Kokohp Ehu me Uhdahn Kesempwal

“Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”—MADIU 24:14.

IRAIL kan me kin sukuhlki laud Paipel, pwungki me iren Paipel wet uhdahn kesempwal. E kesempwal pwehki doadoahk me ire wet mahsanih pahn wiawi nan sampah pwon. E pil kesempwal pwehki e kasalehda me dahme Kristian akan anahne wia iei doadoahk en kalohk me pahn wiawi mwowe, pwehn kasalehda duwen imwio me Sises mahsanih duwe. Ahnsowo kin pid mouren aramas koaros.

Iren kokohp wet pweidahr nan atail ahnsou. Met kin pid omw mour pwehki rongamwahwo kihda luhk ehu oh pil kin kaesehkin uhk dahme pahn wiawi ni ahnsou kohkohdo. E kihong uhk pilipil ehu, pilada Wehin Koht de uhwongada. Pilipil me ke wiahda pahn doke laud omw mour.

Tehk audepen Madiu 24. Rahn ekei mwohn Sises eh pwoula, sapwellime tohnpadahk ko kohla oh idek reh duwen ahnsou kohkohdo. Re men ese duwen koukoudahn Wehin Koht me Sises kin kalapw padahngki. Irail pil men ese duwen “kaimwiseklahn koasoandi en mehkan,” de nin duwen ekei kawehwehn Paipel kan me duwehte Pwuhk Sarawi en Mahsen en Pohnpei kin mahsanih, “imwin sampah?”—Madiu 24:3, NW.

Sises ketin sapeng ni eh kohpada me e pahn mie mahwen laud kan, duhpek, soumwahu lusulus oh rerrer en sahpw kan. E pil ketin mahsanih me suwed pahn paraparala wasa kan, sounpadahk en kaudok likamw kan pahn pitihdi me tohto oh aramas pahn kailongki oh kaloke Kristian mehlel kan. Mepwukat koaros kin wia rong suwed kei.—Madiu 24:4-13; Luk 21:11.

Ahpw pil mie rongamwahu. Mwuri, Sises ketin mahsanih ire kan me kilikilel powe. Ire pwukat kin kahrehiong aramas en medemedewe laud ia wehwe. Mahsen pwukat pil kin kamwakid oh kihong aramas koapworopwor. Mendahki aramas kin pwungki kesempwalpen sapwellimen Sises mahsen pwukat, irail sohte kin pwungkipene wehwe tehieu. Eri uhdahn dahkot rongamwahu wet? Dahkot Wehio? Iahd me kokohp wet pahn pweida oh ihs me pahn kapwaiada? Oh dahkot “imwio”? Kitail pahn kilang.

 [Kilel kan nan pali 2 oh 3]

Madiu 24:14 Pwarada nan pwuhket, Facsimile of the Washington Manuscript of Four Gospels, nan pahr 1912

[Credit Line]

Sang nan pwuhken Facsimile of the Washington Manuscript of the Four Gospels in the Freer Collection 1912