?Ngue yɛle Ɲanmiɛn Sielɛ’n?

“Nyanmiɛn sielɛ’n i jasin fɛ nga [...]”—MATIE 24:14.

I NUN mɔ Zezi íjɔ oka’n su lɔ’n, ɔ kleli wafa ng’ɔ fata kɛ sran’m be srɛ Ɲanmiɛn’n. I waan be se kɛ: “Maan ɔ sielɛ blɛ’n ju.” Sran kpanngban kpa be suannin srɛlɛ sɔ’n, yɛ be kan flannin nun kpɛ sunman. Fluwa kun kannin kɛ “Klistfuɛ’m be kwlaa be Ɲanmiɛn sulɛ’n nun’n, srɛlɛ’n sɔ’n yɛ ɔ ti be srɛlɛ cinnjin’n niɔn.” Sanngɛ be nga be kan srɛlɛ sɔ’n be flan nun’n be siman Ɲanmiɛn Sielɛ’n. Yɛ kɛ Sielɛ sɔ’n i blɛ’n ko ju’n, like ng’ɔ́ wá yó’n be simɛn i.—Matie 6:9, 10.

I sɔ liɛ’n boman e nuan. Be nga be tɔn be wun suɛn kɛ be ti Klistfuɛ’n be kpɛnngbɛn’m be like nga be kle i Ɲanmiɛn Sielɛ’n su’n, be sansan be wun. Kpɛkun be sanngan sran akunndan, yɛ ɔ yo maan Ɲanmiɛn Sielɛ’n i wlɛ wunlɛ’n ti kekle. Bian kun klɛli i kɛ Ɲanmiɛn Sielɛ’n ti “like kun m’ɔ fin Ɲanmiɛn i wunmiɛn’n niɔn, [...] ɔ ti like kun m’ɔ yo maan sran nin Ɲanmiɛn m’ɔ lafiman’n be afiɛn mantan kpa ɔ [...], ɔ ti like kun m’ɔ o sran nin Ɲanmiɛn be afiɛn mɔ maan i yasua o i bla o be kwla ɲan nguan ɔn.” Sran kun ekun waan Ɲanmiɛn Sielɛ’n i jasin’n yɛle “asɔnun’n i su ndɛ’n.”

E kwla wun wafa nga be yiyili Ɲanmiɛn Sielɛ’n nun weinwein’n fluwa nga i bue 2 su. Be klɛli i lɔ kɛ: “Ɲanmiɛn Sielɛ’n, m’ɔ ti awa jrɛiin kun ɲanmiɛn su lɔ’n, ɔ́ wá núnnún klunwifuɛ’m be kwlaa. Kpɛkun ɔ́ yó maan asiɛ’n káci mɛn klanman kun.” Wafa nga Biblu’n suan ndɛ’n i nun yiyilɛ i bo’n, maan e nian.

Be nga bé wá síe asiɛ wunmuan’n

Ɲanmiɛn Sielɛ’n ti awa kun mɔ famiɛn kun yɛ ɔ ti su kpɛn ɔn. Ɲanmiɛn Sielɛ’n i su famiɛn’n yɛle Zezi Klist mɔ Ɲanmiɛn cɛnnin i’n. Aolia nun like kun mɔ Ɲanmiɛn nuan ijɔfuɛ Daniɛli wunnin i’n i nun’n, be yiyili wafa nga be sieli Zezi i famiɛn bia’n su’n, i nun. Daniɛli klɛli i kɛ: “Aolia nun’n, n tɛ o lɛ n tɛ nian. Kpɛkuun n wunnin like kun b’ɔ fa klɔ sran [Zezi]. Ɔ fin nyanmiɛn ble’n nun su jra. Ɔ ɔli bian oke’n [Ɲanmiɛn Zoova] i wun lɔ, naan b’a fɛ i b’a wunnge lɔ. Be fali kwlalɛ’n be mɛnnin, be mɛnmɛnnin i, yɛ be fali famiɛn diwlɛ’n be wlɛli i sa nun. Nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n, be suli i. I kwlalɛ sɔ’n ɔ́ trán lɛ tititi, i blɛ’n su sin-man le, yɛ i sielɛ’n su nunnun-man le.”—Daniɛl 7:13, 14.

