Bulopwe bwa Leza Le I Bika?

“Īno myanda-miyampe ya buno bulopwe . . .”—MATEO 24:14.

MU BWANDI Busapudi bwa ku Lūlu butumbe, Yesu wāletele lulombelo lwa kulondela’po, lutanwa’mo ne bino binenwa bya kulomba Leza amba: “Bulopwe bobe bufike.” Bantu bavule i bakwatyile luno lulombelo ku mutwe ne belupitulukanga kyaba kyonso. Ansikolopedi imo inene’po amba, i “lulombelo lwinelwine lulombelanga Bene Kidishitu mu masambila.” Inoko, bavule bapitulukanga’lo kebayukilepo Bulopwe bwa Leza i bika ne bine byobukalonga po bukafika.—Mateo 6:9, 10.

Ke kya kutulumukapo. Bendeji ba bipwilo bya Kine Kidishitu baletanga bushintuludi bwipatanya, buvutakanya bantu, kadi bukutakane pa mwikadile Bulopwe. Muntu umo walembele amba Bulopwe bwa Leza i “kintu kipite bukomo bwa bantu, . . . kipwano kya munda na Leza mūmi . . . , kintu kidi na Leza kimwena’mo bana-balume ne bana-bakaji bukūdi.” Mukwabo nandi ushintulula evanjile ya Bulopwe amba i “mafundisho atala kipwilo.” Kadi Katekeshimu ka Kipwilo kya Katolika kanena’mba: “Bulopwe bwa Leza [i] boloke, ne ndoe, ne nsangaji mu Muya Utokele.”

Ukatana bushintuludi buvule pa paje 2 wa uno julunale. Potutanga amba: “Bulopwe bwa Leza, umbikalo wa mūlu udi’ko binebine, busa kufudija panopano ponka bubi bonso ne kwalamuna ntanda ke paladisa.” Tutalei muswelo ubingija Bible uno mwanda.

Mulopwe Usa Kuludika Ntanda Yonso

Bulopwe i umbikalo uludikwa na mulopwe. Mulopwe wa Bulopwe bwa Leza i Yesu Kidishitu musangulwe. Kubikikwa kwandi mūlu kwālombwelwe mu kimonwa kyāpelwe mupolofeto Danyele, wāsonekele amba: “Namona mu bimonwa bya bufuku, ino talapo, pa makumbi a mūlu paiya umo wifwene’nka na mwana muntu [Yesu], nandi wafika kudi Kafulamoba [Yehova Leza], penepo bamufwenya kumeso andi. Penepa kadi kwamupebwa bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile; bufumu bwandi i bufumu bwa kulādilamo nyeke, kebukapitepo, ne bulopwe bwandi i bwampikwa kukōnakanibwa.”—Danyele 7:13, 14.

Kadi mukanda wa Danyele ulombola amba buno Bulopwe bwādi bwa kushimikwa pototo pō na Leza, amba bukafudija imbikalo yonso ya bantu, ne amba kebukonakanibwapo nansha patyetye. Shapita 2 utela kilotwa kilenga nzuba kyālotele mulopwe wa Babiloni, mwaāmwene nkishi mukatampe,  welekeja kwipingakana kwa malopwe makatampe a ntanda. Mupolofeto Danyele wāshotolwele kino kilotwa. Wālembele amba: “Mu mafuku a kumfulo’a, . . . Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”—Danyele 2:28, 44.

Mulopwe wa Bulopwe bwa Leza kakaludikapo kasuku kandi. Yesu, mu bula bwa mwingilo wandi pano pa ntanda, wākulupije batumibwa bandi ba kikōkeji amba abo, ne bakwabo, bakasangwilwanga ku būmi bwa momwa mūlu ne kukashikata pa bipona. (Luka 22:28-30) Kādipo wisambila bipona byotumonanga’bi, ke-pantu, monka mwēkilombwedile Yesu, Bulopwe bwādi bwa kwikala mūlu. Bible utela bano bakabikala nandi amba i “ba ku bisaka byonso, ne ba mu ndimi yonso, ne ba ku bantu bonso, ne ba ku mizo.” Bakekalanga “balopwe bapidishitu kudi Leza wetu, bakukabikala panopantanda.”—Kusokwelwa 5:9, 10.

Kine Kikadile Myanda ya Bulopwe bu Miyampe

Yuka’mba Kidishitu Yesu i mupebwe bwendeji pa “bantu bonsololo, ne mizo, ne ndimi” kadi amba bapwani nandi i “bakukabikala panopantanda.” Le penepo, i bāni bakabikalwa na buno Bulopwe? I boba bonso betabija myanda miyampe isapulwa dyalelo. Mu bano babikalwa mubadilwa ne boba bakasangwilwa ku būmi bwa pano panshi ne bakekala na kyepelo kya kumona būmi bwa nyeke.

Bible utela na kawi mbilambila madyese akamona boba bakabikalwa na buno Bulopwe. Talai’po bidi amoamo:

“Watukija mavita ne ku mfulo ya ntanda; utyumunanga buta, ne mukobe nao watempula’o bipindi bibidi; wasōka makalo pa mudilo.”—Mitōto 46:9.

“Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko.”—Isaya 65:21, 22.

“Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:3, 4.

“Penepa kadi meso a bampofu akapūtulwa, ne matwi a babitwi akajikulwa. Ponkapo usunkuta ukatumbuka’nka bwa kasha kalume, ne ludimi lwa kamama lukembanga.”—Isaya 35:5, 6.

“Mwaka wiyako’wa bonso badi mu bibundu bakēvwana diwi dyandi [Yesu]. Ne kutamba bakatambemo, ino boba balongele biyampe bakasanguka ku būmi.”—Yoano 5:28, 29.

“Nanshi bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:11.

Ino i myanda miyampe’po kashā! Ne kadi, bupolofeto bwa mu Bible bufikidile bulombola amba kitatyi kya Bulopwe kutūla’ko bwendeji bwabo boloke pano panshi ponso kibafwena.