Perapera A Doo U Ishima A Ishima You cii
Perapera A Doo U Ishima A Ishima You cii
“Perapera doo U ishima.”—PS. 45:7.
1. Kanyi ia wase se u dondon “igbenda i perapera”?
YEHOVA ngu hemen ior nav sha “igbenda i perapera” sha Mkaanem nam kua icighan jijingi na. (Ps. 23:3) Nahan kpa, er se yen yô, ashighe agen ka se undu igbenda la. Aluer se soo u hiden eren kwagh u vough yô, gba u se nôngo kwagh kpoghuloo. Kanyi ia wase se ve se fatyô u eren nahana? Gba u perapera una doo se ishima, er Yesu nahan.—Ôr Pasalmi 45:7.
2. “Igbenda i perapera” la ka nyi?
2 “Igbenda i perapera” la ka nyi? Se mba fe igbenda ne sha atindi a perapera a Yehova la. Ken zwa Heberu man zwa Grika yô, ishember i “perapera” la ngi ôron kwagh u dondon atindiakaa a sha kwagh u aeren a dedoo la vighe vighe. Er Yehova a lu “ijiir i teman i perapera” yô, saan ior nav iyol u van hen a na sha u a tese ve gbenda u perapera u sha kwagh u aeren a dedoo a vea dondo yô.—Yer. 50:7.
3. Se er nan ve se seer henen kwagh u perapera u Aôndo?
3 Saa se nôngo sha afatyô wase cii, se kuran atindi a Aôndo a perapera la ve una lumun se ye. (Dut. 32:4) Ka se hii u eren kwagh ne sha u henen kwagh u se fetyô u fan sha kwagh u Yehova Aôndo cii, ken Bibilo i i lu Mkaanem nam la. Aluer se mba henen kwagh u Aôndo seer a seer shi se mba kporom ikyua a na hanma iyange yô, perapera na la una seer doon se ishima. (Yak. 4:8) Shi gba keng u se lumun gbendatesen u Mkaanem ma Aôndo a ne i nger la, shighe u i gbe u se er akaa a hange hange ken uma yô.
Ker Perapera u Aôndo
4. U keren perapera u Aôndo la wa nyi kere?
4 Ôr Mateu 6:33. Ka shighe u se vihin sha u pasen loho u dedoo u Tartor la tseegh i lu u keren perapera u Aôndo ga. Aluer se soo ser Yehova a lumun mcivir wase yô, gba u hanma iyange cii se tesen sha ieren yase ser se mba kuran atindi a na a wang la. Gba u mba ve lu keren perapera u Yehova cii vea er nyi? Gba u vea ‘haa orhe iyol u i gbe un sha inja i Aôndo ken perapera u mimi man mtsegh u mimi’ la.—Ef. 4:24.
5. Kanyi ia wase se u hemban iyolkpene?
5 Er se nôngon ser se kura atindi a Aôndo a perapera la nahan kpa, alaghga ashighe agen iyol ia kpe se sha ci u se yen yô. Kanyi ia wase se ve se hemba iyolkpen, se gema se er perapera shi se hen u lun a dooshima? (Anz. 24:10) Gba u se eren msen hen Yehova hanma shighe ‘a ishima i mimi, man a jighjigh u nan u lun a akpelan ga’ la. (Heb. 10:19-22) Sea lu Mbakristu mba i shigh ve mkurem shin sea lu a ishimaverenkeghen i va lun shin tar kpa, se cii se na jighjigh a nagh ku ipaan ku Yesu Kristu kura kua tom u pristi u tamen, ú a eren la. (Rom. 5:8; Heb. 4:14-16) Yange se tese ikyav i mluainja u awambe a Yesu haa sha ci wase la ken mgber u hiihii u magazin ne la je. (1 Yoh. 1:6, 7) Ngeren la kaa ér: “Kwagh u a lu u mimi yô, ka un ne; aluer u kenger ma kwagh u nyian bong shin u a nyian er kpagh nahan ken gelase u nyian ape iwanger i te yô, kwagh shon una lu er ngu pupuu nahan. Nahan, asorabo a ase aa nyian bong shin aa nyian er kpagh nahan kpa, aluer se mba ape Aôndo una fatyô u nengen asorabo shon ken awambe a Kristu yô, aa hingir pupuu hen a na.” (Julai 1879, peeji 6) Ka kwagh u kpilighyol kpishi er Yehova a paa se sha nagh ku Wan na u ishima ishima la nahan!—Yes. 1:18.
