Usa ka Tagna nga Hinungdanon Kaayo

“Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—MATEO 24:14.

MOUYON ang mga eskolar nga hinungdanon kaayo kini nga teksto. Hinungdanon kini kay ang buluhaton nga gihubit niini pagahimoon sa tibuok kalibotan. Hinungdanon usab kini kay gipasiugda niini nga ang mga Kristohanon kinahanglang magwali sa dili pa ang talagsaong panghitabo nga gitawag ni Jesus nga “ang kataposan.”

Kini nga tagna nagakatuman karon. Hinungdanon kini kanimo kay kini nga maayong balita adunay pagdapit ug pasidaan. Ikaw makapili: Dawaton ang Gingharian sa Diyos o isalikway kini. Ang desisyon nga imong himoon makaapektar sa imong kinabuhi.

Tagda ang konteksto. Mga pipila ka adlaw una pa ilansang si Jesus, ang mga tinun-an miduol ug nangutana kaniya bahin sa umaabot. Buot silang masayod bahin sa pagkatukod sa Gingharian sa Diyos nga kanunayng gisulti ni Jesus. Gusto usab silang masayod bahin sa “kataposan sa sistema sa mga butang,” o sumala sa pagkahubad sa ubang mga bersiyon, “ang kataposan sa kalibotan.”—Mateo 24:3, American Standard Version; King James Version.

Ingong tubag, si Jesus nagtagna nga mahitabo sa bisan diin ang mga gubat, gutom, kamatay, ug dagkong linog. Siya usab miingon nga ang kalapasan mouswag, ang mini nga mga magtutudlo magpahisalaag sa daghan, ug ang matuod nga mga Kristohanon pagadumtan ug pagalutoson. Kining tanan maoy daotang balita.—Mateo 24:4-13; Lucas 21:11.

Apan duna poy maayong balita. Dayon gipamulong ni Jesus ang gikutlo sa itaas, mga pulong nga nakapaikag ug nakapadasig sa mga tawo latas sa kasiglohan. Bisag giila sa mga tawo nga hinungdanon ang mga pulong ni Jesus, sila nagkasumpaki bahin sa kahulogan niini. Unsa ba gayod ang maayong balita? Unsa ang Gingharian? Kanus-a matuman kining tagnaa, ug pinaagi ni kinsa? Ug unsa “ang kataposan”? Ato kining susihon.

[Hulagway sa panid 2, 3]

 Kopya sa Washington Manuscript sa Upat ka Ebanghelyo. Gipabaga ang mga letra sa Mateo 24:14

[Credit Line]

From the book Facsimile of the Washington Manuscript of the Four Gospels in the Freer Collection 1912