Tolange akambo w’ɔlɔlɔ l’etema aso tshɛ
Tolange akambo w’ɔlɔlɔ l’etema aso tshɛ
“We atulangaka sambu k’ololo.”—OSAM. 45:7.
1. Kakɔna kayotokimanyiya dia nkɛndakɛnda lo “mbuka y’akambu w’ololo”?
LO TSHIMBO ya Ɔtɛkɛta ande ndo ya nyuma kande k’ekila, Jehowa ekɔ lo nɔmbɔla ekambi ande lo “mbuka y’akambu w’ololo.” (Osam. 23:3) Koko, oko weso kema kokele sho ndjoyangaka dia ntakɔ mboka kɛsɔ. Diakɔ diele, sho pombaka mbidja welo dia nsala kɛnɛ kele ɔlɔlɔ. Kakɔna kayotokimanyiya dia sho nsala dikambo sɔ? L’ɛnyɛlɔ ka Yeso, sho pombaka nanga dia nsala kɛnɛ kele ɔlɔlɔ.—Adia Osambu 45:7.
2. “Mbuka y’akambu w’ololo” kɛdikɛdi na?
2 “Mbuka y’akambu w’ololo” kɛdikɛdi na? Tshɛkɛta ya lo Hɛbɛru ndo ya lo Grɛkɛ yokadimɔmi ɔnɛ “mbuka y’akambu w’ololo” mendanaka l’akambo “wosembwe,” mbuta ate nkitanyiya atɔndɔ wendana la lɔkɛwɔ l’akambo tshɛ. Lo yoho ya didjidji, “mbuka y’akambu w’ololo,” nembetshiyaka lɔkɛwɔ ndo ditshelo dioshikikɛmi oma l’atɔndɔ waki Jehowa wosembwe. Lam’ele Jehowa mbele “edjaselu ka sambu k’ololo,” atɛmɔdi ande mendɛka le nde dia nde mbaɛnya mboka kosembwe kahombawɔ ndjela.—Jer. 50:7.
3. Ngande wakokaso mbeka akambo efula wendana l’akambo w’ɔlɔlɔ waki Nzambi?
3 Paka lo nsala la wolo dia nkitanyiya atɔndɔ wosembwe waki Nzambi l’etema aso tshɛ mbayotɔ̂ngɛnyangɛnya. (Euh. 32:4) Sho tatɛka nsala dui sɔ lo mbeka akambo tshɛ wakokaso mbeka lo kɛnɛ kendana la Jehowa Nzambi oma lo Bible, Ɔtɛkɛta ande. Etena katataleke mbeka akambo wendana la nde, mbatataleke ndjasukanya la nde lushi la lushi ndo mbayotoleka nanga akambo ande w’ɔlɔlɔ. (Jak. 4:8) Sho pombaka nto mbetawɔ dia Ɔtɛkɛta wa Nzambi wakasambiyama tɔlɔmbɔla etena kahombaso mbɔsa tɛdikɔ t’ohomba lo lɔsɛnɔ.
Toyange akambo w’ɔlɔlɔ waki Nzambi
4. Kakɔna kalembetshiya nyanga akambo w’ɔlɔlɔ waki Nzambi?
4 Adia Mateu 6:33. Nyanga akambo w’ɔlɔlɔ waki Nzambi nɔmbaka akambo efula lâdiko dia sho mbetsha wenya efula lo nsambisha lokumu l’ɔlɔlɔ la Diolelo. Di’olimu aso w’ekila mbetawɔma le Jehowa, lɔkɛwɔ laso la lushi la lushi pombaka mbɔtɔnɛ l’atɔndɔ ande wa lâdiko. Kakɔna kahomba nsala wanɛ tshɛ wayanga akambo w’ɔlɔlɔ waki Jehowa? Vɔ pombaka “[ndɔta] lonto l’oyooyo lakatongama oma l’ɛfɔnɛɛlɔ ka [Nzambi] dya nsɛna lo losembwee ndo lo memankana oma lo kɛnɛ kele nsɔlɔ.”—Ef. 4:24, Dyookaneelo dy’Oyooyo.