Yengen Ikyav You Mbi Utyaav Mbi ken Jijingi Mbira Iyol
6. Gba u se yengen ikyav mbi utyaav yasegh mbi ken jijingi mbira iyol sha ci u nyi?
6 Hanma shighe cii yô gba u se har “perutya iyol, ka perapera je la,” sha ci u ngu kwagh u hange hange ken ikyav mbi utyaav mbi Aôndo mbi ken jijingi mbira. (Ef. 6:11, 14) Aluer se sember tseghan ayol a ase sha ci u Yehova shin se civir un upuembaanyomov kar hegen imôngo kpa, gba u hanma iyange cii yô, se yengen ikyav mbi utyaav yasegh mbi ken jijingi mbira iyol. Sha ci u nyi? Sha ci u i daa Satan man azôv a na i gbihi shin tar ne. (Mpa. 12:7-12) Er Satan a fe ér shighe na shi vese ga yô, ishima i vihi un tsung. Sha nahan yô, ngu hemban tan num sha ior mba Aôndo cii. Se nenge er i lu hange hange u se har ‘perutya, u ú lu perapera la iyol’ kpa?
7. Aluer gba u se tese ser “perutya,” u ú lu “perapera” la ngu se kwagh u hange hange yô, ieren yase ia lu nena?
7 Perutya ngu kor ishima. Er se yen yô, ishima yase ka i tese ér i vihi shi i wa atseregh kpishi kpaa. (Yer. 17:9) Er ishima yase i hembe soon u eren kwaghbo yô, gba u se tsaha i. (Gen. 8:21) Aluer se fa er i gbe u se lu a “perutya,” u ú lu “perapera” la yô, shighe môm kpa se er u kera, sha u keren iemberyolough i Aôndo a ker i ihyom la ga, shin se zeren henen sha kwagh u eren isholibo la kpaa ga. Se vihin shighe wase u injaa kpishi sha u nengen televishen ga. Kpa se gema se za hemen u nôngon ser se er kwagh u Yehova a soo yô. Aluer se nôngo gbev se gba sha u henen sha akaa a yolough man a a lu a perapera ga, sha anshighe kpuaa je kpa, sha iwasen i Yehova yô, se fatyô u hiden moughon sha.—Ôr Anzaakaa 24:16.
8. Gba u se lu a “akuvautya,” a a lu “jighjigh u nan” la sha ci u nyi?
8 Kwagh ugen u a lu môm ken ikyav mbi utyaav yasev mbi ken jijingi mbira yô, ka “akuvautya, ka jighjigh u nan je la.” Ngu a wase se u “pirin avaan a usu a orbo.” (Ef. 6:16) Jighjigh u nan man mdoo u Yehova a doo se ishima a ishima i môm la kpa ngu a wase se u lun perapera shi zan hemen u dondon gbenda u zan a vese ken uma u tsôron la. Aluer Yehova ngu seer doon se ishima yô, perapera na kpa una lu hemban doon se ishima. Kpa hide sha kwagh u imoshima yase di ye? Ngi wasen se u soon perapera nena?
Za Hemen u Lun a Imoshima i Dedoo
9. Aluer se za hemen u lun a imoshima i dedoo yô, a wase se nena?
9 Sha shighe u batisema wase la, se sôn Yehova “imo i wanger wanger i ken ishima.” (1 Pet. 3:21) Er se ne nagh ku ipaan ku Yesu kura jighjigh yô, awambe a na la cir asorabo a ase, nahan se mba wang sha ishigh ki Aôndo. Nahan kpa, aluer se soo u lun wang sha ishigh ki Aôndo her yô, gba u se za hemen u lun a imoshima i dedoo. Aluer ashighe agen imoshima yase na se ibo shi i ta se icin yô, gba u se lu a iwuese er i lu eren tom tsembelee yô. Icin i imoshima yase i te se, shin ibo i i ne se nahan la tese je ér ngi kpenegh sha kwagh u igbenda i perapera i Yehova ga. (1 Tim. 4:2) Kpa imoshima ia fatyô u eren kwagh ugen kpaa sha ci u mba ve soo ér kwagh u perapera a doo ve ishima la.
10, 11. (a) Ôr vande-eren u a tese ér gba u se ungwan imoshima yase i Bibilo i tsaase i la yô. (b) Aluer perapera doo se ishima yô, a saan se iyol sha ci u nyi?