Daniɛl fluwa’n kle ekun kɛ Ɲanmiɛn bɔbɔ tɛ́kɛ i Sielɛ’n i kpa, ɔ maan like fi su nunnunmɛn i. Kpɛkun ɔ́ núnnún klɔ sran’m be awa’m be kwlaa, yɛ sielɛ uflɛ fi su sinmɛn i osu. Fluwa sɔ’n i ndɛ tre 2 kan laliɛ kun mɔ Ɲanmiɛn maan Babilɔni famiɛn’n cɛnnin’n i ndɛ. Laliɛ sɔ’n nun’n, ɔ wunnin like kun. Ɔ ti kɛ waka  sran sa. Ɔ ti kpandangblauun kpa. Like sɔ’n ti famiɛn diwlɛ fanunfanun nga bé síe mɛn’n be wun kacikacilɛ’n i nzɔliɛ. Ɲanmiɛn nuan ijɔfuɛ Daniɛli tuli laliɛ sɔ’n i bo. Ɔ klɛli i kɛ: “Blɛ ng’ɔ́ bá lɔ nun’n [...] Nyanmiɛn b’ɔ o nglo lɔ’n ɔ́ síe famiɛn diwlɛ kun b’ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkun i bɔbɔ ɔ́ ká lɛ tititi.”—Daniɛl 2:28, 44.

Nán Ɲanmiɛn Sielɛ’n i su famiɛn’n i kunngba yɛ ɔ́ dí famiɛn’n niɔn. I nun mɔ Zezi dí i junman’n asiɛ’n su wa’n, ɔ seli i akoto nga b’a kpɔcimɛn i le’n be kɛ bé cɛ́n be nin sran uflɛ wie mun ɲanmiɛn su lɔ, kpɛkun bé síe be famiɛn bia’n su. (Lik 22:28-30) Zezi w’a kanman bia jrɛiin sa ndɛ. Afin kɛ ng’ɔ fa kannin’n sa’n, ɲanmiɛn su lɔ yɛ Ɲanmiɛn Sielɛ’n trán ɔn. Be nga be nin Zezi bé dí famiɛn sɔ’n, Biblu’n waan be ti sran mɔ ‘be fin nvle-nvle’n kwlaa nun’n, nin be bɔ be aniɛn’n ti wafa-wafa’n kwlaa’n, ɔ nin be nga be fin mɛnmɛn’n kwlaa nun’n.’ Bé káci “e Nyanmiɛn’n i awlo sran bɔ be trɛn i nyrun. Be yɛ bé síe sran mun asiɛ’n su wa-a.”—Sa Nglo Yilɛ 5:9, 10.

Like ti mɔ Ɲanmiɛn Sielɛ’n i jasin’n ti jasin fɛ’n

Maan e sie i nzɔliɛ kɛ be sieli Klist Zezi i famiɛn “nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n” be su. Kpɛkun be nga be nin i dí famiɛn’n ‘bé síe sran mun asiɛ’n su wa.’ ?Sɛ ɔ ti sɔ’n niɔn, sran wafa benin mun yɛ bé trán Ɲanmiɛn Sielɛ’n i bo ɔ? Be nga mɔ kɛ be bo jasin fɛ’n kle be andɛ’n be sɔ nun klanman’n niɔn. Be wie mun ekun yɛle be nga bé cɛ́n be asiɛ’n su wa mɔ sɛ be nanti klanman’n bé kwlá trán nguan nun tititi’n.

Ninnge kpakpa nga sran’m bé ɲán be Ɲanmiɛn Sielɛ’n i bo’n, Biblu’n kan be ndɛ klanman kpa. Ninnge sɔ’m be nun wie mun yɛ:

“Kɛ ɔ fɛ i lele b’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie, w’a bubu ta’m be nun, w’a bubu cua’m be nun, w’a wɔ nyrɛn’m be nun.”—Jue Mun 46:10.

“Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. Be su kplan-man sua be yaci man-man sran wie kɛ ɔ tran nun. Be su ta-man waka be yaci man-man sran uflɛ kɛ ɔ di i su mma.”—Ezai 65:21, 22.

“[Nyanmiɛn] núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:3, 4.

“I blɛ sɔ nun’n anyansifuɛ’m bé wún ase, sutrefuɛ’m bé tí sa. Blɛ sɔ nun’n, cɛcɛwafuɛ’m bé tú kpɛ́n kɛ flete mun sa. Yɛ aklunjuɛ’n ti bobofuɛ’m bé kpán.”—Ezai 35:5, 6.

“Cɛn wie lele be kwlaa nga be o ndia nun’n, bé tí [Zezi] i nɛn, yɛ bé fín ndia’n nun fíte. Be nga be yoli sa kpa’n, bé cɛ́n bé nyán nguan.”—Zan 5:28, 29.

“Yalɛfuɛ mun [wun ase kanfuɛ mun] yɛ mɛn’n ɔ́ wá yó be liɛ-ɔ. Be wun jɔ́ be kpa fɔuun!”—Jue Mun 37:11.

Nanwlɛ i sɔ liɛ’n ti jasin fɛ dan! I ng’ɔ yo fɛ ekun’n, yɛle kɛ Biblu’n nun kasiɛ nga b’a dun mmua b’a kpɛn su’n, be kle kɛ ɔ cɛ kaan sa’n, Ɲanmiɛn Sielɛ’n wá síe asiɛ wunmuan’n i kpa.