Mbeni prophétie so tënë ni ayeke kota mingi

“A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—MATTHIEU 24:14.

AZO ti gingo nda ti atënë ti Bible ayeda so versê so ayeke kota mingi. A yeke kota ngbanga ti so kusala so versê ni asara tënë ni ayeke mbeni kusala so a yeke sara ni na ndo ti sese kue. A yeke nga kota mingi ngbanga ti so a gboto lê na ndo ti ye so a lingbi aChrétien asara: kusala ti fango tënë. A yeke sara kusala so kozoni si ye so Jésus airi ni “nda ni” asi. Singo ti “nda ni” so ayeke ndu fini ti azo kue na mbeni lege so ayeke ngangu mingi.

Prophétie so aga tâ tënë laso. Nzoni tënë so andu mo ngbanga ti so na yâ ni, a yeke wara tënë ti tisango ndo nga na tënë ti gbotongo mê. A zia na gbele mo ye use ti tene mo soro oko: Ti yeda na Royaume ti Nzapa wala ti ke ni. Ye so mo soro ayeke ndu fini ti mo kue.

Bâ aversê so angoro ni. Alango mingi kozoni si a fâ Jésus, adisciple ti lo aga ahunda lo na ndo ti ye so ayeke si ande kekereke. Ala ye ti hinga ye na ndo ti ngoi so a yeke zia gere ti Royaume ti Nzapa na sese, Royaume so Jésus asara tënë ni fani mingi. Ala ye nga ti hinga ye na ndo ti “ngoi so aye ti ngoi so ayeke gue ti hunzi”, wala ye so ambeni Bible akiri peko ti tënë ni na “lango ti ndani”.​—Matthieu 24:3, Fini Mbuki, 2001.

Na yâ ti kiringo tënë ti lo, Jésus afa so fade bira, kota nzara, asioni kobela nga na sese so ayeke yengi ngangu ayeke mû ndo. Lo tene nga so kpengo ndia pëpe ayeke gue na li ni, awafango ye ti abungbi ti vorongo nzapa ti wataka ayeke handa azo mingi, nga so azo ayeke ke atâ Chrétien na ayeke sara ye ti ngangu na ala. Aye so kue ayeke lani asioni sango.​—Matthieu 24:4-13; Luc 21:11.

Me nzoni tënë ayeke nga dä: Na pekoni so Jésus afa asioni sango so, lo tene tënë so ayeke na nduzu so. Tënë so agbu bê ti azo mingi nga amû beku na ala na yâ ti angu mingi mingi so aga na pekoni. Azo so ayeke gbu li ayeda so tënë ti Jésus so ayeke kota mingi, me ala mä tere pëpe na ndo ti nda ti tënë ni. Nzoni tënë ni so ayeke nyen? Royaume ti Nzapa ayeke nyen? Lawa la prophétie so ayeke ga tâ tënë nga zo wa la ayeke sara si a ga tâ tënë? “Nda ni” ni ayeke nyen? Zia e bâ atënë so oko na oko.

[Foto na alembeti 2, 3]

 Copie ti mbeni manuscript ti a-évangile osio. Matthieu 24:14 la avuko vukongo so

[Lingu ti foto ni]

From the book Facsimile of the Washington Manuscript of the Four Gospels in the Freer Collection 1912