Uyini UMbuso KaZimu?

“Iindaba ezimnandi ngombuso . . .”—MATEWU 24:14.

ETJUMAYELWENAKHE Yentabeni edumileko, uJesu wanikela umthandazo osibonelo, kiwo ahlanganisa nesibawo esiya kuZimu esithi: “Umbuso wakho awuze.” Iingidigidi zabantu ziwazi ngehloko umthandazo lo begodu ziwubuyelela kanengi. Ngokwamezwi wenye i-encyclopedia, “mthandazo oyihloko osetjenziswa ngiwo woke amaKrestu ekukhulekeleni okujayelekileko.” Nokho, abanengi abawutjho ngehloko abazi bona uyini uMbuso nokobana uzokwenzani newufikako.—Matewu 6:9, 10.

Akusirari lokho. Abadosiphambili beSingabukrestu banikela iinhlathululo eziphikisanako, ezirarako, nezingazwisisekiko zalokho uMbuso ongikho. Omunye wabo utlola bona uMbuso kaZimu “ungokuthileko okunamandla angaphezu kwawemvelo, . . . okungaphakathi okusihlanganisa noZimu ophilako. . . , ubudlelwano noZimu amadoda nabafazi abafumana iphuluso ngakho.” Omunye uhlathulula ivangeli loMbuso ngokobana “sinqophiso esimalungana nesonto.” Begodu i-Catechism of the Catholic Church ithi: “Umbuso kaZimu kulunga nokuthula nethabo eMoyeni Ocwengileko.”

Uzokufumana ihlathululo ekhanya bha ekhasini-2 lakamagazini lo. Ifundeka bunjesi: “UMbuso kaZimu, okungurhulumende wamambala osezulwini, msinyana uzokuqeda boke ubumbi utjhugulule iphasi libe yiparadeyisi.” Akhe sibone bona iBhayibhili iyisekela njani ihlathululo le.

Ababusi Bangomuso Bephasi Loke

Umbuso ngurhulumende obuswa yikosi. Ikosi yoMbuso kaZimu nguJesu Krestu ovusiweko. Ukubekwa kwakhe esihlalweni sobukhosi kwahluthululwa embonweni owanikelwa umporofidi uDanyela, owatlola wathi: “Ngaragela phambili ngiqalile eembonweni yebusuku, qala lapha! emafwini wezulwini kusiza onjengendodana yomuntu [uJesu]; wanikelwa ilungelo lokungena koMdala Wamalanga [uJehova uZimu], bamtjhideza phambi Kwakhe. Wanikelwa ububusi nesithunzi nombuso, bonyana abantu, iinqhema zeentjhaba neenlimi zoke zimkhonze. Ububusi bakhe buhlala bekube nini nanini abuzokudlula, nombuswakhe awuzukutjhatjalaliswa.”—Danyela 7:13, 14.

Godu incwadi yeBhayibhili kaDanyela itjengisa bona uMbuso lo, uZimu uzowudzimelelisa ngokuqinileko, uzokutjhabalalisa aborhulumende babantu, begodu ngeze utjhatjalaliswe. Isahluko-2 sihlathulula ibhudango eliphefumulelweko lekosi yeBhabhiloni,  eyabona kilo isithombe esikhulu, esijamele ukulandelana kweembuso yephasi. Umporofidi uDanyela wahlathulula bona litjho ukuthini ibhudangwelo. Watlola, “Engcenyeni yamaswaphelo yamalanga, uZimu wezulwini uzokubeka umbuso ongekhe watjhatjalaliswa. Umbuso loyo ngekhe udluliselwe kwabanye abantu. Uzokusila yoke iimbuso le, begodu wona uzokuhlala ngokungapheliko.”—Danyela 2:28, 44.

IKosi yoMbuso kaZimu ayibusi yodwana. Hlangana nekonzwakhe ephasini, uJesu waqinisekisa abapostoli bakhe abathembekileko bona nabo, nabanye, bazokuvuselwa ezulwini bahlale eenhlalweni zobukhosi. (Luka 22:26-30) UJesu bekangatjho iinhlalo zobukhosi zamambala, ngombana watjengisa bona uMbuso uzokuba sezulwini. IBhayibhili ihlathulula ababusa naye njengabavela “kiyo yoke iimndeni, neenlimi, nemakorweni, neentjhabeni.” Bazokuba ‘mbuso, nabapristi bokulotjha uZimu wethu, bayolibusa iphasi.’—ISambulo 5:9, 10.

Okwenza Iindaba ZoMbuso Zibe Mnandi

Tjheja bona uKrestu Jesu unikelwe ukubusa “yoke imindeni, neenlimi, nemakorweni, neentjhabeni” begodu labo ababusa naye “bayolibusa iphasi.” Nokho, bobani abazokubuswa Mbuso lo? Ngilabo abenza ngokuvumelana neendaba ezimnandi ezitjhunyayelwa namhlanjesi. Bazokuhlanganisa nalabo abavuselwe ekuphileni kwephasini abazokuba nethemba lokuphila ngokungapheliko.

IBhayibhili ihlathulula ngokukhanyako iimbusiso ezizokuthatjelwa babantu ngaphasi koMbuso lo. Nanzi ezimbalwa zazo:

‘Uthulisa izipi ephasini lokana; uphokghoza imisubela, atjhuke imikhondo, aphosele amakhande ngemlilweni.’—IRhalani 46:9.

“Ngokuqinisekileko bazokwakha izindlu bahlale kizo; begodu ngokuqinisekileko bazokutjala isimu yamadribe badle iinthelo zayo. Angekhe bakhe kuhlale omunye; ngekhe batjale kudle omunye.”—Isaya 65:21, 22.

“[UZimu] uzobesula zoke iinyembezi emehlweni wabo. Ukufa angekhe kusaba khona, nokulila nobuhlungu ngekhe kusaba khona, ngombana izinto zokuthoma zidlulile.”—ISambulo 21:3, 4.

“Ngesikhatheso amehlo weemphofu azokuvuleka, neendlebe zabangezwako zizokuvuleka. Ngesikhatheso orholopheleko uzokweqa njengeqina, nelimi leemmumu lizokurhuwelela ngethabo.”—Isaya 35:5, 6.

‘Siyeza isikhathi lapha abafileko bazalizwa ilizwi lakhe [uJesu], baphume ngemalibeni wabo: Labo abenza okulungileko, bazavuka baphile; labo abenza okumbi, bazavuka balahlwe.’—Jwanisi 5:28, 29.

“Abathobekileko bazokudla ilifa lephasi, begodu bazokufumana ithabo nokuthula okukhulu.”—IRhalani 37:11.

Lezi ziindaba ezimnandi kwamambala! Ukungezelela kilokho, iimporofido zeBhayibhili ezizalisekileko zitjengisa bona siseduze isikhathi sokobana uMbuso lowo ulethe ukubusa kwawo okulungileko ephasini loke.