5. Kakɔna kayotokimanyiya dia ntondoya ɔkɔmwɛlɔ?
5 Etena kasalaso la wolo dia nsɛna lo yoho yɔtɔnɛ l’atɔndɔ wosembwe waki Nzambi, tena dimɔtshi sho mbeyaka nkɔmɔ l’ɔtɛ wa munga yaso. Ko kakɔna kakoka tokimanyiya dia sho ntondoya ɔkɔmwɛlɔ wa wolo ndo mbeka dia nanga ndo nsala akambo w’ɔlɔlɔ? (Tuk. 24:10) Sho pombaka ndjasukanyaka le Jehowa tena tshɛ lo dɔmbɛlɔ “l’etema a mete wuludi la mbetawo.” (Heb. 10:19-22) Oyadi tekɔ Akristo w’akitami kana tekɔ l’elongamelo ka nsɛna la nkɛtɛ, sho pombaka monga la mbetawɔ l’olambo wa tshungo waki Yeso Kristo ndo l’olimu ande wa Ɔlɔmbɛdi aso wa Lâdiko. (Romo 5:8; Heb. 4:14-16) Ɔpɔstɔlɔ Joani akafunde ate: “Dikila dia Jesu . . . diambutedia uma lu akambu wa kolo tshe.” (1 Joa. 1:6, 7) Bible mbutaka ɔnɛ: “Kuyanga kolo yanyu yeli tilili, yo yayuyala wema uku pembe. Kuyanga yo yeko belaa, yo yayuyala diosa.” Ande yɛdikɔ ya diambo efula yakɔshi Jehowa lo tshimbo y’olambo wa tshungo waki Ɔnande la ngandji lee!—Is. 1:18.
Tɔsɛdingole ɛlɔtɔ aso wa ta wa lo nyuma
6. Lande na kele ekɔ ohomba efula dia sho sɛdingolaka ɛlɔtɔ aso wa ta wa lo nyuma?
6 Tena tshɛ, sho pombaka monga la “engawo k’akambu w’ololo,” nɛ dia tɔ kekɔ etenyi k’ohomba efula k’ɛlɔtɔ wa lo nyuma w’oma le Nzambi. (Ef. 6:11, 14) Oyadi teke kandjakimɔ le Jehowa kana tamboyakimɔka ambeta ɛnɔnyi akumi, ekɔ ohomba efula dia sho sɛdingolaka ɛlɔtɔ aso wa ta wa lo nyuma lushi la lushi. Lande na? Nɛ dia Diabolo nde la ɛdiɛngɛ ande wamboshilaka mbikadjema l’emamu wa nkɛtɛ. (Eny. 12:7-12) Satana ekɔ la kɛlɛ ndo nde mbeyaka dia etena kambôtshikalɛ kaya mondo. Ɔnkɔnɛ, nde amboleka mbidja welo dia ndɔsha ekambi waki Nzambi. Onde sho shihodiaka ohomba wa monga la “engawo k’akambu w’ololo”?
7. Ayotosala naka sho nshihodia ohomba wa ndɔta “engawo k’akambu w’ololo”?
7 Engawo kokɛka otema wa mɛtɛ mɛtɛ w’onto. L’ɔtɛ wa eongelo kaso kele kema kokele, etema aso wa didjidji wekɔ kɔlɔ ndo lokeso efula. (Jer. 17:9) Lam’ele etema aso totomaka paka dia nsala kɛnɛ kele kɔlɔ, ekɔ ohomba efula dia vɔ mbekiyama ndo mingwama. (Etat. 8:21) Naka sho nshihodia ohomba wa ndɔta “engawo k’akambu w’ololo,” kete hatotetawɔ dia kikolola kânga lo tshanda mɔtshi lo nsɔna dia nsala kɛnɛ kahetsha Nzambi; kana mbetawɔ dia nkanyiya dia nsala kɛnɛ kele kɔlɔ. Hatotetsha wenya wakokaso nsala akambo wele ohomba lo wendelo wa televiziɔ. Koko, tayosala la wolo dia nsala kɛnɛ kayɔngɛnyangɛnya Jehowa. Oyadi tayɔkɔ lo tena dimɔtshi lo tokanyi ta kɔlɔ ta demba, tayoshikikala nto oma l’ekimanyielo kaki Jehowa.—Adia Tukedi 24:16.
