Funani U Luga Nga Mbilu Yaṋu Yoṱhe
Funani U Luga Nga Mbilu Yaṋu Yoṱhe
“Ngauri zwiné wa zwi funa ndi u luga.”—Ps. 45:7.
1. Ndi mini zwine zwa ḓo ri thusa uri ri tshimbile “nḓilani dzo lugaho”?
YEHOVA u shumisa Ipfi ḽawe na muya wawe mukhethwa u itela u livhisa vhathu vhawe “nḓilani dzo lugaho.” (Ps. 23:3) Naho zwo ralo, samusi ri songo fhelela ri anzela u pambuwa nḓilani dzenedzo. U itela u vhuyelela nḓilani ya u ita zwo lugaho zwi ṱoḓa vhuḓidini vhuhulwane. Ndi mini zwine zwa ḓo ri thusa uri ri bvelele? Ri fanela u funa u ita zwo lugaho u fana na Yesu.—Vhalani Psalme ya 45:7.
2. “Nḓilani dzo lugaho,” ndi mini?
2 “Nḓilani dzo lugaho,” ndi mini? Ndi “nḓila” dzo thewa kha zwilinganyo zwa Yehova zwa u luga. Nga Luheberu na nga Lugerika, ‘u luga’ zwi ambela kha u vha “muvhuya,” zwine zwa amba u nambatela nga ho khwaṱhaho kha maitele avhuḓi a vhuḓifari. Samusi Yehova e ene ‘danga ḽa vhukuma’ ḽa u luga, vhatevheli vhawe vha a takalela u mu edzisa u itela u vhona nḓila yo teaho ine vha fanela u fara yone.—Yer. 50:7.
3. Ri nga guda hani zwo engedzeaho nga ha u luga ha Mudzimu?
3 U lwela u ita zwithu u tendelana na zwilinganyo zwa Mudzimu zwa u luga, ndi zwone fhedzi zwine zwa ḓo ita uri ri kone u mu takadza nga vhuḓalo. (Doit. 32:4) Zwenezwo zwi ḓo itea arali ra thoma nga u guda zwoṱhe zwine ra nga kona nga ha Yehova Mudzimu Ipfini ḽawe, Bivhili. Musi ri tshi guda nga hae ri a sendela tsini-tsini nae ḓuvha ḽiṅwe na ḽiṅwe nahone ri ḓo funa u luga hawe nga ho engedzeaho. (Yak. 4:8) Ri fanela u dovha ra ṱanganedza vhulivhisi ha Ipfi ḽa Mudzimu ḽo hevhedzwaho musi ri tshi ita phetho dza ndeme vhutshiloni.
Ṱoḓani U Luga Ha Mudzimu
4. Ndi mini zwine zwa katelwa kha u ṱoḓa u luga ha Mudzimu?
4 Vhalani Mateo 6:33. U ṱoḓa u luga ha Mudzimu zwi katela zwi fhiraho u sokou fhedza tshifhinga ri tshi khou huwelela mafhungo maḓifha a Muvhuso. U itela uri tshumelo khethwa yashu i ṱanganedzee kha Yehova, vhuḓifari hashu ha ḓuvha ḽiṅwe na ḽiṅwe vhu fanela u tshimbidzana na zwilinganyo zwawe zwa nṱhesa. Vhoṱhe vhane vha ṱoḓa u luga ha Mudzimu vha fanela u ita mini? Vha fanela u ‘ambara muthu muswa, we a ri a tshi vhumbiwa ha vha u tevhedza Mudzimu, a vhumbwa ó luga, e mukhethwa, zwi tshi bva kha mafhungo-ngoho.’—Vha-Ef. 4:24.
