Ta sjunul koʼontontik jkʼantik li tukʼilale

«Jaʼ chacʼan li cʼusitic tuqʼue.» (SAL. 45:7)

1. ¿Kʼusi tskoltautik sventa te xi jxanav li ta «tuqʼuil be[e]»?

 LI Jeovae tstunes xchʼul espiritu xchiʼuk sKʼop sventa «chistojobtasu[tik] batel ta tuqʼuil be» (Sal. 23:3). Pe ta skoj ti jpas mulilutike nopem onoʼox xkaʼitik chi jkʼejav lokʼel li ta be taje. Skʼan tsots xkakʼ kipaltik sventa jtamtik yan velta li tukʼil bee. ¿Kʼusi tskoltautik? Jaʼ ti jechuk jtalelaltik kʼuchaʼal Jesús ti skʼanoj ta melel li tukʼilale (kʼelo Salmo 45:7).

2. ¿Kʼusi jaʼ li «tuqʼuil be[e]»?

² ¿Kʼusi jaʼ li «tuqʼuil be[e]»? Jaʼ li stukʼil mantaltak Jeovae. Li jpʼel kʼop ta hebreo xchiʼuk griego ti «tuqʼuil», xie, jaʼ skʼan xal ti jaʼ jech ta jchʼuntik ti kʼuyelan chal li beiltasel ta sventa lekil talelalile. Ta skoj ti jaʼ «spatobil yoʼntonic» Jeova li yajtuneltake, jun koʼontontik chi jnopaj ta stojolal sventa stukʼibtas jtalelaltik xchiʼuk ti xalbutik bu beal skʼan jtamtik batele (Jer. 50:7, Ch).

3. ¿Kʼuxi xuʼ xkojtikinbetik mas li stukʼilal Diose?

³ Skʼan xkakʼtik persa ta xchʼunbel stukʼil mantaltak Jeova mi ta jkʼan lek chilutike (Deu. 32:4). Melel onoʼox chaʼa, skʼan baʼyel xkojtikintik ti bu kʼalal xuʼ kuʼuntike, ti te chkojtikintik li ta sKʼop yakʼoj ta naʼele, li Vivliae. Mas me nopol oy ta jtojolaltik chkaʼitik Dios mi mas chkojtikintike xchiʼuk mas me ta jkʼanbetik li stukʼilale (Sant. 4:8). Jaʼ yuʼun chkakʼ jbatik ta beiltasel ta sKʼop kʼalal oy kʼusi tsots skʼoplal ta jnop ta jpastike.

Jsaʼtik li stukʼilal Diose

4. ¿Kʼusi skʼan xal ti ta jsaʼtik li stukʼilal Jeovae?

⁴ (Kʼelo Sofonías 2:3.) ¿Kʼusi skʼan xal ti ta jsaʼtik li stukʼilal Jeovae? ¿Mi jaʼ noʼox van ti ta jcholtik li lekil aʼyeje? Maʼuk. Oy to kʼusi skʼan jpastik. Skʼan jchʼunbetik jujun kʼakʼal li stsatsal mantaltak sventa xchʼam li chʼul abtelal ta jpastike. Li buchʼutik tsaʼik li stukʼilal Diose skʼan me spasik liʼe: «Jaʼ xa chalapbeic stalel li achʼ cristiano ti pasbil jech chac cʼu chaʼal stuc li Diose, ti tuqʼue ti me jutuc muʼyuc smule» (Efe. 4:24).

5. ¿Kʼusi tskoltautik sventa mu xchibaj koʼontontik?

