Hadomi buat neʼebé loos ho laran tomak
Hadomi buat neʼebé loos ho laran tomak
“Ó hadomi justisa.”—EBR 1:9.
1. Saida mak sei ajuda ita atu laʼo iha “dalan sira neʼebé loos”?
MAROMAK JEOVÁ dirije ninia povu iha “dalan sira neʼebé loos” liuhusi ninia Liafuan no ninia espíritu santu. (Sal 23:3) Maski nuneʼe, tanba ita hotu mak ema sala-naʼin, dala ruma ita laʼo sees husi dalan neʼe. Nuneʼe, atu fila fali ba dalan neʼebé loos ita presiza hakaʼas an duni. Saida mak sei ajuda ita atu halo ida-neʼe? Hanesan Jesus, ita tenke hadomi justisa ka buat neʼebé loos.—Lee Ebreu 1:9.
2. Saida mak “dalan sira neʼebé loos”?
2 Saida mak “dalan sira neʼebé loos”? Dalan sira-neʼe mak Maromak Jeová nia matadalan sira neʼebé nia fó ba ita atu moris tuir. Lia-ebraiku no lia-gregu neʼebé tradús nuʼudar “justisa” ka “buat neʼebé loos” iha arti katak halo tuir ho laran-metin matadalan sira kona-ba morál. Bíblia fó sai katak Maromak mak “hela-fatin ba buat loos nian”. Tan neʼe, sira neʼebé adora Maromak Jeová kontente atu laʼo tuir dalan morál nian neʼebé loos neʼebé Maromak hili ba sira.—Jer. 50:7.
3. Oinsá mak ita bele aprende liután kona-ba buat neʼebé loos tuir Maromak nia haree?
3 Atu monu loos ba Maromak nia laran ita presiza hakaʼas an ho laran tomak atu halo tuir Maromak nia matadalan sira neʼebé loos. (Deut 32:4) Atubele halo ida-neʼe, ulukliu ita presiza aprende kona-ba Maromak Jeová liuhusi ninia Liafuan, Bíblia. Nuʼudar ita aprende buat barak liután kona-ba Maromak no hakbesik liután ba nia loron ba loron, ida-neʼe sei ajuda ita atu hadomi liu buat neʼebé loos tuir ninia haree. (Tgo 4:8) Ita mós presiza simu matadalan husi Maromak nia Liafuan kuandu ita halo desizaun neʼebé importante iha ita-nia moris.
Buka Maromak nia justisa
4. Buka buat neʼebé loos tuir Maromak nia haree envolve saida?
4 Lee Mateus 6:33. Buka Maromak nia justisa ka buat neʼebé loos tuir Maromak nia haree laʼós deʼit katak ita uza tempu barak atu haklaken lia-foun diʼak kona-ba ninia Reinu, ka ukun. Tuir loloos, atu Maromak Jeová simu serbisu neʼebé ita halo ba nia, ita presiza halo tuir ninia matadalan sira iha ita-nia moris loroloron nian. Entaun, ema hotu neʼebé buka buat neʼebé loos tuir Maromak nia haree tenke halo saida? Sira tenke “simu tiha ema foun, neʼebé moris mai tuir Maromak nia ilas iha justisa no santidade lia-loos nian”.—Ef 4:24.
5. Saida mak sei ajuda ita atu la sente laran-tun demais?
5 Maski ita hakarak duni atu moris tuir Maromak nia matadalan neʼebé loos, maibé dala ruma karik ita sente laran-tun tanba sala neʼebé ita halo. Entaun, saida mak bele ajuda ita atu halakon ita-nia laran-tun no aprende atu hadomi no halo buat neʼebé loos? (Prov 24:10) Ita presiza atu hakbesik beibeik ba Maromak Jeová liuhusi orasaun “ho laran loos no nakonu ho fiar”. (Ebr 10:19-22) Maski ita mak ema kristaun kose-mina ka ema kristaun neʼebé iha esperansa atu moris iha rai, ita hotu presiza duni atu tau fiar ba Jesus Kristu nia sakrifísiu no ba ninia serbisu nuʼudar ita-nia Amlulik Boot. (Rom 5:8; Ebr 4:14-16) Edisaun primeiru husi livru neʼe fó ilustrasaun atu hanorin ita kona-ba Jesus nia raan neʼebé fakar tiha atu taka ita-nia sala. (1 Joao 1:6, 7) Livru neʼe hatete: “Kuandu ita haree sasán ruma neʼebé mean liuhusi vidru neʼebé mean bainhira naroman kona, sasán neʼe sei haree hanesan buat neʼebé mutin; entaun, maski ita-nia sala mak mean lakan, maibé kuandu Maromak haree sala neʼe liuhusi Jesus nia raan, ita-nia sala sai hanesan buat neʼebé mutin.” (Zionʼs Watch Tower Jullu 1879, pájina 6) Sin, Maromak Jeová halo duni arranju neʼebé kapás ba ita hodi fó ninia Oan neʼebé nia hadomi nuʼudar sakrifísiu atu taka ita-nia sala.—Isa 1:18.