5. Ndi mini zwine zwa ḓo ri thusa uri ri sa nyabwe?
5 Musi ri tshi khou lwela u tshila u tendelana na zwilinganyo zwa Mudzimu zwa u luga, nga zwiṅwe zwifhinga ri nga kha ḓi kulea nungo nga ṅwambo wa vhushayanungo hashu. Ndi mini zwine zwa ḓo ri thusa uri ri songo nyabwa na uri ri gude u funa u ita zwo lugaho? (Mir. 24:10) Ri fanela u rabela Yehova tshifhinga tshoṱhe “dzimbilu dzashu dzí sa zwifhi, lutendo lwó ḓala.” (Vha-Heb. 10:19-22) Hu sa londwi uri ri Vhakriste vho ḓodzwaho kana ri na fulufhelo ḽa u tshila kha ḽifhasi, ri sumbedza u vha na lutendo kha tshiṱhavhelo tsha Yesu Kristo tshi rengululaho na kha mishumo yawe sa Tshifhe washu Muhulwane. (Vha-Roma 5:8; Vha-Heb. 4:14-16) Muapostola Yohane o ṅwala uri: “Malofha a Yesu . . . a ri ṱanzwa zwivhi zwoṱhe.” (1 Yoh. 1:6, 7) Bivhili i amba uri naho zwivhi zwashu “zwó tswuka sa muridili, zwi ḓo tshena zwa nga mahaḓa.” Ndi ndugiselelo yavhuḓi lungafhani ye Yehova a ri itela yone a tshi shumisa tshiṱhavhelo tshi rengululaho tsha Murwa wawe a funwaho!—Yes. 1:18.
Ṱolisisani Mafumo Aṋu A Lwa Muya
6. Ndi ngani zwi zwa ndeme u ṱolisisa mafumo ashu a lwa muya?
6 Zwifhinga zwoṱhe ri fanela u dzula ro ambara ‘tshipilakhana tsha u luga,’ nga ṅwambo wa uri ndi tsha ndeme vhukuma kha mafumo a muya a bvaho a Mudzimu. (Vha-Ef. 6:11, 14) Hu sa londwi uri ri kha ḓi tou bva u ḓiṋekedza kha Yehova, kana ro no fhedza mahumi a miṅwaha ri tshi khou mu shumela, ndi zwe ndeme vhukuma uri ri dzule ri tshi ṱolisisa mafumo ashu a lwa muya ḓuvha ḽiṅwe na ḽiṅwe. Ndi ngani? Ndi nga ṅwambo wa uri Diabolo na madimoni awe vho poselwa fhano kha ḽifhasi. (Ndzumb. 12:7-12) Sathane o sinyuwa vhukuma nahone u a zwi ḓivha uri u na tshifhinga tshiṱuku. Nga zwenezwo, u khou vutshela vhukuma vhathu vha Mudzimu. Nga u ralo ri fanela u zwi dzhia zwi zwa ndeme vhukuma u ambara ‘tshipilakhana tsha u luga.’
7. Ri ḓo ḓifara hani arali ri tshi dzhiela nṱha ṱhoḓea ya u ambara ‘tshipilakhana tsha u luga’?
7 Tshipilakhana tshi tsireledza mbilu ya lwa ṋama. Nga ṅwambo wa u sa fhelela hashu mbilu dzashu dza lwa pfanyisedzo dzi anzela u vha na tshimbevha nahone ndi mmbi. (Yer. 17:9) Samusi mbilu dzashu dzo sendamela kha u ita zwi songo lugaho ndi zwa ndeme uri ri dzi gudise. (Gen. 8:21) Arali ri tshi dzhiela nṱha ṱhoḓea ya u ambara ‘tshipilakhana tsha u luga,’ ri nga si tshi bvule lwa tshifhinganyana ri tshi itela u ḓitakadza nga zwithu zwine Mudzimu a zwi vhenga; kana ra tendela u takadzwa nga mahumbulele a zwi songo lugaho. Ri nga si tambise tshifhinga tshashu tshinzhi tsha ndeme ro ṱalela thelevishini. Nṱhani hazwo, ri ḓo dzula ri tshi lwela u ita zwine zwa takadza Yehova. Naho ra nga khakhisea lwa tshifhinganyana nahone ra vha na mahumbulele a lwa ṋama a u ita zwi songo lugaho, Yehova u ḓo ri thusa uri ri dovhe ri vuwe.—Vhalani Mirero 24:16.