⁵ Oy onoʼox kʼusi muʼyuk lek chbat ta pasel kuʼuntik, akʼo mi xkakʼbetik tajek yipal ta xchʼunbel li smantaltak Diose. ¿Kʼusi tskoltautik sventa mu xchibaj koʼontontik, ti jpʼeluk-o ta koʼontontik jkʼanojtik li tukʼilale xchiʼuk ti tukʼ kʼusitik ta jpastike? (Pro. 24:10.) Jaʼ ti «ta scotol coʼntontic» jpastik orasion skotol kʼakʼale xchiʼuk ti «jʼechʼel[uk] jchʼunojtic oe» (Heb. 10:19-22). Ta melel, skʼan me jvules ta joltik skotol li yajtsʼaklomutik Cristo —mi ta vinajel chi jkuxi o mi ta Balumil— ti skʼan xkakʼtik ta ilel xchʼunel koʼontontik ta stojolal li Jpojvanej xchiʼuk Mero bankilal Pale kuʼuntike, li Cristoe (Rom. 5:8; Heb. 4:14-16). Xi laj yal li jtakbol Juane: «Chispocbutic loqʼuel scotol jmultic ta xchʼichʼal [...] li Jesuse» (1 Juan 1:6, 7). Xi chal li Vivliae: «Acʼo me batsʼi cuxul tsoj li amulique, sac chcom jech chac cʼu chaʼal tayo». ¡Toj echʼ xa noʼox lek ti la spojutik Jeova kʼalal laj yakʼ ta matanal li xNichʼon ti skʼanoj tajeke! (Isa. 1:18.)

Jkʼeltik mi lek li kabtejebtik ta mantale

6. ¿Kʼu yuʼun toj tsots kʼoplal ti jkʼeltik mi lek li kabtejebtik ta mantale?

⁶ Oy kʼusi jtos ti toj tsots skʼoplal ti skʼan  jlapojtikuk-o li kabtejebtik ta mantale: ti jaʼ li «smac li sna [koʼontontike], jaʼ li cʼusitic tuqʼue» (Efe. 6:11, 14). Toj tsots me skʼoplal ti jkʼeltik jujun kʼakʼal mi lek li kabtejebtik ta mantal yakʼoj Diose, akʼo mi achʼ to laj kakʼ jbatik ta stojolal Jeova o mi voʼne xa tajek chi j-abtej ta stojolal. ¿Kʼu yuʼun? Yuʼun jipbil yalel tal ta Balumil xchiʼuk spukujtak li Satanase (Apo. 12:7-12). Kapem tajek sjol xchiʼuk snaʼ ti mu xa jaluk ch-abteje. Jech oxal mas xa toj tsots chilbajinbe li steklumal Diose. Ta melel, taje jaʼ me srasonal ti toj tsots skʼoplal ti jtunestik skotol ora «smac li sna [koʼontontike], jaʼ li cʼusitic tuqʼue».

7. ¿Kʼu yelan ta jpas jtalelaltik mi jnaʼojtik ti toj jtunel «smac li sna [koʼontontike], jaʼ li cʼusitic tuqʼue»?

⁷ Lek smakoj koʼontontik li uni abtejebal taje. Ta skoj ti jpas mulilutike oy ta koʼontontik ta jpastik li kʼusi chopole (Gén. 8:21). Jech onoʼox, «li oʼntonale toj chopol, jaʼ noʼox ven jloʼlavanej ta scotol» (Jer. 17:9). Jaʼ yuʼun skʼan jchanubtastik xchiʼuk jpastik ta mantal. Jnaʼojtik ti toj tsots skʼoplal «smac li sna [koʼontontike], jaʼ li cʼusitic tuqʼue», jech oxal mu stakʼ jlokʼtik jlikeluk. Ta melel, muʼyuk ta jchʼay-o koʼontontik li kʼusi tspʼaj Diose xchiʼuk muʼyuk bu chkakʼ ta jnopbentik li kʼusitik sventa mulile. Mu jecheʼuk noʼox ta jchʼay jkʼakʼaltik xtok ti jal tajek chbat koʼontontik ta skʼelel televisione, yuʼun li jkʼakʼaltike toj tsots skʼoplal. Ti kʼusi ta jpastike jaʼ ti chkakʼbetik yipal ta slekubtasbel yoʼonton Jeova ta jtalelaltike. Pe ¿mi oy kʼusi chopol tal ta jnopbentik o ti oy kʼusi chopol la jpastike? Muʼyuk chkakʼtik akʼo stsalutik, chkakʼbetik yipal ta stsalel ta skoltaobba Dios (kʼelo Proverbios 24:16).

8. ¿Kʼu yuʼun chtun kuʼuntik «li [jmaktike], jaʼ li xchʼunojel [koʼontontike]»?

