Inangaro i te Tuatua Tika ma Toou Ngakau Katoa

“Inangaro koe i te tuatua-tika.”—SALA. 45:7.

1. Eaa te ka tauturu ia tatou kia aru i “te au ara tuatua-tika”?

NA ROTO i tana Tuatua e tona vaerua tapu, te arataki nei a Iehova i tona iti tangata “na te au ara tuatua-tika.” (Sala. 23:3) No te mea e aronga apa tatou, e aere ke ana tatou mei taua arataa ra. Kia rave akaou i te mea tika ka tauta pakari tatou. Eaa te ka tauturu ia tatou kia puapingaia? Mei ia Iesu rai, ka inangaro tatou i te rave i te mea tika.​—E tatau ia Salamo 45:7.

2. Eaa “te au ara tuatua-tika”?

² Eaa “te au ara tuatua-tika”? E mataara oiti. Akatumuia teia “au ara” ki runga i te au turanga tuatua tika o Iehova. Te aiteanga o te “tuatua-tika” i te reo Epera e te Ereni, te aru tikai anga i te au kaveinga tau. I te mea e ko Iehova “te nooanga tuatua-tika,” te mataora ra tona aronga akamori i te akara kiaia kia akapapu e eaa te ara tuatua tika kia aru ratou.​—Iere. 50:7.

3. Akapeea tatou te apii maata atu anga i te tuatua tika a te Atua?

³ Na te tauta pakari ua anga i te aru i te turanga tuatua tika o te Atua ma to tatou ngakau katoa e mareka tikai mai ei aia ia tatou. (Deu. 32:4) Ka akamata na te apiianga i te ka rauka ia tatou no runga i te Atua ko Iehova mei tana Tuatua, te Pipiria. Te maata atu ta tatou ka apii no runga iaia, te akavaitata anga kiaia i te au ra ravarai, ka maata atu to tatou inangaro i tana tuatua tika. (Iako. 4:8) E ariki katoa tatou i te aratakianga a te Tuatua akauruia a te Atua me umuumuia tatou kia rave i te au ikianga puapinga o te oraanga.

Kimi i te Tuatua Tika a te Atua

4. Eaa te o maira ki te kimianga i te tuatua tika a te Atua?

⁴ E tatau ia Mataio 6:33. Kimianga i te tuatua tika a te Atua e maata atu te o maira ki te akapou anga i te taime i te tutu aere i te tuatua meitaki o te Patireia. E ariki mai ei a Iehova i ta tatou tavinianga tapu, kia rotai to tatou tu i te au ra ki tona au turanga teitei. Eaa ta te katoatoa e kimi ra i te tuatua tika a Iehova ka rave? “Kia akatangata ou oki [ratou] ko tei angaia kia tau i te Atua ra, i te tuatua-tika e te tapu mou.”—Ephe. 4:24.

5. Eaa te ka tauturu ia tatou kia autu i te manako paruparu?

⁵ Ia tatou e tauta ra i te aru i te au turanga tuatua tika a te Atua, penei ka manako paruparu tatou i tetai taime no to tatou tu apa. Eaa te ka tauturu ia tatou kia autu i te manako paruparu, akono i te aroa e kia rave i te tuatua tika? (Mase. 24:10) Ka akavaitata tatou kia Iehova na roto i te pure putuputu “ma te ngakau pikikaa kore, ma te akarongo mou tikai.” (Ebe. 10:19-22) Me e au Kerititiano akatainuia me kore e manakonakoanga to tatou no te enua, e taangaanga i to tatou akarongo i roto i te atinga oko o Iesu Karaiti e tana au angaanga ei Taunga Maata teitei no tatou. (Roma 5:8; Ebe. 4:14-16) Kua akakiteia mai te puapinga tikai o te toto akamaringiia o Iesu i roto i te itiu mua o teia makatini. (1 Ioa. 1:6, 7) Te akakite ra te atikara e: “E tika rai, me akaraia tetai apinga tou muramura me kore kutekute na roto i tetai karati muramura i roto i te marama, akaraanga teatea te apinga; no reira, noatu te tou muramura me kore te kutekute o ta tatou au ara, me akara ra tatou i ta tatou ara mei te tu e akara maira te Atua na roto i te toto o Karaiti, e teatea te reira.” (Tiurai 1879, kapi 6) E mea umere tikai ta Iehova i rave no tatou na roto i te atinga oko o tana Tamaiti akaperepere!​—Isa. 1:18.