8. Ndi ngani ri tshi ṱoḓa “tshiṱangu tsha lutendo”?
8 Kha zwiambaro zwashu zwa lwa muya hu dovha ha vha na “tshiṱangu tsha lutendo.” Tshi ri thusa uri ri kone “u dzima ngatsho’ misevhe yoṱhe i dugaho ya ene muvhi.” (Vha-Ef. 6:16) Zwiṅwe hafhu, u vha na lutendo kha Yehova na u mu funa zwi tshi bva mbiluni zwi dovha zwa ri thusa uri ri ite zwo lugaho na uri ri dzule ri nḓilani ya u wana vhutshilo vhu sa fheli. Musi ri tshi guda u funa Yehova, ri ḓo dzhiela nṱha vhukuma u luga hawe. Fhedzi hu pfi mini nga luvalo lwashu? Lu ri thusa hani kha vhuḓidini hashu ha u funa zwo lugaho?
Dzulani Ni Na Luvalo Lwavhuḓi
9. Ri nga vhuyelwa hani nga u dzula ri na luvalo lwavhuḓi?
9 Musi ri tshi lovhedzwa ro humbela Yehova uri a ri ṋee “luvalo lwavhuḓi.” (1 Pet. 3:21) Nga ṅwambo wa uri ri sumbedza lutendo kha tshirengululi, malofha a Yesu a phumula zwivhi zwashu, nahone ri ḓiphina nga u vha na vhushaka havhuḓi na Mudzimu. Naho zwo ralo, u itela u dzula ri na vhushaka havhuḓi na Mudzimu luvalo lwashu lu fanela u vha lwavhuḓi tshifhinga tshoṱhe. Arali nga zwiṅwe zwifhinga luvalo lwashu lu tshi ri tsivhudza ri fanela u takala nga uri zwi sumbedza uri lu khou shuma zwavhuḓi. U tsivhudzwa honoho zwi sumbedza uri luvalo lwashu a lwo ngo fhisiwa lune lwa sa kone u tevhedza nḓila dza Yehova dzo lugaho. (1 Tim. 4:2) Fhedzi luvalo lu thusa vhukuma vhathu vhane vha funa u ita zwo lugaho.
10, 11. (a) Anetshelani tshenzhelo ine ya sumbedza uri ndi ngani ri tshi fanela u thetshelesa luvalo lwashu lwo gudiswaho nga Bivhili. (b) Ndi ngani u funa u luga zwi tshi nga ita uri ri takale vhukuma?
10 Musi ri tshi ita zwo khakheaho, luvalo lwashu lu nga ri kaidza. Muṅwe muswa o pambuwa ‘nḓilani ya u luga.’ O mbo ḓi thoma u vha na dzema ḽa u sedza zwifanyiso zwine zwa karusa maḓipfele a zwa vhudzekani nahone a mbo ḓi thoma na u daha mbanzhe. O thoma u ḓipfa e na mulandu musi a tshi ya miṱanganoni nahone a thoma u ḓivhona sa mudzia muhoyo musi a tshi ya vhuḓinḓani ha tsimu, nga zwenezwo o mbo ḓi litsha u ita yeneyi mishumo ya Vhukriste. O amba uri: “Ndo vha ndi sa zwi ḓivhi uri luvalo lwanga lwo vha lu tshi ḓo nkaidza kha mishumo yanga.” O dovha a ri: “Ndo tshila nga yeneyo nḓila ya vhutsilu miṅwaha i ṱoḓaho u vha miṋa.” Nga zwenezwo, o mbo ḓi thoma u humbula nga ha u humela ngohoni. Naho o vha a tshi humbula uri Yehova a nga si fhindule thabelo dzawe, o sokou rabela nahone a humbela pfarelo. Hu sa athu fhela mimunithi ya fumi, mme awe vho mu dalela nahone vha mu ṱuṱuwedza uri a humele miṱanganoni. O mbo ḓi ya Holoni ya Muvhuso nahone a humbela uri muṅwe muhulwane a vhale nae. Nga u ya ha tshifhinga, o mbo ḓi lovhedzwa nahone a livhuha Yehova nge a kona u tshidza vhutshilo hawe.
