“Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—MATAYO 24:14.

BANTU ya mayele kendimaka nde verse yai kele mfunu mingi mpenza. Yo kele mfunu sambu kisalu yina yo ketubila, fwete salama na ntoto ya mvimba. Dyaka, yo kele mfunu mingi sambu yo ketubila mambu yina Bakristu fwete sala​—kisalu ya kusamuna yina fwete salama na ntwala ya kukwisa ya dyambu mosi ya mfunu mingi yina Yezu kubingaka nde “nsuka.”

Verse yai ya mbikudulu ke na kulungana bubu yai. Yo ketadila mpi nge sambu nsangu ya mbote kele ti dyambu ya mbote mpi lukebisu. Yo kepesa nge dibaku ya kusala nsola: Kundima Kimfumu ya Nzambi to kubuya yo. Nsola yina nge tasala kele na bupusi na luzingu na nge ya mvimba.

Beto tadila mambu yina kele na ntwala mpi na nima ya verse yango. Bilumbu mingi na ntwala nde Yezu kufwa, balongoki na yandi kwisaka na yandi mpi kuyulaka yandi mambu ya metala bilumbu yina kekwisa. Bo zolaka kuzaba ntangu yina Kimfumu ya Nzambi, yina Yezu vandaka kutubila mbala mingi, zolaka kutulama. Dyaka, bo zolaka kuzaba mambu ya metala “nsuka ya ngidika ya bima” (NW) to mutindu bambalula yankaka kebaluka bangogo yango, “nsuka ya ntoto.”​—Matayo 24:3, American Standard Version; King James Version.

Na mvutu na yandi, Yezu kutubaka nde bamvita, nzala, bamaladi ya mbi, mpi kunikana ya nene ya ntoto tavanda na ntoto ya mvimba. Yandi tubaka mpi nde bantu tazitisaka ve bansiku, balongi ya luvunu ya mabundu takusa bantu mingi mpi Bakristu ya kyeleka takutana ti mbangika mpi kimbeni. Mambu yai yonso kuvandaka bansangu ya mbi.​—Matayo 24:4-13; Luka 21:11.

Kansi, yo vandaka mpi ti nsangu mosi ya mbote. Na nima, Yezu kutubaka bangogo yina beto metubila na zulu, bangogo yina bantu kusosaka kuzaba ntendula na yo mpi yo mepesaka bo kivuvu tuka bamvu-nkama mingi . Ata bantu kendimaka mfunu ya bangogo ya Yezu, bo ketulaka ntembe na ntendula na yo. Nsangu yai ya mbote kele nki mpenza? Kimfumu kele inki? Inki ntangu mbikudulu yai talungana, mpi banani talungisa yo? Mpi “nsuka” kele inki? Bika beto tadila mambu yango.

 [Kifwanisu ya kele na lutiti 2]

Facsimile of the Washington Manuscript of Four Gospels. Matthew 24:14 is highlighted

[Bangogo ya kemonisa kisina ya foto ya kele na lutiti]

From the book Facsimile of the Washington Manuscript of the Four Gospels in the Freer Collection 1912