Ngapezo Mɔɔ Nwolɛ Hyia Kpalɛ

“Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”—MATEYU 24:14.

MBƆLƆBA dɔɔnwo die to nu kɛ edwɛkɛ ɛhye anwo hyia kpalɛ. Ɔboalekɛ bɛbayɛ gyima ɛhye wɔ ewiade amuala. Eza nwolɛ hyia ɔluakɛ ɔtwe adwenle ɔkɔ gyima mɔɔ ɔwɔ kɛ Keleseɛnema yɛ—edwɛkɛhanlɛ gyima bie mɔɔ bɛbalua zo bɛabɔ nolo kolaa na “awieleɛ ne” mɔɔ Gyisɛse hanle nwolɛ edwɛkɛ ara la azo.

Zɔhane ngapezo ne ɛlɛba nu ɛnɛ. Ɔfane ɛ nwo ɔluakɛ edwɛkpa ne le ɛsalɛdolɛ nee kɔkɔbɔlɛ. Ɔmaa ɛnyia adenle ɛsi kpɔkɛ kɛ: Ɛbagyinla Nyamenle Belemgbunlililɛ ne afoa anzɛɛ ɛnrɛgyinla ye afoa. Kpɔkɛ mɔɔ ɛbazi la fane ngoane mɔɔ ɛbanyia ye la anwo.

Suzu mɔɔ zile kolaa na baha edwɛkɛ ɛhye la anwo. Ɔhale kenle ekyii na bɛabɔ Gyisɛse baka nu la, ɛdoavolɛ ne mɔ rale ye ɛkɛ rabizale ye mɔɔ ɔbazi kenlebie la. Ɛnee bɛkpondɛ kɛ bɛnwu kɛzi bɛbava Nyamenle Belemgbunlililɛ ne mɔɔ Gyisɛse ɛha nwolɛ edwɛkɛ bɛazie ɛkɛ la anwo edwɛkɛ dɔɔnwo. Bieko, ɛnee bɛkpondɛ kɛ bɛnwu mekɛ mɔɔ ngyehyɛleɛ anzɛɛ “ewiade ɛhye [bara] awieleɛ la.”—Mateyu 24:3.

Gyisɛse bua bɛ la, ɔhanle kɛ konle, sane, ewule ngakyile, yɛɛ azɛlɛkpusulɛ mgbole bara ɛleka dɔɔnwo. Eza ɔhanle kɛ mɛladonlɛ bahɔ ɔ nyunlu, adalɛ kilehilevolɛma baminli menli dɔɔnwo, bɛbakpɔ nɔhalɛ Keleseɛnema na bɛayɛ bɛ kpɔdekpɔde. Ɛnee ɛhye mɔ amuala ɛnle edwɛkɛ kpalɛ.—Mateyu 24:4-13; Luku 21:11.

Noko ɛnee edwɛkpa bieko wɔ ɛkɛ. Akee Gyisɛse hanle edwɛkɛ mɔɔ wɔ anwuma ɛkɛ la. Menli ɛdwenle mɔɔ edwɛkɛ ɛhye kile la anwo kpalɛ. Eza ɔmaa bɛnyia anyelazo. Menli dɔɔnwo die to nu kɛ Gyisɛse edwɛkɛ ne anwo hyia noko bɛ nloa ɛnzɛ bɛ nwo wɔ mɔɔ ɔkile la anwo. Duzu a le edwɛkpa ɛhye? Belemgbunlililɛ ne a le duzu? Mekɛ boni a ngapezo ɛhye bara nu a, na ɔbalua nwane anwo zo? Na duzu a le “awieleɛ ne”? Maa yɛnlea.

[Nvoninli wɔ mukelɛ ne mɔ 2, 3]

 Washington Kɛlata ne mɔɔ Fane Edwɛkpa nna ne anwo la kɔpe. Bɛzi Mateyu 24:14 azo

[Edwɛkɛ Ɛvileka]

Ɔvi Facsimile of the Washington Manuscript of the Four Gospels in the Freer Collection 1912 buluku ne anu