8. Lande na keso l’ohomba wa “engawo ka mbetawo”?
8 L’atei w’ɛlɔtɔ aso wa ta wa lo nyuma mbele ndo “engawo ka mbetawo.” Tɔ tokimanyiyaka dia “nyima akuwa tshe wa dja wa kanga kolo.” (Ef. 6:16) Lo wedi okina, mbetawɔ ndo ngandji kokaso Jehowa oma k’ɛse otema tokimanyiyaka dia sho ntshikala lo mboka k’otsha lo lɔsɛnɔ la pondjo. Lo yɛdikɔ yayotoleka mbeka dia mboka Jehowa ngandji, mbayotoleka mbɔsa akambo ande w’ɔlɔlɔ la nɛmɔ. Ko kayotota dia nkum’otema kaso? Ngande watokimanyiyatɔ lo welo wadjaso dia nanga akambo ande w’ɔlɔlɔ?
Tolame nkum’otema k’ɔlɔlɔ
9. Wahɔ akɔna wakondjaso lo nama nkum’otema k’ɔlɔlɔ?
9 Lo batismu kaso, takalɔmbɛ Jehowa dia nde tosha “khum’utema k’ololo.” (1 Pet. 3:21) Lam’ele tekɔ la mbetawɔ l’olambo wa tshungo, dikila dia Yeso kombaka pɛkato yaso ndo sho mongaka la eongelo ka pudipudi lo washo wa Nzambi. Koko, dia ntetemala monga la eongelo ka pudipudi ka ngasɔ la ntondo ka Nzambi, sho pombaka nama nkum’otema k’ɔlɔlɔ. Naka nkum’otema kaso tanyaka ndo tewolaka lo tena dimɔtshi, kete sho pombaka monga la lowando nɛ dia tɔ kakakambe dimɛna. Kɛsɔ mɛnyaka dia nkum’otema kaso kema lônyu lo kɛnɛ kendana la nɛmiya mboka yosembwe yaki Jehowa. (1 Tim. 4:2) Koko, nkum’otema kokaka monga l’ɔkɛndɛ okina le wanɛ walanga akambo w’ɔlɔlɔ.
10, 11. a) Kɔndɔla dui dimɔtshi diɛnya lande na kahombaso nkitanyiya nkum’otema kaso kambekiyama oma lo Bible. b) Lande na kele nanga akambo w’ɔlɔlɔ telaka ɔngɛnɔngɛnɔ w’efula?
10 Etena kasalaso kɛnɛ kele kɔlɔ, nkum’otema kaso mbeyaka tânya kana tɛndja onongo. Ɔlɔngɔlɔngɔ ɔmɔtshi akatakɔ “mbuka y’akambu w’ololo.” Nde akayokomaka fumbe k’esato wɛnyawɔ anto etakataka ndo akayotatɛka nnɔ mfɔka ya wolo. Nde akayaɛndjaka ɔnɔngɔ etena kakandatshɔka lo nsanganya, ndo akayaokaka dia ekɔ ose dungi pende etena kakandasambishaka, ɔnkɔnɛ nde akayotshikaka dia ndjasha l’elimu w’Akristo. Nde mbutaka ate: “Koko, dimi kondekaka mbeya dia nkum’otema kami kayoyokoya la mi l’ɔtɛ wa ditshelo diami.” Nde kotshaka ate: “Lakasɛnɛ lɔsɛnɔ l’enginya la ngasɔ suke l’ɛnɔnyi ɛnɛi.” Oma lâsɔ, nde akayotatɛ nkana yimba dia nkalola l’akambo wa mɛtɛ. Kânga mbakandafɔnyaka ɔnɛ Jehowa hatoka alɔmbɛlɔ ande, nde akalɔmbaka dia nyanga edimanyielo. Mbala kɛmɔtshi, l’ɛse ka minitɛ dikumi l’ɔkɔngɔ wa nde nɔmba, nyango akaye dia ndjowenda ndo akokeketsha dia nde ntatɛ mbɔtɔ lo nsanganya. Nde akatshu lo Mbalasa ka Diolelo ndo akalɔmbɛ ekumanyi kɛmɔtshi dia mbeka la nde Bible. L’edjedja ka wonya, nde akayobatizamaka ndo nde kaloyaka Jehowa losaka lo woho wakandashimbɛ lɔsɛnɔ lande.
