“Letindzaba letinhle tembuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.”​—MATEWU 24:14, NW.

TIFUNDZISWA tiyavuma kutsi lelivesi libaluleke kakhulu. Libalulekile ngobe lichaza umsebenti lowentiwa emhlabeni wonkhe. Liveta naloko emaKhristu lokufanele akwente​—lokungumsebenti wekushumayela lobewutawendvulela futsi umemetele sentakalo lesibaluleke kakhulu Jesu lasibita ngekutsi “kuphela.”

Lelivesi lelisiphrofetho liyagcwaliseka lamuhla. Nawe liyakutsintsa ngobe letindzaba letinhle ticuketse simemo kanye nesecwayiso. Kufanele ukhetse kutsi uyawemukela yini uMbuso waNkulunkulu nobe umelene nawo. Loko lokukhetsako kutawutsintsa kuphila kwakho.

Asewucabange ngaloko lelikucuketse. Emalangeni lambalwa ngembikwekutsi Jesu abetselwe, bafundzi beta kuye bambuta ngelikusasa. Bebafuna kwati ngekumiswa kweMbuso waNkulunkulu, Jesu labehlala akhuluma ngawo. Bebafuna nekwati ‘ngekuphela kwetikhatsi’ nobe “ngekuphela kwelive,” njengobe lamanye emahumusho alibeka ngalendlela lelivesi.​—Matewu 24:3, American Standard Version, King James Version.

Nakabaphendvula, Jesu wabiketela kutsi bekutawuba netimphi letinyenti, indlala, tifo letingelapheki, kanye nekutamatama kwemhlaba lokwesabekako. Waphindze watsi kuba bete umtsetfo bekutawukwandza, bafundisi benkholo yemanga badukise bantfu labanyenti, futsi emaKhristu eliciniso atondvwe aphindze ashushiswe. Konkhe loku bekutindzaba letimbi.​—Matewu 24:4-13; Lukha 21:11.

Nanobe kunjalo, betikhona netindzaba letinhle. Jesu wase ukhuluma lamavi lacashunwe ngenhla, lesekungemakhulu eminyaka atsintsa bantfu labanyenti futsi abaniketa litsemba. Nanobe bantfu bavuma kutsi lamavi aJesu abalulekile, bayaphikisana ngaloko lakushoko. Tiyini kahlekahle letindzaba letinhle? Uyini uMbuso? Sitawugcwaliseka nini lesiphrofetho, futsi sitawugcwaliswa bobani? Kuyini “kuphela”? Asesibone.

[Sitfombe emakhasini 2, 3]

 Ikhophi YeMbhalo Wesandla Wase-Washington Wetincwadzi Letine TeMavangeli. Umbhalo WaMatewu 24:14 ugcanyisiwe

[Emavi laveta Umtfombo walentfo]

Encwadzini letsi: Facsimile of the Washington Manuscript of the Four Gospels in the Freer Collection ya-1912