O se Valoaga e Matuā Sili Ona Tāua

“O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”—MATAIO 24:14.

E IOE tagata popoto, e matuā sili ona tāua lenei mau auā o loo faapea mai, e tatau ona faia lenei galuega i le lalolagi atoa. E tāua foʻi, ona o loo faasino mai ai le galuega e tatau ona faia e Kerisiano, e muaʻi talaʻi ma faalauiloa atu se mea iloga o le a tupu, lea na taʻua e Iesu “o le iʻuga,” ona e aafia ai tagata uma.

Ua faataunuuina i aso nei lenā valoaga. O loo aafia ai oe, auā o le tala lelei, o loo aumaia ai se valaaulia ma se lapataʻiga. Ua tuu mai ai iā te oe se avanoa e te filifili ai: Pe e te talia le Malo o le Atua pe leai. O le filifiliga e te faia, e aafia ai lou ola.

Seʻi iloilo isi fuaiupu o le mau. I ni nai aso a o leʻi maliu Iesu, na ō mai ai ona soo ma fesili iā te ia e faatatau i le lumanaʻi. Na latou fia iloa le taimi e toe fuataʻi ai le Malo o le Atua lea sa masani ona taʻua e Iesu. Aemaise le “taufaaiʻuiʻuga o le faiga o mea a le lalolagi,” pe e pei ona faaupu ai i nisi o faaliliuga, “o le gataaga o le lalolagi.”—Mataio 24:3, O le Tusi Paia Samoa—Lomiga o le 1884.

I lana tali atu, na valoia ai e Iesu o le a iai taua tetele, o oge, o faamaʻi, ma mafuiʻe mataʻutia. Na ia taʻua foʻi, o le a faateteleina le solitulafono, faasesēina e aʻoaʻo pepelo a lotu tagata e toʻatele, e inosia foʻi ma sauāina Kerisiano moni. O nei mea uma, o ni tala lē lelei.—Mataio 24:4-13; Luka 21:11.

Ae e iai foʻi se tala lelei. Na toe sii mai e Iesu upu lava ia o loo i luga, sa fia malamalama i ai tagata mo le tele o tausaga, ma maua ai le faamoemoe. E ui e ioe tagata i le tāua o upu a Iesu, ae e lē ioe i le uiga o na upu. O le ā tonu lenei tala lelei? Ae o le ā le Malo? O afea e faataunuu ai lenei valoaga, ma o ai e faataunuuina? O le ā “le iʻuga”? Seʻi o tatou vaai.

 [Ata i le itulau 2, 3]

Kopi o Manusikulipi e fā o Evagelia i Uosigitone. O loo faamatilatila ai le Mataio 24:14

[Ē Ana le Ata]

Mai i le tusi Facsimile of the Washington Manuscript of the Four Gospels in the Freer Collection 1912