Ia Naunau ma Lou Lotoatoa i le Amiotonu
Ia Naunau ma Lou Lotoatoa i le Amiotonu
“Ua e fiafia [naunau] i le amiotonu.”—SALA. 45:7.
1. O le ā e fesoasoani iā i tatou e mulimuli ai i “ala o le amiotonu”?
O LOO taʻitaʻia e Ieova ona tagata i “ala o le amiotonu,” e ala i lana Afioga ma lona agaga paia. (Sala. 23:3) Ae ona e tatou te lē lelei atoatoa, e tatou te see ese ai mai i lenā ala. E manaʻomia ai ni taumafaiga filigā ina ia toe faia le mea saʻo. O le ā e fesoasoani iā i tatou e taulau ai? E ao ona tatou naunau e fai le mea saʻo, e pei o Iesu.—Faitau le Salamo 45:7.
2. O ā “ala o le amiotonu”?
2 O ā “ala o le amiotonu”? O nei ala ua pei o ni auala savali vaiti, ua faia aʻe i tulafono amiotonu a Ieova. I le gagana Eperu ma le Eleni, e faasino atu le upu “amiotonu” i le mulimulituʻi i taʻiala tau amio. Ona o Ieova “o lē e amiotonu,” e fiafia la ona tagata tapuaʻi e talia ana faatonuga, e uiga i amioga saʻo e ao ona latou tausia.—Iere. 50:7.
3. E faapefea ona aʻoaʻoina atili i tatou i le amiotonu a le Atua?
3 Seʻi vaganā ua tatou tauivi ma le lotoatoa e gauaʻi i tulafono ma taʻiala amiotonu a le Atua, ona faatoʻā faafiafiaina lea o ia. (Teu. 32:4) Ia muamua ona aʻoaʻoina le tele e mafai ai e uiga iā Ieova, mai i lana Afioga le Tusi Paia. O le tele o mea e tatou te aʻoaʻoina e uiga iā Ieova ma mafuta vavalalata atu iā te ia i aso uma, o le tele foʻi lenā o lo tatou naunau i lana amiotonu. (Iako. 4:8) E tatau foʻi ona tatou talia le taʻitaʻiga a le Afioga paia a le Atua, pe a tatou faia ni filifiliga tāua i le olaga.
Saʻili le Amiotonu a le Atua
4. O le ā e aofia ai i le saʻilia o le amiotonu a le Atua?
4 Faitau le Mataio 6:33. E iai isi mea e aofia ai i le saʻilia o le amiotonu a le Atua, e ese mai i le faaalu o lo tatou taimi i le talaʻia o le tala lelei o le Malo. Ina ia talia e Ieova la tatou auaunaga paia, e tatau ona ōgatusa a tatou amioga i aso uma ma lona finagalo. O le ā e ao ona fai e i latou uma o ē o loo saʻilia le amiotonu a Ieova? E tatau ona latou “oofu i le tagata fou na foafoaina e tusa ma le finagalo o le Atua, i le amiotonu moni ma le faamaoni.”—Efe. 4:24.
5. E faapefea ona tatou manumalo i le lotovaivai?
5 A o tatou taumafai e ola e tusa ai ma tulafono amiotonu a le Atua, o nisi taimi e lotovaivai ai ona o o tatou vaivaiga. E faapefea ona tatou manumalo mai i le lotovaivai, ma naunau ai i le amiotonu ma faia? (Faata. 24:10) E ao ona tatou faalatalata atu e lē aunoa iā Ieova i le tatalo “ma le lotofaamaoni, i le mautinoa atoa i le faatuatua.” (Epe. 10:19-22) E tusa po o i tatou o ni Kerisiano faauuina po o ē o le a ola e faavavau i le lalolagi, ua tatou faatuatua i le taulaga togiola na faia e ala iā Iesu Keriso, ma lana auaunaga o lo tatou Ositaulaga Sili. (Roma 5:8; Epe. 4:14-16) Na tusi Ioane: “E faamamāina foʻi i tatou mai i agasala uma i le toto . . . o Iesu.” (1 Ioa. 1:6, 7) Ua taʻua i le Tusi Paia, e ui lava “e pei o le ʻie mūmū sesega a [tatou] agasala, ae o le a paʻepaʻe e pei o le kiona.” Maʻeu se sauniuniga matagofie ua faia e Ieova mo i tatou, e ala mai i le taulaga togiola na faia i lona Alo pele!—Isa. 1:18.
