Eü Oesini mi Watte Lamotan

“Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.”​—MATTU 24:14, TF.

EKKEWE sou käeö ra tipeeü ngeni pwe ei wokisin a fokkun lamot. Popun pun a äweweei usun och angang epwe fis woon unusen fönüfan. A pwal aüchea pun a äiti ngeni ekkewe chon Kraist ewe angang repwe wisen föri, repwe esilefeili warotoon eü fansoun mi fokkun lamot epwe kküü unusen fönüfan, Jises a eita ngeni ewe “sopolon.” Ena angangen afalafal epwe fis mwen ena “sopolon.”

Ena oesini a fen fiffis iei. A pwal lamot ngonuk pun ena kapas allim, eü kapasen etiwetiw me kapasen öüröür ngonuk. Filiom ika kopwe etiwa ena Mwuun Kot are ü ngeni. Nge minne kopwe filatä epwe kküü unusen manauom.

Nengeni met a fis. Fitu rän mwen än Jises we epwele mälo, ekkewe chon käeö ra feito ren me eisini usun met epwe fis lon mwach kkan. Ra mochen silei usun pwönütään Mwuun Kot we, ewe Jises a kapas usun fän chommong. Ra pwal mochen silei usun ewe “fansoun sopolan” are me ren ekkoch Paipel ra eita ngeni “sopwoloon fönüfan.”​—Mattu 24:3, American Standard Version; King James Version.

Iwe, Jises a pölüweni me oesini ngeniir pwe epwe wor maun mi watte, lengita, mälapalap, me watteen chechchechin fönü. A pwal erä pwe epwe lapolo föfföringaw, chon afalafal chofona repwe otupu chommong, me chon Kraist mi enlet repwe küna koput me riäfföü. Meinisin ekkeei esap iir kapas allim.​—Mattu 24:4-13; Luke 21:11.

Nge a wor eü kapas allim. Jises a sopwelo me apasa ekkena kapas asan, nge seni loom, aramas ra mochen silei weween me ra äpilükülük woon. Aramas ra tipeeü ngeni lamoten än Jises kewe kapas, nge ra tipefesen woon weween. Met titchikin weween ei kapas allim? Met ena Mwu? Ineet ei oesini epwe pwönüetä, me iö epwe apwönüetä? Met weween ewe “sopolon”? Sipwe ppii.