 Akara Meitaki i Toou Rakei Pae Vaerua

6. Eaa ra i puapinga ai kia akara meitaki tatou i to tatou rakei pae vaerua?

⁶ Ka anoanoia tatou i te au taime ravarai kia tamou i ‘te tapoki-umauma tuatua tika,’ e tuanga puapinga te reira no te rakei pae vaerua no ko mai i te Atua. (Ephe. 6:11, 14) Me kua akatapu ua akenei tatou ia tatou uaorai kia Iehova me kore kua tavini takere ana iaia no tetai rau ngauru mataiti, e mea puapinga maata kia akara meitaki i to tatou rakei pae vaerua. No teaa ra? No te mea kua tiria mai te Tiaporo e tana au temoni ki runga i te enua nei. (Apo. 12:7-12) Kua riri a Satani e kua kite aia e e tuatau poto ua tona. No reira te akapakari nei aia i tana tamaki anga i te iti tangata o te Atua. Te ariki ra ainei tatou i te puapinga o ‘te tapoki-umauma tuatua tika ra’?

7. Eaa ta tatou ka rave me te akaperepere ra tatou i ‘te tapoki-umauma tuatua tika’?

⁷ Mei tetai tapoki umauma e paruru ra i te pukuatu, ka paruru te tuatua tika i to tatou ngakau. No to tatou tu apa, e akatupu ana to tatou ngakau i te pikikaa e te kino. (Iere. 17:9) I te mea e e akakeuia ana to tatou ngakau kia rave i te tarevake, e puapinga tikai kia tereni e kia akatere meitakiia te reira. (Gene. 8:21) Me akaperepere tikai tatou i ‘te tapoki-umauma tuatua tika,’ kare tatou e kiriti i te reira no tetai tuatau poto na te ikianga kia tamataoraia mai e te au mea e rikarika ra te Atua; kare katoa tatou e manakonako atu kia rave i te angaanga tarevake. Kare tatou e kaimoumou maata i to tatou taime i te akarakara tivi. Mari ra, ka tauta pakari tatou i te rave i te mea ka mareka mai a Iehova. Noatu ka inga tatou no tetai tuatau poto no te manako tau kore o te kopapa, ka tu akaou mai tatou ma te tauturu a Iehova.​—E tatau ia Maseli 24:16.

8. Eaa ra tatou ka anoano ei ‘te paruru o te akarongo’?

⁸ Tetai tuanga o to tatou rakei pae vaerua ko ‘te paruru o te akarongo.’ Na te reira e tauturu ia tatou kia ‘mate te au tao ai ravarai a te vaerua kino ra.’ (Ephe. 6:16) Te ka tupu mai, ka tauturu te akarongo e te aroa ngakau katoa no Iehova ia tatou kia rave i te tuatua tika e kia noo tamou ki runga i te mataara no te ora mutu kore. Te maata atu ta tatou ka apii no te inangaro ia Iehova, ka akaperepere maata atu tatou i tana tuatua tika. Akapeea to tatou akava ngakau? Akapeea te reira te tauturu anga i ta tatou tauta anga kia inangaro i te tuatua tika?

Akono Tamou i te Akava Ngakau Meitaki

9. Akapeea tatou e puapinga ai te akono tamou anga i te akava ngakau meitaki?

⁹ To tatou papetitoia anga, kua pati tatou kia Iehova no te “akava-ngakau meitaki.” (1 Pete. 3:21) No te mea te irinaki ra tatou i te oko, te tapoki ra te toto o Iesu i ta tatou ara e te mataora nei tatou i tetai turanga ma i mua i te Atua. Kia vai ma ua taua turanga i mua i te Atua, ka anoanoia tatou kia akono tamou i te akava ngakau meitaki. Me akaapa e me akamatakite mai to tatou akava ngakau ia tatou, e rekareka tatou e te angaanga meitaki ra te reira. Te akakite maira taua akakeuanga  ra e te meitaki ra to tatou akava ngakau no runga i to Iehova au arataa tuatua tika ra. (1 Timo. 4:2) E tuanga ke atu ta te akava ngakau ka rave no te aronga e inangaro ra i te tuatua tika.

10, 11. (a) Akakite mai i tetai tupuanga i te tumu ka akarongo ei tatou ki to tatou akava ngakau tereniia e te Pipiria. (e) Eaa ra te inangaro i te tuatua tika ka akamareka maata ai ia tatou?