11 Onde hatɛnyi dia sho kokaka nkondja ɔngɛnɔngɛnɔ w’efula lo nsala kɛnɛ kele ɔlɔlɔ? Naka sho mbeka dia nanga akambo w’ɔlɔlɔ ndo nkamba la wɔ lo yoho ya dimɛna, kete tayonga l’ɔngɛnɔngɛnɔ w’efula lo nsala kɛnɛ kangɛnyangɛnya Shɛso lele l’olongo. Teye dia lushi lɔmɔtshi, anto tshɛ wayonga la nkum’etema ya pudipudi ndo wayɔkɛnɛmɔla waonga waki Nzambi lo yoho ya kokele. Ɔnkɔnɛ, nyɛsɔ tonɛ ngandji k’efula k’akambo w’ɔlɔlɔ l’etema aso oma ko kakianɛ ndo tɔngɛnyangɛnya Jehowa.—Tuk. 23:15, 16.
12, 13. Ngande wakokaso mbekiya nkum’otema kaso?
12 Kakɔna kakokaso nsala dia mbekiya nkum’otema kaso? Etena kekaso Afundelo ndo ekanda walembetshiya Bible, ekɔ ohomba sho mbohɔka dia “kanga utema w’ololo atukanaka yimba dia nkaluya diui.” (Tuk. 15:28) Tende woho wonga dikambo sɔ la wahɔ etena kasɛdingolaso awui wendana l’olimu. Naka yoho mɔtshi y’olimu ndɔshanaka la kɛnɛ kalɔmba Afundelo, kete aha la tâmu, efula ka l’atei aso wayokitanyiya aha la ntshimbatshimba ɛlɔmbwɛlɔ kalongolaso lo tshimbo y’ɔhɔmbɔ wa kɔlamelo la wa kɛsɔ. Naka hateye shikaa dia naka olimu kapanda wekɔ dimɛna kana wekɔ kɔlɔ, kete sho pombaka nsɛdingola atɔndɔ wa lo Bible wendana la dikambo sɔ lo dɔmbɛlɔ. * Nkamba l’atɔndɔ asɔ ekɔ ohomba efula dia sho mbewɔ diaha mpomuya nkum’otema k’anto akina. (1 Kor. 10:31-33) Sho pombaka mbidja yimba djekoleko l’atɔndɔ wendana la diɔtɔnganelo diasaso la Nzambi. Naka Jehowa ekɔ onto la mɛtɛ le so, kete tayoyambola ɔnɛ: ‘Naka dimi nkamba olimu ɔnɛ, layɔngɛnyangɛnya Jehowa kana layowonyangiya?’—Osam. 78:40, 41.
13 Etena kalɔngɔsɔlaso Wekelo wa Tshoto y’Etangelo kana Wekelo wa Bible wa l’etshumanelo, sho pombaka namaka lo timba taso ohomba wa kanaka yimba l’awui wasɛdingolaso. Onde sho tekɛka eshidi esadi esadi l’ekadimwelo wa ambola ko mbeta mbala kakɔ ɔtɔi l’odingɔ wayela? Yoho ya wekelo ya ngasɔ hatotokimanyiya dia sho mfudia ngandji kaso k’akambo w’ɔlɔlɔ ndo dia monga la nkum’otema kele bu la wendjudi. Dia sho nanga akambo w’ɔlɔlɔ, sho pombaka mbeka la yambalo tshɛ ndo kanaka yimba la kɛnɛ kadiaso oma l’Ɔtɛkɛta waki Nzambi wakafundama. Ɔsɔ mbele yoho yayotokimanyiya dia sho nanga kɛnɛ kele ɔlɔlɔ l’etema aso tshɛ.