10 Shighe u se er kwaghbo yô, imoshima yase ia na se ibo shin ia za se iyol. Gumor ugen yange undu “igbenda i perapera.” Ufoto mba jimbagh yange ya tor ken a na shi hii u man ikya kpaa. Una za mbamkombo yô, ishima i naan un ibo shi una due kwaghpasen kpa, i lu un er ngu eren a er atseregh nahan. Sha nahan yô, a de u eren ityom i Mbakristu ne. A kaa ér, “Kpa yange m fa cuku tsô mer imoshima yam ia nam ibo sha aeren a am nahan ga.” Shi a kaa ér, “M er ibumegh nahan nôngo u kuman anyom a anyiin je.” Maa hii u henen sha kwagh u hiden ken mimi. Shin er a hen ér Yehova una ungwa msen na ga nahan kpa, a gba eren msen tsô, a sôn ér Yehova a de un kwaghbo. Er msen bee lu a kuma miniti pue ga tsô maa ngô na va un inya shi taver un ishima ér a hide a hii mbamkombo mba zan. A za hen Iyou i Tartor a za kaa a ortamen ugen ér a hii u henen Bibilo a na. Shighe kar yô, a er batisema, shi a wuese Yehova kpishi er a war uma na yô.
11 Se fa er or ka nana er kwagh u vough ve i saan nan iyol yô. Aluer se mba henen u soon perapera shi se seer eren un yô, a saan se iyol kpishi u eren ishima i Ter wase u sha la. Shi hen ase sha kwagh ne yôô. Shighe ngu van u imoshima i uumace cii ia iv a akaa a nan ve msaanyol tseegh yô. Hen shighe la vea gema eren kwagh vough er Aôndo nahan. Nahan yô, perapera a doo se ishima hegen tsung, sha er se na a saan Yehova iyol yô.—Anz. 23:15, 16.
12, 13. Se fatyô u tsaase imoshima yase nena?
12 Se er nan ve se tsaase imoshima yase? Shighe u se henen Ruamabera man ityakerada yase i pasen Bibilo la yô, ka hange hange u se umbur ser “ishima i orperapera ka i henen imokwagh i ia ôr yô.” (Anz. 15:28) Nenge er kwagh ne una wase se shighe u se lu keren tom yô. Aluer Ruamabera tese wang ér ma tom doo sha ci u Orkristu ga yô, se kpishi se dondo kwagh u nongo u wanakiriki u jighjigh man u fan kwagh u tese la fese je. Nahan kpa, aluer tom u se soo u eren la ua doo shin ua doo ga, kpa se fa kuma se ga yô, gba u se time sha atindiakaa a ken Bibilo la, shi se er msen, se gbidye kwar sha a tsembelee. Se fatyô u eren kwagh ne sha u gbidyen kwar sha atindiakaa, er a a gber sha kwagh u palegh u eren kwagh u una za imoshima i mbagenev iyol la nahan. (1 Kor. 10:31-33) U hemban cii yô, doo u kwagh a gba se sha atindiakaa a sha kwagh u ikyaryan yase a Aôndo la. Aluer Yehova ngu or kpôô kpôô hen avese yô, se pinen ayol a ase ser, ‘Aluer m lumun tom ne nahan, me lu nan Yehova ishimavihin shin me lu bamen unu?’—Ps. 78:40, 41.
13 Shighe u se lu wan agoyol sha Iyoukura i Henen shin Bibilo i Henen ken Tiônnongo yô, doo u se umbur er i gbe u se gbidyen kwar sha kwagh u i nger la nahan. Hanma shighe ka se kpela hwange fese shin kpe u mlumun u sha ma mpin u a lu ken kwagh u se lu henen la, maa se yem sha ikyumhiange igen jee? A taver kpishi u imba kwaghhenen ngula nahan a na perapera a seer doon se ishima shin a tsaase imoshima yase sha u i ese tsema tsema yô. Aluer se soo ser perapera a doo se ishima yô, gba u se henen kwagh sha gbashima shi se gbidyen kwar sha kwagh u se er ken Mkaanem ma Aôndo a ne i nger la. Gba u se nôngo kwagh ve perapera una doo se a ishima yase cii ye.
Imura man Ijen i Kwagh u Perapera I Kôr U
14. Yehova Aôndo man Yesu Kristu soo ér i lu se nena sha icighan tom u se lu eren laa?
14 Yehova Aôndo man Yesu Kristu ve soo ér i saan se iyol er se eren icighan tom wase la. Kanyi ia wase se ve se zua a msaanyolo? Ka u soon perapera. Yesu yange kaa ken Ityesen i sha Uwo la ér: “Saan mba ijen i ker ve, man imura kpaa, sha kwagh u perapera la iyol, gadia vea ide.” (Mat. 5:6) Mkaanem man ma a inja hen mba ve lu keren ér perapera a doo ve ishima la nena?
15, 16. A fatyô u been a ijen man imura i ken jijingi sha nyi igbenda?