Uza beibeik ita-nia hatais funu nian
6. Tanbasá mak importante atu haree beibeik katak ita uza ita-nia hatais funu nian?
6 Iha tempu hotu, ita presiza atu tau hahalok neʼebé loos atu ‘tahan ita-nia hirus-matan’, tanba hahalok neʼe mak parte importante ida husi hatais funu nian neʼebé Maromak fó ba ita. (Ef 6:11, 14) Maski ita foin dedika ita-nia an ba Maromak Jeová ka serbí Maromak ba tinan barak ona, importante tebes ba ita hotu atu haree beibeik katak ita uza ita-nia hatais funu nian loroloron. Tanbasá? Tanba Maromak soe tun ona Diabu no ninia anju aat sira mai iha rai. (Apok 12:7-12) Satanás hirus tebes no hatene katak nia iha tempu uitoan deʼit ona. Tan neʼe, nia hakaʼas an liután atu ataka Maromak nia povu. Ita sente katak tau hahalok neʼebé loos nuʼudar hatais funu nian mak importante duni ka lae?
7. Se ita sente katak tau hahalok loos nuʼudar hatais funu nian mak importante, saida mak ita sei halo?
7 Hatais funu nian neʼebé soldadu sira tau iha sira-nia hirus-matan bele proteje sira. Hanesan neʼe mós, ita presiza tau hahalok neʼebé loos atu proteje ita-nia laran. Tanba ita mak ema sala-naʼin, dala barak ita-nia laran koko atu lohi ita no susar atu kontrola. (Jer 17:9) Tan neʼe, importante tebes atu ita treinu no dixiplina ita-nia laran. (Gên 8:21) Se ita sente katak tau hahalok neʼebé loos nuʼudar ita-nia hatais funu nian mak importante, ita sei nunka atu hasai hatais neʼe ba tempu uitoan. Neʼe katak ita sei la hili halimar sira neʼebé Maromak odi, ita sei la hanoin beibeik kona-ba halo hahalok sala ruma, no ita mós sei la gasta tempu barak liu atu haree televizaun. Duké halo buat sira-neʼe, ita sei kontinua hakaʼas an atu halo Maromak Jeová kontente. Maski karik ita sidi ba tempu uitoan hodi hanoin kona-ba buat neʼebé la loos, maibé ita sei hamriik fali tanba Maromak Jeová ajuda ita.—Lee Provérbios 24:16. *
8. Tanbasá mak ita presiza “fiar” neʼebé sai ‘nuʼudar ita-nia eskudu’?
8 Parte ida tan husi ita-nia hatais funu nian mak “fiar” neʼebé sai ‘nuʼudar ita-nia eskudu’. Fiar neʼe sei ajuda ita atu tahan “hasoru rama ho ahi neʼebé mai husi diabu”. (Ef 6:16) Klaru katak, fiar no domin ba Maromak Jeová ajuda ita atu halo buat neʼebé loos no nafatin laʼo iha dalan neʼebé lori ita ba moris rohan-laek. Nuʼudar ita aprende atu hadomi Maromak Jeová, ita sei hafolin liután buat neʼebé loos tuir ninia haree. Maibé, oinsá ho ita-nia laran ka konxiénsia? Oinsá mak ida-neʼe ajuda ita atu hadomi buat neʼebé loos?