Tonge la ndjala ndo la mposa k’akambo w’ɔlɔlɔ
14. Ngande walanga Jehowa Nzambi nde la Yeso Kristo dia sho ndjaoka etena kakambaso olimu aso w’ekila?
14 Jehowa Nzambi nde la Yeso Kristo nangaka dia sho monga l’ɔngɛnɔngɛnɔ etena kakambaso olimu aso w’ekila. Kakɔna kayotokimanyiya dia sho monga l’ɔngɛnɔngɛnɔ? Ngandji k’akambo w’ɔlɔlɔ mbayotokimanyiya. Lo Dako diande dia lo dikona, Yeso akate ate: “Wane weli la ndjala la pusa ka akambu w’ololo weli la otshoko, ne dia vo wayulutshama.” (Mat. 5:6) Kitshimudi yakɔna yele l’ɛtɛkɛta ɛsɔ le wanɛ wele la mposa k’akambo w’ɔlɔlɔ?
15, 16. Lo toho takɔna tayolotshama wanɛ wele la ndjala ndo la mposa k’akambo wa lo nyuma?
15 Andja wasɛnaso ɔnɛ wekɔ lo nɔmbwama oma le kanga kɔlɔ. (1 Joa. 5:19) Etena kendaso oseka jurnalɛ tshɛ yatondjama lo wodja tshɛ, sho tanaka alapɔlɔ wendana l’awui w’esehe ndo wa ngala wasalema lo yoho yoleki tshɛ kɔlɔ. Wanɛ walanga akambo w’ɔlɔlɔ mongaka la lonyangu efula l’ɔtɛ w’awui w’esehe wasalanɛ anto. (Und. 8:9) Lam’ele sho mbokaka Jehowa ngandji, sho mbeyaka dia paka ndamɛ mbakoka nshidiya ndjala ndo mposa k’akambo wa lo nyuma kele la wanɛ wakombola mbeka akambo w’ɔlɔlɔ. Anto wa kɔlɔ wayonyɛma kem’edja, ndo wanɛ walanga akambo w’ɔlɔlɔ hawotodiɛnɛ nto la ditshelo di’anto wa kɔlɔ wɔnyɔla ɛlɛmbɛ. (2 Pet. 2:7, 8) Ɔsɔ mɛtɛ ayonga etshungwelo ka woke!
16 Oko weso ekambi waki Jehowa ndo ambeki waki Yeso Kristo, sho mbeyaka di’anto tshɛ wele la ndjala ndo la mposa k’akambo w’ɔlɔlɔ “wayulutshama.” Vɔ wayolotshama oma lo yɛdikɔ yaki Nzambi yendana la olongo w’oyoyo la nkɛtɛ y’oyoyo ‘lɛnɛ ayonga akambo w’ɔlɔlɔ.’ (2 Pet. 3:13) Ɔnkɔnɛ, tatɔkɔmɔke kana mamba lo woho wambololanɛ akambo wa wɛngiya ndo wa kɔlɔ l’andja waki Satana ɔnɛ. (Und. 5:8) Jehowa Nkum’Olongo mbeyaka kɛnɛ kayangasalema ndo kem’edja nde ayanga ntshungola anto tshɛ walanga akambo w’ɔlɔlɔ.