15 Ka orbo a hemen tar u se lu shimi ne ye. (1 Yoh. 5:19) Ken hanma veghertar u se lu cii kpa, aluer se tôô ma ipipaabaver se ôr yô, se kav er i lu hemban eren tswam man ipila hen shighe wase ne yô. Orperapera ka nana hen sha tswam u uumace ve eren mbagenev la yô, i za nan iyol kpishi. (Orpa. 8:9) Er Yehova a doo se ishima yô, se fa ser ka un tseegh una fatyô u been a ijen man imura i ken jijingi i i ker mba i sar ve u henen perapera la ye. Ica a gba ga tsô a tim mbacivir Aôndo ga mbara kera, nahan mba perapera a doo ve ishima la vea kera ya ican ken ishima sha ikyev i mbaaferev ga. (2 Pet. 2:7, 8) Nenge imba mmem u kwagh ne una va a mi la sha wono!
16 Er se lu mbatomov mba Yehova man mbadondon Kristu yô, se fa ser mba ijen man imura i sha kwagh u perapera i ker ve la cii “vea ide.” Vea va ide a kuma ve gbing shighe u Aôndo una va a usha mba hev man tar u he u “perapera una tema ker” la. (2 Pet. 3:13) Sha nahan yô, iyol i de kpen se shin i kpiligh se iyol sha ci u ipila man ieren i nzughul a ior, i i kar a perapera kera ken tar u Satan ne ga. (Orpa. 5:8) Yehova, Uhembansha la fa kwagh u a lu zan hemen yô, man ica a gba ga tsô una yima mba perapera a doo ve ishima la.
Zua a Mtsera sha u Soon Kwagh u Perapera
17. Aluer perapera doo se yô, ka averen agen a nyi se zua a mini?
17 Pasalmi 146:8 pase mtsera u vesen u se zua a mi sha u dondon gbenda u perapera la wang. Orpasalmi la yange wa icam ér: “Mbaperapera doo TER ishima.” Nenge imba la sha wono! Se doo Tor u Hembancii ishima sha ci u perapera doo se ishima! Er se doo Yehova ishima yô, se mba a vangertiôr ser una na se akaa a kwagh a gbe se sha mi la, aluer se ver akaa a Tartor hiihii ken uma wase yô. (Ôr Pasalmi 37:25; Anzaakaa 10:3.) Ken masejime yô, a lu mba perapera a doo ve ishima la tseegh vea lu shin tar ne ye. (Anz. 13:22) Ior mba Aôndo kpishi mba ve lu perapera la, vea zua a injar i uma u tsôron ken paradiso u doonashe shin tar shi vea zua a msaanyol kpishi. Hegen je kpa, i na mba perapera u Aôndo a doo ve la injar i bem u ken ishima, u a wasen ve u eren kwagh ken mzough vea icombor ve man atôônanongo a ve la.—Fil. 4:6, 7.
18. Er se lu keghen iyange i Yehova ne, ka akaa a dedoo a nyi i gbe u se za hemen u erene?
18 Er se lu keghen iyange i vesen i Yehova ne, gba kpee u se za hemen u keren perapera na. (Sef. 2:2, 3) Nahan yô, se tese nen sha mimi ser igbenda i perapera i Yehova Aôndo la doo se ishima. Kwagh ne kua u kôron “perutya,” u ú lu “perapera” la dông, sha er se kura ishima yase i sha injakwagh la yô. Shi gba u se za hemen u lun a imoshima i dedoo, i ia na se msaanyol shi ia na Aôndo kpa a saan un iyol la.—Anz. 27:11.
19. Gba u se kange ishima u eren nyi, man se hen nyi ken ngeren u dondon laa?
19 “Ashe a [Yehova] nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kron. 16:9) Mkaanem mara ka ma surun se ishima, er se eren perapera ken botar u ipila man anzughul man ifer ve lu seer a seer ne nahan. Ka mimi, alaghga igbenda yase i perapera la ia kpiligh uumace kpishi mba ve lu paleghaa a Aôndo la iyol. Kpa ka se zua a mbamtsera kpishi sha u eren akaa er perapera u Aôndo a tese la. (Yes. 48:17; 1 Pet. 4:4) Yô, se kange nen ishima, se za nen hemen u soon perapera shi eren un a ishima yase cii. Nahan kpa, u eren kwagh ne a ishima i môm la wa u se nyaghen mvende u vendan atindi la kpa ker. Ngeren u dondon ne una tese se inja i kwagh ne.
Ú Na Mlumun Wer Nyi?
• Gba u se fa mluainja u nagh ku ipaan kura ve perapera una doo se ishima ye sha ci u nyi?
• Gba hange hange u se har “perutya,” u ú lu “perapera” la sha ci u nyi?
• Se tsaase imoshima yase nena?
[Mbampin mba ngeren u henen]
[Foto u sha peeji 26]
Aluer se tsaase imoshima yase yô, ia wase se shighe u se lu keren tom yô
