Llapan shonquntsikwan alli rurëta kuyashun

“Alli kaq rurëtam kuyarqunki.” (SAL. 45:7.)

1. ¿Imataq yanapamäshun “llanu alli kaq nänikunapa” purinapaq?

BIBLIAWAN y santo espïritunwanmi Jehoväqa sirveqninkunata “llanu alli kaq nänikunapa” pushamantsik (Sal. 23:3). Tsënö kaptimpis hutsasapa karmi, tsë nänikunapita rakikärintsik. Tsëmi tsë näniman yapë kutinapaqqa alli sinchikunantsik. ¿Imataq yanapamäshun tsëta ruranapaq? Jesusnö kanqantsikmi, pëqa alli rurëkunata alläpam kuyëkoq (lei  Salmo 45:7 *).

2. ¿Imataq ‘llanu alli kaq nänikuna’?

² Bibliachö ‘llanu alli kaq nänikuna’ ninqanta rikärishun. Llanu nänikunaqa purinapaq kichkim kayan. ¿Imanirtaq “alli kaq” rurëta llanu nänitawan igualatsin? Diospa alli rurëninkunawan patsätsishqa kaptinmi. Hebreo y griego idiömakunachö “alli kaq” rurë nirqa, parlan Biblia ninqannölla rurëpaqmi. Jehovämi “alli rurëkunapa täränan sitio”, tsëmi pëta sirveqkunaqa kushishqa pëman witintsik, alli kaqta yachatsimänapaq y mëpa ëwanapaq nimänapaqpis (Jer. 50:7).

3. ¿Imanötaq Diospa alli rurëninkunata más reqishun?

³ Jehoväta kushitsita munarqa, alläpa precïsom pë mandakunqannölla kawanantsik (Deu. 32:4). Tsëpaqqa, pëpitam llapan puëdenqantsikmannö Bibliapita yachakunantsik. Diosta más reqirninmi, pëpa lädonchö kashun y alli rurëninkunatapis kuyashun (Sant. 4:8). Tsënöpam imatapis rurëta munarqa, Diospa Palabran ninqannö rurashun.

Diospa alli rurëninkunata ashishun

4. ¿Ima ninantaq Diospa alli rurëninta ashiqa?

⁴ (Lei Mateo 6:33.) ¿Ima ninantaq Jehoväpa alli rurëninta ashiqa? ¿Diospita yachatsikïllatsuraq? Manam. Tsëpaqqa mastaran ruranantsik. Ruranqantsikta pë chaskinampaqqa, llapan hunaqkunam mandakunqankunata wiyakunantsik. Diospa alli rurëninta asheqkunaqa, hukläya nunanam kayänan. “Tsepaqmi Teyta Diosqa camamashqa cantsic rasonpa caqta cäsucur jutsannaq  pe munashqanno cawacunantsicpaq.” (Efe. 4:24.)

5. ¿Imataq yanapamäshun llakikurlla mana kawakunapaq?

⁵ Pero Dios ninqannölla allita ruranapaq kallpachakurnimpis, höraqa hutsamanmi ishkirintsik. Tsënö pasakuptinqa, ¿imaraq yanapamäshun llakikurlla mana kawakunapaq, y alli kaqta ruranapaq y kuyanapaq? (Pro. 24:10.) “Llapan shonquntsicwan, y alli marcäquinintsicwan Diosman” mañakunqantsikmi yanapamäshun (Heb. 10:19-22). Awmi, ciëlochö o Patsachö kawanapaq cristiano karpis, yarpänantsikmi Salvakoq y Sacerdötekunapa Mandaqnin Cristuman markäkunapaq kaqta (Rom. 5:8; Heb. 4:14-16). Ingleschö kë revista (julio de 1879) tsëraq yarqamurmi, parlarqan Cristupa yawarnin salvamänantsikpaq alläpa väleq kanqanta (1 Juan 1:6, 7). Hoqta kaq päginanchömi kë igualatsikï yarqamurqan: “Imapis chipapaq puka color karqa, yulaqnömi tikrarin aktsichö puka vidriopa rikëkushqaqa. Tsënöllam hutsantsik pasëpa chipapäkïkaq puka colornö kaptimpis, Cristupa yawarnimpa Dios rikanqannö rikëkushqaqa, yulaqman tikrakärin”. ¡Imanö kushikïpaqmi Jehová, kuyë Tsurimpa yawarninwan salvamänapaq tukï ruranqanqa! (Isa. 1:18.)

Dios qomantsik armakunata haqishuntsu

6. ¿Imanirtaq Dios qomanqantsik armakunata haqishwantsu?