⁸ Li kabtejebtik ta mantale te me skʼoplal liʼe: «Li amaquique, jaʼ li xchʼunojel avoʼntonique», taje toj tsots me skʼoplal «sventa [jmakbetik-o] yabtejeb li pucuj ti tsanajtic sniʼ tsjip tal ta [jtojolaltike]» (Efe. 6:16). Li xchʼunel koʼontontike jaʼ chkoltavan sventa teuk xi jxanav li ta tukʼil bee, ti jaʼ ch-ikʼvan batel ta kuxlejal sbatel osile. Pe skʼan me jkʼanojtikuk tajek li Jeova xtoke. Jech, kʼalal mas jkʼanojtike mas tsots skʼoplal chkiltik li stukʼilale. Ti kʼusi tskoltautik xtoke jaʼ li jol koʼontontike. Pe ¿kʼuxi tskoltautik sventa tsotsuk skʼoplal xkiltik li tukʼilale?

Lekuk li jol koʼontontike

9. ¿Kʼusi sbalil ta jtatik kʼalal lek-o li jol koʼontontike?

⁹ Kʼalal laj kichʼtik voʼe la jkʼanbetik Jeova ti akʼo «[xlekub] jol coʼntonti[ke]» (1 Ped. 3:21). Ta skoj ti kakʼoj xchʼunel koʼontontik ta stojolal li pojelale, ta stupʼ jmultik li xchʼichʼel Jesuse, vaʼun jech lek chkil-o jbatik xchiʼuk li Diose. Pe skʼan me sakuk jol koʼontontik sventa jaʼuk-o te xi jxanav li ta sbelel kolebale. Skʼan me jtojtik ta vokol ti tspʼijubtasutik li jol koʼontontike o ti chakʼ kiltik li kʼusi chopole. ¿Kʼu yuʼun? Yuʼun jaʼ skʼan xal ti muʼyuk sokeme, ti lek xtune xchiʼuk ti snaʼojbe lek kʼuyelan li stukʼil mantaltak Jeovae (1 Tim. 4:2). Pe oy to kʼuxi yan tskoltautik li jol koʼontontik sventa oyuk mas ta koʼontontik skʼanel li tukʼilale.

10, 11. 1) Alo kʼusi kʼotem ta pasel ti chakʼ ta ilel ti oy sbalil kʼalal chkaʼitik li kʼusi chal jol koʼontontike. 2) ¿Kʼu yuʼun xi jmuyubaj noʼox kʼalal lek tukʼ kʼusitik ta jpas ta jkuxlejaltike?

 ¹⁰ Kʼalal oy kʼusi chopol ta jpastike xuʼ me xal jol koʼontontik ti oy jmultik o ti chakʼ jvokoltike. Jaʼ jech kʼot ta stojolal jun kerem ti la skʼej sba lokʼel «ta tuqʼuil be» ti mu toʼox jaluk stamoj li be taje. Nop xaʼi skʼelel pornografia xchiʼuk slajesel marivana. Solel chopol chaʼi yoʼonton li ta tsobajeletike xchiʼuk li ta chol mantale. Jaʼ yuʼun la sten komel li abtelaletik tspas yajtsʼaklomtak Cristoe. Xi chal kaʼitike: «Mu toʼox bu jnopoj ti chakʼ jvokol li jol koʼonton ta skoj li kʼusitik jpasoje. Akʼo mi jech, jech-o ta jbolil la jpas chanib jabil». Ta mas tsʼakale lik snop ti tsut li ta mantale. La snop ti mu skʼan xaʼi Jeova li s-orasione, akʼo mi jech, la spas orasion xchiʼuk la skʼanbe perton. Mu toʼox bu echʼem lajuneb minuto, jaʼo kʼot ta vulaʼal li smeʼe xchiʼuk albat ti xlik batuk li ta tsobajeletike. La xchʼun li tojobtasele xchiʼuk la skʼanbe vokol jun mol ta tsobobbail yoʼ xchanubtasat ta Vivlia. Laj yichʼ voʼ ta mas tsʼakal, vaʼun li avie tstojbe ta vokol Jeova ta skoj ti kuxul toe.

