Kwaghôron u Profeti u A Lu a Inja Kpishi Yô

“Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—MATEU 24:14.

MBAFANTAKERADA lumun ér mkaanem ma i nger ken ivur Bibilo ne ma a inja kpishi. Mkaanem man ma a inja sha ci u ma pase tom u i gbe u a er tar sha won cii yô. Shi ma a inja sha ci u ma tese tom u i gbe u Mbakristu ma ve lu eren yô; ka tom u pasen kwaghaôndo, u i gbe u a vande eren sha u yôôn mve u kwagh u hemban cii, u Yesu yange yila ér “mkur” la.

Kwaghôron u profeti u ken ivur ne ngu kuren nyian. Man we kpa kwagh ne kua u ker, sha ci u loho u dedoo ne ngu lôhôn ior ér ve er kwagh shi ngu tan ve icin kpaa. Loho ne na u ian i eren kwagh. U na u ian i tsuan u suen Tartor u Aôndo, shin hendan a u. Kwagh u ú tsough u eren la una bende a uma wou.

Nenge ase kwagh u yange za hemen ve Yesu hingir u ôron mkaanem ma i nger ken ivur ne la. Er mase shin ayange kpuaa u a mande Yesu yô, mbahenen nav va her a na ve va pine un ér a̱ ôr ve kwagh u una va er ken hemen yô. Yange sar ve u fan shighe u a ver Tartor u Aôndo, ú Yesu ôron kwagh u ú hanma shighe la. Shi ve soo u fan kwagh u shighe u “mkurtar” la kpaa.—Mateu 24:3.

Yesu tsengaôron ve kwagh u una va er la kaa ér, ityav mbia nôngo sha ajiir wue wue shi ijen ia gba man ubombauangev kua ityartenger i vesen kpaa. Shi a kaa ér mvende u vendan atindi una seer, shi mbatesen mba ken ukwaghaôndo mbaaiev vea tsume a ior kpishi, shi a kôr Mbakristu mba mimi ihyom shi a tôv ve a ican kpaa. Akaa ne cii lu loho u bo.—Mateu 24:4-13; Luka 21:11.

Yange ôr loho u dedoo kpaa. Yesu za hemen ôr ve mkaanem ma ken ivur i i nger sha heen, ma ior kpishi ve ndera henen sha inja i ma shi ve veren ashe a m-iv u ma ica i gbe hegen la. Shin er ior ve fe ér mkaanem ma Yesu man ka ma injaa kpishi nahan kpa, ve kera gba zwa môm sha kwagh u a lu inja i ma jighilii la ga. Kpa kanyi jim i lu loho u dedoo nee? Kanyi i lu Tartor shono? Ka hanma shighe kwaghôron u profeti ne una iv sha mi, man a lu sha ikyev i ana? Man kanyi i lu mkuru? De ase se nenge sha mbampin mban.

[Foto u sha peeji 2, 3]

 Ukôpi mba tsev mba ityakerada i ivangeli i inyiin i ken Washington. Henpe i nger Mateu 24:14 LA

[Ngeren u pasen orngeren]

From the book Facsimile of the Washington Manuscript of the Four Gospels in the Freer Collection 1912