¹⁰ Me rave tatou i te tarevake ka akaapa mai me kore ka tamamae to tatou akava ngakau ia tatou. Kua aere ke tetai mapu mei “te au ara tuatua- tika.” Inangaro maata aia i te au ravenga ainga viivii e kua akamata i te kai maruana. Kua kinokino tona ngakau te aere anga ki te au uipaanga e kua manako aia e e pikikaa aia te piri anga ki te angaanga tutuanga, no reira kua akamutu aia i te piri atu ki teia au angaanga Kerititiano. “Inara,” kua tuatua aia, “kare au i kite ana e ka akaapa mai toku akava ngakau iaku no taku i rave.” Kua tuatua katoa aia, “Kua rave au i taua angaanga neneva ra e a mataiti.” Kua manako aia i te oki akaou ki te tuatua mou. Noatu e kua manako aia e kare a Iehova e akarongo mai ki tana pure, kua pure rai aia e kua pati kia akakoreia mai tana ara. Raro ua ake i te tai ngauru miniti, kua atoro mai tona metua vaine iaia e kua akamaroiroi iaia kia oki ki te au uipaanga. Kua aere atu aia ki te Are Uipaanga Patireia e kua pati ki tetai tangata pakari kia apii raua. Kare i roa ana, kua papetitoia aia, e te akameitaki ra aia ia Iehova no te tauturu anga iaia.

¹¹ Kare ainei e ka mareka maata tatou no te rave anga i te mea tika? Ia tatou e apii ra i te inangaro i te tuatua tika e te rave maroiroi anga i te reira, ka rekareka maata atu tatou i te rave i te mea ka mareka mai to tatou Metua i te rangi. E akamanako ana! Ka tae mai te ra e kite ei te tangata ravarai i te akava ngakau mataora; ka akaata apa kore mai ratou i to te Atua tu. No reira e tatanu i te inangaro i te tuatua tika ki roto i to tatou ngakau e kia akarekareka ia Iehova.​—Mase. 23:15, 16.

12, 13. Akapeea tatou me tereni i to tatou akava ngakau?

¹² Eaa ta tatou ka rave me tereni i to tatou akava ngakau? Me apii tatou i te au Tuatua Tapu e te au puka akatumuia ki runga i te Pipiria, e puapinga kia akamaara e “te kimi ra te ngakau o te aronga tuatua-tika ra i tana e tuatua atu.” (Mase. 15:28) Akamanako i te puapinga o teia me aro atu tatou i tetai au turanga no runga i te angaanga. Me patoi tetai angaanga i te au umuumuanga Tuatua Tapu, e aru viviki ana te maataanga ia tatou i te aratakianga tei orongaia mai e te pupu tavini akono meitaki e te pakari. Inara, me kare tetai angaanga e taka meitaki ana, e akara tatou i te au kaveinga Pipiria e kia pure no runga i te reira. * Te aru ra teia i te au kaveinga kia kore e akakino atu i te akava ngakau o tetai ke. (1 Kori. 10:31-33) Kia akamanako meitaki tatou i te au kaveinga te o maira to tatou pirianga ki te Atua. Me e tika tikai a Iehova kia tatou, ka ui tatou kia tatou  uaorai e, ‘Ka akaongoongo ainei au ia Iehova me rave au i teia angaanga?’​—Sala. 78:40, 41.

¹³ Me akapapa no te Apii Punanga Tiaki me kore te Apii Pipiria a te Putuputuanga, e akamaara e ka anoanoia kia akamanako oonu i te apii. Te akaira viviki ua ra ainei tatou i te pauanga o te uianga e kua neke atu ki te parakarapa e aru maira? Kare taua tu apiianga e akaoonu i to tatou inangaro i te tuatua tika me kore e akatupu i te akava ngakau meitaki. Me inangaro tatou i te tuatua tika, ka anoanoia tatou kia apii meitaki e kia akamanako oonu i ta tatou e tatau ra i roto i te Tuatua tataia a te Atua. Te umuumuia ra te tauta anga pakari i te apii kia inangaro i te tuatua tika ma to tatou ngakau katoa!

Pongi e te Kaki i te Tuatua Tika

14. Eaa ta te Atua ko Iehova e Iesu Karaiti e inangaro ra ia tatou kia kite mai no runga i ta tatou angaanga tapu?

¹⁴ Te inangaro ra te Atua ko Iehova e Iesu Karaiti ia tatou kia mataora me rave i ta tatou angaanga tapu. Eaa te ka akatupu i to tatou mataora? Te inangaro no te tuatua tika! I roto i te Tuatua i runga i te Maunga, kua akakite a Iesu e: “E ao to tei pongi, e tei kaki i te tuatua-tika: e akakiia ratou.” (Mata. 5:6) Eaa te puapinga o teia au tuatua no te aronga e anoano ra kia inangaro i te tuatua tika?

15, 16. Na teea au tu e akamerengoia ai te pongi e te kaki pae vaerua?