Nafatin iha laran neʼebé moos
9. Ita hetan buat diʼak saida hodi iha laran neʼebé moos nafatin?
9 Kuandu ita hetan batizmu, ita hatudu katak ita husu Maromak Jeová atu ita bele iha konxiénsia ka laran neʼebé moos. (1 Ped 3:21, MF) Hodi hatudu fiar ba Jesus nia sakrifísiu, Jesus nia raan taka ita-nia sala no tan neʼe ita bele haksolok hodi sai moos iha Maromak nia oin. Maibé, atu nafatin moos iha Maromak nia oin, ita presiza atu iha laran neʼebé moos. Se ita-nia laran fó avizu mai ita antes halo hahalok sala ruma, neʼe dehan katak ita-nia laran halo serbisu ho diʼak. Sin, ida-neʼe hatudu katak ita-nia laran la sai toos liu atu halo tuir Maromak Jeová nia dalan sira neʼebé loos. (1 Tim 4:2, MF) Maibé, laran bele halo buat seluk tan atu ajuda ema neʼebé hakarak atu hadomi buat neʼebé loos tuir Maromak nia haree.
10, 11. (a) Konta toʼok esperiénsia ida neʼebé hatudu katak importante atu tuir ita-nia laran neʼebé treinu ona tuir Bíblia. (b) Tanbasá mak domin ba buat neʼebé loos bele lori ksolok mai ita?
10 Kuandu ita halo buat neʼebé sala, ita-nia laran karik tesi lia ba ita ka kastigu ita. Hanoin toʼok kona-ba esperiénsia tuirmai. Joven ida laʼo sees husi ‘dalan neʼebé loos’. Nia sai toman atu haree pornografia no hahú fuma droga naran marijuana. Nia sente la diʼak kuandu nia bá tuir reuniaun sira no nia mós sente katak nia hanesan ema neʼebé laran-makerek kuandu nia hola parte iha serbisu haklaken, tan neʼe nia para atu halo atividade kristaun nian sira-neʼe. Maibé, nia hatete: “Haʼu-nia laran fó kastigu ba haʼu tanba buat neʼebé haʼu halo. Haʼu halo hahalok beik hanesan neʼe ba tinan haat.” Tuirmai, nia komesa hanoin atu fila fali ba lia-loos. Maski nia sente katak Maromak Jeová sei la rona ninia orasaun, maibé nia halo orasaun hodi husu Maromak atu fó perdua ba nia. La toʼo minutu sanulu depois nia halo orasaun, ninia inan vizita nia no fó laran-manas ba nia atu tuir fali reuniaun sira. Nia bá Reuniaun-Fatin no husu katuas ida atu estuda ho nia. Ikusmai, nia hetan batizmu, no agora nia agradese tebes tanba Maromak Jeová salva ninia moris.
11 Klaru katak hodi halo buat neʼebé loos tuir Maromak nia haree lori duni bensaun barak ba ita, loos ka lae? Nuʼudar ita kontinua atu hadomi no halo buat neʼebé loos, ita sei haksolok liután hodi halo buat neʼebé halo kontente ita-nia Aman iha lalehan. Hanoin toʼok kona-ba mundu foun neʼebé atu mai. Iha tempu neʼebá, sei la iha ema ida neʼebé ninia laran duun nia tanba sala neʼebé nia halo; ema hotu sei haleno Maromak nia hahalok iha dalan neʼebé perfeitu. Nuneʼe, agora mak tempu diʼak ba ita atu komesa kuda iha ita-nia laran domin ba buat neʼebé loos no halo Maromak Jeová kontente.—Prov 23:15, 16.
12, 13. Oinsá mak ita bele treinu ita-nia laran?
12 Ita bele halo saida atu treinu ita-nia laran ka konxiénsia? Kuandu ita estuda Bíblia no estuda ita-nia livru sira neʼebé esplika kona-ba Bíblia, importante atu hanoin-hetan Bíblia nia konsellu neʼebé dehan: “Ema loos hanoin kleʼan iha nia laran atu bele hatán.” (Prov 15:28) Porezemplu, hanoin toʼok oinsá mak halo tuir konsellu neʼe bele ajuda ita kuandu ita halo desizaun kona-ba buka serbisu. Se ita hatene ho klaru katak serbisu ida kontra matadalan husi Bíblia, ita barak sei la simu serbisu neʼe hodi tuir konsellu husi atan laran-metin no matenek. Maibé, dala ruma ita la hatene ho klaru se serbisu ida diʼak ba ema kristaun ka ladiʼak. Iha situasaun hanesan neʼe, ita presiza buka matadalan sira husi Bíblia, no hanoin kleʼan no halo orasaun kona-ba matadalan sira-neʼe. * Ida-neʼe mós inklui matadalan sira kona-ba la hakanek ema seluk nia laran ka konxiénsia. (1 Kor 10:31-33) Buat neʼebé importante liu mak hanoin kona-ba matadalan sira neʼebé kona ita-nia relasaun ho Maromak. Kuandu ita iha relasaun diʼak ho Maromak Jeová, ida-neʼe sei book ita atu husu ba ita-nia an: ‘Hodi halo serbisu neʼe, haʼu sei hakanek Maromak Jeová nia laran ka lae?’—Sal 78:40, 41.