¹¹ ¿Mi mu jechuk ti mas chakʼ jmuyubajeltik kʼalal lek tukʼ li kʼusitik ta jpas ta jkuxlejaltike? Mi jkʼanojtik li tukʼil beiltaseletike xchiʼuk mi chkakʼbetik yipal ta yakʼel ta jkuxlejaltik skotol kʼakʼale, xi jmuyubaj noʼox me ta jlekubtasbetik yoʼonton Dios ta jtalelaltik. ¡Nopo xa noʼox avaʼi! Ta me xkʼot skʼakʼalil ti muʼyuk xa chal jol koʼontontik ti oy jmultike, yuʼun jaʼ xa jech jtalelal jkotoltik kʼuchaʼal li jTotik ta vinajele. Pe li avie jaʼ xa me yorail ti jtsʼites ta koʼontontik li skʼanel tukʼilale, vaʼun jaʼ me jech xkuxet yoʼonton li Jeovae (Pro. 23:15, 16).

12, 13. ¿Kʼuxi ta jchanubtas li jol koʼontontike?

¹² ¿Kʼuxi ta jchanubtas li jol koʼontontike? Jaʼ ti jchantik li sKʼop Diose, li vunetik lokʼem ta Vivliae xchiʼuk ti xkakʼ ta jkuxlejaltik li beiltasel liʼe: «Li bochʼo tucʼ yoʼntone ta snop lec» (Pro. 15:28). Kalbetik skʼoplal avaʼi ti toj jtunel kʼalal ta jnoptik lek li kʼusitik ta jkʼan ta jnaʼtik ta sventa jtosuk abtelale. Veno, kʼalal chakʼ kiltik ta Vivlia li j-abtel ti tukʼ yoʼonton, ti lek pʼij ti oy jun abtelal ti chʼabal leke, jutuk mu skotoluk li yajtsʼaklom Cristoe muʼyuk chchʼamik li abtelal taje. Yan mi muʼyuk jamal chkichʼtik albel mi stakʼ o mu stakʼ jchʼamtike, skʼan me jkʼanbetik vokol Jeova ta jujuntal yoʼ jchanbetik skʼoplal li beiltaseletik ta Vivlia ta sventa li kʼusi ta jnop ta jpastike. a Jun li beiltasel taje jaʼ ti mu me chopoluk xaʼi sjol yoʼonton kuʼuntik li yantike (1 Cor. 10:31-33). Pe li kʼusi mas tsots skʼoplal chkaʼitike jaʼ ti lekuk-o xkil jbatik xchiʼuk li Jeovae. Xi me ta jakʼbe jbatik mi yuʼun batsʼi kuxul chkiltik li Jeovae: «¿Mi chat-o van yoʼonton Jeova xchiʼuk mi chopol van chaʼi ti jchʼam li abtelal liʼe?» (Sal. 78:40, 41).

¹³ Teuk me ta joltik ti skʼan jnopbetik lek skʼoplal kʼalal ta jchapan jbatik ta sventa Li Jkʼel osil ta toyole o kʼalal ta jchapan jbatik ta sventa li Xchanel Vivlia ta Tsobobbaile. ¿Mi anil tajek ta jsabetik stakʼobil li kʼusi ta jchantike,  ti ta ora chi jelavutik ta yan parafoe? Mi jech ta jpastike mu me bu chtojobaj lek kuʼuntik li jol koʼontontike xchiʼuk muʼyuk me tstsatsub li kʼanel kuʼuntik ta sventa li tukʼilale. Yuʼun sventa xtojobaj lek kuʼuntike skʼan me baxboluk xi jchanunaj xchiʼuk ti jnopbetik lek skʼoplal li sKʼop Diose. Skʼan xkakʼbetik yipal mi ta jkʼantik stsʼun sba lek ta koʼontontik li tukʼil beiltaseletike.

Kakʼtik ta ilel ti ta skotol koʼonton jkʼanojtik ti tukʼuk koʼontontike

14. ¿Kʼu yelan tskʼan chkaʼi jbatik li Jeova xchiʼuk Jesucristo kʼalal ta jpastik li chʼul abtelale?

