O Kikanenu Kiki Kiala ni Kijimbuluilu Kia Dikota

‘O Njimbu íii Iambote ia Utuminu ua Nzambi, ia bhingi ku i tula mu ngongo ioso, mu ku bhana umbangi ku akua jixi joso; kiene kia kèza o dizubhilu.’—MATESU 24:14.

O ATHU a di longo kiavulu, a xikina kuila o velusu íii, iala ni kijimbuluilu kia dikota. Kiala ni kijimbuluilu kia dikota, mukonda kikalakalu kia tokala o ku ki bhanga mu ixi ioso. Ki tanga ué, se ihi ia tokala o ku bhanga o Jikidistá, mu ku bhanga o kikalakalu kia kuboka, ande dia ku bhita o kizulukutu, kiambe Jezú kuila “dizubhilu.”

O velusu íii, ia mu dikumbidila mu izuua ietu. O velusu íii ia ku tokala ué, mukonda njimbu iambote iala ni kixanu, i bhana ué kitendelesu. I ku bhana ujitu ua ku sola: Ua ku xikana o Utuminu ua Nzambi, mba ua ku dituna. O kima ki ua-nda sola kiene kia-nda londekesa se u-nda kala ni muenhu, mba kana.

Xinganeka mu izuelu ia dianga. Ande dia Jezú ku vutuka ku diulu, o maxibulu mê a mu ibhula ia lungu ni ima ieji bhita ku hádia. Ene a mesenene kuijiia ia lungu ni thembu ieji mateka ku tumina o Utuminu ua Nzambi, ia kexile mu ku a longa Jezú. Ene ué a mesenene kuijiia ia lungu ni “dizubhilu dia ima ioso mu ngongo,” mu ji Bibidia ja mukuá a ki jimbulula ué, kuila “dizubhilu dia mundu.”—Matesu 24:3, American Standard Version, King James Version.

Jezú ua a tambuijila mu ku a tangela kuila, kueji kala ita ku mundu uoso, nzala, mabhebhu, ni itungutu ia ixi. Muéne uambe ué kuila, o usuéia ueji kuvula, kueji moneka jipolofeta javulu ja makutu phala ku nganala athu, o Jikidistá ja kidi a-nda ku a zemba, ni ku a zukutisa. O ima ioso íii ia tange, ki iexile njimbu iambote.—Matesu 24:4-13.

Maji kua kexile hanji njimbu iambote. Kiene kia tange Jezú o izuelu i tua tange ku dimatekenu, o izuelu íii, iene mu bhana kisangusangu kiavulu ku athu tundé ukulu. Sumbala o athu a xikina o izuelu ia Jezú, maji ka xikina mu kijimbuluilu kia izuelu íii. Maji-phe o njimbu iambote ihi? O Utuminu ua Nzambi ihi? Thembu kuxi ia mateka ku kumbidila o kikanenu kiki, a nanhi ene mu boka o njimbu íii? O dizubhilu ihi? Tua-nda di longa.

 [Kilombuelelu ku bandu 2]

O Divulu dia Matesu 24:14 a di Tendelesa Kiavulu

[Muxinda ua tokala]

Mu divulu, Facsimile of the Washington Manuscript of the Four Gospels in the Freer Collection 1912