Ouhamba wa Huku Oityi?

“Onondaka ombu onongwa mbouhamba . . . ”—MATEUS 24:14.

MELONGOMONA liae lio Komphunda, Jesus waava elikuambelo, muna muakutikinya okuita ku Huku okuti: “Ouhamba wove uye.” Ovanthu ovanyingi vakoneka elikuambelo olio nokulipalakaununa apeho. Omukanda umwe wati, “olio elikuambelo lilingwa vali no Vakristau aveho mefendelo.” Anthi, ovanyingi valinga elikuambelo olio, kavei oityi Ouhamba wa Huku ine oityi maulingi tyina wameya.—Mateus 6:9, 10.

Otyo katyihuvisa. Ononkhalamutwe mbo Vakristau vomouye vahangununa Ouhamba wa Huku mononkhalelo mbelikalaila nokuepuiya mbunguanguanesa ovanthu. Umwe wahoneka okuti Ouhamba wa Huku “otyipuka tyimwe tyihamoneka, . . . tyikahi kumwe na Huku womuenyo . . . , tyina Huku ekahi nokuundapesa opo ovalume novakai vamone eyovo.” Omukuavo wahangununa o evandyeliu Youhamba wa Huku okuti, “elongeso konthele yongeleya.” Iya Okatekesi kongeleya yo Katolika kati: “Ouhamba wa Huku ouviuki, nombembwa, nehambu Mospilitu Sandu.”

Ove movasi ehangununo liayandyuluka vali nawa pefo lia 2 liomukanda uno. Tutangapo okuti: “Ouhamba wa Huku, outumini wotyotyili ukahi keulu, maukaeta apa katutu onthyulilo yovivi aviho nokupilulula oohi ino omphangu yombembwa.” Tutalei oñgeni Ombimbiliya iyakulila enoñgonoko olio.

Ovatumini Mavakatumina Oohi Aiho Komutwe

Ouhamba, outumini wendesua nohamba. Ohamba Youhamba wa Huku, omututiliswa Jesus Kristu. Okuvialekwa kwae keulu, kuapopiwa memonekelo liapelwe omuuli Daniele, wahoneka okuti: “Ame natualako okutala momamonekelo ange o kounthiki, iya andyimono omunthu uya nomakaka o keulu, ukahi ngomona womulume [Jesus]. Iya oe weya alo Pomukulu Wononthiki, [Jeova Huku], avemuhikiya ponthele Yae. Iya apewa outumini, nounene, nouhamba, opo ovanthu aveho, novilongo, nomalaka vemuumbile. Outumini wae, maukatualako apeho, kamaukapwa, iya ouhamba wae, kamaukanyonwa.”—Daniel 7:13, 14.

Omukanda wa Daniele mo Mbimbiliya, tupu ulekesa okuti Ouhamba maukapumphikwa nawa na Huku, opo ukanyimeko omautumini ovanthu aveho, iya ouhamba oo kaukahanyuako nalumwe. Okapitulu ka 2 kapopia ondyoi imwe ohamba yo Mbambilonia alotele, iya amono otyilolo otyinene, otyilekeso tyomautumini ouye  maekelipinga koutumini. Omuuli Daniele wahangununa ondyoi oyo. Oe wahoneka okuti: “Konthyulilo yononthiki, Huku yo keulu makavialeka Ouhamba umwe kamaukahanyuako nalumwe. Ouhamba oo kamaukapita pomaoko elongo ekuavo. Maukahanyako omautumini atyo aeho nokuenyimako. Iya ouhamba watyo oo, ngao ukakalako apeho.”—Daniel 2:28, 44.

Ohamba Youhamba wa Huku kamatumina aike. Mokueenda kuovilinga viae viokuivisa pano pohi, Jesus walaele ono apostolu mbae vekolelo okuti navo, navakuavo vali, mavatutiliswa avaende keulu avakapumphama kovipundi vioutumini. (Lucas 22:28-30) Oe ankho kapopi ovipundi vimoneka, mokonda Jesus walekesa okuti Ouhamba wa Huku maukala keulu. Ombimbiliya ipopia vana mavakatumina na Jesus okuti “vatunda momihoko, no momalaka, no movanthu, no momalongo.” Mavakakala “ouhamba novanakwa pala Huku yetu, opo vakatumine ngo nohamba kombanda yoohi.”—Revelação [Apocalipse] 5:9, 10.

Onondaka Mbouhamba wa Huku Onongwa Mokonda Yatyi

Tala okuti Kristu Jesus wapeua outumini wokutumina ‘ovanthu aveho, nomalongo, nomalaka.’ Iya vana makaundapa navo mavakakala onohamba ‘avakatumina kombanda yoohi.’ Iya ovalie mavakatuminwa Nouhamba oo? Ovanthu vana vetavela onondaka onongwa mbukahi nokuiviswa hono. Povanthu ovo, pakutikinya vana mavakatutiliswa pala omuenyo kombanda yoohi, nekevelo liomuenyo waapeho.

Ombimbiliya ipopia neyandyuluko ouwa ovanthu mavakakala nao Mouhamba wa Huku. Ouwa umwe oyou:

“Huku makamanako ovita alo kuna kuaoyela oohi. Uhanya ononkhondyi nokutetateta omaonga. Omatemba ovita weepaka otupia.”—Salmo 46:9.

“Tyotyili, mavakatunga onondyuo avakalamo, mavakatuika omiti avakalia ovinyango viavio. Kavakatunga iya mukuavo ngae ukakalamo, kamavakatuika iya mukuavo ngae ukalia.”—Isaías 65:21, 22.

“[Huku] makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:3, 4.

“Pomuvo watyo oo, omaiho ovamphoki maakapatuluka, omakutui onompholo maakahituluka. Pomuvo watyo oo, otyilema matyikalombauka ngombambi, elaka liotyihita mulungu malikaimba nokukwilila nehambu.”—Isaías 35:5, 6.

“Oola ikahi nokuya tyina aveho vekahi momalangalo mavekeiva ondaka yae [Jesus], iya avatundumo, vana valinga ovipuka oviwa, pala etutilo liomuenyo.”—João 5:28, 29.

“Ovatendi mavakapiñgana oohi, iya avakakala nombembwa onene.”—Salmo 37:11.

Onondaka ombo tyotyili onongwa! Okuyawisako, omaulo Ombimbiliya afuiswapo, alekesa okuti omuvo Ouhamba mauhimbika okutumina nouviuki kombanda yoohi aiho ukahi popepi.