Iloilo Lou Ofutau Faaleagaga
6. Aiseā e tāua tele ai ona iloilo lo tatou ofutau faaleagaga?
6 E ao ona tatou ofuina i taimi uma “le ufifatafata o le amiotonu,” ona o se vaega tāua o le ofutau faaleagaga mai i le Atua. (Efe. 6:11, 14) E tusa pe e leʻi leva ona tatou tuuina atu iā Ieova po ua autausagā foʻi o faia le auaunaga paia, ae e tāua tele ona iloilo i aso uma lo tatou ofutau faaleagaga. Aiseā? Talu ai ua lafo mai le Tiapolo ma ana temoni i le lalolagi. (Faaa. 12:7-12) Ua ita tele Satani ma ua ia iloa ua puupuu lona taimi. O lea ua faateteleina ai ana osofaʻiga i tagata o le Atua. Po o tatou talisapaia le tāua o le ofuina o “le ufifatafata o le amiotonu”?
7. O le ā e tatou te faia pe a iloa le tāua o “le ufifatafata o le amiotonu”?
7 E pei ona puipuia le fatu i se ufifatafata, e faapea foʻi ona puipuia o tatou loto i le amiotonu. Ae ona ua tatou fananau mai ma le agasala, e tele ai ina faaʻoleʻole ma matuā leaga o tatou loto. (Iere. 17:9) Talu ai e mananaʻo o tatou loto e fai le mea sesē, e tāua ai ona aʻoaʻoina ma aʻoaʻia. (Kene. 8:21) Pe afai e tatou te iloa e tāua “le ufifatafata o le amiotonu,” o le a tatou lē aveesea la i se taimi, e ala i le fiafia i mea e inosia e le Atua. O le a tatou lē mafaufau foʻi ma manaʻonaʻo e fai ni mea sesē. O le a tatou lē faamaʻimau le tele o taimi aogā i le matamata i le televise. Nai lo o lea, o le a tatou tauivi pea e fai le mea e fiafia i ai le finagalo o Ieova. E ui o nisi taimi e tatou te tautevateva ai ona o le mafaufau i amioga leaga, ae e mafai ona toe tulaʻi ona o le fesoasoani a Ieova.—Faitau le Faataoto 24:16.
8. Aiseā e tatou te manaʻomia ai “le talita telē o le faatuatua”?
8 O le isi vaega o lo tatou ofutau faaleagaga, o “le talita telē o le faatuatua.” E mafai ona tatou “tineia ai aū fanafana mū uma a lē o loo leaga.” (Efe. 6:16) Pe a faatuatua ma alofa ma le lotoatoa iā Ieova, e tatou te faia ai le amiotonu ma tumau i le ala i le ola e faavavau. O le tele e tatou te alolofa ai iā Ieova, o le tele foʻi lenā o lo tatou faatāua o lana amiotonu. Ae faapefea o tatou lotofuatiaifo? E faapefea ona fesoasoani i a tatou taumafaiga ia naunau i le amiotonu?