⁶ Dios qomanqantsik armakunataqa imëpis puritsinantsikmi, huk kaqmi: alli rurëpaq “imeca fierupita chalecu cuenta” (Efe. 6:11, 14). Pasaq watakunallaraq bautizakushqa kar o atska watana Jehoväta servikarpis, alläpa precïsom llapan hunaq Dios qomanqantsik armakunata katsinantsik. ¿Imanir? Satanasta supëninkunatawan kë Patsaman weqaparkayämushqa kayaptin (Apo. 12:7-12). Ushakänampaq ichikllana pishiptinmi, alläpa piñashqa kakïkan. Tsëmi Diospa markanta pasëpa mana alli rurëkunawan hipëkätsin. Tsërëkurmi llapan hunaqkuna “fierupita chalecu[ntsicta]” haqinantsiktsu.

7. “Fierupita chalecu cuenta” alli rurëkuna preciso kaptinqa, ¿imanöraq portakushun?

⁷ Chaleco llapan qasquntsikta tsaparmi, shonquntsiktawan tsapan. Hutsasapa kashqam shonquntsikqa mana allillaman yarparan (Gén. 8:21). Awmi, alli rurëta munashqapis mana allimanmi heqarkatsimantsik (Jer. 17:9). Tsëmi alläpa preciso shonquntsikta alli kaqta yachatsinantsik y dominanantsik. Musyantsikmi alli rurëkuna “fierupita chalecu cuenta” alläpa preciso kanqanta, tsëmi huk minütollapapis këtaqa qotukurishwantsu. Manam Dios chikinqan cösaskunawanqa kushikuntsiktsu, ni mana alli cösaskunamanqa yarparäkuntsiktsu. Hina manam atska hörakunatsu televisionta rikaräkur kakuntsik. Tsëpa rantinqa, portakïnintsikwan Jehoväta kushitsinapaqmi sinchikuntsik. Pero ¿ichikllapis mana alli pensëkunaman o rurëkunaman ishkirishqaqa? Manam llakikurllatsu kakuntsik, sinöqa Diospa yanapakïninwanmi tsë pensëkunata vencinapaq sinchikuntsik (lei Proverbios 24:16 *).

8. ¿Imanirtaq wanantsik ‘marcäquininintsic escudu cuenta’ kananta?

⁸ Hina Dios qomanqantsik armakunachömi këkan, “escudu cuenta” markäkïnintsik, tsëqa alläpa precïsom ‘diablupa flechancuna mana imanamänantsicpaq’ (Efe. 6:16). Markäkïqa o  yärakuyga yanapamantsik alli kaq nänipa ëwanapaqmi, tsëqa mana wanushpa kawakïmanmi apamantsik. Hina llapan shonquntsikwanmi Jehoväta kuyanantsik, y pëta kuyarqa, masmi alli rurëtapis munashun. Tsëta ruranapaqqa concienciantsikmi yanapamäshun. Pero ¿imanötaq alli kaqta ruranapaq yanapamantsik?

Concienciantsik alli katsun

9. ¿Imanöraq kashun concienciantsik alli kaptinqa?

⁹ Bautizakunqantsik hunaqmi ‘alli consensiantsic’ Jehová qoykamänata mañakurqantsik (1 Ped. 3:21). Pero Jesuspa wanïninman markäkurmi, hutsantsikkunapita perdonta chaskirnin Diosnintsikwan amishtarquntsik. Tsënö kaptimpis, kawëman apakoq nänipa purinapaqqa, alli concienciatam wanantsik. Concienciantsik imapis mana alli kanqanta mäkutsimashqaqa, agradecikushwanmi. ¿Imanir? Mana chukrukashqa karnin ima alli o mana alli kanqantapis rikätsimashqa, y Jehová ninqannölla ruranapaq willamashqam (1 Tim. 4:2). Hina concienciantsikqa alli rurëta kuyanapaqpis huknöpa yanapamantsikmi.

10, 11. a) Concienciantsik ninqanta wiyakï alläpa preciso kanqanta willakaramï. b) ¿Imanirtaq alläpa kushitsimantsik alli kaqta rurë?

¹⁰ Mana allita rurëkushqaqa, concienciantsik manam punutsimäshuntsu y llakishqallatam katsimäshun. Tsënömi Bibliapita tsëraq yachakïkaq jöventa pasarqan. Pëqa alli nänipa ëwëkanqantam marihuana drögata shoqur y warmipis ollqupis qalapächu mana allita rurëkaqkunata rikaräkur qallëkurqan. Tsënö karmi reunionkunachö ruranqankunapita yarparäkïkaq, y yachatsikoq ëwarnimpis kikin mana alli këkanqantam yarparaq. Tsëmi Diospa kaqta paqwë haqirirqan. Pëmi willakun: “Ruranqäkunapita concienciä cuentata mañamänantaqa manam pensarqätsu. Tsënö kaptimpis chusku watapam mana allikunata rurar kakïkarqä”. Tsëpitanam, Diospa kaqman yapë kutinampaq pensarirqan. Jehová manana wiyanampaq kaqman pensarpis, perdonta mañakurmi pëman qayakurqan. Chunka minütollapis manaraq pasaptinmi, mamänin watukaqnin charqan y reunionkunaman ëwanampaq nirirqan. Tsëmi reunionkunaman yapë ëwar qallëkurqan y huk anciänotam Bibliapita yachatsinampaq mañakurqan. Tiempowannam bautizakurqan, y kananqa kawanqampitam Jehoväta alläpa agradecikun.