11 U ita zwo lugaho zwi ri ḓisela dakalo ḽihulwane. Musi ri tshi khou bvela phanḓa na u guda u funa zwo lugaho na u zwi ita nga ho fhelelaho, ri ḓo wana dakalo ḽihulu nga u ḓivha uri ri zwi takadza Khotsi ashu wa ṱaḓulu. Humbulani uri hu ḓo swika tshifhinga tshine vhathu vhoṱhe vha ḓo tshenzhela maḓipfele a u takala nga ṅwambo wa luvalo lwavho lwo kunaho; vha tshi khou sumbedza zwine Mudzimu a vha zwone nga ho fhelelaho. Nga zwenezwo, kha ri bvele phanḓa ri tshi ṱahulela u funa zwo lugaho mbiluni dzashu nga ho dzikaho na u ita uri Yehova a takale.—Mir. 23:15, 16.
12, 13. Ri nga gudisa hani luvalo lwashu?
12 Ndi mini zwine ra nga zwi ita u itela u gudisa luvalo lwashu? Musi ri tshi guda Maṅwalo na khandiso dzashu dzo thewaho Bivhilini, ndi zwa ndeme uri ri humbule uri “mbilu ya muvhuya i fhindula yó ranga ya anganya.” (Mir. 15:28) Ṱhogomelani nḓila ine zwenezwi zwa nga ni vhuyedza ngayo musi ri tshi ita phetho malugana na mushumo wa u ḓitshidza. Arali wonoyo mushumo u sa tshimbidzani na zwi re Maṅwaloni, vhunzhi hashu ri ṱavhanya u shumisa vhulivhisi vhune ra vhu wana kha tshigwada tsha mukoma a fulufhedzeaho na wa vhuṱali. Naho zwo ralo, musi hu si na vhulivhisi ho tou livhaho nga ha mushumo une ra u khetha, ri fanela u ṱhogomela na u elekanya nga thabelo nga ha maitele a re Bivhilini ane ra nga a shumisa. * Zwenezwi zwi katela u shumisa maitele a ngaho a u iledza u khakhisa mvalo dza vhaṅwe vhathu. (1 Vha-Kor. 10:31-33) Zwihuluhulu ri fanela u ṱhogomela maitele ane a kwama vhushaka hashu na Mudzimu. Arali Yehova e wa vhukuma kha riṋe ri ḓo ḓivhudzisa uri, ‘Naa u ita wonoyo mushumo zwi ḓo vhaisa Yehova kana u mu ṱungufhadza?’—Ps. 78:40, 41.
13 Musi ri tshi lugiselela Pfunzo ya Tshiingamo kana Pfunzo ya Bivhili ya Tshivhidzo, ri fanela u humbula nga ha ṱhoḓea ya u elekanya nga ha mafhungo ane ra khou a vhala. Naa ri wana uri tshifhinga tshoṱhe musi ri tshi lugiselela ri sokou talela nga u ṱavhanya phindulo dza mbudziso dza zwine ra khou zwi guda nahone ra fhirela kha phara i tevhelaho? U lugiselela nga yeneyo nḓila zwi nga si engedze u funa hashu u luga kana u ita uri ri vhe na luvalo lu shumaho. Arali ri tshi ṱoḓa u funa u luga ri fanela u guda nga u fhisea na u elekanya nga zwe ra zwi vhala kha Ipfi ḽa Mudzimu. A zwi konadzei uri ri tou khauledza arali ri tshi ṱoḓa u guda u funa u luga nga mbilu yashu yoṱhe!