¹⁴ Li Jeova xchiʼuk xNichʼone tskʼan ti xkuxetuk koʼontontik kʼalal ta jpastik li chʼul abtelale. ¿Kʼusi tskoltautik sventa jtatik taje? Jaʼ kʼalal jkʼanojtik li tukʼilal xtoke. Xi onoʼox laj yal Jesús li ta Mantaletik ta Vitse: «Li bochʼotic scotol yoʼntonic tscʼanic ti acʼo tucʼuc yoʼntonique [ti xkoʼolaj kʼuchaʼal viʼnal xchiʼuk takitiʼil chaʼiik li skʼanel tukʼilale], ta sta xcuxetel yoʼntonic yuʼun jaʼ ta xʼacʼbatic tucʼ yoʼntonic yuʼun li Diose» (Mat. 5:6, Achʼ Testamento, ta skʼop Chenalhó). ¿Kʼusi skʼan xal ta sventa li buchʼutik skʼanojbeik stukʼil betak Jeovae?

15, 16. ¿Kʼusi tspas Jeova sventa xnoj jchʼutik xkaltik xchiʼuk ti xchʼayes li takitiʼil chkaʼitik ta skʼanel tukʼilale?

¹⁵ Pasbil ta mantal yuʼun Satanás li balumile (1 Juan 5:19). Buyuk nakalutik, pe kʼalal ta jkʼeltik li periodikoe te chkilbetik skʼoplal li kʼusitik toj chopol chkʼot ta pasel xchiʼuk li majbaile. Li buchʼutik skʼanojik tukʼilale solel toj echʼ xa noʼox chopol chilik li krixchanoetik ti chilbajin xchiʼiltakike, ti xkoʼolaj xa stalelalik kʼuchaʼal chonbolometike (Ecl. 8:9). Veno, pe li buchʼutik skʼanojik Jeova xchiʼuk stukʼil mantaltake, snaʼojik lek ti jaʼ noʼox stuk Jeova xuʼ xnojesbat xchʼutik xkaltik xchiʼuk ti xchʼayesbatik li takitiʼil chaʼiik ta mantale. Poʼot xa me xlaj li chopol krixchanoetike. Jaʼ yuʼun li tukʼil krixchanoetike muʼyuk xa me chil svokolik ta skoj li jsaʼ muliletike xchiʼuk ti toj chopol stalelalike (2 Ped. 2:7, 8). ¡Jaʼ to me xkuxet koʼontontik un!

¹⁶ Li buchʼutik ta jtsʼaklitik echʼel Cristoe xchiʼuk ti chi jtun ta stojolal Jeovae jnaʼojtik ta melel ti «ta xʼacʼbatic tucʼ yoʼntonic yuʼun [Dios]» li buchʼutik tskʼanik tukʼilale. Ta melel, jun me yoʼonton chaʼi sbaik ta skoj li achʼ vinajel xchiʼuk achʼ balumil «ti bu puru tucʼ xa cʼusitic te oye» (2 Ped. 3:13). Jaʼ yuʼun muʼyuk bu labal chkaʼitik xchiʼuk muʼyuk bu chchibajes koʼontontik li sbalumil Satanás ti toj echʼ xa noʼox utsʼintael xchiʼuk majbaile (Ecl. 5:8). Yiloj me skotol li Mukʼul Diose, jaʼ yuʼun poʼot xa skolta lokʼel ta vokolil li buchʼutik skʼanoj tukʼilale.

Ta jtatik bendision kʼalal jkʼanojtik tukʼilale

17. ¿Kʼusi bendisional ta jtatik kʼalal jkʼanojtik li tukʼilale?

