A Ulaoch el Kmal Klou a Ultutelel

“Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—MATTEUS 24:14.

A RUUMESINGD el ngarbab a skulir el chad a kongei el kmo tia el Bades a kmal klou a ultutelel. Tiang a klou a ultutelel e le ngmesaod er a ureor el kirel el meketmokl er a chelsel a beluulechad el rokir. Ngdirrek el kmal klou a ultutelel e le ngmeketeklii el kmo ngureor el rokui el Kristiano a kirir el meruul er ngii, el ngii a ureor er a osisechakl el kirel el mosisechakl el mo er a bek el beluu el ua lullekoi a Jesus el kmo ngmo meketmokl er a uchei er a lemei sel “ullebongel” er a beluulechad.

Me tia el ulaoch a ultaut er chelecha el taem. E kau me ke uldimukl er ngii, e le tia el ungil el chais a mengemedaol er a rechad, e dirrek el mengelechel er tir. Ngmeskau a techellem el melilt: Me a omelilt el kau a ngiltii el mo kongei er a Rengedel a Dios me a lechub e ke otngeklii a kmal klou a bo lerellii er a klengar er kau.

Ka di molatk er tiang. Sesei el klebesei er a uchei er a bo lemedeel a Jesus er a teluo el kerrekar, e a redisaiplo er ngii a uleker er ngii el kirel a ngar medad el klebesei. Te mle semeriar el mo medengei a tekoi el kirel a teketekel a Rengedel a Dios, el ngii el Jesus a di mle blechoel el mesaod er ngii. Te dirrek el mle sorir el mo medengei a tekoi el kirel a “ullebongel ra taem ra belulechad.”​—Matteus 24:3.

Me a Jesus a ulenger er tir er a lomlaoch el kmo ngmo er ngii a meklou el mekemad me a bosech er a kall me a meringel el rakt, me a dirrek el meklou el desiu. Ngdirrek el dilu el kmo a delengerenger a meleketek me a remengeteklel a klsuul el klechelid a mo mengeuid er a rebetok, e tirke el mera el Kristiano a mo muketui e dirrek el mo meringel el mukcharm. Aikang a di rokui el kmal mle mekngit el chais.​—Matteus 24:4-​13; Lukas 21:11.

Engdi ngdirrek el mla er ngii a ungil el chais. A tekingel a Jesus el medung er a uchelel tia el suobel a riruul a eru el tekoi el kmal lesemeriar er ngii a rechad er a irechar el me lmuut er chelechang. A kot e ngriruul a uldesuir a rechad el mo melatk e melebedebek a belkul aike el tekingel. E a ongerung, e a cheldechedechal a milsterir a rechad a omelatk e dirrek el mlo melisiich er tir. Me alta e a rechad a kongei el kmo ngklou a ultutelel aike el tekingel a Jesus, engdi ngdiak el kengei aike el belkul ngii el tekoi. Me ngngerang a ungil el chais? E ngerang a Renged? E oingerang e okiu techang e tia el ulaoch a mo tmaut? E ngerang a ulebongel er a beluulechad? Ka me bo dosaod aika el ker.

 [Siasing el ngar er a 2 el llel]

Facsimile of the Washington Manuscript of Four Gospels. A Matteus 24:14 a mocholt er tiang

[Credit Line]

Mlengai er a babier el dai er ngii a Facsimile of the Washington Manuscript of the Four Gospels in the Freer Collection 1912