Ɛlɔlɔ waya oma lo nanga akambo w’ɔlɔlɔ
17. Naa ɛtshɔkɔ ɛmɔtshi wakondja wanɛ walanga akambo w’ɔlɔlɔ?
17 Osambu 146:8 mbikaka epole ɔsɛkɛ lo wahɔ ɔmɔtshi wa woke waya lo nkɛndakɛnda lo mboka k’akambo w’ɔlɔlɔ. Omembi w’esambo akembe ate: “[Jehowa] katukaka antu w’ololo ngandji.” Tokanyiya yema, Nkum’Olongo, tokaka ngandji l’ɔtɛ walangaso akambo w’ɔlɔlɔ. L’ɔtɛ wa ngandji katoka Jehowa, tekɔ l’eshikikelo ɔnɛ nde ayotokotshɛ ehomba aso naka sho mbetsha wahɔ wa Diolelo lo dihole dia ntondo lo nsɛnɔ yaso. (Adia Osambu 37:25; Tukedi 10:3.) L’edjedja ka wonya, anto walanga akambo w’ɔlɔlɔ wayololanɛ lo nkɛtɛ k’otondo. (Tuk. 13:22) Le efula k’ekambi waki Nzambi, difuto diayowokondja lo woho walangawɔ akambo w’ɔlɔlɔ ele ɔngɛnɔngɛnɔ wahakoke mbɛdikama ndo lɔsɛnɔ laha l’ekomelo lo paradiso. Kânga ɛlɔ kɛnɛ, wanɛ walanga akambo w’ɔlɔlɔ waki Nzambi wekɔ la wɔladi wa l’etei k’otema wâkimanyiya dia vɔ monga kâmɛ lo nkumbo ndo lo tshumanelo diawɔ.—Fil. 4:6, 7.
18. Akambo akɔna w’ɛlɔlɔ wakokaso nsala etena kakongɛso lushi la Jehowa?
18 Etena kakongɛso oyelo wa lushi la woke la Jehowa, sho pombaka ntetemala nyanga akambo ande w’ɔlɔlɔ. (Zef. 2:2, 3) Ɔnkɔnɛ, nyɛsɔ tɔkɛnɛmɔlɛ ngandji ka shikaa kokaso mboka yaki Jehowa Nzambi yosembwe. Dui sɔ nɔmbaka nto dia sho nkukutɛ la wolo tshɛ “engawo k’akambu w’ololo” dia nkokɛ otema aso wa didjidji. Sho pombaka nto nama nkum’otema k’ɔlɔlɔ, nɛ dia tɔ mbayotosha ɔngɛnɔngɛnɔ ndo tokimanyiya dia ngɛnyangɛnya Nzambi kaso.—Tuk. 27:11.
19. Kakɔna kahombaso ndjashikikɛ dia nsala, ndo kakɔna kayotɔsɛdingola lo sawo diayela?
19 Jehowa “atukaka ashu andi lu kete tshe, dia nsukela waku weli la etema tshe le ndi.” (2 Ek. 16:9) Ɛtɛkɛta ɛsɔ tokeketshaka mɛtɛ etena kasalaso kɛnɛ kele ɔlɔlɔ oko wambofulanɛ awui wa ngala ndo wa kɔlɔ l’andja ɔnɛ w’ofukutanu. Lo mɛtɛ, mboka yaso yosembwe mbeyaka mbidja anto wanganyi la Nzambi l’okandokando. Koko, sho kondjaka wahɔ efula lo ndjela akambo w’ɔlɔlɔ waki Jehowa. (Is. 48:17; 1 Pet. 4:4) Ɔnkɔnɛ, nyɛsɔ toyashikikɛ l’etema aso tshɛ dia ntetemala nanga ndo nsala akambo w’ɔlɔlɔ. Koko, monga l’otema wosembwe nembetshiyaka nto mpetsha kɛnɛ kele kɔlɔ. Sawo diayela diayotɛnya kɛnɛ kalembetshiya dikambo sɔ.
[Nɔtɛ ka l’ɛse ka dikatshi]
^ od. 12 Dia ntana atɔndɔ akina wa lo Bible wendana l’olimu, enda dibuku ‘Ngandji ka Nzambi,’ tshap. 15, od. 14-17.
Ngande wayoyokadimola?
• Lande na kele nshihodia nɛmɔ diele l’olambo wa tshungo ekɔ ohomba dia sho nanga akambo w’ɔlɔlɔ?
• Lande na kele ekɔ ohomba efula dia sho ndɔta “engawo k’akambu w’ololo”?
• Ngande wakokaso mbekiya nkum’otema kaso?
[Ambola wa wekelo]
[Osato wa lo lɛkɛ 26]
Nkum’otema kambekiyama tokimanyiyaka dia nkandola awui wendana l’olimu
