Jesus nia liafuan neʼebé kona ema hotu nia moris

“Lia-foun reinu nian neʼe, ema sei haklaken iha mundu tomak hodi fó sasin ba povu hotu. Iha oras neʼebá, buat hotu nia rohan sei toʼo mai.”—MATEUS 24:14.

TUIR matenek-naʼin sira-nia hanoin, Jesus nia liafuan neʼe mak importante duni. Liafuan neʼe importante duni tanba esplika kona-ba serbisu neʼebé ema sei halaʼo iha mundu tomak. Liafuan neʼe mós hatudu kona-ba knaar neʼebé ema kristaun tenke halo. Neʼe mak serbisu haklaken neʼebé fó sai nanis kona-ba akontesimentu boot neʼebé sei kona ema hotu. Jesus bolu akontesimentu neʼe nuʼudar “buat hotu nia rohan”.

Jesus nia liafuan kona-ba serbisu haklaken neʼe sai loos daudauk ohin loron. Ida-neʼe kona ita ida-idak nia moris tanba mensajen neʼe fó konvite no mós avizu. Ita iha oportunidade atu hili: Simu ka la simu Maromak nia reinu. Desizaun neʼebé Ita foti sei kona Ita-nia moris rasik.

Hanoin toʼok situasaun iha tempu neʼebé Jesus hatete liafuan neʼe. Loron balu antes Jesus mate, dixípulu sira hakbesik nia no husu nia kona-ba futuru. Tanba Jesus sempre koʼalia kona-ba Maromak nia reinu, ka ukun, sira hakarak hatene bainhira mak ukun neʼe sei harii. Sira mós hakarak hatene kona-ba bainhira mak “mundu neʼe atu hotu”.—Mateus 24:3.

Jesus hatán hodi hatete katak funu, rai-hamlaha, moras no rai-nakdoko sei akontese iha mundu tomak. Nia mós dehan katak ema nia hahalok aat sei aumenta ba beibeik, mestre falsu sira sei lohi ema barak, no ema sei odi no fó terus ba ema kristaun neʼebé loos. Akontesimentu sira-neʼe hotu hanesan lia-foun aat.—Mateus 24:4-13; Lucas 21:11.

Maibé, tuirmai Jesus mós fó-hatene kona-ba lia-foun diʼak neʼebé temi iha leten. Tinan atus ba atus, ema buka namanas atu hatene Jesus nia liafuan neʼe katak sá loos no kaer metin ba ida-neʼe nuʼudar esperansa ba ema hotu. Maski ema barak hanoin katak Jesus nia liafuan neʼe importante, maibé sira iha hanoin neʼebé la hanesan no fó resposta oioin ba pergunta sira tuirmai neʼe: Lia-foun diʼak neʼe kona-ba saida? Saida mak reinu neʼe? Bainhira mak Jesus nia liafuan neʼe sei sai loos? Sé mak sei halaʼo serbisu haklaken? Buat hotu nia “rohan” katak sá? Mai ita haree.

 [Dezeñu iha pájina 2, 3]

Kópia husi Manuskritu Washington ba Evanjellu Haat, Neʼebé iha Mateus 24:14

[Dezeñu iha pájina 2]

From the book Facsimile of the Washington Manuscript of the Four Gospels in the Freer Collection 1912