13 Kuandu ita prepara ba Estudu Livru Haklaken ka Estudu Bíblia iha Kongregasaun, ita presiza atu hanoin kleʼan kona-ba informasaun neʼebé ita estuda. Dala ruma ita riska lalais deʼit resposta ba pergunta hodi hakat liu ba parágrafu tuirmai ka lae? Se ita prepara lalais deʼit, karik ida-neʼe sei la aumenta ita-nia domin ba buat neʼebé loos, no karik ida-neʼe mós sei la treinu ita-nia laran hodi ajuda ita atu sees husi buat neʼebé sala. Se ita hakarak hadomi buat neʼebé loos, ita presiza estuda ho badinas no hanoin kleʼan kona-ba buat neʼebé ita lee iha Maromak nia Liafuan. Sin, atu hadomi buat neʼebé loos ho ita-nia laran tomak ita presiza hakaʼas an duni!
Hamlaha no hamrook ba buat loos
14. Maromak Jeová no Jesus Kristu hakarak ita atu sente oinsá kona-ba ita-nia adorasaun?
14 Maromak Jeová no Jesus Kristu hakarak ita atu halaʼo ita-nia adorasaun ho haksolok. Saida mak bele ajuda ita atu haksolok? Domin ba buat neʼebé loos! Iha Jesus nia diskursu iha foho, nia hatete: “Ksolok ba sira neʼebé hamlaha no hamrook ba justisa [ka buat neʼebé loos], basá sira sei bosu.” (Mt 5:6) Ba sira neʼebé hakarak atu hadomi buat neʼebé loos, Jesus nia liafuan sira-neʼe katak sá?
15, 16. Iha dalan saida deʼit mak ema neʼebé hamlaha no hamrook ba buat neʼebé loos bele sente kmaan?
15 Bíblia hatete katak aat-naʼin mak ukun mundu neʼe. (1 Joao 5:19) Jornál sira iha fatin hotu iha mundu neʼe sempre koʼalia kona-ba hahalok violénsia neʼebé aumenta ba beibeik. Ema nia hahalok aat sira-neʼe halo ema loos sente laran-susar. (Ecle 8:9) Maibé, sira neʼebé hadomi Maromak Jeová hatene katak nia deʼit mak bele fó kmaan ba sira neʼebé hamlaha no hamrook kona-ba aprende buat neʼebé loos. Lakleur tan, ema aat sei lakon, no sei la iha tan hahalok aat sira neʼebé fó laran-susar ba ema neʼebé hadomi buat neʼebé loos. (2 Ped 2:7, 8) Ita sei sente laran kmaan duni!
16 Nuʼudar Maromak Jeová nia atan sira no Jesus Kristu nia dixípulu, ita hatene katak ema hotu neʼebé hamlaha no hamrook ba buat neʼebé loos “sei bosu”. Neʼe katak sira sei hetan kmaan liuhusi Maromak nia arranju kona-ba lalehan foun no rai foun “iha neʼebé justisa sei hela ba nafatin”. (2 Ped 3:13) Nuneʼe, ita lalika hakfodak ka sente laran-tun kuandu ita haree katak buat aat no violénsia iha Satanás nia mundu neʼe halakon ona buat neʼebé loos. (Ecle 5:8) Maromak Jeová, Ida neʼebé Aas Liu Hotu, hatene buat neʼebé akontese daudauk, no lakleur tan nia sei salva sira neʼebé hadomi buat neʼebé loos.