¹⁷ Xi chal li Salmo 146:8: «Li Mucʼul Diose cʼux ta yoʼnton li bochʼotic tucʼ yoʼntonique». ¿Mi la avil xa kʼusi li smukʼta balil ta jtatik kʼalal te chi jxanav ta sbelel tukʼilal kʼuchaʼal chal li tekstoe? Jaʼ ti tskʼanutik ta melel li Mukʼul Jpas mantal ta vinajel-balumile. ¡Jaʼ jun mukʼta matanal! Jaʼ yuʼun muʼyuk bu xchibet koʼontontik ta stojolal Jeova, jpatoj lek koʼontontik ti chakʼ li kʼusitik chtun kuʼuntik mi jaʼ baʼyel chkakʼ ta jkuxlejaltik li Ajvalilal yuʼune (kʼelo Salmo 37:25 xchiʼuk Proverbios 10:3). Vaʼun jaʼ me chuʼunin Balumil li buchʼutik tskʼanik tukʼilale (Pro. 13:22). Jutuk  mu skotoluk li tukʼil yajtuneltak Diose te me tsta smotonik ta paraiso balumil, jaʼ li kuxlejal sbatel osile. Li avie jun xa onoʼox yoʼontonik ta melel, ti jun-o yoʼonton xchiʼuk li yutsʼ yalalike xchiʼuk li yermanotakike (Fili. 4:6, 7).

18. ¿Kʼusi skʼan jpastik ti mu to chtal li skʼakʼalil Jeovae?

¹⁸ Ti kʼu sjalil ta jmalatik li smukʼta kʼakʼalil Jeovae, skʼan jsaʼtik li stukʼilal Diose (Sof. 2:2, 3). Skʼan xkakʼtik ta ilel ti jkʼanojtik ta melel li stukʼil betake. Mu me jlokʼtik «smac li sna [koʼontontike], jaʼ li cʼusitic tuqʼue», sventa mu kʼusi chopol snuptan. Jech xtok skʼan me lekuk li jol koʼontontike, yuʼun jaʼ to me jech xi jmuyubaj chi jkuxi xchiʼuk ta jmuyubtabetik yoʼonton li jTotik ta vinajele (Pro. 27:11).

19. ¿Kʼusi ti jpʼel ta koʼonton ta jpastike, xchiʼuk kʼusi ta jkʼelbetik skʼoplal li ta yan xchanobil chtale?

¹⁹ Li Jeovae «sqʼueloj scotol li banamile», yuʼun tskʼan «chacʼ ta ilel svuʼel ta stojol li bochʼo scotol yoʼntonic tscʼanic coltael[e]» (2 Cró. 16:9). ¡Taje toj echʼ xa noʼox xi jmuyubaj yuʼun ti chkakʼtik persa jech chi jkuxi kʼuchaʼal chal li stukʼil mantaltak Jeovae! Yuʼun li balumil avie muʼyuk xa smelolal jujun kʼakʼal, yantik xa x-ayan mas majbail xchiʼuk ti toj echʼ xa noʼox chopole. Li epal krixchanoetik ti nom oyik ta stojolal Diose labal to van chilik ti kichʼojtik lek ta mukʼ li smantaltak Diose. Akʼo mi jech, jnaʼojtik lek ti jaʼ sventa jlekilaltik kʼalal ta jchʼuntike (Isa. 48:17; 1 Ped. 4:4). Jaʼ yuʼun jpʼel ta koʼonton chkakʼtik ta ilel ta jkuxlejaltik ti jkʼanoj ta sjunul koʼontontik li tukʼilale. Pe oy to me kʼusi skʼan jpastik. Sventa chkakʼtik ta ilel ti tukʼ koʼontontik ta stojolal Diose skʼan me jkontraintik li kʼusi chopole. Li ta yan xchanobil chtale te ta jkʼeltik kʼusi smakoj taje.

[Tsʼib ta yok vun]

¿Kʼusi ta jtakʼtik?

• ¿Kʼu yuʼun mas to ta jkʼantik li tukʼilal kʼalal chkaʼibetik smelolal ti ep sbalil li pojelale?

• ¿Kʼu yuʼun toj tsots kʼoplal ti mu stakʼ jlokʼtik jlikeluk «smac li sna [koʼontontike], jaʼ li cʼusitic tuqʼue»?

• ¿Kʼuxi ta jchanubtas li jol koʼontontike?

[Sjakʼobiltak sventa xchanobil]

[Lokʼol ta pajina 26]

Yoʼ jnaʼtik kʼusi ta jpastik sventa jtosuk abtelale skʼan me chanem lek li jol koʼontontike