Nso Idi Obio Ubọn̄ Abasi?

“Ẹyenyụn̄ ẹkwọrọ eti mbụk obio ubọn̄ emi . . . ” —MATTHEW 24:14.

KE ỌWỌRỌETOP Ukwọrọikọ Jesus oro ke Obot, enye ama owụt nte ẹkpebọn̄de akam, ndien kiet ke otu n̄kpọ emi enye ọkọdọhọde ẹben̄e Abasi edi: “Yak obio ubọn̄ fo edi.” Ata ediwak owo ẹmụm akam emi ẹdọn̄ ke ibuot ẹsinyụn̄ ẹbọn̄ enye ediwak ini. N̄wed ofụri orụk ifiọk kiet ọdọhọ ke akam emi edi “akpan akam emi kpukpru mme Christian ẹsibọn̄de ke mme edinam utuakibuot mmọ.” Edi ata ediwak mbon emi ẹsibọn̄de akam emi ifiọkke se Obio Ubọn̄ emi edide m̀mê ndifiọk se enye edinamde ke ini enye edidide.—Matthew 6:9, 10.

Emi ikpaha nnyịn idem koro se mme adausụn̄ ke Christendom ẹtịn̄de ẹban̄a Obio Ubọn̄ Abasi awak n̄kukọhọ akaha, etịmerede mme owo inyụn̄ in̄wan̄ake owo. Ete kiet ekewet ete ke Obio Ubọn̄ Abasi edi “n̄kpọ eke spirit, . . . n̄kpọ emi adiande owo ye odu-uwem Abasi . . . , se owo edide ye Abasi, kpa se idinamde owo enyene edinyan̄a.” Owo en̄wen ọdọhọ ke Obio Ubọn̄ Abasi edi “ukpepn̄kpọ aban̄ade ufọkabasi.” Catechism Ufọkabasi Catholic ọdọhọ ke “Obio Ubọn̄ Abasi edi edinen ido ye emem ye idatesịt ke Edisana Spirit.”

Ọyọhọ page 2 ke magazine emi anam n̄kpọ emi an̄wan̄a. Enye ọdọhọ ete: “Obio Ubọn̄ Abasi, emi edide ata ukara ke heaven, eyetre kpukpru idiọkido onyụn anam isọn̄ akabade edi paradise.” Ẹyak ise nte Bible ọsọn̄ọde emi.

Mbon Emi Ẹdikarade Ofụri Isọn̄ ke Ini Iso

Obio Ubọn̄ edi ukara, ndien enye enyene edidem. Edidem Obio Ubọn̄ Abasi edi Jesus Christ emi ẹkenamde eset ke n̄kpa. Ẹma ẹnam prọfet Daniel okụt ke n̄kukụt nte ẹdoride Jesus ke ebekpo ke heaven, enye ama onyụn̄ ewet ete: “N̄kụt ke n̄kukụt okoneyo, ndien, sese! owo eke ebietde eyen owo asan̄a ke obubịt enyọn̄ edi; ẹnyụn̄ ẹyak enye ebe ekesịm Andisọn̄ọ Usen, ndien mmọ ẹda enye ẹdọk ẹdi ke iso Esie. Ndien ẹnọ enye ukara ye itie ukpono ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye. Ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.”—Daniel 7:13, 14.

N̄wed Daniel n̄ko owụt nte Abasi edisọn̄ọde owụk Obio Ubọn̄ emi, ye nte Obio  Ubọn̄ emi edisobode kpukpru ukara owo ifep, ndien ke owo en̄wen idibọhọ ukara emi. Daniel ibuot iba etịn̄ ndap oro Abasi akanamde edidem Babylon adaba okụt akamba mbiet emi adade aban̄a mme ukara ererimbot emi. Prọfet Daniel ama etịn̄ se ndap emi ọwọrọde, ete: “Ke mme akpatre usen . . . Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”—Daniel 2:28, 44.

Edidem Obio Ubọn̄ Abasi idikarake ikpọn̄. Ke ini utom ukwọrọikọ Jesus mi ke isọn̄, enye ama ọn̄wọn̄ọ ọnọ mme anam-akpanikọ apostle esie ete ke ẹyenam mmọ ye mbon en̄wen ẹset ẹka heaven ye nte ke mmọ ẹyetie ke mme ebekpo. (Luke 22:28-30) Idịghe ata ebekpo ke Jesus eketịn̄ aban̄a koro enye ọkọdọhọ ke Obio Ubọn̄ emi odu ke heaven. Bible ọdọhọ ke mbon emi ẹditienede enye ikara mi ẹto “kpukpru esien ye usem ye obio ye idụt.” Mmọ ẹyedi “obio ubọn̄ ye mme oku ẹnọ Abasi nnyịn, ndien mmọ ẹyekara isọn̄ nte ndidem.”—Ediyarade 5:9, 10.

Se Inamde Obio Ubọn̄ Emi Edi Eti Mbụk

Ndi omokụt ke ẹnọ Christ Jesus odudu ndikara “kpukpru owo ye mme idụt ye usem” ye nte ke mme nsan̄a esie “ẹyekara isọn̄ nte ndidem”? Mmanie ndien ke Obio Ubọn̄ emi edikara? Edi mbon emi ẹnamde n̄kpọ ẹban̄a eti mbụk oro ẹkwọrọde mfịn. Emi ẹyesịne n̄ko mbon oro ẹdinamde ẹset ye idotenyịn ndidu uwem ke isọn̄ ke nsinsi.

Bible etịn̄ mme edidiọn̄ emi mme owo ẹdinyenede ke Obio Ubọn̄ Abasi. Se ndusụk ke otu mme edidiọn̄ oro mi:

“[Abasi ayanam] ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; Ọfọp mme chariot ekọn̄ ke ikan̄.”—Psalm 46:9.

“[Mme owo] ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia.”—Isaiah 65:21, 22.

“[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4.

“Ke ini oro enyịn ẹyen̄wan̄a mme nnan, utọn̄ ẹyenyụn̄ ẹsịrede mme inan. Ke ini oro mbụn̄ọ ọyọfrọ nte ayara edop, edeme imụm oyonyụn̄ ọkwọ ke idatesịt.”—Isaiah 35:5, 6.

“Kpukpru mme andidu ke udi editi [ẹyekop Jesus] uyo ẹwọn̄ọ ẹdi, mbon oro ẹkenamde se ifọnde ẹyeset ke n̄kpa ẹdụk uwem.”—John 5:28, 29.

“Mbon nsụkidem ẹyeda isọn̄ ẹnyene, Ediwak emem oyonyụn̄ adat mmọ esịt.”—Psalm 37:11.

Ata eti mbụk edi emi! N̄kpọ en̄wen edi ke mme ntịn̄nnịm ikọ Bible oro ẹsude ẹwụt ke ini enen̄ede ekpere emi edinen ukara Obio Ubọn̄ Abasi emi edikarade ofụri isọn̄.