Ia Iai Pea se Lotofuatiaifo Lelei
9. O ā aogā e tatou te maua pe a iai pea se lotofuatiaifo lelei?
9 Ina ua tatou papatiso, na tatou talosaga atu iā Ieova mo “se lotofuatiaifo lelei.” (1 Pete. 3:21) Ona o le faatuatua i le togiola, ua faamagaloina ai a tatou agasala i le toto o Iesu, ma maua ai se tulaga mamā i luma i le silafaga a le Atua. Ae ina ia faatumauina lenā tulaga mamā, e ao ona iai pea se lotofuatiaifo lelei. Pe afai e tuuaʻia ma lapataʻia i tatou e o tatou lotofuatiaifo i nisi taimi, e ao ona lotofaafetai ona o loo gaoioi lelei. O na uunaʻiga e iloa ai e lē o maaa o tatou lotofuatiaifo ma lē amanaʻia ala amiotonu a Ieova. (1 Timo. 4:2) Ae e iai se isi matafaioi a le lotofuatiaifo mo ē e naunau i le amiotonu.
10, 11. (a) Taʻu mai se mea na tupu e iloa ai le pogai e ao ai ona faalogo i o tatou lotofuatiaifo ua aʻoaʻoina i le Tusi Paia. (e) Aiseā e tatou te matuā fiafia ai pe a naunau i le amiotonu?
10 Pe a tatou faia se mea sesē, e ono taʻusalaina pe faatigā mai o tatou lotofuatiaifo. Na see ese se talavou mai i “ala o le amiotonu.” Sa fiafia o ia e matamata i ata o feusuaʻiga matagā ma ulaula mariuana. Sa lagona lona nofosala pe a alu i sauniga, ma pei o sē e faafiaamiotonu pe a auai i le talaʻiga. O lea na lē toe auai ai i nei galuega faa-Kerisiano. Na faapea mai o ia: “Ou te leʻi iloaina e taʻusalaina faapena aʻu e loʻu lotofuatiaifo ona o aʻu gaoioiga.” Na ia taʻua atili: “E fā tausaga o oʻu ola i lenā olaga faavalevalea.” Ona amata lea ona mafaufau e toe foʻi i le upu moni. E ui lava na manatu o le a lē faafofoga mai Ieova i lana tatalo, ae na tatalo lava ma ōle atu mo lana faamagaloga. E leʻi atoa le sefulu minute, ae asiasi atu lona tinā ma faalaeiau o ia e toe auai i sauniga. Sa alu i le Maota mo Sauniga ma talosaga atu i se toeaina e fai lana suʻesuʻega. Mulimuli ane na papatiso o ia, ma ua lotofaafetai iā Ieova ona o le faasaoina o lona ola.
11 E mautinoa e te matuā fiafia ona o le faia o le mea saʻo. A o tatou naunau atili ma faia le amiotonu, o le a tatou matuā olioli ona o le faia o mea e fiafia i ai lo tatou Tamā i le lagi. Ia manatua le mea lenei! Ua lata le taimi o le a lagona ai e tagata uma na o le fiafia mai i o latou lotofuatiaifo, ma o le a latou matuā faaatagia atu uiga o le Atua. O lea la, seʻi o tatou totō i o tatou loto le naunau i le amiotonu ma faafiafiaina ai le finagalo o Ieova.—Faata. 23:15, 16.
12, 13. E faapefea ona aʻoaʻoina o tatou lotofuatiaifo?
12 O le ā e fai ina ia aʻoaʻoina ai o tatou lotofuatiaifo? Pe a suʻesuʻeina le Tusi Paia ma a tatou lomiga faale-Tusi Paia, e tāua ona manatua, “o le loto o lē e amiotonu e mafaufau loloto ina ia tali atu.” (Faata. 15:28) Seʻi iloilo le tāua o le faia faapea pe a feagai ma fesili e tusa ai o galuega totogi. Pe a faigofie ona iloa e feteenaʻi se galuega ma le Tusi Paia, o le toʻatele o i tatou e vave lava ona usitaʻia taʻiala mai i le vasega o le pologa faamaoni ma le faautauta. Peitaʻi, pe a lē manino pe talafeagai se galuega pe leai, e ao ona tatou iloilo ni taʻiala mai i le Tusi Paia ma tatalo e uiga i lenei mataupu. * E faatatau atu lenei manatu i taʻiala e pei o le ʻalofia o le faatigā i lotofuatiaifo o isi. (1 Kori. 10:31-33) Ae e sili ona tatou manatu mamafa i taʻiala e aafia ai la tatou faiā ma le Atua. Pe a iai sa tatou faiā māfana ma Ieova, o le a tatou fesili ifo, ‘Pe a ou faia lenei galuega, po o le a ou faatigā ai i le finagalo o Ieova?’—Sala. 78:40, 41.
