Eruẹaruẹ Jọ Nọ I Wuzou Gaga

“A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—MATIU 24:14.

EGBA-ERIARIẸ Ebaibol a rọwo inọ oria Ebaibol yena u wuzou gaga. U wuzou keme o ta kpahe iruo jọ nọ a te jọ akpọ na soso ru. U te je wuzou keme o fodẹ oware nọ o gwọlọ nọ Ileleikristi a re ru enẹna—iruo usiuwoma ota nọ e te karo, nọ a te rọ ẹkwoma riẹ rọ vuẹ ahwo kpahe ẹdẹ ologbo nọ Jesu o se ‘urere na.’

Eruẹaruẹ Ebaibol nana i bi rugba nẹnẹ. Onana u kpomahọ owhẹ keme a be rọ ẹkwoma emamọ usi na kẹ uzizie gbe unuovẹvẹ. O kẹ owhẹ uvẹ ẹsalọ jọ: Uvẹ nọ who re ro dede Uvie Ọghẹnẹ rehọ hayo siẹe. Onọ whọ salọ u ti kpomahọ uzuazọ ra.

Roro kpahe oware nọ u su kpohọ eruẹaruẹ nana. Edẹ jọ taure a te ti kpe Jesu, ilele riẹ a nya bru ei a tẹ nọe kpahe obaro. A jẹ gwọlọ riẹ okenọ a te rọ rehọ Uvie Ọghẹnẹ mu, uvie nọ Jesu ọ ta ẹme kpahe unuẹse buobu no. A jẹ gwọlọ riẹ kpahe “urere akpọ na” re.—Matiu 24:3.

Evaọ uyo, Jesu ọ ta nọ ẹmo, ohọo, ẹyao, gbe otọ-unuho e te roma via. Ọ ta re inọ emuemu o ti vihọ, otu iwuhrẹ egagọ erue i re ti su ibuobu thọ, gbe inọ a re ti mukpahe je kpokpo Ileleikristi uzẹme. Enana kpobi yọ ekpehre usi.—Matiu 24:4-13; Luk 21:11.

Dede na, emamọ usi jọ o riẹ re. Nọ Jesu ọ fodẹ eware yena no, ọ tẹ ta ẹme nọ ma jọ obehru wariẹ na, ẹme nọ ọ kpare isiuru ahwo jẹ kẹ ae ẹruore no anwọ ige buobu ze na. Dede nọ ahwo a rọwo inọ ẹme Jesu na o gine wuzou, a wo ọvuọ eriwo riẹ kpahe otofa riẹ. Ginọ eme họ usi uwoma na? Eme họ Uvie na? Oke vẹ eruẹaruẹ nana i ti ro rugba, kọ ẹkwoma amono? Kọ eme họ urere na? Joma ruẹ.

 [Uwoho nọ o rrọ ẹwẹ-obe avọ 2, 3]

Facsimile of the Washington Manuscript of Four Gospels. A jariẹ rehọ ibieme nọ i mu gbalọ kere eme Matiu 24:14

[Ọnọ o wo uwoho]

Rono obe na ze Facsimile of the Washington Manuscript of the Four Gospels in the Freer Collection 1912