¹¹ Dios munanqannö kawakurqa, ¿manaku rasumpa kushikuntsik? Dios ninqanta kuyar y nimanqantsiknö kawarqa, pëpa shonqunta kushitsirmi alläpa kushikushun. ¡Këman pensari! Ichikllachönam ciëlochö Teytantsiknö hutsannaq kashun, tsëqa mananam concienciantsik imapitapis llakitsimäshunnatsu. Tsë kawë chämunqanyaqqa, shonqupita patsëmi alli rurëta kuyanantsik, tsënöpam Jehoväpa shonqunta kushitsishun (Pro. 23:15, 16).

12, 13. ¿Imanötaq concienciantsikta yachatsishwan?

¹² ¿Imanötaq concienciantsikta yachatsintsik? Bibliapita y publicacionkunapita yachakurmi, y kë consëjota qatirninmi: “Alli ruraq nunapa shonqunqa pensanran” (Pro. 15:28). Huk trabäjoman yëkunapaq o mana yëkunapaqpis tapukushqaqa, yachakunqantsikkunaman yarpachakunqantsikmi yanapamäshun. Pero mäkoq mäkoq cumplido sirveq ninqannöpis, wakin trabäjokunachöqa cristiänokuna manam trabajashwantsu Biblia yachatsikunqampa contranta rurayaptin. Pero huk trabajo alli kanqan claro  mana rikakaptinqa, manaraq tsë trabäjoman yëkurmi, Diosta mañakurir Biblia tsëpaq parlanqanta rikänantsik. * Y Biblia ninqannöpis, manam rurënintsikwanqa pitapis mana alliman ishkitsishwantsu (1 Cor. 10:31-33). Imëkanöpapis Diosnintsikwanmi alli këta munantsik. Jehoväta amïgontsiktanö kuyarqa, puntatam kënö tapukunantsik: “Kë trabäjoman yëkurqa, ¿Diospa shonquntatsuraq nanatsishaq o llakitsishaq?” (Sal. 78:40, 41).

¹³ Täpakoq revistapaq o Bibliapita Yachakunapaq reunionpaq yachakurqa, mana qonqëtam leinqantsikkunaman yarpachakunantsik. Estudianqantsik publicacionkunata, ¿rasllaku imëpis ushëpa ushar rayakachärintsik? Kënö ruranqantsikqa manam concienciantsikta alliyätsinqatsu, ni manam alli rurëta kuyanapaq yanapamäshuntsu. Tsëpaqqa, alläpa precïsom Bibliapita alleq yachakunantsik y ninqankunaman yarpachakunantsik. Dios ninqankunata shonquntsikman churëta munashqaqa, manam imapis michämäshuntsu.

Mallaqaqnöraq o yakunaqnöraq alli rurëta tïrashun

14. Jehoväwan Jesucristu, ¿imanö kanatataq munayan mandamanqantsikkunata ruranqantsikchö?

¹⁴ Jehoväwan Jesusqa mandamanqantsikkunata rurar kushishqa kawakunatam munayan. ¿Imataq tsënö ruranapaq yanapamäshun? Alli rurëta kuyanqantsikmi. Hirkapita Yachatsikïninchömi Jesus kënö nirqan: “Cushicuyanqam mallaqepanoraq y yacunëpanoraq alli rurellata tïraqcuna, porqui munayanqannomi ruracanqa” (Mat. 5:6). Diospa alli näninkunata kuyaqkunapaq, ¿ima ninantaq këqa?

15, 16. ¿Imanötaq mallaqëpanöraq o yakunëpanöraq alli rurëta tïranqantsikchö Diosnintsik yanapamäshun?

¹⁵ Kë mundoqa Satanaspa makinchömi këkan (1 Juan 5:19). Mëchö tsëchö tärashqapis periödicokunaqa maqakïpaq, y wanutsinakïllapaqmi más willakuyan. Alli rurëkunata kuyaqkunaqa, nunakuna kikinkunapura maqanakuyanqanta wiyarmi espantakuyan (Ecl. 8:9). Pero Jehoväta y alli rurëkunata kuyaq nunakunaqa, musyayanmi yakunö y mikïnö Palabranta pëlla qonampaq kaqta. Ichikllanam pishin mana alli kaq nunakuna ushakäyänampaq. Alli ruraqkunaqa mananam rikäyanqanatsu mana alli nunakunata ni rurëninkunata (2 Ped. 2:7, 8). ¡Imanö shumaqraq tsëqa kanqa!

