Isiporofido Esiqakatheke Khulu

“Iindaba ezimnandi ngombuso kaZimu zizatjhunyayelwa ephasini loke, kube bufakazi eentjhabeni zoke; [ngemva kwalokho ukuphela kuzakufika,” NW.]—MATEWU 24:14.

IZAZI zeBhayibhili ziyavuma bona iveseli liqakatheke khulu. Liqakathekile ngombanyana lihlathulula umsebenzi owenziwa ephasini loke. Godu liqakathekile ngombana litjengisa lokho amaKrestu okufuze akwenze, umsebenzi wokutjhumayela ozokuba sisendlalela netshwayo elitjengisa isenzakalo esiqakatheke khulu nesifinyelela kude, uJesu asibiza ngokobana “ukuphela.”

Ivesi elisiporofidweli liyazaliseka namhlanjesi. Nawe uyabandakanyeka ngombana iindaba ezimnandi zimumethe kokubili isimemo nesiyeleliso. Zikunikela ithuba lokukhetha: Yamukela uMbuso kaZimu namtjhana uphikisane nawo. Isiqunto osenzako sithinta ukuphila kwakho.

Cabangela umongo wendaba le. Emalangeni ambalwa ngaphambi kobana uJesu abethelwe, abafundi bakhe beza kuye bambuza ngengomuso. Khabe bafuna ukwazi ngokubekwa koMbuso kaZimu, uJesu egade akhulume ngawo kanengana. Bebafuna nokwazi ‘ngokuphela kwephasi.’—Matewu 24:3.

UJesu nekaphendulako, wabikezela bona kuzokuba nezipi, indlala, amalwelwe, nokusikinyeka kwephasi ngezinga elikhulu. Godu wathi ukungabi namthetho kuzokurhagala, abafundisi beenkolo zamala bazokukhohlisa abanengi, amaKrestu weqiniso azokuhloywa begodu atjhutjhiswe. Koke lokho bekuziindaba ezimbi.—Matewu 24:4-13; Luka 21:11.

Kodwana bekuneendaba ezihle. Ngokulandelako uJesu wakhuluma ngamezwi adzubhululwe ngehla, amezwi akarisako nakhuthaze abantu amakhulu weemnyaka. Nanyana abantu bavumelana ngokuqakatheka kwamezwi kaJesu, bayaphikisana ngokobana atjho ukuthini. Kuhle kuhle ziyini iindaba ezimnandi? Uyini uMbuso? Isiporofidwesi siyokuzaliseka nini begodu sizokuzaliswa ngubani? Khuyini “ukuphela”? Akhe sibone.

[Isithombe emakhasini 2, 3]

 Amakhophi Wango-1912 Wemitlolo Etlolwe Ngesandla Wange-Washington WamaVangeli Amane. UMatewu 24:14 utjengisiwe

[Umthombo]

Ivela encwadini i-Facsimile of the Washington Manuscript of the Four Gospels in the Freer Collection 1912