13 Pe a sauniuni mo le Suʻesuʻega o le Olomatamata po o le Suʻesuʻega Faale-Tusi Paia a le Faapotopotoga, ia manatua e ao ona tatou manatunatu loloto i faamatalaga ua taʻua. Po o fai ma a tatou masani le vave ona vase o le tali o se fesili ona see atu lea i le isi palakalafa? O suʻesuʻega faapena o le a lē fesoasoani iā i tatou e matuā naunau ai i le amiotonu, pe faatupu se lotofuatiaifo e vave ona gaoioi. Ina ia naunau i le amiotonu, e ao ona tatou suʻesuʻe māeʻaeʻa ma manatunatu loloto i mea ua tatou faitau ai i le Afioga a le Atua. E manaʻomia ni taumafaiga filigā ina ia mafai ai ona naunau ma o tatou lotoatoa i le amiotonu.
Fia Aai ma Fia Inu i le Amiotonu
14. O le ā e finagalo Ieova ma Iesu ia tatou lagona a o faia la tatou auaunaga paia?
14 E finagalo Ieova le Atua ma Iesu Keriso ia tatou fiafia a o fai la tatou auaunaga paia. O le ā e saosaolaumea i lo tatou fiafia? Ia naunau i le amiotonu! I le Lauga i le Mauga, na fetalai ai Iesu: “E fiafia o ē e fia aai ma fia inu i le amiotonu, auā e maoona i latou.” (Mata. 5:6) O le ā le uiga o nei upu i ē e naunau i le amiotonu?
15, 16. O ā auala e mafai ona faamalieina ai le fia aai ma le fia feinu faaleagaga?
15 O loo pulea lenei lalolagi ua tatou soifua ai, e lē o loo leaga. (1 Ioa. 5:19) Pe a tatou faitau i se nusipepa i so o se atunuu, ua iai lipoti e uiga i faiga lē alofa ma sauā i se tulaga e leʻi faapea ona iai muamua. E faigatā i sē e amiotonu ona malamalama i le pogai ua faia ai e le tagata faiga lē alofa ma sauā i le isi tagata. (Fai. 8:9) Talu ai e tatou te alolofa iā Ieova, ua tatou iloa e na o ia e mafai ona faamalieina le fia aai ma le fia feinu faaleagaga o tagata, ina ia iloa le amiotonu. Ua lata ona faaumatia ē e lē matataʻu i le Atua, ma o le a lē toe mafatia ē e naunau i le amiotonu ona o tagata solitulafono ma a latou amioga leaga. (2 Pete. 2:7, 8) Maʻeu se mapusaga o le a iai!
16 Ona o ni auauna a Ieova ma o soo o Iesu Keriso, ua tatou iloa ai e “maoona” i latou uma o loo fia aai ma fia feinu i le amiotonu. O le a matuā faamalieina i latou e ala i le faatulagaga a le Atua i le lagi fou ma le lalolagi fou, lea “e mau ai le amiotonu.” (2 Pete. 3:13) Seʻi aua la neʻi o tatou lotovaivai pe faateʻia, ona ua aveesea le amiotonu i lenei lalolagi a Satani ona o pulega lē alofa ma faiga sauā. (Fai. 5:8) O loo silafia e Ieova, o Lē e Silisili Ese, mea o loo tutupu ma ua toe o se aga ona laveaʻia lea o ē e naunau i le amiotonu.
