Eulo Limwe Liakolela Unene

“Onondaka ombu onongwa mbouhamba wa Huku, mambukaiviswa kombanda yoohi aiho, pala oumbangi movilongo aviho, iya konyima onthyulilo aiya.”—MATEUS 24:14.

OVANONGO vetavela okuti oversikulu ei yakolela unene. Yakolela mokonda ovilinga ipopia, mavilingwa ouye auho. Tupu yakolela mokonda ilekesa etyi Ovakristau vesukisa okulinga, ovilinga viokuivisa mavitetekela, nenyingilikilo novipuka maviendeko momuvo Jesus aihana okuti “onthyulilo.”

Eulo lio versikulu oyo, hono likahi nokufuiswapo. Otyo tyakolela kuove mokonda onondaka onongwa mbakutikinya okukonga nokulondola. Mbukulekesa oityi moholovona: Okutavela Ouhamba wa Huku ine okuanya. Etyi moholovonapo tyakutikinya omuenyo wove.

Tala onondaka mbulilandula nayo. Mononthiki mbumwe etyi Jesus eheneipawe, ovalongwa veya kwe avemupulu etyi matyikamoneka komutwe. Ankho vahanda okunoñgonoka konthele yokuviala Kuouhamba wa Huku, una Jesus ankho apopia apeho. Tupu ankho vahanda okunoñgonoka konthele “yokupwa kuouye” ine etyi vamwe vapitiya okuti “onthyulilo youye.”—Mateus 24:3, Tradução Interconfessional.

Jesus evekumbulula okuti makukakala ovita, nomauvela, nondyala, novinimawe ovinene. Tupu, wati okuhetavela ovitumino matyikeliyawisa, ovalongesi vonongeleya mbomatutu mavayapula ovanthu ovanyingi, iya Ovakristau votyotyili mavakayalwa nokuhataikiswa. Otyo atyiho onondaka onombi.—Mateus 24:4-13; Lucas 21:11.

Mahi tupu kuna onondaka onongwa. Okulandulisako Jesus evepopila onondaka mbapopiwa keulu, onondaka mbuetesa olumbwe mbukevelelwa novanthu mokueenda kuomanima omanyingi. Namphila ovanthu vetavela esilivilo lionondaka mba Jesus, mahi vaanya etyi mbuhangununa. Anthi, onondaka onongwa oityi? Ouhamba oityi? Onalupi eulo olio malikafuisuapo, iya onalie? Iya “onthyulilo” maiya nalupi? Tutalei.

 [Olutalatu pefo 2]

Okopiya yo no Evandyeliu Ononkhuana Mbomukanda Washington. Mateus 24:14 Yatuiswa Nawa

[Lualandwa]

Yapolwa momukanda Okopiya yo Washington yo no Evandyeliu Ononkhuana mo Coleção Freer 1912