Nḓala Na Ḓora Zwa U Luga
14. Yehova Mudzimu na Yesu Kristo vha ṱoḓa ri tshi ḓipfa hani nga ha tshumelo yashu khethwa?
14 Yehova Mudzimu na Yesu Kristo vha ṱoḓa ri tshi takala musi ri tshi ita tshumelo khethwa. Ndi mini zwine zwa nga ita uri ri takale? U funa u luga zwi nga ita uri ri takale. Kha Pfunzo yawe ya Thavhani Yesu o ri: “Mashudu, vhané u tama u luga, ha nga nḓala na ḓora, ngauri vhane vha ḓo fushwa ndi vhenevho.” (Mat. 5:6) Enea maipfi ndi a ndeme vhukuma kha vhathu vhane vha funa u luga.
15, 16. Nḓala na ḓora ḽa muya zwi ḓo fushwa nga nḓila dzifhio?
15 Shango ḽine ra tshila khaḽo ḽi vhuswa nga muvhi. (1 Yoh. 5:19) Musi ri tshi vhala gurannda kha shango ḽiṅwe na ḽiṅwe, ri wana mivhigo ine ya pfisa vhuṱungu na vhuvemu zwine zwa khou engedzea vhukuma. Vhuvhi vhune ha itelwa vhathu vhu pfisa vhuṱungu vhathu vho lugaho. (Muh. 8:9) Samusi ri tshi funa Yehova, ri a zwi ḓivha uri a nga fusha vhathu vhane vha vha na nḓala na ḓora ḽa muya, vhane vha vha na lutamo lwa u guda u ita zwo lugaho. Hu si kale vhathu vha songo lugaho vha ḓo fheliswa nahone vhane vha funa u luga a vha tsha ḓo tsikeledzea nga ṅwambo wa vhathu vha si na mulayo na zwiito zwavho zwivhi. (2 Pet. 2:7, 8) Yeneyo i ḓo vha hu mbofholowo yavhuḓi lungafhani!
16 Sa vhashumeli vha Yehova na vhatevheli vha Yesu Kristo, ri a zwi ḓivha uri vhathu vhoṱhe vha re na nḓala na ḓora ḽa u luga “vha ḓo fushwa.” Vha ḓo fushea nga vhuḓalo kha ndugiselelo ya Mudzimu ya maṱaḓulu maswa na ḽifhasi ḽiswa “zwine u luga ha fhaṱa khazwo.” (2 Pet. 3:13) Nga zwenezwo, ri songo kulea nungo kana u mangadzwa nga uri mutsiko kana vhuvemu zwo ita uri hu si vhe na u luga kha ḽino shango ḽa Sathane. (Muh. 5:8) Yehova wa Ṱaḓulu-ṱaḓulu u a zwi ḓivha zwine zwa khou itea nahone hu si kale u ḓo vhofholola vhane vha funa u luga.
Vhuyelwani Nga U Funa U Luga
17. Ndi dzifhio dziṅwe mbuyelo dzine dza waniwa nga vhathu vhane vha funa u luga?
17 Psalme ya 146:8 yo ombedzela mbuyelo dzavhuḓi dza u tevhela nḓila dzo lugaho. Mupsalme o imba a ri: ‘Yehova u funa vho lugaho.’ Edzani u humbula nga ha zwenezwi! Muvhusahoṱhe u a ri funa nga ṅwambo wa uri ri funa u luga. Nga ṅwambo wa uri Yehova u a ri funa, ri na vhungoho ha uri u ḓo ri ṋea zwithu zwi vhonalaho zwine ra zwi shaya musi ri tshi vhea madzangalelo a Muvhuso u thoma vhutshiloni hashu. (Vhalani Psalme ya 37:25; Mirero 10:3.) Mafheleloni pulanete yashu ya ḽifhasi i ḓo vha ya vhathu vhane vha funa u luga. (Mir. 13:22) Vhathu vhanzhi vha Mudzimu vhe vha ita zwo lugaho vha ḓo wana mbuyelo dzi takadzaho na vhutshilo vhu sa fheli paradisoni yo nakaho kha ḽifhasi. Na ṋamusi, vhane vha funa u luga ha Mudzimu vho wana malamba a u vha na mulalo une wa ita uri vha vhe na vhuthihi miṱani yavho na zwivhidzoni zwavho.—Vha-Fil. 4:6, 7.