¹⁶ Cristuta qatirnin Jehoväta sirveqkunaqa, musyantsikmi ichikllachöna alli kaq rurëkuna Diosnintsik apamunampaq kaqta. Awmi, mushoq ciëlochö y mushoq Patsachöqa, kushishqam ‘allicunata rurarllana, nunacuna cawayanqa’ (2 Ped. 3:13). Tsëmi kë mundochö nunakuna maqanakuyaptin, wanutsinakuyaptin y qayapänakuyaptimpis manam llakinantsiktsu ni mantsanantsiktsu (Ecl. 5:8). Ciëlochö Teytantsikqa llapantam rikarëkan, tsëmi ichikllachöna serviqninkunata mana alli ruraqkunapita horqanqa.

Alli rurëta kuyanqantsikpita bendicionkuna

17. ¿Ima bendicionkunataraq chaskishun alli rurëta kuyanqantsikpita?

¹⁷ “Jehoväqa alli ruraqkunatam kuyëkan”, ninmi Salmo 146:8 texto. Kë versïculochö rikarqunkiku, ¿imanir alli rurëta kuyanqantsikta? Ciëlopa y Patsapa Autoridadnin kuyamänantsikta musyarmi. ¡Pëpa kuyakïninnöqa manam imapis kanmantsu! Tsëmi musyantsik pëpa Gobiernonta puntaman churashqaqa, llapan wananqantsikta qomänantsikpaq kaqta (lei Salmo 37:25 * y Proverbios 10:3 *). Kë Patsaqa kanqa alli rurëta kuyaqkunallapaqmi (Pro. 13:22). Diosta sirveqkunaqa, casi llapanmi kë Patsachö mana wanushpa kawakuyanqa. Y kanampis cristiänokunaqa shonqunkunachö kushishqa karninmi, shumaq kawakuyan cristiano mayinkunawan y kastankunawampis (Fili. 4:6, 7).

18. ¿Imataraq rurashwan Jehoväpa hunaqnin chämunqanyaq?

 ¹⁸ Tsëmi Jehoväpa hunaqnin chämunanta shuyaranqantsikyaqqa, alli kaq rurëkunata ashikänantsik (Sof. 2:2, 3). Alli näninkunata kuyanqantsiktam rikätsikunantsik. Shonquntsik tsapaq “fierupita chalecu cuenta” alli kaq rurëkunataqa manam imëpis qotukunantsiktsu, tsënöpa imapis shonquntsikman mana yëkunampaq. Hina, kikintsik alli kanapaq y ciëlochö Teyta Diosnintsikta kushitsinapaqpis concienciantsikmi alli kanan (Pro. 27:11).

19. ¿Imatataq imëpis rurëkänantsik, y imatataq qateqnin yachatsikïchö rikäshun?

¹⁹ Jehoväqa “hinantin patsapam rikarëkan” “pëllata llapan shonqunkunawan kuyaqkunata kallpanwan yanapanampaq” (2 Cró. 16:9). Maqakoq, qayapäkoq y wanutsikoq nunakunapa chöpinchö kawëkarpis, ¡imanö kushikïpaqmi allita ruranapaq sinchikunqantsikta Diosnintsik rikarëkanqanqa! Kë mundochö Diospita rakikashqa nunakunaqa, espantakuyanmi alli ruraqta rikämarnintsik, pero noqantsikqa musyantsikmi kikintsikpaq alli kanqanta (Isa. 48:17; 1 Ped. 4:4). Tsëmi, imëpis rikätsikïkäshunlla alli kaqta llapan almantsikwan kuyëkanqantsikta. Pero maskunatapis ruranantsikmi. Diosllapaq shonquntsik kanqanta rikätsikunapaqqa, mana alli rurëkunatam pasëpa chikinantsik. Qateqnin kaq yachatsikïchömi imanö ruranapaq kaqtapis rikäshun.

[Päginapa ura kuchunchö willakïkuna]

¿Imatataq yachakurquntsik?

• ¿Imanirtaq Jesus wanunqampita yachakurqa alli rurëta más kuyantsik?

• ¿Imanirtaq alläpa preciso alli rurëkuna “fierupita chalecu cuenta” kapamänantsik?

• ¿Imanötaq concienciantsikta yachatsintsik?

[Yachakunapaq kaqpa tapukïninkuna]

[24 kaq päginachö dibüju]

Huk trabajo alli kanqanta musyanapaqqa, concienciantsiktam alli yachatsinantsik