Duzu A Le Nyamenle Belemgbunlililɛ Ne?

‘Edwɛkpa ɛhye mɔɔ fane Belemgbunlililɛ ne anwo la . . .’—MATEYU 24:14.

WƆ GYISƐSE Boka Zo Ɛdendɛlɛ ne mɔɔ ɛlie duma la anu, ɔhanle ye wɔ asɔneyɛlɛ nwo neazo ne anu kɛ yɛzɛlɛ Nyamenle kɛ: “Wɔ belemgbunlililɛ ɛrɛla.” Menli dɔɔnwo ze nzɛlɛlɛ ɛhye kpalɛ yɛɛ bɛta bɛka. Encyclopedia bie ka kɛ ɔle “nzɛlɛlɛ titile mɔɔ Keleseɛnema kɔsɔɔti fa di gyima wɔ ɛzonlenlɛ nu a.” Noko akee, menli mɔɔ ka la anu dɔɔnwo ɛnze mɔɔ Belemgbunlililɛ ne kile anzɛɛ mɔɔ ɔba a ɔbayɛ la.—Mateyu 6:9, 10.

Ɔnyɛ azibɛnwo. Ɔboalekɛ edwɛkɛ mɔɔ Keleseɛnemaanle ne adekilevoma ka ye wɔ Belemgbunlililɛ ne anwo la abo ɛdelɛ yɛ se yɛɛ asolo mɔɔ biala ka a. Nrenya ko hɛlɛle kɛ Nyamenle Belemgbunlililɛ ne le ‘debie mɔɔ vi anwuma mɔɔ maa menli kola nee Nyamenle di ngitanwo wɔ sunsum nu na bɛdua zo bɛnyia ngoane a.’ Ko noko kile kɛ Belemgbunlililɛ ne anwo edwɛkpa ne le “asɔne ne anwo adehilelɛ.”

Ɛbanwu mɔɔ Belemgbunlililɛ ne kile la anwo ngilenu kpalɛ wɔ magazine ɛhye mukelɛ 2 ne. Ɔkenga kɛ: “Nyamenle Belemgbunlililɛ ne le arane mɔɔ wɔ anwuma na ɔnrɛhyɛ ɔbaye ɛtane kɔsɔɔti yeavi ɛkɛ na yeamaa azɛlɛ ne ahakyi paladaese.” Maa yɛnlea kɛzi Baebolo ne di boa ndelebɛbo ɛhye la.

Arelemgbunli Mɔɔ Bazie Azɛlɛ Ne Kenlebie

Belemgbunlililɛ le arane mɔɔ belemgbunli a nea zo a. Nyamenle Belemgbunlililɛ ne azo Belemgbunli a le Gyisɛse Kelaese mɔɔ bɛdwazo ye bɛvi ewule nu la. Bɛha mekɛ mɔɔ bɛvale ye bɛziele belemgbunli wɔ anwuma la anwo edwɛkɛ wɔ ɛnyelɛzodeɛnwunlɛ bie mɔɔ ngapezonli Daneɛle nwunle ye la anu: “Wɔ nɔe ne ɛnyelɛzodeɛnwunlɛ ne anu, menwunle debie bie mɔɔ zɔho sonla ra la [Gyisɛse] kɛ ɔlua amungu nu ɔlɛba, na ɔrale Tetenli ne [Gyihova Nyamenle] anyunlu na bɛvale ye bɛhilele ye. Bɛmanle ye ebialilɛ tumi, anyunlunyia, yɛɛ enililɛ, amaa aleɛabo maanle maanle mɔɔ ka aneɛ ngakyile la azonle ye. Ye belemgbunlililɛ ne ɛnlɛ awieleɛ, ɔnrɛpɛ nu ɔnrɛze ɛlɛ yɛɛ awie ɛnrɛhola ye sɛkye.”—Daneɛle 7:13, 14.