Hetan bensaun tanba hadomi buat neʼebé loos
17. Ema neʼebé hadomi buat neʼebé loos hetan bensaun saida deʼit?
17 Bíblia fó sai bensaun boot ida neʼebé ita bele simu kuandu ita laʼo iha dalan neʼebé loos. Salmo 146:8 hatete: “Jeová hadomi ema sira neʼebé loos.” Hanoin toʼok kona-ba eskritura neʼe. Ukun-naʼin Boot Liu Hotu hadomi ema neʼebé hadomi buat neʼebé loos! Ita hotu neʼebé tau uluk Maromak nia Ukun iha ita-nia moris bele fiar duni katak Maromak sei tau matan nafatin ba ita tanba nia hadomi ita. (Lee Salmo 37:25; * Provérbios 10:3. *) Ikusmai, mundu tomak sei sai hela-fatin ba ema neʼebé hadomi buat neʼebé loos. (Prov 13:22) Sin, tanba Maromak nia povu halo buat neʼebé loos, sira barak liu sei hetan bensaun atu moris ba nafatin iha paraízu iha mundu foun. Liután neʼe, sira neʼebé hadomi buat neʼebé loos hetan bensaun agora hodi sente dame iha laran, no dame neʼe halo sira moris ho kontente iha família laran no iha kongregasaun laran.—Flp 4:6, 7.
18. Nuʼudar ita hein Maromak Jeová nia loron, ita tenke halo saida deʼit?
18 Nuʼudar ita hein Maromak Jeová nia loron boot, ita tenke kontinua buka atu halo buat neʼebé loos tuir ninia haree. (Sof 2:2, 3) Nuneʼe, mai ita hatudu domin neʼebé loos ba Maromak Jeová nia dalan sira. Neʼe inklui tau hahalok loos nuʼudar hatais funu nian atu proteje ita-nia laran. Importante mós atu iha konxiénsia ka laran neʼebé moos, tanba ida-neʼe bele halo ita kontente no mós halo kontente ita-nia Maromak.—Prov 27:11.
19. Saida mak ita hakarak atu halo? Lisaun tuirmai sei koʼalia kona-ba saida?
19 Maromak Jeová nia “matan hateke bá-mai iha rai hotu atu hatudu ninia forsa atu ajuda sira neʼebé fó sira-nia laran tomak ba nia”. (2 Crôn 16:9) Liafuan sira-neʼe halo ita sente kmaan duni nuʼudar ita halo buat neʼebé loos maski ita hasoru susar oioin, violénsia no buat aat seluk iha mundu neʼe. Karik ema neʼebé dook husi Maromak hakfodak ho ita-nia hahalok loos. Maibé, hodi kaer metin ba buat neʼebé loos tuir Maromak nia haree, ita hetan buat diʼak barak. (Isa 48:17; 1 Ped 4:4) Entaun, mai ita ho laran tomak hakaʼas an atu haksolok nafatin hodi hadomi no halo buat neʼebé loos. Maibé, atu serbí ho laran tomak, ida-neʼe inklui odi buat neʼebé aat. Lisaun tuirmai sei esplika kona-ba neʼe.
[Nota–rodapé]
^ par. 7 Provérbios 24:16: “Tanba ema laran loos ida karik monu ba dala hitu, maski nuneʼe nia sei hamriik fali; maibé ema aat sei sidi tanba hasoru susar.”
^ par. 12 Atu hatene liután matadalan husi Bíblia kona-ba buka serbisu, haree livru “Hela Nafatin iha Maromak nia Domin”, pájina 176-179, parágrafu 14-17.
^ par. 17 Salmo 37:25: “Uluk haʼu mak mane klosan ida, agora haʼu sai idade ona, maski nuneʼe haʼu seidauk haree ema ida neʼebé loos la hetan ajuda, ka ninia oan sira buka paun.”
^ par. 17 Provérbios 10:3: “Maromak Jeová sei la halo ema neʼebé loos atu sai hamlaha, maibé nia sei tau ba dook buat neʼebé ema aat kaan.”
Oinsá ita hatán?
• Atu hadomi buat neʼebé loos, tanbasá mak importante atu hafolin Jesus nia sakrifísiu?
• Tanbasá mak importante atu tau hahalok loos nuʼudar hatais funu nian neʼebé proteje ita-nia hirus-matan?
• Oinsá mak ita bele treinu ita-nia laran?
[Pergunta estudu nian]
[Dezeñu iha pájina 26]
Laran neʼebé hetan treinu tuir Bíblia ajuda ita kuandu foti desizaun kona-ba serbisu
