Mmušo wa Modimo ke Eng?

“Ditaba tše tše dibotse tša Mmušo . . .”—MATEO 24:14.

THUTONG ya gagwe e tumilego ya Thabeng, Jesu o boletše thapelo ya mohlala, yeo e akaretšago go kgopela Modimo ka gore: “Mmušo wa gago a o tle.” Batho ba dimilione tše sa balegego ba swere thapelo yeo ka hlogo e bile ba e boaboeditše gantši. Saeklopedia e nngwe e re ke “thapelo e kgolo yeo e rapelwago ke Bakriste ka moka borapeding bjo bo tlwaelegilego.” Lega go le bjalo, ba bantši bao ba e rapelago ga ba tsebe seo Mmušo e lego sona goba seo o tlago go se dira ge o etla.—Mateo 6:9, 10.

Seo ga se makatše. Baetapele ba Bojakane ba nea ditlhaloso tšeo di thulanago, tše di gakantšhago le tšeo di raraganego mabapi le seo Mmušo e lego sona. Monna yo mongwe o ngwala gore Mmušo wa Modimo ke “selo seo se phagametšego tlhago, . . . go ba le kgokagano ya ka gare le Modimo yo a phelago . . . , go tlwaelana le Modimo moo go dirago gore banna le basadi ba phološwe.” Yo mongwe yena o hlalosa ebangedi ya Mmušo e le “thuto ya mabapi le kereke.” Catechism of the Catholic Church yona e re: “Mmušo wa Modimo ke toko le khutšo le lethabo ka Moya o Mokgethwa.”

O tla hwetša tlhaloso e kwagalago kutšwanyana go letlakala 2 la makasine wo. E balega ka gore: “Mmušo wa Modimo, wo e lego pušo ya kgonthe ya legodimong, o tla tloga o fediša bokgopo ka moka le go fetoša lefase gore e be paradeise.” A re boneng kamoo Beibele e thekgago kwešišo yeo.

Babuši ba ka Moso ba Lefase ka Moka

Mmušo ke pušo yeo e nago le kgoši. Kgoši ya Mmušo wa Modimo ke Jesu Kriste yo a tsošitšwego. Go bewa ga gagwe sedulong sa bogoši legodimong go hlalositšwe ponong yeo e neilwego moporofeta Daniele, yo a ngwadilego gore: “Ka fela ke lebeletše diponong tšeo tša bošego gomme ka bona motho yo mongwe yo e kego ke morwa wa motho [Jesu] a etla ka maru a magodimo; a dumelelwa gore a tsene mo go lego Motala wa Mabaka [Jehofa Modimo], ba mmatametša kgauswi le Yena yoo. A newa pušo, seriti le mmušo, gore batho ba merafo, ditšhaba le maleme ka moka ba mo hlankele. Pušo ya gagwe ke ya neng le neng, yeo e ka se kego ya fedišwa gomme mmušo wa gagwe ke wo o ka se kego wa senywa.”—Daniele 7:13, 14.

Puku ya Beibele ya Daniele gape e bontšha gore Mmušo o tla hlongwa ka go tia ke Modimo, gore o tla fediša mebušo ka moka ya batho, le gore o ka se ke wa fedišwa le ka mohla. Kgaolo 2 e hlalosa toro e buduletšwego yeo e  ilego ya lorwa ke kgoši ya Babilona, yeo go yona a bonego sehlwaseeme seo se swantšhetšago tlhatlamano ya mebušo ya lefase. Moporofeta Daniele o ile a hlalosa toro yeo. O ngwadile gore: “Mehleng ya bofelo . . . Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.”—Daniele 2:28, 44.

Kgoši ya Mmušo wa Modimo ga e buše e nnoši. Nakong ya bodiredi bja gagwe bja lefaseng, Jesu o ile a kgonthišetša baapostola ba gagwe ba botegago gore bona, gotee le ba bangwe, ba tla tsošetšwa legodimong gomme ba dula didulong tša bogoši. (Luka 22:28-30) O be a sa bolele ka didulo tše di tlwaelegilego ka gobane, bjalo ka ge Jesu a bontšhitše, Mmušo o tla ba legodimong. Beibele e hlalosa babušigotee ba e le bao ba tšwago “molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe.” Ba tla ba “mmušo le baperisita ba Modimo wa rena gomme ba tla buša e le dikgoši godimo ga lefase.”—Kutollo 5:9, 10.

Lebaka Leo ka Lona Ditaba tša Mmušo e Lego tše Dibotse

Ela hloko gore Kriste Jesu o filwe bogoši gore a buše “batho ba merafo, ditšhaba le maleme ka moka” le gore bao ba tlago go buša le yena ba tla “buša e le dikgoši godimo ga lefase.” Bjale, ke bomang bao e tlago go ba balata ba Mmušo wo? Ke bao ba arabelago gabotse ditabeng tše dibotse tšeo di bolelwago lehono. Balata bao gape ba akaretša bao ba tlago go tsošetšwa bophelong mo lefaseng le bao ba tlago go ba le tebelelo ya go phela ka mo go sa felego.

Beibele e hlalosa gabotse ditšhegofatšo tšeo batho ba tlago go ba le tšona ka tlase ga Mmušo. Tše ke tše sego kae tša tšona:

“O fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.”—Psalme 46:9.

“Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele.”—Jesaya 65:21, 22.

“[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

“Mohlang woo mahlo a difofu a tla buduloga gomme ditsebe tša difoa di tla thibologa. Mohlang woo sehlotša se tlo taboga bjalo ka kgama gomme leleme la semumu le tlo goelela ka lethabo.”—Jesaya 35:5, 6.

“Nako e a tla yeo ka yona bohle bao ba lego mabitleng ba tlago go kwa lentšu la gagwe [la Jesu] gomme ba tšwa, bao ba dirilego dilo tše dibotse ba tla tsogela bophelong.”—Johane 5:28, 29.

“Ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:11.

Tšeo ruri ke ditaba tše dibotse! Go oketša moo, diporofeto tša Beibele tšeo di phethagetšego di bontšha gore nako ya gore Mmušo o hlome pušo ya wona ya toko lefaseng ka bophara e batametše.