Wan Profet Tok We i Impoten Tumas

“Bambae ol man oli stap talemaot gud nius ya, se God i King blong olgeta man [“gud nius ya blong kingdom,” NW]. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei [“en,” NW] i save kam.”​—MATIU 24:14.

OL MAN we oli stadi dip long Baebol oli agri se vas ya i impoten tumas. Hemia from we i tokbaot wan wok we bambae i kasem olgeta ples long wol. Mo tu, vas ya i soemaot wok we ol Kristin oli mas mekem, hemia wok blong prij. “En” we Jisas i tokbaot, hemia bigfala trabol we bambae i kasem olgeta ples long wol. Bifo we en ya i kam, taem ol Kristin oli mekem wok ya blong prij, oli mas talemaot long ol man se “en” ya i klosap.

Profet tok we i stap long vas ya, i stap kamtru tede. Yu yu mas save long gud nius ya from we gud nius ya i blong singaot yu blong mekem sam samting mo i blong givim woning long yu tu. Desisen we yu mas mekem long saed blong gud nius ya, hemia se: Bambae yu sapotem Kingdom blong God no bambae yu yu agensem Kingdom blong God. Laef blong yu i dipen long desisen we yu mekem long saed ya.

I gud yumi tingbaot ol vas raonabaot long profet tok ya, mo yumi traem kasem save long samting we i stap hapen long taem we Jisas i talem ol tok ya. Sam dei bifo we ol man oli nilim Jisas long pos, ol disaepol blong hem oli kam luk hem mo oli askem kwestin long hem long saed blong fiuja. Oli wantem save wetaem God bambae i stanemap Kingdom ya we Jisas i tokbaot. Mo oli wantem save taem we “wol ya i finis” no olsem sam narafala Baebol i talem, “en blong wol ya.”​—Matiu 24:​3, American Standard Version; King James Version.

Jisas i ansa long olgeta se bambae i gat ol bigfala faet we oli kasem olgeta ples long wol, bambae i gat hadtaem blong kasem kakae, bambae i gat ol sik, mo graon bambae i seksek bigwan. Hem i talem tu se bambae ol fasin nogud oli kam bigwan moa, bambae ol tija blong ol giaman jos oli pulum plante man oli go krangke, mo bambae ol man oli no laekem nating ol tru Kristin, bambae oli mekem i nogud long olgeta. !Hemia sam nogud nius ya!​—Matiu 24:​4-13; Luk 21:⁠11.

Be Jisas i talem sam gud nius tu. Hem i gohed, i talem ol tok ya long Matiu 24:14 we oli stap long stat blong haf ya. Blong plante handred yia, ol man oli tingting dip long mining blong ol tok ya, mo ol tok ya oli leftemap tingting blong plante man. Plante man oli agri se ol tok ya blong Jisas oli impoten, be oli no save agri long mining blong ol tok ya. ?Gud nius ya hem i wanem? ?Kingdom hem i wanem? ?Wetaem bambae profet tok ya i kamtru, mo hu i mekem wok we profet tok ya i tokbaot? ?“En” ya i en blong wanem samting? Bambae yumi faenemaot ansa blong ol kwestin ya long ol haf we oli kam biaen.

 [Tok blong pija long pej 2, 3]

 Kopi blong the Washington Manuscript of Four Gospels. Ol tok blong Matiu 24:14 i stap long raeting we i blak

[Credit Line]

From the book Facsimile of the Washington Manuscript of the Four Gospels in the Freer Collection 1912