip Jiisusillu Kristusip illernartumik kiffartornitsinni qanoq innissarput kissaatigaat?

¹⁴ Jehovap Guutip Jiisusillu Kristusip kissaatigaat illernartumik kiffartornitsinni pilluartuunissarput. Suna pilluarnerulissutigisinnaavarput? Eqqortumik iliornermik nuannarinninneq! Jiisusi qaqqami oqaluutsimini ima oqarpoq: “Pilluarput iluarnermut kaattut imerusuttullu, taakkumi qaarsillartinneqassapput.” (Matthæusi 5:6) Oqaatsit taakku eqqortumik iliornermik nuannarinnikkumasunut qanoq pingaaruteqartigippat?

15, 16. Inuit anersaakkut kaallutillu imerusuttut qanoq ilillutik qaarsillartinneqassappat?

¹⁵ Silarsuaq inuuffigisarput Ajortumit naalakkersorneqarpoq. (1 Johannesi 5:19) Nunami sumiikkaluaraanniluunniit aviisini allaaserineqartarput naakkittaatsuliornerit nakuusernerillu aatsaat taama ingasatsigisut. Eqqortumik iliornermik nuannarisaqartut inuit inoqatiminnut naakkittaatsuliortarnerat isumakuluutigisupilussuusarpaat. (Oqaluussisartup oqaasii 8:9) Jehovamik asannittut nalunngilaat taanna kisimi inunnik eqqortumik iliornermik nuannarinnittunik anersaakkut kaakkunnaarsitsisinnaallunilu imerusuersaasinnaasoq. Guutiitsut qanittukkut suujunnaarsinneqassapput, eqqortumillu iliornermik nuannarinnittut inatsisaatsut iliuusii ajortut naalliuutigiunnaassavaat. (2 Petrusi 2:7, 8) Qanoq nuannertigissava!

¹⁶ Jehovamut kiffaallutalu Jiisusimut Kristusimut ajoqersugaagatta nalunngilarput naapertuilluarnermut kaallutillu imerusuttut tamarmik ‘qaarsillartinneqassasut’. ‘Qaarsillartinneqassapput’ qilaat nutaat nunalu nutaaq ‘iluassutsip najugarisassai’ Guutimit atuutilersinneqartussat aqqutigalugit. (2 Petrusi 3:13) Taamaattumik nikallornaveersaarta, aamma naqisimanninnerup nakuusernerullu silarsuarmi Saatanimit siulersorneqartumi naapertuilluarnermik inangiinerat tupigusuutiginaveersaartigu. (Oqaluussisartup oqaasii 5:7) Jehovap, Qutsinnerussaartup, pisut malinnaaffigai, eqqortumillu iliornermik nuannarinnittut qanittukkut aniguisissavai.

Eqqortumik iliornermik nuannarinninnerup pilluaqqussutissartai misigikkit

17. Eqqortumik iliornermik nuannarinninnerup pilluaqqussutissartaasa ilaannik eqqaasaqarit.

¹⁷ Tussiaat 146:8-mi erseqqissarneqarpoq naapertuilluarnerup aqqutaatigoornerup pilluaqqussutissartaa nuanningaartoq. Tussiaasiortoq ima erinarsorpoq: “[Jehovap] iluartut asavai.” Takorlooriaruk! Qilammi nunamilu Kisimi Oqartussaasup asavaatigut eqqortumik iliornermik nuannarinnikkatta! Jehovap asanninnera pissutigalugu qularutiginngilarput timikkut isumagisarumaaraatigut  Guutip naalagaaffianut attuumassuteqartut inuunitsinni pingaarnerpaatittarutsigit. (Atuakkit Tussiaat 37:25; Ussatit 10:3). Naggataatigut nunarsuaq tamarmi inunnit eqqortumik iliornermik nuannarinnittunit pigineqalissaaq. (Ussatit 13:22) Guutip innuttaasa amerlanersaat eqqortumik iliornertik pillugu nuannaangaarnermik nunarsuarmilu paratiisiusumi inuunermik naassaanngitsumik akissarsisinneqassapput. Allaat ullumikkut Guutip naapertuilluassusianik nuannarinnittut qamuuna eqqissinermik ilaquttaminni ilagiinnilu aaqqiagiilersitsisartumik akissarsisinneqassapput. — Filippimiut 4:6, 7.

18. Jehovap ullussarsua utaqqitillugu sujuartariaqarpugut?

¹⁸ Jehovap ullussarsua utaqqitillugu Guutip naapertuilluassusia ujartuartariaqarparput. (Sefania 2:2, 3) Taamaattumik Jehovap aqqutigeqqusaanik naapertuilluartunik ilumoorluta nuannarinninnerput ersersitsigu. Taamaaliornermut ilaavoq ‘iluarnermik saattuaasaqarnissarput’, taanna sukallugu, uummatitsinnut assersuutaasumut illersuutaaniassammat. Aamma ilerasuutissaqarnaveersaartariaqarpugut, nammineq nuannaarsinnaaniassagatta aamma Jehovap uummataa nuannaartissinnaaniassagatsigu. — Ussatit 27:11.

19. Suna aalajangiusimasariaqarparput, allaaserisamilu tulliuttumi suna sammineqassava?

¹⁹ Jehovap “nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit”. (2 Nalunaarsuutit 16:9) Oqaatsit taakku uagutsinnut ilumut tuppallersaataapput, silarsuarmi allanngorarfioqalunilu nakuuserfioqalunilu ajussuseqarfioqisumi eqqortumik iliortaratta! Ilumoorpoq aqqutitigut naapertuilluartutigoornerput inunnit millionilinnit Guutimut takornartaasunit tupigusuutigineqartarsinnaasoq. Jehovalli naapertuilluassusianik aalajangiusimanninnerput iluaqutigingaartarparput. (Esaja 48:17; 1 Petrusi 4:4) Taamaattumik uummatikkut iluunngarluta eqqortumik iliornermik nuannarinnittuarlutalu eqqortumik iliortuarnissarput aalajangiusimatigu. Uummatikkulli iluunngarluta eqqortumik iliornermik nuannarinnissagutta eqqunngitsuliorneq aamma uumigisariaqarparput. Allaaserisami tulliuttumi tamatuma qanoq paasisariaqarnera ersersinneqarpoq.

[Quppernerup ataani ilanngussaq]

Qanoq akissavit?

• Eqqortumik iliornermik nuannarinnikkumalluni utertitsissutip pingaaruteqassusianik paasinninnissaq sooq pingaaruteqarpa?

• Sooq ‘iluarnermik saattuaasaqarnissaq’ pingaaruteqarpa?

• Nalunngeqatiginnissuterput qanoq ililluta ilinniartissinnaavarput?

[Atuaqqissaarnermi apeqqutit]

[Qupp. 25-mi assiliartaq]

Nalunngeqatiginnissut ilinniartinneqarsimasoq suliffitsinnut tunngatillugu aalajangigassaqaraangatta iluaqutigisarparput