Boporofeta bjo Bohlokwa Kudu

“Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—MATEO 24:14.

DIITHUTI di dumela gore temana ye e bohlokwa kudu. E bohlokwa ka gobane modiro wo e o hlalosago o swanetše go dirwa lefaseng ka bophara. Le gona e bohlokwa ka gobane e bolela ka seo Bakriste ba swanetšego go se dira—modiro wa boboledi wo o bego o tla dirwa pele le go eta pele tiragalo e kgolo le yeo e tlago go direga lefaseng ka bophara yeo Jesu a e biditšego gore ke “bofelo.”

Temana yeo ya boporofeta e a phethagala lehono. E a go kgoma ka gobane ditaba tše dibotse di hupere taletšo le temošo. E go nea kgetho: Ya go amogela Mmušo wa Modimo goba go o ganetša. Kgetho yeo o e dirago e kgoma bophelo bja gago.

Ela hloko taba e dikologilego temana yeo. Matšatši a mmalwa pele ga ge Jesu a kokotelwa koteng, barutiwa ba ile ba tla go yena gomme ba mmotšiša mabapi le bokamoso. Ba be ba nyaka go tseba ka go hlongwa ga Mmušo wa Modimo, woo Jesu a boletšego ka wona gantši. Ba be ba bile ba nyaka go tseba ka “bofelo bja tshepedišo ya dilo,” goba bjalo ka ge diphetolelo tše dingwe di fetolela polelwana ye, ba be ba nyaka go tseba ka “bofelo bja lefase.”—Mateo 24:3, Phetolelo ya Kgale.

Ge a ba araba, Jesu o boletše e sa le pele gore go be go tla ba le dintwa, ditlala, mauba a malwetši le ditšhišinyego tša lefase ka tekanyo e kgolo. O ile a ba a bolela gore go hloka molao go be go tla ata, barutiši ba bodumedi ba maaka ba be ba tla timetša ba bantši le gore Bakriste ba therešo ba be ba tla hloiwa le go tlaišwa. Dilo tše ka moka e be e le ditaba tše mpe.—Mateo 24:4-13; Luka 21:11.

Eupša gape go be go ena le ditaba tše dibotse. Se se latelago, Jesu o ile a bolela mantšu a tsopotšwego ka mo godimo, mantšu ao a ilego a tsoša kgahlego le go tutuetša batho ka nywagakgolo. Gaešita le ge batho ba dumelelana ka bohlokwa bja mantšu a Jesu, ga ba dumelelane ka seo mantšu ao a se bolelago. Ditaba tše tše dibotse ge e le gabotse ke eng? Mmušo ke eng? Boporofeta bjo bo tla phethagala neng le gona bo tla phethagatšwa ke bomang? Le gona “bofelo” ke eng? A re boneng.

[Seswantšho go matlakala 2, 3]

 Kopi ya Sengwalwa sa Washington sa Diebangedi tše Nne. Mateo 24:14 e bonala botse

[Mothopo]

From the book Facsimile of the Washington Manuscript of the Four Gospels in the Freer Collection 1912