Faamanuiaga o le Naunau i le Amiotonu
17. O ā nisi o faamanuiaga ona o le naunau i le amiotonu?
17 O loo faamatilatila i le Salamo 146:8 se faamanuiaga mataʻina o le mulimuli i le ala o le amiotonu. Na pese le faisalamo: “E alofa Ieova i ē e amiotonu.” Seʻi manatu i ai! E alofa le Pule Silisili Ese o le aoao o mea iā i tatou, ona o loo tatou naunau i le amiotonu! O le alofa o Ieova ua tatou mautinoa ai o le a ia tausia o tatou manaʻoga, pe a faamuamua i o tatou olaga mea e fesootaʻi atu i le Malo. (Faitau le Salamo 37:25; Faataoto 10:3.) O le a iai le taimi e na o ē e naunau i le amiotonu o le a nonofo i lenei paneta. (Faata. 13:22) O le toʻatele o tagata o le Atua o ē na naunau i le amiotonu, o le a tauia i le matuā olioli ma le ola e faavavau i se parataiso matagofie i le lalolagi. O loo tauia foʻi i aso nei ē e naunau i le amiotonu a le Atua, i le filemu o le loto lea e saosaolaumea i le autasi o o latou aiga ma faapotopotoga.—Fili. 4:6, 7.
18. O ā mea lelei e ao ona tatou faia a o faatalitali i le aso o Ieova?
18 A o tatou faatalitali atu i le aso tele o Ieova, e ao ona faaauau ona tatou saʻilia lana amiotonu. (Sefa. 2:2, 3) O lea la, seʻi o tatou faaalia le naunau moni i ala amiotonu a Ieova le Atua. E aofia ai le ofuina pea o “le ufifatafata o le amiotonu,” ina ia puipuia ai o tatou loto. E ao foʻi ona iai pea se lotofuatiaifo lelei, lea o le a faafiafiaina ai i tatou atoa ma le finagalo o le Atua.—Faata. 27:11.
19. O le ā e ao ona tatou maumauaʻi e fai, ma o le ā le autū o le mataupu o loo sosoo mai?
19 O loo “silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.” (2 No. 16:9) Maʻeu le faamāfanafanaina i na upu, a o tatou faia le mea e tonu e ui i le faateleina o tulaga faalētonu, faiga sauā ma le amioleaga i lenei lalolagi malaia! Ioe, atonu e faateʻia le toʻatele o tagata ua vavaeese mai i le Atua, i o tatou ala amiotonu. Ae e matuā faamanuiaina i tatou pe a tumau i le amiotonu a Ieova. (Isa. 48:17; 1 Pete. 4:4) O lea la, seʻi o tatou maumauaʻi e faaauau ona naunau ma faia ma o tatou lotoatoa le amiotonu, lea o le a faafiafiaina ai i tatou. Peitaʻi, e aofia ai foʻi i le iai o se lotoatoa le ʻinoʻino i le solitulafono po o le amioleaga. O le a talanoaina i le mataupu o sosoo mai le uiga o lenei manatu.
[Faamatalaga pito i lalo]
^ pala. 12 Mo se faamatalaga e uiga i taʻiala a le Tusi Paia e tusa ai o galuega totogi, tagaʻi i Le Olomatamata o Aperila 15, 1999, itulau e 28-30.
O le ā Lau Tali?
• Aiseā e tāua ai le talisapaia o le togiola ina ia naunau ai i le amiotonu?
• Aiseā e tāua ai ona tatou ofuina “le ufifatafata o le amiotonu”?
• E faapefea ona aʻoaʻoina o tatou lotofuatiaifo?
[Fesili mo le Suʻesuʻega]
[Ata i le itulau 26]
O se lotofuatiaifo ua aʻoaʻoina e fesoasoani e iloa ai pe talafeagai se galuega totogi pe leai