Daneɛle buluku ne mɔɔ wɔ Baebolo ne anu la eza kile kɛ Nyamenle bamaa Belemgbunlililɛ ne adɛnla ɛkɛ dahuu. Ɔbaye menli arane kɔsɔɔti ɛkɛ noko yemɔ awie ɛnrɛhola ye  sɛkye ɛlɛ. Tile 2 ne ka ɛlalɛ bie mɔɔ Nyamenle manle Babelɔn belemgbunli ne hanle la anwo edwɛkɛ. Ɔnwunle ananze kpole bie mɔɔ gyi ɛkɛ maa ewiade tumililɛ mɔɔ badoɔdoa zo ara la wɔ ɛlalɛ ne anu. Ngapezonli Daneɛle hilele ɛlalɛ ne abo. Ɔhɛlɛle kɛ wɔ “mekɛ mɔɔ li amozi la anu” anwuma “Nyamenle ne bava belemgbunlililɛ bie azie ɛkɛ mɔɔ bɛnrɛzɛkye ye ɛlɛ a. Na bɛnrɛva belemgbunlililɛ ne bɛnrɛmaa maanle fofolɛ biala. Ɔbazɛkye arelemgbunlililɛ ɛhye mɔ amuala bɔkɔɔ, na yemɔ ɔbadɛnla ɛkɛ ne dahuu.”—Daneɛle 2:28, 44, NW.

Awie mɔ baboka Nyamenle Belemgbunlililɛ ne azo Belemgbunli ne anwo bali tumi. Mekɛ mɔɔ Gyisɛse yɛ ye azɛlɛ ye azo gyima ne la, ɔbɔle ye ɛzoanvolɛ nɔhavoma ne ɛwɔkɛ kɛ bɛbadwazo bɛ nee awie mɔ bahɔ anwuma na bɛbadɛnlɛdɛnla arelemgbunli mbia zo. (Luku 22:28-30) Tɛ azɛlɛ ye azo mbia ɛlilɛ nwo edwɛkɛ yɛɛ ɛnee Gyisɛse ɛlɛka a, ɔluakɛ ɔhilele nu kɛ Belemgbunlililɛ ne wɔ anwuma. Baebolo ne ka zɛhae menli ne mɔɔ bɛ nee ye bali ebia ne la anwo edwɛkɛ kɛ bɛvi “abusua ekpunli, aneɛ nee maanle ngakyile kɔsɔɔti anu.” Bɛbayɛ “arelemgbunli nee Nyamenle sɛlɛvolɛma na bɛbali arelemgbunli wɔ azɛlɛ ye azo.”—Yekile 5:9, 10.

Deɛmɔti Belemgbunlililɛ Edwɛkɛ Ne Le Edwɛkpa La

Yɛ ye nzonlɛ kɛ bɛmaa Kelaese Gyisɛse tumi wɔ “aleɛabo maanle maanle mɔɔ ka aneɛ ngakyile la” kɔsɔɔti azo. Ɔ nee menli mɔɔ bɛboka ɔ nwo la bɛayɛ “arelemgbunli wɔ azɛlɛ ye azo.” Na nwane mɔ a bayɛ Belemgbunlililɛ ne maanlema a? Bɛdabɛ mɔɔ bɛtie edwɛkpa ne mɔɔ bɛlɛka ye ɛnɛ la ɔ. Menli mɔɔ bɛbadwazo bɛ bɛara ngoane nu wɔ azɛlɛ ye azo na bɛlɛ anyelazo kɛ bɛbadɛnla aze dahuu la bɛaboka ye maanlema ne anwo.

Baebolo ne ka nyilalɛ ngakyile mɔɔ menli banyia ye wɔ Belemgbunlililɛ ne abo la anwo edwɛkɛ dɔɔnwo. Nuhua ekyi bie ɛne:

“Ɔmaa bɛgyakyi konle wɔ azɛlɛ ye amuala azo; ɔbubu ɛda nee atwɛ ne mɔ, ɔfa senle ɔyela konle ehwili ne mɔ!”—Edwɛndolɛ 46:9.

“Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali.”—Ayezaya 65:21, 22.

“[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:3, 4.

“Anyenzinlirama anye badukue, anzondilirama anzo badukue. Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.”—Ayezaya 35:5, 6.

“Mekɛ ɛlɛba mɔɔ mɔwuamra amuala bade [Gyisɛse ane] wɔ bɛ nla ne mɔ anu, na bɛvi bɛ nla ne mɔ anu bɛbavinde: bɛdabɛ mɔɔ bɛlile boɛ la badwazo na bɛanyia ngoane mɔɔ ɛnlɛ awieleɛ.”—Dwɔn 5:28, 29.

“Bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:11.

Ɛhye le edwɛkpa amgba! Bieko, Baebolo ngapezo mɔɔ ɛra nu la kile kɛ ɔnrɛhyɛ Belemgbunlililɛ ne bamaa ye tenlene tumililɛ ne ara azɛlɛ ye kɔsɔɔti azo.