Wanfala Barava Important Profesi

“Olketa bae talemaot disfala gud nius abaotem kingdom long evri ples long world mekem pipol long evri kantri mas herem. Bihaen datwan nao, world bae finis.”—MATTHEW 24:14.

OLKETA savveman long Bible agree hao datfala verse hem barava important. Hem bikos waka wea verse hia storyim bae kasem full world. And hem important tu bikos olketa Christian nao shud duim disfala waka. Hem nao preaching waka wea Jesus storyim hao disfala “world bae finis” and wea mas kamap firstaem bifor diswan savve happen.

Datfala profesi hem kamap tru distaem. Disfala gud nius hem garem wanfala invitation and wanfala warning. Hem samting wea iuseleva nao mas disaedem. Iu savve chus for acceptim or no acceptim Kingdom bilong God. Wanem iu chusim bae affectim laef bilong iu.

Tingim samting wea happen tu-thri day bifor Jesus hem dae. Olketa disaepol kam long Jesus and askem hem abaotem future. Olketa laek for savve long wanem taem nao Kingdom bilong God wea Jesus storyim evritaem bae start. Olketa laek savve tu abaotem taem wea “world hem gogo for finis,” or olsem samfala transleison sei, “datfala end bilong world.”—Matthew 24:3, American Standard Version; King James Version.

For ansarem datwan, Jesus sei olketa war, bigfala hangre, olketa barava nogud sik, and olketa bigfala earthquake bae kamap. Hem talem tu hao pipol bae duim olketa samting wea no stret, olketa bigman bilong religion bae laea long staka pipol, and pipol bae heitim and spoelem olketa trufala Christian. Evri samting hia hem nogud nius.—Matthew 24:4-13; Luke 21:11.

Bat gud nius hem stap. Bihaen Jesus storyim olketa nogud samting wea bae happen, hem talem toktok wea stap long datfala verse antap, wea for longfala taem finis hem mekem pipol for ting raonem and givim hope long olketa man. Nomata pipol agree hao samting wea Jesus talem long datfala verse hem important, olketa no agree abaotem mining bilong hem. So wanem nao datfala gud nius? Wanem nao Kingdom? Wanem taem nao profesi hia bae kamap tru, and hu nao bae mekem diswan happen? And wanem nao disfala toktok “world bae finis” hem minim? Bae iumi storyim olketa samting hia.

[Piksa long page 2, 3]

 Facsimile of the Washington Manuscript of Four Gospels. Matthew 24:14 long blak raeting

[Credit]

From buk Facsimile of the Washington Manuscript of the Four Gospels in the Freer Collection 1912