18. Ndi zwifhio zwithu zwavhuḓi zwine ra fanela u bvela phanḓa ri tshi khou zwi ita musi ro lindela ḓuvha ḽa Yehova ḽihulwane?
18 Musi ro lindela uri ḓuvha ḽa Yehova ḽihulwane ḽi swike, ri fanela u bvela phanḓa ri tshi ṱoḓa u luga hawe. (Tsef. 2:2, 3) Nga zwenezwo, kha ri bvele phanḓa ri tshi funa nḓila dza Mudzimu dzo lugaho zwi tshi bva mbiluni. Zwenezwo zwi katela u dzula ro ambara ‘tshipilakhana tsha u luga’ u itela u tsireledza nga ho khwaṱhaho mbilu dzashu dza pfanyisedzo. Ri fanela u dovha ra dzula ri na luvalo lwavhuḓi—lune ra ḓo ita uri ri takale na lune lwa ḓo takadza mbilu ya Mudzimu.—Mir. 27:11.
19. Ri fanela u ḓiimisela u ita mini, nahone hu ḓo haseledzwa nga ha mini theroni i tevhelaho?
19 Maṱo a Yehova “a sedza shango ḽoṱhe, uri a vhonadze maanḓa awe kha ane a mu nambatela nga mbilu yoṱhe. Ndi zwone zwe wa ita zwa vhutsilu khazwo’; zwino ndi hone U tshi ḓo vutshelwa nga dzinndwa.” (2 Koron. 16:9) Eneo maipfi a ri khuthadza lungafhani samusi ri tshi khou ita zwo lugaho kha ḽino shango ḽine khakhathi, vhuvemu na vhuvhi zwa khou engedzea! I ngoho, vhathu vhanzhi vhane vha vha kule na Mudzimu vha nga kha ḓi ita uri zwi ri konḓele u ita zwo lugaho. Fhedzi u farelela kha u luga ha Yehova zwi ḓo ri vhuyedza vhukuma. (Yes. 48:17; 1 Pet. 4:4) Nga zwenezwo, kha ri ḓiimisele u bvela phanḓa ri tshi wana dakalo nga u funa na u ita zwo lugaho nga mbilu dzashu dzoṱhe. Naho zwo ralo, u ita zwenezwo nga mbilu dzashu dzoṱhe zwi katela u vhenga zwithu zwi tshinyaho mulayo. Thero i tevhelaho i ḓo ri sumbedza uri zwenezwo zwi amba mini.
[Ṱhaluso i re magumoni a siaṱari]
^ phar. 12 U itela khaseledzo ya Bivhili nga ha maitele ane a tshimbidzana na mushumo wa u ḓitshidza, sedzani Tshiingamo tsha ḽa 15 April, 1999, masiaṱari 28-30.
Ni Ḓo Aravha Hani?
• Ndi ngani u dzhiela nṱha tshirengululi zwi zwa ndeme u itela uri ni fune u luga?
• Ndi ngani zwi zwa ndeme u ambara ‘tshipilakhana tsha u luga’?
• Ri nga gudisa hani luvalo lwashu?
[Mbudziso dza Pfunzo]
[Tshifanyiso kha siaṱari 26]
Luvalo lwo gudiswaho lu ri thusa uri ri kone u humbula nga ho dzikaho musi ri tshi khetha mushumo wa u ḓitshidza