¹⁵ Te akatereia nei te ao e noo nei tatou e te vaerua kino. (1 Ioa. 5:19) Me tatau tatou i te nuti pepa i tetai ua atu enua, ka kite mai tatou i te au ripoti no runga i te au tu kino e te takinga kino maata tikai. Kare te tangata tuatua tika e marama ana i te kino ta te tangata e rave ra ki tetai. (Kohe. 8:9) Ei aronga inangaro ia Iehova, kua kite tatou e nana anake e akamerengo i te pongi e te kaki pae vaerua o te aronga tataki tai e anoano ra kia apii i te tuatua tika. Kare e roa atu ka takoreia te aronga akono kore i te Atua, e kare te aronga inangaro i te tuatua tika e taitaia i te au angaanga kino tei akatupuia e te aronga kino. (2 Pete. 2:7, 8) E akapumaana anga tikai te reira!

¹⁶ Ei au tavini no Iehova e ei au pipi na Iesu Karaiti, kua kite tatou e ka “akakiia” te aronga pouroa tei pongi e tei kaki i te tuatua tika. Ka akamerengoia tikai ratou e te akanoonooanga a te Atua no te rangi ou e te enua ou “te vai tika anga o te tuatua-tika ra.” (2 Pete. 3:13) Auraka tatou e taitaia me kore e poitirere e kare e tuatua tika i roto i teia ao o Satani no te taomianga e te kino. (Kohe. 5:8) Te kite maira a Iehova, Tei Teitei Rava, eaa te tupu ra e kare e roa atu ka akaora mai aia i tei inangaro i te tuatua tika.

Puapingaia no te Inangaro i te Tuatua Tika

17. Eaa tetai au akameitakianga no te inangaro i te tuatua tika?

¹⁷ Te akakite maira a Salamo 146:8 i tetai akameitakianga maata no te aru anga i te arataa tuatua tika. Kua imene te tata taramo e: “Ko Iehova tei inangaro i te aronga tuatua-tika ra.” Akamanako ana! Te inangaro maira Tei Ngateitei i te ao e pini ua ake ia tatou no te inangaro i te tuatua tika! No to Iehova aroa, papu e ka akono mai aia ia tatou, ia tatou e tuku ra i te au anoano o te Patireia ei mea mua i roto i to tatou oraanga. (E tatau ia Salamo 37:25; Maseli 10:3.) Kare e roa atu, ka riro teia paraneta katoa no tei inangaro i te tuatua tika. (Mase. 13:22) No te maataanga o te iti tangata o te Atua, ka riro te  rekareka maata tikai e te oraanga ope kore ki runga i tetai enua parataito manea ei akameitakianga no tei rave i te tuatua tika. Teia tuatau katoa, ka akameitakiia tei inangaro i te tuatua tika a te Atua ki te manako au te ka akarotai i to ratou pamiri e to ratou putuputuanga.​—Phili. 4:6, 7.

18. Eaa te au mea papu ka rave tatou ia tatou e tapapa ra i te ra o Iehova?

¹⁸ Ia tatou e tapapa ra i te tae anga mai o te ra maata o Iehova, e kimi ua atu rai tatou i tana tuatua tika. (Zepha. 2:2, 3) No reira, e akaari tatou i te aroa tika tikai no te au arataa tuatua tika a te Atua ko Iehova. Kapiti mai te akono tamou anga i ‘te tapoki-umauma tuatua tika,’ ei paruru i to tatou ngakau. Ka anoano katoa tatou kia akono ua rai i te akava ngakau meitaki​—te ka akamareka ia tatou e ka akarekareka i te ngakau o to tatou Atua.​—Mase. 27:11.

19. Eaa ta tatou ka tauta i te rave, e eaa te ka uriuriia i roto i te atikara ka aru mai?

¹⁹ “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Para. 16:9) E pumaana tikai taua au tuatua ra kia tatou, ia tatou e rave ra i te mea tika i roto i teia ao manamanata, e maata ua atura te tu tinamou kore, takinga kino e te kino! E tika, kare te maataanga o te tangata tei takake mai mei te Atua e marama ana i to tatou arataa tuatua tika. Inara ka puapinga maataia tatou na te aru anga i te tuatua tika a Iehova. (Isa. 48:17; 1 Pete. 4:4) No reira e tauta ua rai tatou kia inangaro e kia rave i te tuatua tika ma to tatou ngakau katoa, te ka oronga mai i te mataora kia tatou. Inara, e rauka ai tetai ngakau katoa te kapiti maira te rikarika anga i te kino. Ka akaari mai te atikara ka aru mai i te aiteanga o teia kia tatou.

[Tataanga Rikiriki i Raro]

Akapeea Koe me Pau?

• Eaa ra tatou ka akaperepere ei i te oko kia rauka i te inangaro i te tuatua tika?

• Eaa ra i puapinga ai kia aao tatou i ‘te tapoki-umauma tuatua tika’?

• Akapeea tatou me tereni i to tatou akava ngakau?

[Au Uianga Apii]

[Tutu i te kapi 26]

Tauturu te akava ngakau tereniia kia akatikatika i te au manako no te angaanga